Read Kpelle Nɔŋba 36 Bible Online

Nɔŋba 36 - Kpelle bible

Nɔŋba 36

¹Makiɛ ŋɔsuui su-ƃelai túɛ-ƃelai dí pà Mose pɔ́ da Eezuɛ-ŋai dísuui su-ƃelai túɛ-ƃelai kpéli-ŋai. Gilia ŋí è kɛ̀ a Makiɛ ǹóŋ, Mikiɛ kɛ́ ƃò a Manasɛ ǹóŋ, Manasɛ kɛ́ ƃò a Zosɛ ǹóŋ.

²Dí mò Mose ma dîyɛɛi, “Yâwɛɛ è mò yâ a gɛɛ í Eezuɛ-ŋai dílɔii ŋá kɔ́lɛ a kpɛyɛŋ toɔɔ. Yâwɛɛ è ŋɔ́nɔ mò yâ a gɛɛ í kúkaayɔɔi Zɛlofɛya ŋɔlɔii tɛ́ɛ ǹônii-nɛyãai pɔ́ a dípɔɔ.

³Kɛ́lɛ à kɛ̀ da núu-suu da kpɛ́ni kùla a surɔ̂ŋ Eezuɛ-ŋai sáma, gɛ̀ ní da pâi dílɔii kulâi kúnâŋ-ni dílɔii ma dí dɛ́ɛ nuu-suu da kpɛ́ni pɔ́ ƃɛ́i dí dísinâai kula naai. Gɛ̀ ní kúlɔii a pâi lɛɛ̂i a guro-te.

⁴Ǹyaŋ góraŋ a pà tãi Eezuɛ-ŋai da ǹɔii-ŋai tɛ̀ɛ la pôlu namela pɔ́ nyii dí yài, gɛ̀ ní da pâi Zɛlofɛya ǹónii-nɛyãai dílɔii tɛɛ̂i ǹúu-suui pɔ́ ƃɛ́i dí dísurɔ̂ŋ kula naai, ǹyaŋ dílɔii a pâi kulâi kúnâŋ-ni dílɔii ma.”

⁵Nya ƃe Mose è Yâwɛɛ wóoi ŋí ƃò Eezuɛ-ŋai dîa ǹyɛɛi, “Mɛnii Manasɛ ŋɔsuui su-ƃelai túɛ-ƃelai da môi gáa a tɔ̃yâ.

⁶Mɛni ma Yâwɛɛ wóo ká ŋí Zɛlofɛya ǹônii-nɛyãai dîa. Da pɔ̂ri surɔ̂ŋ kulâi nyii da ŋ̀wɛ̂lii, kɛ́lɛ fɛ̂ɛ dí díkula dínâŋ-ni dísuui su-ƃelai sáma.

⁷Vé a sɛŋ a gɛɛ Eezuɛ-ŋai dísuui da ŋɔlɔii é kɛ́ a núu-suu da kpɛ́ni pɔ́ɔ. Fɛ̂ɛ Eezuɛ-nuu kélee ŋɔlɔii é lɛ́ɛ dínâŋ-ni dísuui su-ƃelai yêei.

⁸Nɛnî kélee nyii lɔii sɔlɔ ƃò Eezuɛ-ŋai dísuui da sui, fɛ̂ɛ é surɔ̂ŋ kula ǹâŋ ŋɔsuui su-ƃelai sáma. Bere sii ŋí ƃé Eezuɛ-ŋai kélee da pâi dínâŋ-ni dílɔii sɔlɔ ƃôi la.

⁹À kɛ̀ tí gɛ̀ ní núu-suu tɔnɔ ŋɔlɔii fé pâi kulâi ǹyêei é lí núu-suu da kpɛ́ni pɔ́. Eezuɛ-ŋai dísuu tɛi-tɛi kélee a pâi kɛ̂i nɔ́ gbɔ́ɔi lɔii ma.”

¹⁰Zɛlofɛya ǹônii-nɛyãai dí gɛ̀ nɔ́ yɛ̂ɛ berei Yâwɛɛ è mò la Mose mai.

¹¹Nya ƃe Mala, Taza, Oga da Mika é pɛ́lɛ Nôa ma, nyii-ŋai kɛ̀ a Zɛlofɛya ǹónii-nɛyãai, dí dínâŋ nêɣe sinaai-ni dílônii kùla a dísinâa.

¹²Dí Zosɛ ǹóŋ Manasɛ ǹônii-sinaai dísuui su-ƃelai da-ni kùla a dísinâa. Berei ŋí ƃé dílɔii è lɛ̀ɛ la dínâŋ ŋɔsuui su-ƃelai yêei.

¹³Dɔ̂ŋ-ŋai ká ŋí Yâwɛɛ è dɛ̀ɛ Eezuɛ-ŋai pɔ́ Mose sârai Môa fɛ̃ɛ-kpalaŋ su Zɔdiŋ Ya-leei pôlu Zɛleko téniŋ mai.