Read Kpelle Nɔŋba 30 Bible Online

Nɔŋba 30 - Kpelle bible

Nɔŋba 30

¹Mose è lòno Eezuɛ-ŋai dítuɛ-ƃelai pɔ́ ǹyɛɛi, “Mɛnii ŋí ƃé Yâwɛɛ è mò ǹyɛɛ

²à kɛ̀ núu da a góno tèe Yâwɛɛ yêei kpaa máŋ é vóo a sɛ́ɣɛ tɛ̀ɛ a gɛɛ a pâi mɛni da kɛ̂i Yâwɛɛ mì kpaa máŋ vé pâi mɛni ta kɛ̂i, vé a sɛŋ a gɛɛ é ŋɔkono-tee-wooi kara. Fɛ̂ɛ é mɛnii kélee ŋá-see kɛ́ è mòi.

³“À kɛ̀ nɛnî-loo ta nyii gáa ǹâŋ ŋɔpɛ́rɛi mui, à góno tèe Yâwɛɛ yêei a sɛ́ɣɛ tɛ̀ɛ a gɛɛ a pâi mɛni ta kɛ̂i Yâwɛɛ mì kpaa máŋ vé pâi mɛni ta kɛ̂i,

⁴à kɛ̀ nɛnîi ǹâŋ à mɛ̀ni é mɛi sáa, fɛ̂ɛ nɛnîi é mɛnii kélee ŋa-see kɛ́ è góno-tee la kpaa máŋ è vòo dímɛni mai.

⁵Kɛ́lɛ ŋ̀elei nɛnîi ǹâŋ à mɛ̀ni lai à mò mà a gɛɛ nɛnîi é ŋɔkono-tee-wooi ŋa-see kɛ́. Ǹyaŋ Yâwɛɛ a pâi zu-mɛni lɛɛ̂i kpɛ́ni fêi, ǹâŋ fé fáa ní ŋ̀óo ma.

⁶“À kɛ̀ nɛnî ta nyii dífe nîi maa mɛni ƃó níi, è vòo kpaa máŋ é góno tée nɔ́ a nâgbɔ kɛ́lɛ vé ziɣe ní ǹíi su,

⁷ǹyaŋ ŋɔsurɔ̂ŋ fé da ƃó ní a ŋ̀élei è mɛ̀ni lai, fɛ̂ɛ nɛnîi é mɛni kélee ŋa-see kɛ́ è vòo lai kpaa máŋ è góno tèe lai.

⁸Kɛ́lɛ ŋ̀elei nɛnîi ŋɔsurɔ̂ŋ à mɛnii tí mɛ̀ni lai, à mò a gɛɛ vé fáa ní ma, gɛ̀ ní vé a sɛŋ a gɛɛ nɛnîi é ŋɔfóo-wooi kpaa máŋ ŋɔkono-teei nyii è gɛ̀ a nâgbɔi kɛ́lɛ vé ziɣe ní ǹíi sui é ŋ̀á-see kɛ́. Ǹyaŋ Yâwɛɛ a pâi zu-mɛni lɛɛ̂i.

⁹“À kɛ̀ nɛnî nyii bɔ̂ŋ a saai kpaa máŋ nɛnî nyii da ŋɔsurɔ̂ŋ da taai, è vòo kpaa máŋ é góno tée, fɛ̂ɛ maa nɛnîi é ŋɔ-foo-wooi kpaa máŋ ŋɔkono-teei ŋa-see kɛ́.

¹⁰“À kɛ̀ nɛnî ta nyii bɔ̂ŋ káa ma a góno tèe a gbanaŋɔɔ Yâwɛɛ yêei ŋɔsurɔ̂ŋ ŋɔpɛ́rɛi mu,

¹¹à kɛ̀ zurɔ̂ŋ à mɛ̀ni kɛ́lɛ vé mɛni da ƃó ní, fɛ̂ɛ nɛnîi é m̀ɛnii kélee ŋa-see kɛ́ è góno tèe la.

¹²Kɛ́lɛ ŋ̀elei nɛnîi ŋɔsurɔ̂ŋ a m̀ɛnii tí mɛ̀ni lai, à mò a gɛɛ vé fáa ní mà, gɛ̀ ní vé a sɛŋ a gɛɛ nɛnîi é ŋɔkono-tee-wooi ŋa-see kɛ́. Kpɛni fêi, ŋɔsurɔ̂ŋ fé fáa ní ma. Yâwɛɛ a pâi zu mɛni lɛɛ̂i.

¹³Kono-tee-woo kpanaŋɔɔ kélee nyii nɛnîi è gɛ̀i, ŋɔsurɔ̂ŋ à fàa ma, a pâi gɛ̂i, kɛ́lɛ ŋɔsurɔ̂ŋ à wàla fáa ma, vé pâi gɛ̂i.

¹⁴Kɛ́lɛ à kɛ̀ nɛnîi ŋɔsurɔ̂ŋ fé mɛni da ƃó ní nɛnîi ma a naa pôlu ma ɣelei, gɛ̀ ní fɛ̂ɛ nɛnîi é ŋɔkono-tee-wooi kélee ŋa-see kɛ́. Ŋɔsurɔ̂ŋ è fàa mu. Kpɛni fêi, vé mɛni da ƃó ní nɛnîi ma ŋ̀elei è mɛ̀ni lai.

¹⁵Kɛ́lɛ à kɛ̀ naa à tùa é lɛ́ɛ pâi môi nɛnîi ma a gɛɛ vé fáa ní ma, gɛ̀ ní ǹyaa kpîŋ a pâi tɔŋ kpɛ́ maa sɔlɔ ƃôi kpɛ́ni fêi nɛnîi fé ŋɔkono-tee-wooi ŋa-see kɛ́ ní.

¹⁶“Dɔ̂ŋ-ŋai ká ŋí Yâwɛɛ è dɛ̀ɛ Mose pɔ́ é pîlaŋ la gono-tee-woo-ŋai dîa, nyii-ŋai díkaa nɛnî da ŋɔsurɔ̂ŋ díloai, kpaa máŋ nɛnî-loo nyii gáa niî ǹâŋ ŋɔpɛ́rɛi mui da ǹâŋ díloai.”