Read Kpelle Nɔŋba 6 Bible Online

Nɔŋba 6 - Kpelle bible

Nɔŋba 6

¹Nya ƃe Yâwɛɛ è mò Mose ǹyɛɛi,

²“M̀ó Eezuɛ-ŋai dîa yɛɛi, à kɛ̀ surɔ̂ŋ kpaa nɛnî à góno tèe a gɛɛ é kɛ́ a Nazirɛ-nuu, a gɛɛ é gbîŋ tɛɛ ḿbɔ,

³fɛ̂ɛ é tée ŋwãai kpeleɛɛ ma da kpele-sɛŋ kpanaŋ kélee. Vé kpele-sɛŋ sii kélee kpèle nyii gbɛtɛɛ̂i a ŋwãai kpona kpaa máŋ kpɔmɔ-ƃa ya. Vé máŋ kpɔmɔ-ƃa ŋunu mìi kpaa máŋ gbála nyii da gbɛtɛ a ŋwãai.

⁴Ŋɔkono-tee tãi ma, vé kpɔmɔ-ƃa da kélee mìi nyii da gbɛ̀tɛ a ŋwãai, gáo kpaa máŋ gala kpîŋ.

⁵“Ŋɔkono-tee tãi ma, vé kɔli pɛ̂lɛ ŋuŋ ma é lɛ́ɛ la zu ŋɔkono-tee tãi é kpɛ́ɛ. Fɛ̂ɛ é kɛ́ a núu maa waa, ŋuŋ kpiriɛ.

⁶Tãi ma a gbîŋ tɛ̀ɛ la Yâwɛɛ pɔ́i, vé lɛ̀ɣɛ saa kɔlɛ.

⁷A nɛ̃ɛ ma kpîŋ ǹâŋ, ǹee, zaaƃɔlɔ-surɔ̂ŋ kpaa máŋ zaaƃɔ-nɛni da a sàa, vé lɛ̀ɣɛ ma, kpɛ́ni fêi, ŋɔŋuŋ-kpirii maa ŋɛi-kɛ-maai a nɛ̀ a gɛɛ è gbîŋ tɛ̀ɛ Ɣâla pɔ́.

⁸Tãi ma a nâa gbîŋ tɛ̀ɛ la Yâwɛɛ pɔ́i, màa waâi Yâwɛɛ ŋɛ́i.

⁹“Ǹyaŋ núu da à sàa gɔlɛ kpɔ́ nɔ́ ŋ̀á ma, nyii pâi ŋɔŋuŋ-kpirii maa ŋɛi-kɛ-maai su karâi, gɛ̀ ní fɛ̂ɛ é ŋuŋ ƃó a vóloi ǹɔ́ɔlu mɛi feerɛ ɣelei nyii gáa a ŋɔmaa waa-ɣelei.

¹⁰É pá a tòloŋ feerɛ kpaa máŋ popo-loni feerɛ zâla láa soŋ-nuui pɔ́ Zua kɔlɔ seɣe pɛrɛ maa waai lá a vóloi ǹɔ́ɔlu mɛi saaƃa ɣelei.

¹¹Zâla láa soŋ-nuui é dɔnɔ kula a ŋɔsɔnyɔ̂ŋ su-mɛni-lɛɛ sala kpɛ́ni fêi è lɛ̀ɣɛ zaai ma é gbelii kúla a kéreŋ sala. Fɛ́ɛ zâla láa soŋ-nuui é nyíŋi kɛ́ a gɛɛ zɔnyɔ̂ŋ kɛ́-nuui é maa waa-laa sɔlɔ ƃó. A kɛ̀ tí, fɛ̂ɛ é ŋɔŋuŋ-kpirii maa-kono-tee kɛ́ ŋɔ́nɔ a nina a ma-ɣelei tɔnɔi tí.

¹²É gbîŋ tɛɛ Yâwɛɛ pɔ́ ŋɔkono-tee ɣele-ŋai mɛni ma. É ŋɔ́nɔ pá a ƃála-sirɛ nyii gáa a kóraŋ tɔnɔi, a ŋɔmɛni nyɔ́mɔɔi maa-sala. Kɛ́lɛ tãi nyii a tɛɛ̂i, dífa ŋɔ́nɔ zìɣe a tãi tí da kpɛ́ni fêi, ŋɔŋ-kpirii maa-waa-laai è kàra.

¹³“Nazirɛ-ŋai dítɔ̂ŋ ká ŋí. Vóloi Nazirɛ-nuui ŋɔkono-tee-tãi a kpɛ̂ɛ lai, dí lí la Zua kɔlɔ seɣe pɛrɛ maa waai lá.

¹⁴É sâla kula Yâwɛɛ ma a taa-tulɛ saaƃa nyii-ŋai pɔ́ɔ fé diai. Kóraŋ tɔnɔ ƃala-sirɛ kéreŋ-sala mɛni ma, kóraŋ tɔnɔ ƃala, sɔnyɔ̂ŋ sala mɛni ma é pɛ́lɛ ƃala-sirɛ tɔnɔ ma lii-see sala mɛni ma.

¹⁵É ŋɔ́nɔ sâla kula Yâwɛɛ ma a tɛ́-sɛŋ féu kpolo kpɔlɔ tɔnɔ, kpólo-ƃela kpaya-kpaya nyii-ŋai dí kpɛtɛ̂ɛi a felaƃa da wúlɔi, da kpólo ƃela fɛŋ-fɛŋ-ŋa nyii-ŋai tɛ́-sɛŋ fé dísui, dí wúlɔ sia dîa, é pɛ́lɛ mii-sɛŋ-sala ma da kpele-sɛŋ-sala ma.

¹⁶“Zâla láa soŋ-nuui é sɔnyɔ̂ŋ su-mɛni-lɛɛ salai da kéreŋ sala kula a dia é dítɛɛ Yâwɛɛ pɔ́.

¹⁷É m̀ala-sirɛi kúla a lii-see sâla da dɛ́-sɛŋ féu kpolo kpɔlɔ tɔnɔi, é pɛ́lɛ mii-sɛŋ-salai ma da gbele-sɛŋ salai é dítɛɛ Yâwɛɛ pɔ́.

¹⁸Nazirɛ-nuui é ŋ̀uŋ ƃó Zua kɔlɔ seɣe pɛrɛ maa waai lá é ŋuŋ-leɣa pú ŋɔŋ ŋá nyii gáa nii-see salai kéreŋ-mɛni mai.

¹⁹“Zâla láa soŋ-nuui é m̀ala-sirɛ ɣíliɛi gâraŋ dɔnɔ siɣe é dɛ́-sɛŋ fe-zu kpolo-ƃela kpaya-kpayai dɔnɔ kula gbɔ̂lɔi su da gbolo-ƃela fɛŋ-feŋɔɔ-ŋai dɔnɔ é dílaa Nazirɛ-nuui yée ŋá ŋuŋ ƃóɔ pôlu ma.

²⁰Nàa pôlu ma, zâla láa soŋ-nuui é dítɛɛ Yâwɛɛ pɔ́ a soŋ nyee-ŋa sala. Díkaa a sama-sãa maa waa-ŋa zâla láa soŋ-nuui mɛni ma é pɛ́lɛ m̀ála sii-la ma da ŋwɛ́rɛ. Nyíŋi pôlu ma, Nazirɛ-nuui a pɔ̂ri ŋwãai kpelêi.

²¹“Nazirɛ-nuui a góno tèe ŋɔtɔ̂ŋ-ŋai ká ŋí. Ŋɔsama-sɛŋ a dɛ̀ɛ Yâwɛɛ pɔ́i é kɛ́ nɔ́ yɛ̂ɛ berei dɔ̂ŋ a mò lai é kúla nyii-ŋai pôlu a pɔ̂ri gɛ̂i. Kɛ́lɛ à kɛ̀ Nazirɛ-nuu a sama-sɛŋ da kpɛ́ni maa-kono-tee kɛ̀ é kúla nyii-ŋai pôlu díkaa dɔ̂ŋ lá-woo mai, fɛ̂ɛ é díŋa-see kɛ́ yɛ̂ɛ berei è mò lai.”

²²Yâwɛɛ è mò Mose ma a gɛɛ é

²³mó Eelɔŋ ma da ǹônii dîa a gɛɛ fɛ̂ɛ dí lûwa láa Eezuɛ-ŋai dîa a ŋ̀óo-ŋai ŋí:

²⁴Yâwɛɛ é lûwa láa kâa é ká mɛi káa.

²⁵Yâwɛɛ é gɛ́ ŋ̀ɛ́i é pono ká túɛ é káƃɛlɛ-see.

²⁶Yâwɛɛ é ŋ̀ɛ́i mu siɣe kâa é lii-see tɛɛ kápɔ.

²⁷“Bere ƃé fɛ̂ɛ dí ńaa see la Eezuɛ-ŋai dîa, ńyaŋ ŋa pâi lûwa lâai dîa.”