Read Kpelle Nɔŋba 33 Bible Online

Nɔŋba 33 - Kpelle bible

Nɔŋba 33

¹Eezuɛ-ŋai díƃûu-ŋai láa ká ŋí é síɣe tãi ma dí kùla la Ize lɔii su. Mose da Eelɔŋ ƃé kɛ̀ dítuɛ.

²Mose è gwaa-ŋai ma láa pɔ̃yɛ tɛi-tɛi ƃɛ́i dí díƃûu-ŋai pù naai yɛ̂ɛ berei Yâwɛɛ è mò la mai.

³Dí kùla Ize lɔii su a góraŋ ŋɔɣáloŋ maa-ŋuŋ ŋɔfólo puu káo lɔ́ɔlu ɣele nyii kɛ̀ a dɛɛ-mɛi-kuui pôlu ma ɣelei. Yâwɛɛ ŋɔkpɔŋ-maai su Eezuɛ-ŋai dí kùla Laŋse-taa-leei su Ize-ŋai kélee ŋɛ́i.

⁴Maa tãi tí ƃé Ize-ŋai dí kɛ̀ dílônii-sinaai maa-ŋuŋ-ŋai saa loôi la nyii-ŋai Yâwɛɛ è dípàai. Bere sii ŋí ƃé Yâwɛɛ è díɣâla-ŋai maa-mɛni ŋá tee la.

⁵Eezuɛ-ŋai dí kùla Laŋse dí díƃûui pú Sukɔ.

⁶Nya ƃe dí kùla Sukɔ dí díƃûui pú Itaŋ nyii gáa vɛ̃ɛ-kpâlaŋ kóyaŋ mai.

⁷Nya ƃe dí kùla Itaŋ dí lí pôlu Pi-ɣaɣilo, nyii gáa Bazɛfɔŋ vóloi kûlai-perei, dí díƃûui pú Midɔ ŋɛ́i-tuɛ.

⁸Dí kùla Pi-ɣaɣilo dí tɛ́ɛ yúo sámai dí lí vɛ̃ɛ-kpâlaŋ su. Dí fólo saaƃa sia kɛ̀ Itaŋ fɛ̃ɛ-kpalaŋ su dí díƃûui pú Malai.

⁹Nya ƃe dí kùla Malai dí pá Iliŋ ƃɛ́i ya-toŋ-ma puu káo feerɛ da tóu nɛ̃ɛ wuru buu lɔ́ɔlu mɛi feerɛ dí kɛ̀ naai, dí díƃûui pú naa.

¹⁰Dí kùla Iliŋ dí díƃûui pú Ǹyúo Kpɔ̂lui kɔlɛ.

¹¹Dí kùla Ǹyúo Kpɔ̂lui kɔlɛ dí díƃûui pú Siŋ fɛ̃ɛ-kpalaŋ su.

¹²Nya ƃe dí kùla Siŋ fɛ̃ɛ-kpalaŋ su dí díƃûui pú Dofa.

¹³Nya ƃe dí kùla Dofa dí díƃûui pú Alu.

¹⁴Dí kùla Alu dí díƃûui pú Lɛfidiŋ ƃɛ́i yá fé kɛ́ ní naa a gɛɛ dí díkpele lai.

¹⁵Nya ƃe dí kùla Lɛfidiŋ dí díƃûi pú Sana Fɛ̃ɛ-kpalaŋ su.

¹⁶Dí kùla Sana Fɛ̃ɛ-kpalaŋ su dí díƃûui pú Kibolo Atava.

¹⁷Nya ƃe dí kùla Kibolo Atava dí díƃuui pú Azelo.

¹⁸Nya ƃe dí kùla Azelo dí díƃûui pú Lima.

¹⁹Dí kùla Lima dí díƃûui pú Limoŋ Pɛrɛɛ.

²⁰Nya ƃe dí kùla Limoŋ Pɛrɛɛ dí díƃûui pú Lina.

²¹Dí kùla Lina dí díƃûui pú Lisa.

²²Dí kùla Lisa dí díƃûui pú Keelata.

²³Dí kùla Keelata dí díƃûui pú Sefa yeei ma.

²⁴Nya ƃe dí kùla Sefa yeei ma dí díƃûui pú Arada.

²⁵Nya ƃe dí kùla Arada dí díƃûui pú Makelo.

²⁶Nya ƃe dí kùla Makelo dí díƃûui pú Taya.

²⁷Dí kùla Taya dí díƃûui pú Tela.

²⁸Dí kùla Tela dí díƃûui pú Mika.

²⁹Nya ƃe dí kùla Mika dí díƃûui pú Asimona.

³⁰Dí kùla Asimona dí díƃûui pú Moselo.

³¹Dí kùla Moselo dí díƃûui pú Bene Zakaŋ.

³²Dí kùla Bene Zakaŋ dí díƃûui pú Ɔ̂ɔ Agigaa.

³³Nya ƃe dí kùla Ɔ̂ɔ Agigaa dí díƃûui pú Zobata.

³⁴Nya ƃe dí kùla Zobata dí díƃûui pú Abona.

³⁵Dí kùla Abona dí díƃûui pú Ezioŋ-gibɛ.

³⁶Dí kùla Ezioŋ-gibɛ dí díƃûui pú Ziŋ fɛ̃ɛ-kpalaŋ su (nyii da dòli máŋ a Kedɛ).

³⁷Nya ƃe dí kùla Kedɛ dí díƃûui pú Ɔ̂ɔ yeei ma, Idɔŋ lɔii koyaŋ ma.

³⁸Nya ƃe Eelɔŋ è tɛ̀ Ɔ̂ɔ yeei su yɛ̂ɛ berei Yâwɛɛ è mò la mai é sáa naa a góraŋ buu náaŋ ŋɔɣaloŋ ǹɔ́ɔlu ŋɔfólo maa-ŋuŋ ɣele Eezuɛ-ŋai kuláa Ize lɔii su pôlu ma.

³⁹Eelɔŋ è kɛ̀ a kóraŋ ŋuŋ tɔnɔ pôlu buu feerɛ káo saaƃa (123) tãi è saa la Ɔ̂ɔ yeei mai.

⁴⁰Nya ƃe Keena kaloŋ Ara nyii bɔ́taai è kɛ̀ Keena lɔii kwára-perei, è mɛ̀ni a gɛɛ Eezuɛ-ŋai dí kɛ̀ pâi.

⁴¹Nya ƃe Eezuɛ-ŋai dí ŋɔ́nɔ kùla Ɔ̂ɔ yeei ma dí díƃûui pú Zamona.

⁴²Dí kùla Zamona dí díƃûui pú Punɔŋ.

⁴³Nya ƃe dí kùla Punɔŋ dí díƃûui pú Obo.

⁴⁴Dí kùla Obo dí díƃûui pú Abariŋ, Môa lɔii su.

⁴⁵Nya ƃe dí kùla Abariŋ dí díƃûui pú Dibɔŋ Gâa.

⁴⁶Dí kùla Dibɔŋ Gâa dí díƃûui pú Dibataŋ.

⁴⁷Nya ƃe dí kùla Amoŋ Dibataŋ dí díƃûui pú Abariŋ Yeei ma Nebo ŋɛ́i-tuɛ.

⁴⁸Nya ƃe dí kùla Abariŋ Yeei ma dí díƃûui pú Môa fɛ̃ɛ-kpalaŋ su Zɔdiŋ Ya-leei pôlu Zɛleko téniŋ ma.

⁴⁹Dí díƃûui pù Zɔdiŋ Ya-leei pôlu é síɣe Bɛ Zɛsimo é lí Akasia tiŋ-tiŋ su.

⁵⁰Nya ƃe Yâwɛɛ è lòno Mose pɔ́ Môa fɛ̃ɛ-kpalaŋ su Zɔdiŋ Ya-leei pôlu Zɛleko kɔlɛ ma ǹyɛɛi,

⁵¹“Mó Eezuɛ-ŋai dîa, tãi ka Zɔdiŋ Ya-leei tiyeŋ la ká píli Keena lɔii sui,

⁵²fɛ̂ɛ ká ǹɔii-ƃelai kélee kpɛ́ kátuɛ, ká díkɔni siɣɛɛ-ŋai kélee su kara da díɣâla pɔkɔɔŋ-ŋai é pɛ́lɛ díɣâla fɛli kwaa-ŋai kélee ma.

⁵³Ka ǹɔii síɣe ká sée ma. Kpɛni fêi, ŋa dɛ̀ɛ kápɔ a kápɔɔ.

⁵⁴Ka ǹɔii ŋa kɔ́lɛ a kpɛyɛŋ toɔɔ yɛ̂ɛ berei kásuu-ŋai láa káa la tɛi-tɛi. Ǹûai nyii-ŋai dísuu kɛ̂tɛi, ka lɔii kɛ́tɛ tɛ́ɛ dípɔ. Ǹûai nyii-ŋai dísuu fé kɛ́tɛ ní, ka lɔii kpua-loŋ tɛɛ dípɔ. Berei gbɛyɛŋ a pâi toôi lai bere nɔ́ ƃé ǹúui a pâi ŋɔ̀i sɔlɔ ƃôi la.

⁵⁵Kɛ́lɛ kà wàla ǹɔii-ƃelai kpɛ́, diai da lɛɛ naai da pâi kɛ̂i yɛ̂ɛ wúru-kalaŋ káŋɛi kpaa máŋ yɛ̂ɛ ŋalêŋ kápɛ̂rɛ ma, ǹyaŋ da pâi kɔ̂i kápɔ.

⁵⁶Kà wàla díkpɛ, ŋa pâi kásu karai, yɛ̂ɛ berei ŋá gbɛ̀tɛ la ŋ́gili ŋá a gɛɛ ŋá dísu karai.”