Read Kpelle Nɔŋba 34 Bible Online

Nɔŋba 34 - Kpelle bible

Nɔŋba 34

¹Yâwɛɛ è mò Mose ma ǹyɛɛi,

²“Mɛni-ŋai ŋí ƃó Eezuɛ-ŋai dîa. Tãi ka lì la Keena lɔii sui, ǹɔii nyii ŋa dɛɛ̂i kápɔ a kápɔɔi, goyaŋ ma-ŋai ka ŋí.

³Ǹɔii kwára-pere koyaŋ ma a pâi siɣêi Ziŋ fɛ̃ɛ-kpalaŋ ma da Idɔŋ-ŋai dí lɔii koyaŋ ma pere, é síɣe Ǹyúo Saai kperai ŋá vóloi kulai-pere,

⁴gɛ́ yeŋ ǹɔii kwára-pere gɛ́ lì Akabiŋ yeei pɛrɛ ma-pere, é ŋɔ́nɔ tɛɛ Ziŋ fɛ̃ɛ-kpalaŋ su é kpéra Kedɛ Bania taai kwára-pere. A pâi ŋɔnɔ síɣe naa é lí Aza Ada é tɛ́ɛ Amoŋ taai su.

⁵É ŋɔ́nɔ kúla naa é lí diŋ-tiŋ su Ize koyaŋ ma, é kperâ Mɛditɛrenia Yuoi mâ.

⁶“Ǹɔii koyâŋ ma pere nyii pâi kɛ̂i voloi lii-perei a pâi siai a Mɛditɛrenia Yuoi kóo.

⁷“Ǹɔii ŋûa-pere koyâŋ ma kɔ́ɔ a pâi pîlanii é síɣe Mɛditɛrenia Yuoi ma é tɛ́ɛ Ɔ̂ɔ yeei ma.

⁸É síɣe ŋɔ́nɔ Ɔ̂ɔ yeei ma gɛ́ lì Ama-perei kɔlɛ ma é seri Zida taai ma.

⁹É síɣe ŋɔ́nɔ Zida taai ma é lí Zifɔŋ é kóyaŋ Aza Inaŋ ma. Kálɔii ŋûa-pere koyâŋ ma ká ŋí.

¹⁰“Vóloi kulai-pere lɔii koyâŋ ma a pâi kɛ̂i é síɣe Aza Inaŋ é lí Sifaŋ.

¹¹A pâi ŋɔ́nɔ kúla Sifaŋ é yéŋ Liƃa nyii gáa Aiŋ foloi kulai-perei. É ŋɔ́nɔ síɣe naa é seri Galalii Yúo-loŋ kɔlɛ ma yeei ma vóloi kulai pere.

¹²É ŋɔ́nɔ síɣe naa é yéŋ Zɔdiŋ Ya-leei mâ é kóyaŋ Ǹyúo Saai mâ. “Kálɔii ŋí ŋɔgoyâŋ perei ǹaaŋɔɔ ká ŋí.”

¹³Mose è mò Eezuɛ-ŋai dîa ǹyɛɛi, “Ǹɔii ká ŋí nyii Yâwɛɛ è dɛ̀ɛ ká pɔ́ a kápɔɔi. Ka ŋá kɔlɛ a kpɛyɛŋ toɔɔ, ǹúu-suu lɔ́ɔlu mɛi naaŋ da gburai loai.

¹⁴Kpɛni fêi, Lubiŋ ŋɔsuui su-ƃelai da Gâa ŋɔsuui su-ƃelai é pɛ́lɛ Manasɛ ŋɔsuui su-ƃelai m̀élai tɔnɔ ma dí díwɔ̂ lɔii sɔlɔ ƃô.

¹⁵Ǹúu-suu feerɛi ŋí da gburai dí díwɔ̂ lɔii sɔlɔ ƃò Zɔdiŋ Ya-leei pôlu vóloi kula-pere Zɛleko téniŋ ma.”

¹⁶Yâwɛɛ è mò Mose ma ǹyɛɛi,

¹⁷“Ǹûai láa ká ŋí pâi ǹɔii ŋá kɔlɛ̂i ǹûai diai. Dia ƃa zâla láa-soŋ-nuui Ilieza da Nuŋ ǹóŋ Zasua.

¹⁸Ka núu-tuɛ nuu tɔnɔ-tɔnɔ kúla máŋ ǹúu-suu tɛi-tɛi kélee sáma a gɛɛ dí kpɔ́ŋ dîa dí ǹɔii ŋá kɔ́lɛ.”

¹⁹Ǹûai láa ká ŋí: Ǹúui kùla Zuda ŋɔsuui sui nya ƃa Zefunɛ ǹóŋ Kelɛ.

²⁰Ǹúui kùla Simiɔŋ ŋɔsuui suii nya ƃa Amiyu ǹóŋ Simuɛ.

²¹Ǹúui kùla Bɛŋsima ŋɔsuui sui nya ƃa Kisilɔŋ ǹóŋ Ilida.

²²Ǹúui kùla Daŋ ŋɔsuui sui nya ƃa Zogili ǹóŋ Buki.

²³Ǹúui kùla Zosɛ ǹón Manasɛ ŋɔsuui sui, nya ƃa Ifɔ ǹóŋ Aniɛ,

²⁴Ǹúui kùla Zosɛ kpéli ǹón Ifiraŋ ŋɔsuui sui, nya ƃa Sifaŋ ǹóŋ Kemuɛ.

²⁵Ǹúui kùla Zɛbulɔŋ ŋɔsuui sui, nya ƃa Pâna ǹóŋ Ilizafaŋ.

²⁶Ǹúui kùla Isaka ŋɔsuui sui, nya ƃa Azaŋ ǹóŋ Patiɛ.

²⁷Ǹúui kùla Asɛ ŋɔsuui sui, nya ƃa Selomi ǹóŋ Aiyu.

²⁸Ǹúui kùla Nɛfɛtɛli ŋɔsuui sui, nya ƃa Amiyu ǹóŋ Pɛdayɛɛ.

²⁹Ǹûai ká ŋí Yâwɛɛ è dílɛ̀ a gɛɛ dí Eezuɛ-ŋai dílɔii ŋá kɔ́lɛ dîa Keena lɔii sui.