Read Kpelle Neeuŋ 3 Bible Online

Neeuŋ 3 - Kpelle bible

Neeuŋ 3

¹Kpalo-ƃêlai ŋãa taai ma, ǹáa fɛ̂ɛ a lɛ́ɛ kɛ́ɛ, ƃɛ́i kɔsôŋ sãa tâmai naa, ǹyaŋ da pâi gulâi díyêei.

²Vaai tíŋ, gɔ́-kɔ keleŋ kɔ́ɔ mu tiŋ, zoo-ŋai pili tîŋ da gɔ́ kɔ́ keleŋ ɣála tiŋ kulâai!

³Zoo sia-ƃelai díkɛ nɔ́ lì, m̀óa sɔ̂kpɔ-ŋai díkɛ kɛ̀ mãla-mãla, zɔla-ŋai díkɛ fòlo, núu pôma támaa púɔɔ nyii núu fa pɔ̂ri lônoi, díkɛ kàreŋ a dia!

⁴Ŋ̀úlu-wulu kɛ́ nɛnii ŋɔwulu-wulu kɛ́ɛi su, a núu ɣála ma ŋɔtûa pere nyɔ̂ŋ su, gɛ́ lɔii ŋûŋ-ŋa pìli mɛnîi ŋɔwulu-wulu kɛ́ɛi su da diai díkaa gɔlɛ mai.

⁵Ŋ̀wála-wâla kélee Yâwɛɛ a môi ǹyɛɛi, “Ninivɛ, ńdɔɔ̂i yâ, ŋa pâi ímaa sêɣe tɛ̂i ɣelei ŋá bɛlɛ íŋɛi, ŋá ǹɔii ŋûŋ-ŋai kɛ́ dí íkaŋ káa, ŋá gɛ́ lɔii kpîniŋ-ŋa dí íŋumɛi káa.

⁶Ŋa pâi ímaa nɔ̃̂ɔi, ŋá íkɛ a nyɔ́mɔɔ, ŋá íkɛ a ɣɛ́lɛ maa sɛŋ.

⁷Ŋa pâi ǹûai kélee kɛ̂i da íkaa dí dípôlu tɔɔ yâ díkɛ mò dîyɛɛ, ‘Ninivɛ su a kara. Gbɛ̂ɛ ƃé pâi wɔ̂lɔi m̀ɛni mai? Mí ƃé ŋa pâi nûa kâai naa dí díŋaa kpɛ̂i?’ ”

⁸Ninivɛ, ímaa mɛni kpanaŋɔ̂ɔi é tɛ́ɛ Tɛbi taa leei ma nyii gáa a Ize ŋɔtaa-lêe kɛ́tɛi? Ǹâai Ya-leei tínaŋɔ̂ɔi ma yɛ̂ɛ siɣãŋ m̀ɛi káa mɛni ma.

⁹Itiopia da Ize lɔii ƃe kɛ̀ a ŋɔwála-walai, ǹyaŋ dífe kpera ní kpɔ̂nii dîa. Ǹûai kɛ̀ Pô lɔii sui da Lebia-ŋai ƃé kɛ̀ a ŋɔkpɔŋ maa-ƃelai.

¹⁰Berei máŋ è kɛ̀ tí lai, dí Tɛbi taa-leei wôlo dí lí a zu-ƃelai luɛ la su. Dí ǹîa-pɛlɛɛi pâa, dí lí a díkɔ̃liŋ kélee, dí ǹúu ŋuŋ tuɛ-ƃelai kélee pú yɔlɔ ŋá.

¹¹Yá máŋ ya pâi kɛ̂i yɛ̂ɛ lɔɔ kpele-nuu. Pɔri fé pâi kɛ̂i yɛ̂. Ƃa pâi kpɔ̂ŋ mâ wɛ̂lii íkpɔara-ƃelai yêei.

¹²Ítɔɔ sãai kélee káa yɛ̂ɛ fîi wuru a ƃa, dí dúmo é pú dí mii.

¹³Ka ƃɛ́ káa, kákɔ-kuluƃa-ŋai díkaa yɛ̂ɛ nɛyâa kásama. Kásiɣãŋ-ŋai láa ƃóɔɔ kákpɔara-ƃelai túɛ. Ŋɔŋ a pâi kasiɣãŋ lá sãai kélee kérenîi.

¹⁴Ka yá tĩyɛ gɔ́i é lɛ́ɛ pâi kásiɣãŋ maa tínanîi. Ka kákpîŋ kpɛtɛ kásiɣãŋ mɛi káa mɛni ma. Ka pɔ̂rɔ yɔ́ɔŋ ká bileki-ŋa kpɛtɛ ká bûi kɛ́ ziɣãŋ tɔɔ mɛni ma.

¹⁵Berei máŋ ká nyíti kɛ̀ lai, ŋɔŋ a pâi kákerenîi, ƃóa-sɔ̂kpɔ kɛ́ kásu tèe-tee yɛ̂ɛ berei gotó a sɛŋ têe lai. Kátâmai yɛ̂ɛ gotó kpaa máŋ zãi!

¹⁶Kápɔni tɔɔ-ƃelai da táma yɛ̂ɛ berei pɛ́mɛlɛŋ-kao tâmaai lai. Kɛ́lɛ kátɔɔ sãai da pâi koônii yɛ̂ɛ gotó a kooŋ.

¹⁷Kálônii díkaa yɛ̂ɛ zai-ŋa, kákɔlɔ pɔ̃yɛ-ƃelai díkɛ ƃò yɛ̂ɛ gotó-ŋa ƃé pɛlɛ̂nii kóraŋ ma a ɣele wâla, vóloi a kùla, dí koôŋ dí lí ƃɛ́i núu da fé naa kɔ́lɔŋ.

¹⁸Óo Asiria kaloŋ, ílɔii-kpîniŋ mɛi káa-ƃelai da saa. Inuu kpaya-kpayai díkaa nyiî wɔ́lɔ-wɔlɔ da wɔ́lɔ-wɔlɔ. Ínûai táa-taai ǹyée-ŋai su, núu da fé naa é pá a dia ŋɔ́nɔ pôlu.

¹⁹Lii-sêe fé íyêei, ísɛŋ sôlii maa su a kɛ̂tɛi. Diai kélee da ímaa tûŋ mɛnii, da díyee ŋa lòkwa. Núu da káa naa ífe nii mɛni nyɔ́mɔɔ kɛ́ ní la?