Read Kpelle Neeuŋ 2 Bible Online

Neeuŋ 2 - Kpelle bible

Neeuŋ 2

¹Íkpɔara-nuui a pá gêtii lá-ƃerei. Ka berei su káa. Ka káƃɛ̂tii ɣíri a gbanaŋɔɔ. Ka kákɔ-kɔ seɣe-ŋai tóo kâa.

²Ǹyaŋ Yâwɛɛ káa Zeeka ŋɔwála-walai tɛɛ̂i bɔ́ pôlu yɛ̂ɛ berei è gɛ̀ la a ŋɔkpɔara-ƃelai dí lɛ́ɛ pâi ǹyee mɛi ɣâlei.

³Ŋɔkɔ-kuluƃa-ŋai dí kɔ́-kɔ sãai a kpɔ̂lu, dímaa ɣîri seɣe-ŋai díkɛ kpɔ̂lu. Díkɔ-kɔ seɣe-ŋai da kpɔ̂lu. Da kɛ̀ kîrɛ siɣêi díkɛɛ yɛ̂ɛ ŋɔŋ a kɛ̀ lenîi, zia-ƃela díkɛ pìli-pili.

⁴Gɔ́-kɔ keleŋ-ŋai dí pìli daai su a kîrɛ, díkɛ lɔ̀-lɔ bɛ́rɛ-ŋai loai, díkɛ fòlo yɛ̂ɛ kpáleŋ leŋ, díkɔɔ mu tiŋ kɛ́ tɛ̀ yɛ̂ɛ ŋ̀ele-gbâna.

⁵Da gɔ́-kɔ-ƃelai tóli, díkɛ kàreŋ, díkɛ lì, díkɛ lì a kîrɛ ziɣãŋ ma. Da díkɔ-kɔ sãai ŋáa tɛ̂i ma gɔ́-kɔ kwaai ma.

⁶Ziɣãŋ lá kpéli-ŋai ǹyái lái, lá a ƃó, gâloŋ ŋɔpɛ́rɛi mu kɛ́ ƃò wúlee.

⁷Da lí a ŋɔkâloŋ nɛnii luɛ lâa su. Ǹyée mu-nɛyãai da malôŋ see ƃôi yɛ̂ɛ tòloŋ, díkɛ díkeŋe lá lòkwa.

⁸Ninivɛ kɛ̂ɛi yɛ̂ɛ póa a kpàla. Dí ǹaa-ƃelai kélee sóŋ díkɛ lì a dia díkɛ wɔ̀lɔ dîyɛɛi, “Ka tée kûa! Ka tée kûa!” Kɛ́lɛ núu da fé ŋ̀óli tɔɔ ní dîa.

⁹Ka gáne-ŋai síɣe, ká gôo-ŋai síɣe! Tɔɔ sãa táma káa daai su, kpaa máŋ sɛŋ sɔ̃ɔ kpanaŋɔɔ támaa.

¹⁰Ninivɛ a lɛɛ a vólo! Ǹûai díkɛ fòa, díkɔɔ ma kɛ́ kpɛ̃̀liŋ, dílii kɛ́ sɛ̀lɛŋ, díŋɛi yoloɔɔ.

¹¹Ǹyála-sûlu koraŋ kɔɔ, ƃɛ́i ǹyála-sûlu lonii da kâa kɛ̀ naa ǹyála-sûlui kɛ́ pà a díkɔnɔ̃ŋ, ƃɛ́i da ka kɛ̀ naa sɛŋ da fa lɛ̂ɣɛ dîai?

¹²Ǹyála-sûlui a sua támaa pàa é dísu tée-tee záa mɛni ma da ǹônii. A ŋɔkóraŋ láa fɛ̀ɛ a sua tée-tee.

¹³Ŋ̀wála-wâla kélee Yâwɛɛ a môi, ǹyɛɛ, “Gáa, ńdɔɔ̂i yâ, ŋa pâi íkɔ-kɔ keleŋ-ŋai kérenîii, ƃóa-sɔ̂kpɔ é íkɔ kɔ́-ƃelai páa. Ŋa pâi íkɔnɔ̂ŋ kpɛɛ̂i ǹɔii ma, núu fé pâi ŋɔ́nɔ íworɛ̂-woo ƃó-ƃelai wóo mɛnîi.”