Read Kpelle Nɔŋba 26 Bible Online

Nɔŋba 26 - Kpelle bible

Nɔŋba 26

¹Tãi zaa-kɔlɔ-felai è tɛ̀ɛ lai, Yâwɛɛ è mò Mose da zâla laa soŋ-nuui Eelɔŋ ǹóŋ Ilieza mà ǹyɛɛi,

²“Ka Eezuɛ-ŋai kélee lóno dísuu ma, ká nyii-ŋai lóno máŋ díkoraŋ káa é síɣe kóraŋ buu feerɛ ma é tɛ́ tuɛ-pere, nyii-ŋai da pɔ̂ri kɔ́ kɔ̂i.”

³Nya ƃe Mose da zâla láa-soŋ-nuu kɛ́tɛi Ilieza dí lòno ǹûai pɔ́ Môa Fɛ̃ɛ-kpalaŋ su Zɔdiŋ Ya-leei pôlu Zɛleko téniŋ ma dîyɛɛ diai,

⁴“Ka ǹûai lóno nyii-ŋai díkoraŋ káa é síɣe kóraŋ buu feerɛ ma é tɛ́ tuɛ-pere yɛ̂ɛ berei Yâwɛɛ è mò la Mose mai.” Eezuɛ-ŋai kùla Ize lɔii sui, dia ká ŋí:

⁵Lubiŋ, nyii kɛ̀ a Eezuɛ ǹóŋ maa-ŋuŋ, ǹônii-sinaai da dísuui su-ƃela ká ŋí. Anɔ da ŋɔnûai, Palu da ŋɔnûai,

⁶Ɛzɔrɔŋ da ŋɔnûai, é pɛ́lɛ Kami da ŋɔnûai dîa.

⁷Lubiŋ ŋɔsuui su-ƃelai ká ŋí nyii-ŋai díkaa a núu wála buu náaŋ káo saaƃa pôlu ŋuŋ lɔ́ɔlu mɛi feerɛ pôlu buu saaƃai (43,730).

⁸Palu ŋɔsuui su-ƃelai ká ŋí. Ilia

⁹da ǹônii-sinaai Nɛmuɛ, Dataŋ da Abiraŋ. Dataŋ ŋí da Abiraŋ ƃé Eezuɛ-ŋai dí dílɛ̀, nyii-ŋai tɔ̀ɔ Mose da Eelɔŋ diai. Ǹûai ŋí da Koa é pɛ́lɛ ŋɔnûai dîa dí tɔ̀ɔ máŋ Yâwɛɛ ma.

¹⁰Nya ƃe ǹɔii lá è ƃò é díkpele é pɛ́lɛ Koa ma da ŋɔnûai kélee. Ŋɔŋ è kùla Yâwɛɛ yêei é núu ŋuŋ feerɛ pôlu buu lɔ́ɔlu (250) kéreŋ. Ǹyaŋ nyíŋi è kɛ̀ a lia-woo ǹûai mɛni ma.

¹¹Kɛ́lɛ Koa ǹônii-sinaai dífe saa ní.

¹²Simiɔŋ ǹônii-sinaai ká ŋí yɛ̂ɛ berei dísuu-ŋai díkaa lai. Nɛmuɛ da ŋɔnûai, Zamiŋ da ŋɔnûai, Zakiŋ da ŋɔnûai,

¹³Zela da ŋɔnûai é pɛ́lɛ Sau ma da ŋɔnûai.

¹⁴Simiɔŋ ŋɔsuui su-ƃelai ká ŋí nyii-ŋai díkaa a núu wála buu feerɛ káo feerɛ pôlu ŋuŋ feerɛi (22,200).

¹⁵Gâa ǹônii-sinaai ká ŋí yɛ̂ɛ berei dísuu-ŋai díkaa lai. Zefɔŋ da ŋɔnûai, Agii da ŋɔnûai, Suni da ŋɔnûai,

¹⁶Oni da ŋɔnûai, Iri da ŋɔnûai,

¹⁷Alo da ŋɔnûai é pɛ́lɛ Areli ma da ŋɔnûai.

¹⁸Gâa ŋɔsuui su-ƃelai díkaa a núu wála buu náaŋ pôlu ŋuŋ lɔ́ɔlu (40,500).

¹⁹Zuda ǹônii-sinaai ƃé kɛ̀ a Sila, Pɛrɛ, Zera, Ɛzɔŋ, da Amuɛ. (Zuda ǹônii veerɛi Ɛ̂ɛ da Onaŋ dí sàa Keena lɔii su.)

²⁰Zuda ŋɔsuui su-ƃelai ká ŋí. Sêla da ŋɔnûai, Pêle da ŋɔnûai, é pɛ́lɛ Zêla ma da ŋɔnûai.

²¹Pêle ǹônii-sinaa ƃé kɛ̀ a Ezɔrɔŋ da ŋɔnûai, é pɛ́lɛ Amuu ma da ŋɔnûai.

²²Zuda ŋɔsuui su-ƃelai dí kɛ̀ a núu wála buu lɔ́ɔlu mɛi feerɛ káo lɔ́ɔlu mɛi da pôlu ŋuŋ lɔ́ɔlu (76,500).

²³Isaka ǹônii-sinaai ká ŋí yɛ̂ɛ berei dísuu-ŋai díkaa lai. Tola da ŋɔnûai, Pua da ŋɔnûai,

²⁴Zasu da ŋɔnûai, é pɛ́lɛ Similɔŋ ma da ŋɔnûai.

²⁵Isaka ŋɔsuui su-ƃelai ká ŋí nyii-ŋai kɛ̀ a núu wála buu lɔ́ɔlu mɛi da káo náaŋ pôlu ŋuŋ saaƃai (64,300).

²⁶Zɛbulɔŋ ǹônii-sinaai ká ŋí yɛ̂ɛ berei dísuu-ŋai díkaa lai. Sêre da ŋɔnûai, Ilɔŋ da ŋɔnûai é pɛ́lɛ Zalɛɛ ma da ŋɔnûai.

²⁷Zɛbulɔŋ ŋɔsuui su-ƃelai dí kɛ̀ a núu wála buu lɔ́ɔlu mɛi da pôlu ŋuŋ lɔ́ɔlu (60,500).

²⁸Zosɛ ǹônii-sinaai ká ŋí yɛ̂ɛ berei dísuu-ŋai díkaa lai. Manasɛ da Ifiraŋ.

²⁹Manasɛ ǹônii-sinaai ká ŋí. Makii da ŋɔnûai é pɛ́lɛ Gilia ma da ŋɔnûai. Makii è kɛ̀ a Gilia ǹâŋ.

³⁰Gilia ǹônii-sinaai ká ŋí. Iyeezɛ da ŋɔnûai, Ele da ŋɔnûai,

³¹Asie da ŋɔnûai, Sɛkɛŋ da ŋɔnûai,

³²Semida da ŋɔnûai é pɛ́lɛ Ɛfɛ ma da ŋɔnûai.

³³Ɛfɛ ǹóŋ Zɛlofɛya fé lóŋ-surɔ̂ŋ káa ní fɛ̂ɛ lônii-nɛyaa. Ǹônii-nɛyãai láa ƃé kɛ̀ a Mala, Nôa, Ola, da Maka é pɛ́lɛ Taza ma.

³⁴Manasɛ ŋɔsuui su-ƃelai ká ŋí nyii-ŋai kɛ̀ a núu wála buu lɔ́ɔlu káo feerɛ pôlu ŋuŋ lɔ́ɔlu mɛi feerɛi (52,700).

³⁵Ifiraŋ ǹônii-sinaai ká ŋí yɛ̂ɛ berei dísuu-ŋai káa lai. Sutela da ŋɔnûai, Bɛka da ŋɔnûai é pɛ́lɛ Tâɣaŋ ma da ŋɔnûai.

³⁶Sutela ǹóŋ-surɔ̂ŋ ká ŋí. Elaŋ da ŋɔnûai,

³⁷Ifiraŋ ǹônii-sinaai dísuui su-ƃelai ká ŋí nyii-ŋai kɛ̀ a núu wála buu saaƃa káo feerɛ pôlu ŋuŋ lɔ́ɔlu (32,500). Zosɛ ǹônii-sinaai ká ŋí yɛ̂ɛ berei dísu-ŋai díkaa lai.

³⁸Bɛŋsima ǹônii-sinaai ká ŋí yɛ̂ɛ berei dísuu-ŋai díkaa lai. Bela da ŋɔnûai, Asiƃɛ da ŋɔnûai, Airaŋ da ŋɔnûai,

³⁹Sɛfufaŋ da ŋɔnûai é pɛ́lɛ Ufaŋ ma da ŋɔnûai.

⁴⁰Bela ǹônii-sinaai ká ŋí. Âa da ŋɔnûai é pɛlɛ Namaŋ ma da ŋɔnûai.

⁴¹Bɛŋsima ǹônii-sinaai dísuu su-ƃelai ká ŋí nyii-ŋai kɛ̀ a núu wála buu náaŋ káo lɔ́ɔlu pôlu ŋuŋ lɔ́ɔlu mɛi da (45,600).

⁴²Daŋ ǹônii-sinaai ká ŋí yɛ̂ɛ berei dísuu-ŋai díkaa lai. Suaŋ da ŋɔnûai.

⁴³Suaŋ ǹônii-sinaai dísuui su-ƃelai ká ŋí nyii-ŋai kɛ̀ a núu wála buu lɔ́ɔlu mɛi da káo náaŋ pôlu ŋuŋ náaŋ (64,400).

⁴⁴Asɛ ǹônii-sinaai dísuui su-ƃelai ká ŋí yɛ̂ɛ berei dísuu-ŋai díkaa lai. Imina da ŋɔnûai, Isii da ŋɔnûai, é pɛ́lɛ Belia ma da ŋɔnûai.

⁴⁵Belia ǹônii-sinaai ká ŋí. Ɛbɛ da ŋɔnûai é pɛ́lɛ Makiɛ ma da ŋɔnûai.

⁴⁶Asɛ ǹóŋ-nɛnii láa ƃé kɛ̀ a Seela.

⁴⁷Asɛ ǹônii-sinaai dísuui su-ƃelai ká ŋí nyii-ŋai kɛ̀ a núu wála buu lɔ́ɔlu káo saaƃa pôlu ŋuŋ náaŋ (53,400).

⁴⁸Nɛfɛtɛli ǹônii-sinaai ká ŋí yɛ̂ɛ berei dísuu-ŋai díkaa lai. Zazɛɛ da ŋɔnûai, Guni da ŋɔnûai,

⁴⁹Zezɛ da ŋɔnûai é pɛ́lɛ Silɛŋ ma da ŋɔnûai.

⁵⁰Nɛfɛtɛli ǹônii-sinaai dísuui su-ƃelai ká ŋí nyii-ŋai kɛ̀ a núu wála buu náaŋ káo lɔ́ɔlu pôlu ŋuŋ náaŋ (45,400).

⁵¹Diai dí dílònoi gélee púɔɔ gîe ma è kɛ̀ a núu wála ŋuŋ lɔ́ɔlu mɛi da káo tɔnɔ pôlu ŋuŋ lɔ́ɔlu mɛi feerɛ pôlu buu saaƃa (61,730).

⁵²Yâwɛɛ è mò Mose mà ǹyɛɛi,

⁵³“Ǹɔii ŋá kɔ́lɛ ǹûai dîa a díseêi yɛ̂ɛ berei dísuui láa káa lai.

⁵⁴Ǹûai nyii-ŋai dísuu kɛ̂tɛi ƃa pâi lɔii kɛ́tɛ tɛ̂ɛi dípɔ, ǹûai nyii-ŋai dísuu fé kɛ́tɛ níi, dílɔii fé pâi kɛ̂i a gɛ́tɛ. Núu-suu tɛi-tɛi kélee a pâi lɔii sɔlɔ ƃôi yɛ̂ɛ berei dísuui kɛ̂tɛi lai.

⁵⁵Kɛ́lɛ fɛ̂ɛ í ǹɔii ŋá kɔ́lɛ a kpɛɛŋ toɔɔ yɛ̂ɛ berei ǹúu-suu-ŋai láa káa lai.

⁵⁶Diai dísuu kɛ̂tɛi da diai dísuu fé kɛ́tɛ níi fɛ̂ɛ í kpɛɛŋ tóo díloai.”

⁵⁷Livai ǹônii-sinaai ká ŋí da dísuui su-ƃelai yɛ̂ɛ berei dí dílòno lai. Gɛsɔŋ da ŋɔnûai, Koa da ŋɔnûai é pɛ́lɛ Melali ma da ŋɔnûai.

⁵⁸Livai ǹônii dísuui su-ƃelai ká ŋí. Lini da ŋɔnûai, Iburɔŋ da ŋɔnûai, Mali da ŋɔnûai, Musi da ŋɔnûai, é pɛ́lɛ Kora ma da ŋɔnûai. Koa è kɛ̀ a Amaraŋ ǹâŋ.

⁵⁹Amaraŋ ŋɔnɛnîi láa ƃé kɛ̀ a Zokɛbɛ nyii kɛ̀ a Livai ǹóŋ-nɛnii nyii dí maa sɔlɔ ƃò Ize lɔii sui. Da Amaraŋ dí Eelɔŋ ma sɔlɔ ƃò da Mose é pɛ́lɛ dísaaƃɔlɔ Miriaŋ ma.

⁶⁰Eelɔŋ ǹônii-sinaai láa ƃé kɛ̀ a Nâda, Abiyu, Ilieza é pɛ́lɛ Itama ma.

⁶¹Nâda da Abiyu dí sàa tãi dí géreŋ sala-ŋɔŋ tɛ̀ɛ la Yâwɛɛ pɔ́ nyii vé kɛ́ ní a maa waai.

⁶²Livai-ŋai dísuui su-sinaai nyii-ŋai dípɔlɔ-pɔlɔ-laa è kɛ̀ é síɣe ɣáloŋ tɔnɔ ma é tɛ́ tuɛ-perei, dí dílòno dí ƃò a núu wála buu feerɛ káo saaƃa (23,000). Dífe dílono ní da Eezuɛ-ŋai a tãi tɔnɔ. Kpɛni fêi, dífe lɔii sɔlɔ ƃó ní yɛ̂ɛ berei Eezuɛ-ŋai dí zɔlɔ ƃò lai.

⁶³Eezuɛ-ŋai láa ká ŋí nyii-ŋai Mose da zâla láa-soŋ-nuui Ilieza dí dílòno Môa Fɛ̃ɛ-kpalaŋ su Zɔdiŋ Ya-leei lá Zɛleko téniŋ mai.

⁶⁴Kɛ́lɛ diai Mose da zâla láa-soŋ-nuui Eelɔŋ dí dílòno Sanai Fɛ̃ɛ-kpalaŋ su a maa-ŋuŋ, dítɔnɔ kpîŋ fé lɛɛ ní ǹûai ŋí sáma.

⁶⁵Yâwɛɛ è wɔ́lɔ mò dîa a gɛɛ díkelee da pâi saâi vɛ̃ɛ-kpâlaŋ su. Ǹyaŋ núu tɔnɔ kpîŋ fé lɛɛ ní fɛ̂ɛ nɔ́ Zɛfunɛ ǹóŋ Kelɛ da Nuŋ ǹóŋ Zasua.