Read Kpelle Nɔŋba 4 Bible Online

Nɔŋba 4 - Kpelle bible

Nɔŋba 4

¹Yâwɛɛ è mò Mose da Eelɔŋ dîa ǹyɛɛ,

²“Koa ǹônii-sinaai lóno Livai ǹônii-sinaai sáma yɛ̂ɛ berei dísuui káa la da dínâŋ-ni dípɛrɛ-ŋai,

³nyii-ŋai díkoraŋ káa é síɣe kóraŋ buu saaƃa ma é tóo buu lɔ́ɔlu ma, nyii-ŋai da pɔ̂ri tíi kɛ̂i Zua kɔlɔ seɣe pɛrɛ maa waai mui.

⁴Koa ǹônii-sinaai dítii gáa Zua kɔlɔ seɣe pɛrɛ maa waai mui ǹyaa ƃa dí zãa maa waa-ŋai mɛi káa.

⁵“Dí lɛ́ɛ pâi kolônii fɛ̂ɛ Eelɔŋ da ǹônii-sinaai dí lɔ́ Zua kɔlɔ seɣe pɛrɛ maa waai mu dí gwaa maa waai da gwaa maa ŋɔkwaa maa waai loai seɣei síɣe dí bɛlɛ gbanaŋ-woo-kɛɛi maa-gãlai mɛi.

⁶Nàa pôlu ma dí ƃoli-kɔlɔ pɛlɛ mɛi, dí seɣe buluŋ-kɛɛ pɛ́lɛ bôlu dí ziɣe-wuru kôya-ŋai lɔ́ zu.

⁷“Fɛ̂ɛ dí seɣe buluŋ-kɛɛ pɛ́lɛ gbólo maa waai kpɛtɛ teƃelei ŋá, dí peleti-ŋai sée ŋ̀á da géreŋ sâla kula sɛŋ-folo-ŋai, gawulu-ŋai da gbele-sɛŋ sala kula kɔ̂pu-ŋai. Fɛ̂ɛ dí gbólo maa waai pú máŋ teƃelei ŋá.

⁸Nàa pôlu ma dí mɛ̀i pɛ́lɛ a seɣe kpɔ̂lu, dí ƃoli-kɔlɔ pɛlɛ mɛ̀i, dí ziɣe wuru kôya-ŋai lɔ́ zu.

⁹“Fɛ̂ɛ dí seɣe buluŋ-kɛɛ síɣe dí laŋpo see-wurii maa kpíniŋ la da lâŋpo-ŋai é pɛ́lɛ lâŋpo-ŋai maa-tii kɛ́-sãai kélee dîa da laŋpoi.

¹⁰Fɛ̂ɛ dí laŋpo see-wurii ŋí da maa tii kɛ́-sãai kélee maa kpiniŋ a ƃoli-kɔlɔ, dí ŋiri ziɣe-wurii mâ.

¹¹“Fɛ̂ɛ dí seɣe buluŋ-kɛɛ pɛ́lɛ ŋ̀âla-teƃelei ŋá dí ƃoli-kɔlɔ pɛlɛ mɛi dí ziɣe-wuru-ŋai lɔ́ zu.

¹²Fɛ̂ɛ dí Zua kɔlɔ seɣe pɛrɛ maa waai mu-tii kɛ́-sãai kélee maa kpíniŋ a seɣe buluŋ-kɛɛ dí ƃoli-kɔlɔ kpíniŋ la dí ŋiri ziɣe-wurii mâ.

¹³Fɛ̂ɛ dí ǹuui kɔ́ɔ ŋ̀âla-teƃelei ŋá dí seɣe kpɔ̂lu mu tɛiɣɛɛ pɛ́lɛ ŋ̀á.

¹⁴Nàa pôlu ma fɛ̂ɛ dí ŋ̀âla-teƃelei maa-tii kɛ́-sãai kélee pú zeɣei ŋí mɛi. Dia ƃa ŋɔŋ-pu-pane-ŋa, sua ƃɔ́-kɔli-ŋa, sɔ̂ƃele-ŋa da sɛŋ-folo-ŋa, dí mɛ̀i pɛ́lɛ a ƃoli-kɔlɔ dí ŋiri ziɣe wuru-ŋai dîa.

¹⁵Eelɔŋ da ǹônii-sinaai da kpɛ̀ɛ a Zua kɔlɔ seɣe pɛrɛ maa waai maa kpíniŋɔɔ da maa-tii kɛ́-sãai kélee, dí nâa díkpîŋ kpɛtɛ dísiai mɛni ma. Koa ǹônii-sinaai ƃé gáa a sɛŋ dí lí a dia. Kɛ́lɛ maa fé nɛ̃ɛ ní dí lɛ́ɣɛ zãa maa waai dɔnɔ kpîŋ ma. Dà lɛ̀ɣɛ da ma, da pâi saâi. Koa ǹônii-sinaa díwɔ̂ tii ƃa dí Zua kɔlɔ seɣe pɛrɛ maa waai síɣe da maa sãai kélee dí lí a dia ƃɛ́i kélee da lî naai.

¹⁶“Eelɔŋ nyii gáa a zâla láa-soŋ-nuu kɛ́tɛi ǹóŋ Ilieza é kɛ́ laŋpo-wulɔi mɛi da géreŋ-sɛŋ kúŋ-nɛɛ, ŋ̀ele-kelee sala-sãai, bu-ŋua wulɔi é pɛ́lɛ Zua kɔlɔ seɣe pɛrɛ maa waai mu-sãai kélee dîa nyii-ŋai dítɛɛ̂i Yâwɛɛ pɔ́i.”

¹⁷Nya ƃe Yâwɛɛ è mò Mose da Eelɔŋ dîa ǹyɛɛi,

¹⁸“Káfe nɛ̀ɛ naa Koa ŋɔsuui-su-ƃelai su fé kàra Livai-ŋai sáma.

¹⁹À kɛ̀ da lɛ̀ɣɛ gwaa maa waai kɔlɛ, mɛnii ka pɔ̂ri gɛ̂i a gɛɛ dífe sàai ǹya ká. Fɛ̂ɛ Eelɔŋ da ǹônii-sinaai dí lɔ́ Zua kɔlɔ seɣe pɛrɛ maa waai mu dí dítii-ŋai lɛ́ dîa tɛi-tɛi da gbîri-ŋai dí dísiɣei.

²⁰Kɛ́lɛ dífe lɔ̀ naa a gɛɛ dí zãai maa waai káa a tãi kpua loŋ máŋ. Dà gɛ̀ tí da pâi saâi.”

²¹Yâwɛɛ è mò Mose mà ǹyɛɛi,

²²“Gɛsɔŋ ǹônii-sinaai lóno máŋ yɛ̂ɛ berei dísuui káa la da dínâŋ-ni dípɛrɛ-ŋai,

²³nyii-ŋai díkoraŋ káa é síɣe kóraŋ buu saaƃa ma é tóo buu lɔ́ɔlu (950) ma, nyii-ŋai da pɔ̂ri tíi kɛ́i Zua kɔlɔ seɣe pɛrɛ maa waai mui.

²⁴Gɛsɔŋ ŋɔsuui ŋɔtíi ká ŋí gbîri siɣe-tii su.

²⁵Fɛ̂ɛ dí lí a Zua kɔlɔ seɣe pɛrɛ maa waai mu-seɣe-ƃelai da Zua kɔlɔ seɣe pɛrɛ maa waai é pɛ́lɛ mɛi pɛlɛ sãai dîa da mála-kɔlɔi nyii gáa mɛi-perei, da Zua kɔlɔ seɣe pɛrɛ maa waai láƃelei-seɣei,

²⁶góraŋ maa-seɣe-ƃelai, góraŋ láƃelei-seɣei nyii dínaŋɔɔi Zua kɔlɔ seɣe pɛrɛ maa waai ma da ŋ̀âla-teƃelei da góraŋ tɔɔ sãai kélee é pɛ́lɛ dítii kɛ́-sãai kélee dîa. Dí díi-ŋai kélee kɛ́ nyii-ŋai maa nɛɛi a gɛɛ dí gɛ́ a diai.

²⁷Gɛsɔŋ ŋɔsuu-ŋai dí dítii-ŋai kélee kɛ́ Eelɔŋ da ǹônii yée mu. Dí gbíri-ŋai kélee síɣe, dí díi-ŋai kélee kɛ́ da dɛ̀ɛ dípɔi. Ka dítii-ŋai lɛ́ dîa ká gáa a gɛɛ sɛŋ da fé díkɛ̀.

²⁸Gɛsɔŋ ŋɔsuu-ŋai dítii ká ŋí Zua kɔlɔ seɣe pɛrɛ maa waai mu. Fɛ́ɛ dí díi-ŋai ŋí kɛ́ Eelɔŋ nyii gáa a zâla láa-soŋ-nuu kɛ́tɛi ǹóŋ Itama yée mu.”

²⁹Yâwɛɛ è mò Mose mà ǹyɛɛi, “Melali ǹônii-sinaai lóno máŋ yɛ̂ɛ berei dísuui káa la da dínâŋ-ni dípɛrɛ-ŋai,

³⁰nyii-ŋai díkoraŋ káa é síɣe kóraŋ buu saaƃa ma é tóo buu lɔ́ɔlu ma, nyii-ŋai da pɔ̂ri tíi kɛ́i Zua kɔlɔ seɣe pɛrɛ maa waai mui.

³¹Dítii ká ŋí gbîri siɣe-tii su. Dí lí a Zua kɔlɔ seɣe pɛrɛ maa waai pîlaŋ-wuru-ŋai, maa-wuru kôya-ŋai, zeɣe soŋ-wuru-ŋai da zee-sãai.

³²Dí lí máŋ a góraŋ pîlaŋ-wuru-ŋai, da zee-sãai da ŋuru pɛlɛɛ-ŋai da zoŋ ɣɛlii kpulɔŋ mai, zoŋ ɣeli é pɛ́lɛ dɔɔ-sãai kélee dîa da maa-tii kɛ́ kɔli-sãai. Ka gbîri-ŋai lɛ́ dîa tɛi-tɛi dí gáa a gɛɛ dí ziɣe.

³³Melali ŋɔsuu-ŋai dítii ká ŋí Zua kɔlɔ seɣe pɛrɛ maa waai mu. Fɛ̂ɛ dí díi-ŋai ŋí kɛ́ Eelɔŋ nyii gáa a zâla láa-soŋ-nuu kɛ́tɛi ǹóŋ Itama yée mu.”

³⁴Nya ƃe Mose, Eelɔŋ da Eezuɛ-ŋai túɛ-ƃelai dí Koa ŋɔsuui su ƃelai lòno da Gɛsɔŋ-ŋai é pɛ́lɛ Melali-ŋai dîa, yɛ̂ɛ berei Yâwɛɛ è mò la Mose mai. Dí dílônii-sinaai kélee lòno yɛ̂ɛ berei dísuui káa la da dínâŋ-ni dípɛrɛ-ŋai, nyii-ŋai díkoraŋ káa é síɣe kóraŋ buu saaƃa ma é tóo buu lɔ́ɔlu ma, nyii-ŋai da pɔ̂ri tíi kɛ̂i Zua kɔlɔ seɣe pɛrɛ maa waai mui. Dísuu-ŋai dílaa ká ŋí da dínɔŋba-ŋai. Koa-ŋai díkɛ̀ a wála feerɛ, ŋuŋ lɔ́ɔlu mɛi pôlu buu lɔ́ɔlu (2,750). Gɛsɔŋ-ŋai díkɛ̀ a wála ŋuŋ feerɛ, buu lɔ́ɔlu mɛi-da pôlu buu saaƃa (2,630). Melalli-ŋai díkɛ̀ a wála saaƃa, ŋuŋ feerɛ (3,200). Gélee púɔɔ gîe ma è kɛ̀ a wála lɔ́ɔlu mɛi saaƃa, pôlu ŋuŋ lɔ́ɔlu pôlu buu lɔ́ɔlu mɛi saaƃa (8,580).

⁴⁹Mose è ǹûai lòno yɛ̂ɛ berei Yâwɛɛ è mò la mai. Ǹûai ŋí dí díkpîri-ŋai sìɣe tɛi-tɛi dí dítii-ŋai kɛ́ yɛ̂ɛ berei Yâwɛɛ è mò la Mose mai.