Read Kpelle Maka 2 Bible Online

Maka 2 - Kpelle bible

Maka 2

¹Mɛni kpɔ̂lu a pâi lâai kâa káai ka lâa kágbìŋ-ŋai ŋá a kpíni ká mɛni nyɔ́mɔ kpɛ̀tɛ é pîlaŋ káƃarai dîa, ɣele a ƃɔ̀ ká gɛ́ a dia, kpɛ́ni fêi maa wala-wala-laa káa káyêei.

²Da núu da kpɛ́ni ŋɔlɔii maa liî tèe dí ziɣe. Da núu da kpɛ́ni ŋɔpɛ́rɛi maa liî tèe dí gula ǹyêei. Da núu fìli da ŋɔnûai dí díkɔliŋ kula díyêei.

³M̀ɛni ma, Yâwɛɛ è mò ǹyɛɛi, “Ka gáa, ńdɔɔ̂i kâa. Ŋa mɛni nyɔ́mɔɔ kpɛtɛ̂i kámɛni ma nyii káŋuŋ fé pâi kulâi zui. Káfe pâi ŋɔ́nɔ siâi a yoŋka-pere kpɛ́ni fêi, a pâi kɛ̂i a mɛni kpɔ̂lu ɣele.

⁴Maa ɣêlei tí, da pâi malôŋ wule ŋí toôi é pîlaŋ kâa: ‘Da kú su kara. Yâwɛɛ a kúlɔii kúla kúyêei a dɛ́ɛ kúkpɔara-ƃelai pɔ́.’ ”

⁵M̀ɛni ma tãi a sèri a gɛɛ dí ǹɔii ŋáa kɔ́lɛ Yâwɛɛ ŋɔnûai loai, káfe pâi da sɔlɔ ƃôi.

⁶Ǹûai dí mò ḿâ dîyɛɛi, “Ífe Ɣâla ŋɔwóoi ƃò kûa. Ɣâla fé pâi kúŋumɛi.

⁷Í lâai-la Eezuɛ-ŋai díkaa foo-woo mu? Yâwɛɛ líi fé kpele ni? Í lâai-la a pɔ̂ri m̀ɛni-ŋai ŋí kɛ̂i? Va pɔ̂ri mɛni lɛ́lɛɛ kɛ̂i dɔ̃yâ-ƃelai dîɛ?”

⁸Yâwɛɛ è zu tòo ǹyɛɛi, “Ka ŋánûai sòŋ yɛ̂ɛ ká kɔ́ɔyɔ̃ɔ-ŋa. Da díseɣe-ŋai sèe kayêei a sɛ́ɣɛ, káfa ŋɔ́nɔ dɛ̀ɛ dípɔ pôlu.

⁹Bɔɔ-nɛyãai da dípɛrɛ-ŋai sèe káyêei a sɛ́ɣɛ, da wàla maa tée, káfa dɛ̀ɛ dípɔ pôlu. À kɛ̀ tí, ka dínîa-pɛlɛɛi fîli, ká ŋálûwai kúla dí yêei.

¹⁰Ka kámu siɣe ká lí ká kɛ̂i fé ŋɔ́nɔ ƃɛ́, kpɛ́ni fêi, kásɔnyɔ̂ŋ a ƃɛ́ kara kpɔ́ kpɔlɔwɔ.

¹¹“Núui nɔ́ zɛŋ-kula yêei-kɛ-ƃelai da díwoli tɔ̀ɔ mai, ǹyaa ƃa lɛ́ɛ ɣâla-woo ƃó nuu nyii a kɛ̂ tɛɛ̂i gɛ́ mò ǹyɛɛi, ‘Ŋá pà Ɣâla-woo ƃôi káa a gɛɛ ká lɔɔ támaa sɔlɔ ƃó ká gbèle.’

¹²“Ŋa pâi Eezuɛ-ŋai ŋáa-tɛ̂i ma nyii-ŋai lɛ̀ɛ Eezuɛ lɔii sui. Ŋa pâi dí tɔɔ̂i ŋ́duɛ yɛ̂ɛ ƃála-mɛi káa-nuu a ŋɔƃála-ŋai kùla kóraŋ su gɛ́ lì a dia kala ŋá, ǹyaŋ kálɔii láa a pâi ŋɔ́nɔ fɛ̂ɛi a nûa támaa.”

¹³Yâwɛɛ a pâi berei kulâi a dîa é díkula luɛ-laa su. A pâi gêtii wôloi díperei dí tɛ́ɛ. Yâwɛɛ ǹyaa kpîŋ ƃé pâi kɛ̂i a díkâloŋ, gɛ́ ƃò dítuɛ.