Read Kpelle Nɔŋba 3 Bible Online

Nɔŋba 3 - Kpelle bible

Nɔŋba 3

¹Eelɔŋ da Mose dísuui pîlaŋ-pere ká ŋí tãi Yâwɛɛ è lòno la Mose pɔ́ Sana Yeei mai.

²Eelɔŋ ǹônii-sinaai láa ká ŋí. Nâda nyii gáa a ǹóŋ-surɔ̂ŋ maa-ŋuŋ, Abiyu,, Ilieza da Itama.

³Dí wúlɔ pù díŋûa dí dísee a sâla-laa soŋ-ƃela.

⁴Kɛ́lɛ Nâda da Abiyu dí sàa Yâwɛɛ ŋɛ́i-tuɛ Sana Fɛ̃ɛ-kpalaŋ su tãi dí kéreŋ-sala kùla-ŋɔŋ tɛ̀ɛ la Yâwɛɛ pɔ́, nyii vé kɛ́ ní a maa waai. Mɛni ma Ilieza da Itama dí sâla-laa soŋ-tii kɛ̀ dínâŋ Eelɔŋ mu tãi è kɛ̀ la ɣele mai.

⁵Nya ƃe Yâwɛɛ è mò Mose mà ǹyɛɛi,

⁶“Pá a Livai ŋɔsuui su-ƃelai zâla láa-soŋ-nuui Eelɔŋ pɔ́ a gɛɛ dí tíi kɛ́ ḿî.

⁷Dí Zua-kɔlɔ seɣe pɛrɛ maa waai mu tii kélee kɛ́, dí tíi kɛ́ zâla láa-soŋ-ƃelai dîɛ da ǹûai kélee.

⁸Dí Zua-kɔlɔ seɣe pɛrɛ maa waai maa-sãai kélee mɛi káa dí mu-tii kélee kɛ́ Eezuɛ-ŋai mɛni ma.

⁹Livai-ŋai tɛ́ɛ Eelɔŋ pɔ́ da ǹônii. Díkaa a bɔ́ɔ Eezuɛ-ŋai pɔ́ɔ ŋá.

¹⁰Eelɔŋ lɛ́ da ǹônii a gɛɛ dí zâla-laa soŋ-tii kɛ́. Kɛ́lɛ núu da kpɛ́ni kélee à lɛ̀ɣɛ naa, maa-nuui a pâi saâi.”

¹¹Yâwɛɛ è mò Mose ma ǹyɛɛi,

¹²“Gáa, ŋa Livai-ŋai síɣe Eezuɛ-ŋai dílonii-sinaa maa-ŋuŋ-ŋai pɔ́ɔ ŋa a gɛɛ dí kɛ́ a ḿbɔɔ.

¹³Kpɛni fêi, dílonii-sinaa maa-ŋuŋ-ŋa kélee díkaa a ḿbɔɔ. Ŋelei ŋá Ize-lonii-sinaa maa-ŋuŋ-ŋai kélee pàa la Ize lɔii sui, ŋá Eezuɛ lonii-sinaa maa-ŋuŋ-ŋai da dítaa-tulɛ-ŋai dílônii maa-ŋuŋ-ŋai sìɣe a ḿbɔɔ. Díkaa a ḿbɔɔ. Ńyãa ƃa Nuu-namui.”

¹⁴Nya ƃe Yâwɛɛ è lòno Mose pɔ́ Sana Fɛ̃ɛ-kpalaŋ su ǹyɛɛ mai,

¹⁵“Livai-ŋai dílônii-sinaai lóno dísuu-ŋai dîa da dínâŋ-ni dípɛrɛi-ŋai. Í dílônii-sinaai kélee lóno nyii-ŋai dípɔlɔ-pɔlɔ laa káa é síɣe ɣáloŋ tɔnɔ ma é lí tuɛ perei.”

¹⁶Nya ƃe Mose è dí lòno yɛ̂ɛ berei Yâwɛɛ è mò la mai.

¹⁷Livai ǹônii-sinaai láa ká ŋí kɛ̀. Gɛsɔŋ, Koa da Melali.

¹⁸Gɛsɔŋ ǹônii-sinaai láa ká kɛ̀ ŋí yɛ̂ɛ berei dísuui è kɛ̀ lai. Lini da Simi.

¹⁹Koa ǹônii-sinaai ká ŋí yɛ̂ɛ berei dísuui è kɛ̀ lai. Amaraŋ, Iza, Iburɔŋ da Uziɛ.

²⁰Melali ǹônii-sinaai ká kɛ̀ ŋí yɛ̂ɛ berei dísuui è kɛ̀ lai. Mali da Musi. Livai ŋɔsuui su-ƃelai ká kɛ̀ ŋí yɛ̂ɛ berei dínâŋ-ni dípɛrɛ-ŋai dí kɛ̀ lai.

²¹Gɛsɔŋ ŋɔsuui su ƃé Lini da Simi dísuui è kùla naa.

²²Zinâai kélee púɔ díkîe ma nyii-ŋai dípɔlɔ-pɔlɔ laa è kɛ̀ é síɣe ɣáloŋ tɔnɔ ma é tɛ́ tuɛ-perei, dí kɛ̀ a wála lɔ́ɔlu mɛi feerɛ pôlu ŋuŋ lɔ́ɔlu (7,500).

²³È kɛ̀ a sɛŋ a gɛɛ Gɛsɔŋ ŋɔsuui su-ƃelai dí díƃûui tɔ́ɔ Zula kɔlɔ seɣe pɛrɛ maa waai pôlu pere, vóloi liî-pere.

²⁴Dítuɛ-nuui ƃé kɛ̀ a Laɛɛ ǹóŋ Iliasa.

²⁵Gɛsɔŋ ǹônii-sinaai dítii ƃé kɛ̀ a gɛɛ dí Zua kɔlɔ seɣe pɛrɛ maa waai mɛi káa. Dí banaŋ ma seɣe-ƃelai da zu-pere seɣe-ƃelai mɛi káa é pɛ́lɛ bɛ́rɛi láƃelei-seɣei mâ.

²⁶Dí góraŋ ma seɣe-ƃelai mɛi káa nyii dínaŋɔ̂ɔi Zua kɔlɔ seɣe pɛrɛi maa waai ma da ŋ̀âla-teƃelei, góraŋ láƃelei-seɣei, ŋ̀ɛli-ŋai kélee da dɔɔ-sãai é pɛ́lɛ díi kélee ma gáa dímɛni mai.

²⁷Koa ŋɔsuui su ƃé Amaraŋ, Iza, Iburɔŋ da Uziɛ dísuui è kùla naa.

²⁸Zinaai kélee púɔ díkîe ma nyii-ŋai dípɔlɔ-pɔlɔ laa è kɛ̀ é síɣe ɣáloŋ tɔnɔ ma é tɛ́ tuɛ-perei dí kɛ̀ a wála lɔ́ɔlu mɛi saaƃa pôlu ŋuŋ lɔ́ɔlu mɛi da (8,600). Dítii ƃé kɛ̀ a gɛɛ dí Zua kɔlɔ seɣe pɛrɛ maa waai mɛi káa.

²⁹È kɛ̀ a sɛŋ a gɛɛ Koa ŋɔsuui su-ƃelai dí díƃûui tɔ́ɔ Zua kɔlɔ seɣe pɛrɛ maa waai mɛi kɔlɛ nàa kwára-pere.

³⁰Koa ŋɔsuui su-ƃelai dítuɛ-nuui ƃé kɛ̀ a Uziɛ ǹóŋ Ilisafaŋ.

³¹Dítii ƃé kɛ̀ a gɛɛ dí gbanaŋ-woo-kɛɛ maa gãlai mɛi káa da gbólo maa waai maa-teƃelei, laŋpo siɣe-wurii, ŋ̀âla-teƃele-ŋai, Zua kɔlɔ seɣe pɛrɛ maa waai mu-sɛŋ folo-ŋai é pɛ́lɛ gwaa maa waai ŋɔkwaa maa waai loai seɣei ma. Dítii ƃé kɛ̀ a gɛɛ dí tíi kɛ́ a zãai ŋí kélee.

³²Livai-ŋai dítuɛ-nuui ƃé kɛ̀ a Zâla-laa soŋ-nuui kɛ́tɛi Eelɔŋ ǹóŋ Ilieza. È kɛ̀ Zua kɔlɔ seɣe pɛrɛ maa waai mu-tii kɛ́-ƃelai kéle mɛi kâai.

³³Melali ŋɔsuui su ƃé Mali da Musi dísuui è kùla naa.

³⁴Zinaai kélee púɔ díkîe ma nyii-ŋai dípɔlɔ-pɔlɔ laa è kɛ̀ é síɣe ɣáloŋ tɔnɔ ma é tɛ́ tuɛ-perei, dí kɛ̀ a wála lɔ́ɔlu mɛi da pôlu ŋuŋ feerɛ (6,200).

³⁵È kɛ̀ a sɛŋ a gɛɛ Melali ŋɔsuui su-ƃelai dí díƃûui tɔ̀ɔ Zua kɔlɔ seɣe pɛrɛ maa waai kɔlɛ mâ yá-ŋûa pere. Dítuɛ-nuui ƃé kɛ̀ a Abiai ǹóŋ Zuliɛ.

³⁶Melali ǹônii-sinaai dítii ƃé kɛ̀ a gɛɛ dí Zua kɔlɔ seɣe pɛrɛ maa waai pîlaŋ wuru-ŋai mɛi káa, da maa wuru kôya-ŋai, zeɣe soŋ-wuru-ŋai da zee-sãai é pɛ́lɛ maa-tii kɛ́-sãai kélee dîa. Dítii ƃé kɛ̀ a gɛɛ dí tíi kɛ́ a zãâi ŋí kélee.

³⁷Dítii ƃé kɛ̀ máŋ a gɛɛ dí góraŋ-wuru kôya-ŋai mɛi káa, zee-sãai da ŋuru pɛlɛɛ-ŋai da zôŋ ɣɛli-ŋai kpulɔŋ mai dí gáa a gɛɛ Eezuɛ-ŋai dí Ɣâla fɛli a pere sîi sãa da bɛ́rɛi tɔɔ-sãa kélee.

³⁸È kɛ̀ a sɛŋ a gɛɛ Mose da Eelɔŋ é pɛ́lɛ Eelɔŋ ǹônii-sinaaai dîa dí díƃûui tɔ́ɔ Zua kɔlɔ seɣe pɛrɛ maa waai ŋɛ́i-tuɛ vóloi kulâi-pere. À kɛ̀ núu da kpɛ́ni kélee a lɛ̀ɣɛ naa, da pâi maa-nuui tí paâi.

³⁹Livai ŋɔsuui su-sinaai nyii-ŋai kélee díkoraŋ è kɛ̀ é síɣe ɣáloŋ tɔnɔ ma é tɛ́ tuɛ-pere nyii-ŋai Mose da Eelɔŋ dí dílòno yɛ̂ɛ berei Yâwɛɛ è mò la diai, dí kɛ̀ a wála buu feerɛ káo feerɛ (22,000).

⁴⁰Nya ƃe Yâwɛɛ è mò Mose ma ǹyɛɛi, “Ńyãa ƃa Yâwɛɛ, Eezuɛ-ŋai dílônii-sinaai maa-ŋuŋ-ŋai kélee díkaa a ḿbɔɔ. Mɛni ma díkelee dílono í dílaa síɣe nyii-ŋai dípɔlɔ-pɔlɔ-laa káa é síɣe ɣáloŋ tɔnɔ ma é tɛ́ tuɛ-perei.

⁴¹Kɛ́lɛ ŋa Livai-ŋai síɣe dípɔɔ ŋá a ḿbɔɔ. Ŋa Livai-ŋai dítaa-tulɛ-ŋai síɣe máŋ a ḿbɔɔ Eezuɛ-ŋai dítaa-tulɛ-ŋai dílônii maa-ŋuŋ-ŋai pɔ́ɔ ŋá.

⁴²Nya ƃe Mose è Eezuɛ-ŋai dílônii-sinaai maa-ŋuŋ-ŋai kélee lòno é dílaa síɣe yɛ̂ɛ berei Yâwɛɛ è mò la mai.

⁴³Eezuɛ-ŋai dílônii-sinaai maa-ŋuŋ-ŋai nyii-ŋai dípɔlɔ-pɔlɔ-laa è kɛ̀ é síɣe ɣáloŋ tɔnɔ ma é tɛ́ tuɛ-perei, dí kɛ́ a wála buu feerɛ káo feerɛ pôlu ŋuŋ feerɛ pôlu buu lɔ́ɔlu mɛi feerɛ káo saaƃa (22,273), yɛ̂ɛ berei dí dílaa sìɣe lai.”

⁴⁴Nya ƃe Yâwɛɛ è mò Mose ma ǹyɛɛ,

⁴⁵“Livai-ŋai síɣe Eezuɛ-ŋai dílônii-sinaa maa-ŋuŋ-ŋai pɔ́ɔ ŋá dí kɛ́ a ḿbɔɔ. Ńyãa ƃa Yâwɛɛ.

⁴⁶Eezuɛ-ŋai dí lônii-sinaai maa-ŋuŋ-ŋai tâmaai é tɛ́ɛ Livai-ŋai dîa a núu ŋuŋ feerɛ pôlu buu lɔ́ɔlu mɛi feerɛ káo saaƃa (273).

⁴⁷Mɛni ma fɛ̂ɛ í ǹûai ŋí maa fela-fei kɛ́ tɛ-tɛi. Núu tɔnɔ maa-fela-fei káa a káne kpua lɔ́ɔlu nyii-ŋai díwiɛ káa yɛ̂ɛ berei dɔ̂ŋ è nɛ̀ lai.

⁴⁸Zɛŋ-kaoi ŋí tɛ́ɛ Eelɔŋ pɔ́ da ǹônii-sinaai.”

⁴⁹Nya ƃe Mose è zɛŋ-kaoi ŋí kùla ǹûai yêei a Eezuɛ-ŋai dílônii sinaai maa-ŋuŋ-ŋai dí tɛ̀ɛ la Livai-ŋai diai pɔ̀ɔ ŋa tôo.

⁵⁰Zɛŋ kaoi ŋí kélee è kɛ̀ a káne kpua-kpua wála tɔnɔ pôlu ŋuŋ saaƃa pôlu buu lɔ́ɔlu mɛi-da káo lɔ́ɔlu (1,365) nyii ŋɔwiɛ è kɛ̀ yɛ̂ɛ berei dɔ̂ŋ è nɛ̀ lai.

⁵¹Nya ƃe Mose è zɛŋ-kaoi ŋí tɛ̀ɛ Eelɔŋ pɔ́ da ǹônii-sinaai yɛ̂ɛ berei Yâwɛɛ è mò la mai.