Read Kpelle Neeuŋ 1 Bible Online

Neeuŋ 1 - Kpelle bible

Neeuŋ 1

¹Ɣâla ŋɔworɛ̂-wooi ká ŋí é pîlaŋ Ninivɛ ma. Gɔlɔi bîlaŋɔɔ̂i Neeuŋ ŋɔzĩ̂ai ma nyii kùla Eekɔi.

²Yâwɛɛ káa a tólo Ɣala, gɛ́ mɛni nyɔ́mɔɔ kula maa kɛ̂, gɛ́ mɛni gba kùla a lii-ŋwâna pere. Yâwɛɛ a tɔ̂ŋ pù diai dîa mɛni ma dí tɔɔ̂i mai.

³Wála-wâla-laa káa Yâwɛɛ yêei, kɛ́lɛ ǹíi ŋwana la fé nɛ̃ɛ ní. Ǹyaŋ a pâi zɔnyɔ̂ŋ-ƃelai kùla maa kɛ̂i. Ƃɛ́i Yâwɛɛ a sîa naai, fãa su kpanaŋɔɔ a tɛ̂ɛ naa, ǹyaŋ ŋ̀ele-kɔ̂lɔŋ kolei ƃa gɔ́ɔ ŋá muluŋ.

⁴A gɛ́ Yúo é kpála da ǹyá lêe-ŋai kélee. A gɛ́ Basãŋ lɔii da Kamɛɛ Yeei ma wuru-ŋai dí fɔ̃ya, Lɛƃanɔŋ wuru poa-ŋai dí kpála.

⁵Ǹyée kpaya-kpaya da kpɛ̃liŋ Yâwɛɛ ŋɛ́i túɛ, ǹyée pɛlɛ-pɛlɛɛi dí séɣeŋ gɔ́ɔ mu. Ǹɔii da zãai kélee ŋ̀éniɛi sui dí lɛ́ɛ kpɛ́ni-kpɛni ŋ̀ɛi-tuɛ.

⁶Gbɛ̂ɛ ƃa pɔ̂ri tɔɔ̂i Yâwɛɛ ŋɔlii-ŋwânai túɛ? Gbɛ̂ɛ ƃa pɔri ǹíi kpelêi Yâwɛɛ ŋɔwála-wala lii-ŋwana fãai yêei? Ŋɔlii-ŋwânai a pâ yɛ̂ɛ ŋɔŋ, é gɔni-ŋai ƃéla-ƃela.

⁷Yâwɛɛ sɔŋ lɛ̂lɛɛi, wála-wala kɛ́tɛ káa ǹyêei é diai kúla mɛnii dí láai lai, tãi mɛni kpɔ̂lu a pâ lai.

⁸Kɛ́lɛ a pâi ŋɔkpɔara kwaa-ŋai ma su karâi a ya fɛ̂ɛ kɛ́tɛɛ, é ŋɔkpɔara-ƃelai pú kpînii wɔ́lɔ-wɔlɔ da wɔ́lɔ-wɔlɔ.

⁹Lé mɛni nyɔ́mɔɔ ƃé ƃa gbɛtɛ̂i íkili-ŋá Yâwɛɛ mɛni mai? A pâi ímɛni kpɛtɛɛi su karâi wɔ́lɔ-wɔlɔ da wɔ́lɔ-wɔlɔ. Núu da fa mɛni nyɔ́mɔɔ kɛ̀ la gîei feerɛ.

¹⁰Berei máŋ Ɣâla ŋɔkpɔara-ƃelai kɛ́ɛi la yɛ̂ɛ ŋalêŋ kpɔlɔ a sìa gîei, a pâi dísu-kara yɛ̂ɛ berei ŋɔŋ a kala kpâla kèreŋ lai.

¹¹Núu da fé kula ní kásama é mɛni nyɔ́mɔɔ kpɛtɛ Yâwɛɛ láa ma da ŋwana lɔ̂ɔ mɛni?

¹²Nya ƃe Yâwɛɛ è mò ǹyɛɛ, “Berei máŋ Asiria tâmai la dí wála-walai, ŋa pâi dísu karâi. Berei máŋ ŋá mɛni ŋánaa kɛ̀ la a káai, fé pâi ŋɔ́nɔ da kɛ̂i a káa.

¹³Ŋa pâi kákpɔara-ƃelai díkɔŋ ma kpɔnɔ̃i kulâi kákɔŋ ma ŋá díyɔlɔi kúla kákɔɔ ma.”

¹⁴Yâwɛɛ a tɔ̂ŋ tɛɛ kámɛni ma ǹyɛɛi, “Kálaa fé pâi ŋɔ́nɔ kɛ̂ɛ ɣele ma. Ŋa pâi Káɣâla-ŋai su-karâi. Ŋa pâi káƃolôŋ kpɛtɛ̂i, ka pâi sai.”

¹⁵Ka gáa, ŋ̀orɛ̂-woo ƃó-nuui kɔ́ɔ mu tiŋ káa tɛ̂i ǹyéei su gɛ́ pà a duŋ lɛ́lɛɛi lii-sêe mɛni ma! Óo Zuda-ƃela, ka kɛ́ nɔ́ kúu kɛ̂i ḿâ, ká kákono têe-ŋai ŋ̀aa-see kɛ́, kpɛ́ni fêi, ŋ̀wana lɔ̂ɔ nuui fé pâi pâi ŋɔ́nɔ kápɔ a saa.