Read Kpelle Nɔŋba 24 Bible Online

Nɔŋba 24 - Kpelle bible

Nɔŋba 24

¹Tãi Bâlaŋ è nâa gɔ̀lɔŋ la a gɛɛ gáa a Yâwɛɛ nîa-mɛni a gɛɛ é lûwa láa Eezuɛ-ŋai diai, vé ŋɔ́nɔ ŋɛi-kɛ-ma-sãa kɔ́ri-ni yɛ̂ɛ berei è gɛ̀ la a bɔlɔi, kɛ́lɛ è tìnaŋ vɛ̃ɛ-kpâlaŋ pɔ́ naa-pere.

²Nàa ƃé è Eezuɛ-ŋai kàa naa díƃûu-ŋai púɔɔ dísuu ma tɛi-tɛi. Yâwɛɛ ŋɔmɔ̂leŋ è pà bɔ́,

³gɛ́ ŋ̀óo-ŋai ŋí ƃò. “Beo ǹóŋ Bâlaŋ wóo-ŋa ká ŋí. Ǹúui a kwaa kâai ŋ̀óo ká ŋí,

⁴Ǹúui a Ɣâla wóo mɛ̀ni Ŋá zĩa kàa a ŋá kwaa káa ŋɛ́i Zĩai nyii kula Ŋ̀wála-wâla kélee Ɣalai yêei.

⁵Óo Eezuɛ, ŋɔƃûu-ŋai lɛ̂lɛɛi,

⁶Díkaa yɛ̂ɛ diŋ-tiŋ su-kɛ́tɛ gɛ̀ lì kwaa kôya-mà. Díkaa yɛ̂ɛ sûa-ŋa nyii gáa yá kɔlɛi. Yɛ̂ɛ wúru kuŋ nɛ̃ɛ nyii Yâwɛɛ è zìi. Kpaa máŋ yɛ̂ɛ sîda wuru nyii dɔɔ̂i yá kɔlɛi.

⁷Tuna támaa a pâi pûi dílɔii su Da pâi ŋɔsí-sɛŋ sîi yá-lɔii ma. Díkâloŋ ŋɔkâloŋ-laai a pâi kɛ̂i a gɛtɛ tɛ́ɛ Aga Ŋɔkâloŋ-laa a pâi kɛ̂i a zu kɛ́tɛ.

⁸Ɣâla è díkùla Ize lɔii su, Gɛ́ kɔ̀ dímɛni ma yɛ̂ɛ tou-sirɛ. Eezuɛ a ŋɔkpɔara-ƃelai su karâi, É díkao ɣále-ɣale é díŋɔtɔ̃a-ŋai kara.

⁹Eezuɛ káa yɛ̂ɛ yala-sulu wála-walaa. A kɛ̀ nyîi, núu da fé naa é lɛ́ɣɛ mà. Ǹúui a lûwa làa Eezuɛ mai lûwa káa mà. Ǹúui a Eezuɛ fooi, foo-woo a pâi kɛ̂i maa ǹúui ma.”

¹⁰Nya ƃe Bâla líi è ŋwàna Bâlaŋ ma é ǹyée ŋá túa, ǹyɛɛ mai, “Ŋá ítòli a gɛɛ í ŋákpɔara-ƃelai fóo. Kɛ́lɛ gáa ƃa lûwa láa dîa gîei saaƃa.

¹¹Mɛni ma kula ƃɛ́ í lí pôlu ípɔ-naa. Ŋá ŋ́gono tée íyêei a gɛɛ ŋa pâi íbɛlɛ seêi, kɛ́lɛ Yâwɛɛ fé fáa ní ma.”

¹²Bâlaŋ è ŋ̀óo su tòo ǹyɛɛ mai, “Ŋá mò íkela-ŋai dîa,

¹³a gɛɛ a nɛ̃ɛ ma kpîŋ í ípɛrɛi láa fɛ́ɛ a káne da gôo í dɛɛ ḿbɔ, fa pɔ̂ri Yâwɛɛ wóo pilîi a dɔnɔ kpîŋ. Mɛnii nɔ́ Yâwɛɛ a pâi môi ḿâi, ǹyaa nɔ́ ƃé ŋa pâi gɛ̂i.”

¹⁴Gáa, ŋa pâi liî pôlu ŋánûai pɔ́ naa kɛ́lɛ ŋá lɛ́ɛ pâi liî pôlu, ŋa pâi mɛnii lɛ̂i yâ Eezuɛ-ŋai da pâi gɛ̂i a ínûai tínaa-tuɛ-perei.

¹⁵Nya ƃe è ŋ̀óo-ŋai ŋí ƃò ǹyɛɛi, “Bêɔ ǹóŋ Bâlaŋ wóo ká ŋí. Ǹúui a kwaa kâa a ǹɛ́lɛɛi ŋ̀óo ká ŋí.

¹⁶Ǹúui a m̀ɛnii mɛ̂ni Ɣâla a mòi, è dárei kɔ́lɔŋ a kûla Ŋ̀wála-wâla kélee Ɣalai yêei. Ŋá zĩa kàa a ŋákwaa káa ŋɛ́i. Zĩai nyii kula Ŋ̀wála-wâla kélee Ɣalai yêei

¹⁷Ŋa tinaa-tuɛ pere kàa, ǹya ƃe ŋá Eezuɛ lɔii kâa. Kâloŋ tɔnɔ a pâi kulâi dílɔii su gɛ́ fòlo yɛ̂ɛ pɛmɛlɛŋ-kao. Kâloŋ-wuru a pâi kulâi Eezuɛ. A pâi Môa-ŋai tuɛ-ƃelai su karâi. É Sɛ̂ ŋɔsuui su-ƃelai kélee yée mɛi ɣále.

¹⁸A pâi ŋɔkpɔara-ƃelai yée mɛi ɣalêi Idɔŋ. É dílɔii kɛ́ a gɔ̂liŋ. A pâi kɛ̂i nɔ́ a ŋwala-walaa.

¹⁹Eezuɛ lɔii a pâi kɛ̂i ŋɔkpɔara-ƃelai mɛi, ǹyaŋ a pâi diai lɛɛ a dífului yée mɛi ɣâlei dítaa-lee-ŋai su.”

²⁰Tãi Bâlaŋ è Amɛlɛka-ŋai kàa la zĩai sui è ŋ̀óo-ŋai ŋí ƃò ǹyɛɛi, “Amɛlɛka-ŋai dílɔii ƃé kɛ̀ a ǹɔii maa-ŋuŋ, kɛ́lɛ dísu a pâi pûi a tãi gbɛɛ-ŋa wɔlɔ-wɔlɔ da wɔlɔ-wɔlɔ.”

²¹Tãi è Kɛŋ-ŋai kàa la zĩai sui, è ŋ̀óo-ŋai ŋí ƃò ǹyɛɛi, “Berei máŋ Kataai tɔɔ̂i lɛ̂lɛɛi lai, berei máŋ kápɛrɛ-ŋai tɔɔ̂i la kɔni-wolo sui,

²²É máŋ kɛ́ tí, Asiria-ŋai da pâi káai a Kɛŋ-ŋai káyee mɛi ɣâlei Asiria a pâi ká kɛ́ a kɔ-soŋ-ŋa.”

²³Bâlaŋ è ŋɔ́nɔ zĩai-su wóo-ŋai ŋí ƃò ǹyɛɛi, “Gbɛ̂ɛ ƃé pâi lɛ̂ɛi ɣele mâ tãi Ɣâla a pâi nyiŋi kɛ̂i lai?

²⁴Ǹûai da pâi kulâi Kitiŋ lɔii su Da pâi Asiria-ŋai da Ɛƃɛ-ŋai yée-mɛi ɣâlei. Kɛ́lɛ dia máŋ da pâi sâai wɔlɔ-wɔlɔ da wɔlɔ-wɔlɔ.”

²⁵Nya ƃe Bâlaŋ è mù sìɣe é lí bɔ́ taai. Bâla máŋ è lì bɔ́ naa pere.