Read Kpelle Nɔŋba 28 Bible Online

Nɔŋba 28 - Kpelle bible

Nɔŋba 28

¹Nya ƃe Yâwɛɛ è mò Mose mà ǹyɛɛi,

²“Mó Eezuɛ-ŋai dîa a gɛɛ ŋámii-sɛŋ salai nyii gáa a kéreŋ-sala kúŋ nɛ̃ɛ ḿɛni mai, dí dɛ́ɛ ḿbɔ a dɛɛ tãi.

³“Kɛ́ dîa, géreŋ-salai fɛ̂ɛ ká gula Yâwɛɛ mai, ǹyaa ká. Kóraŋ tɔnɔ ƃala-sirɛ feerɛ nyii-ŋai pɔ́ɔ fé diai ká díkula a kéreŋ-sala a ɣele kélee.

⁴Dɔnɔ kula a sâla a ɣele-wala, í dɔnɔ kula a ɣele-wulii.

⁵Fɛ̂ɛ í mii-sɛŋ salai kúla máŋ a felaƃa-fũa lɛ́lɛɛ pãŋ feerɛ sumoɔ a ɔle wúlɔ lɛ́lɛɛ pãi feerɛ.

⁶Gáa a ɣele kélee mii-sɛŋ sala nyii gáa a kéreŋ-sala kúŋ nɛ̃ɛ Yâwɛɛ mɛni ma, nyii ká gùla Sana Yeei ma a maa-ŋuŋ.

⁷Fɛ̂ɛ í ŋwãai pãi feerɛ kúla máŋ a kpele-sɛŋ sala ŋ̀âla-teƃelei lá mu Yâwɛɛ mɛni ma a m̀ála-salai maa-ŋuŋ kula-tãi.

⁸M̀ála-salai veerɛi kúla a ɣele-wulii da mii-sɛŋ sala é pɛ́lɛ gbele-sɛŋ salai ma yɛ̂ɛ berei í gɛ̀ la a Ŋ̀ele-wâlai. Gáa máŋ a kéreŋ-sala kúŋ nɛ̃ɛ Yâwɛɛ mɛni ma.

⁹“Kóraŋ tɔnɔ ƃala-sirɛ feerɛ kúla a sâla nyii-ŋai pɔ́ɔ fé dîa a Vii-tɔɔ-ɣelei, í felaƃa-fũa lɛ́lɛɛ ŋɔpãŋ náaŋ sumo a ɔle wúlɔ a mii-sɛŋ sala, bɛ́lɛɛ gbele-sɛŋ-salai ma.

¹⁰Vii-tɔɔ-ɣelei kéleee ŋɔkéreŋ-salai ká ŋí nyii búɔi ŋ̀ele kélee salai ma da ŋɔkpele-sɛŋ salai.

¹¹“Ɣáloŋ kélee ŋɔfóloi maa-ŋuŋ ka géreŋ-salai ŋí kúla Yâwɛɛ mɛni ma. Niŋa loŋ-sirɛ feerɛ, ƃála-sirɛ tɔnɔ é pɛ́lɛ kóraŋ-tɔnɔ ƃala-sirɛ lɔ́ɔlu mɛi feerɛ ma nyii-ŋai pɔ́ɔ fé diai.

¹²Ka felaƃa-fũa lɛ́lɛɛ pãŋ lɔ́ɔlu mɛi da sumo a ɔle wúlɔ ká bú niŋa-sirɛ loŋ sala tɛi-tɛi ma a mii-sɛŋ sala. Ka felaƃa-fũa lɛ́lɛɛ pãŋ náaŋ sumo a ɔle wúlɔ ka bú m̀ála-sirɛ-salai ma a mii-sɛŋ sala.

¹³Ka felaƃa-fũa lɛ́lɛɛ pãŋ feerɛ sumo a ɔle wúlɔ ká bú m̀ála-sirɛ sala tɛi-tɛi ma a mii-sɛŋ sala. Díkaa a kéreŋ-sala kúŋ nɛ̃ɛ Yâwɛɛ mɛni ma.

¹⁴Gbele-sɛŋ salai é kɛ́ a ŋwãai pãi náaŋ niŋa-sirɛ loŋ tɛi-tɛi mɛni ma, ŋwãai pãi saaƃa m̀ála-sirɛi mɛni ma, da ŋwãai pãi feerɛi m̀ála-sirɛ loŋ tɛi-tɛi mɛni ma. Géreŋ-salai kula-pere ká ŋí a góraŋ kélee ŋɔɣáloŋ tɛi-tɛi ŋɔfólo maa-ŋuŋ mɛni ma. Gbele-sɛŋ salai é kɛ́ a ŋwãai pãi náaŋ niŋa-sirɛ loŋ tɛi-tɛi mɛni ma, ŋwãai pãi saaƃa m̀ála-sirɛi mɛni ma, da ŋwãai pãi feerɛ m̀ála-sirɛ tɛi-tɛi mɛni ma. Géreŋ-salai kula-pere ká ŋí a góraŋ kélee ŋɔɣáloŋ tɛi-tɛi ŋɔfólo maa-ŋuŋ mɛni ma.

¹⁵Ka ƃoli-sîrɛ tɔnɔ kula máŋ a sɔnyɔ̂ŋ su-mɛni-lɛɛ sâla Yâwɛɛ mɛni ma. Ka zâlai ŋí kúla a ŋ̀ele kélee salai da maa kpele-sɛŋ salai kula pôlu ma.

¹⁶“Ka Yâwɛɛ ŋɔtɛɛ-mɛi-kuui kúla a góraŋ ŋɔɣáloŋ maa-ŋuŋ ŋɔfólo puu káo náaŋ ɣele.

¹⁷Ŋáloŋ ŋí ŋɔɣele-kuu puu káo lɔ́ɔlu ɣelei ƃé ka ŋ̀ele-kuu lɔ́ɔlu mɛni feerɛ kuui kɔ́ɔ pîlaŋ la. Tãi tí su ƃé fɛ̂ɛ ká kpólo míi nyii tɛ́-sɛŋ fé zui.

¹⁸Ŋele-kuu maa-ŋuŋ ɣelei ka Ɣâla fɛli koyâŋ maa waa tóo. Káfe tíi da kélee kɛ̀.

¹⁹Kɛ́lɛ ka géreŋ-salai ŋí kula Yâwɛɛ mɛni ma. Niŋa-sirɛ loŋ feerɛ, ƃála-sirɛ tɔnɔ é pɛ́lɛ kóraŋ tɔnɔ ƃala-sirɛ lɔ́ɔlu mɛi feerɛ ma nyii-ŋai pɔ́ɔ fé diai.

²⁰Ka mii-sɛŋ sala kula máŋ a felaƃa-fũa lɛ́lɛɛ sumoɔ a ɔle wúlɔ pãŋ lɔ́ɔlu mɛi da niŋa-sirɛ tɛi-tɛi mɛni ma, pãŋ náaŋ ƃala-sirɛ mɛni ma,

²¹é pɛ́lɛ pãŋ feerɛ ma m̀ála-sirɛ lɔ́ɔlu mɛi feerɛ tɛi-tɛi mɛni ma.

²²Ka zâla-ŋai ŋí kúla ŋ̀ele-wala kereŋ-sala-kulaa tɛɛ pôlu ma nyii gáa a ɣele kélee kereŋ salai.

²⁴Bere tɔnɔi tí nɔ́ ƃé ká mii-sɛŋ sala kula la a ɣele kélee ɣele-kuu lɔ́ɔlu mɛi feerɛ yée mu nyii gáa a kéreŋ-sala kúŋ nɛ̃ɛ Yâwɛɛ mɛni mai. Ka nyíŋi kúla ŋ̀ele-kelee kereŋ-salai da maa kpele-sɛŋ salai kuláa pôlu ma.

²⁵Ŋ̀ele-kûui ǹɔ́ɔlu mɛi feerɛ ɣelei ká Ɣâla fɛli koyâŋ maa waa tóo. Káfe tíi da kélee kɛ̀.

²⁶“Mii-sãa ŋatɛ gîe ma kuui maa-ŋuŋ ɣele, ka pá a kámii-sãai maa-ŋuŋ Yâwɛɛ pɔ́ a mii-sɛŋ-sala, ká Ɣâla fɛli koyâŋ maa waa tóo. Káfe tíi da kélee kɛ̀.

²⁷Kɛ́lɛ ka zâlai ŋí kúla nyii gáa a kéreŋ-sala kúŋ nɛ̃ɛ Yâwɛɛ mɛni mai. Niŋa-sirɛ loŋ feerɛ, ƃála-sirɛ tɔnɔ, é pɛ́lɛ kóraŋ tɔnɔ ƃala-sirɛ lɔ́ɔlu mɛi feerɛ ma, nyii-ŋai pɔ́ɔ fé diai.

²⁸Ka mii-sɛŋ-sala kula máŋ a felaƃa-fũa lɛ́lɛɛ sumoɔ a ɔle wúlɔ ŋɔpâŋ lɔ́ɔlu mɛi da niŋa-sirɛ tɛi-tɛi mɛni ma, ŋɔpâŋ náaŋ m̀ála-sirɛi mɛni ma,

²⁹é pɛ́lɛ ŋɔpâŋ feerɛ ma ƃála-sirɛ lɔ́ɔlu mɛi feerɛ tɛi-tɛi mɛni ma.

³⁰Ka ƃoli-sirɛ tɔnɔ kula máŋ a sâla kásɔnyɔ̂ŋ su-mɛni-lɛɛ mɛni ma.

³¹Ka zâla-ŋai ŋí kúla da maa kpele-sɛŋ salai, ŋ̀ele-kelee kereŋ-salai da maa mii-sɛŋ-salai tɛɛ pôlu ma.”