Read Kpelle Abaku 1 Bible Online

Abaku 1 - Kpelle bible

Abaku 1

¹Ŋ̀orɛ̂-wooi ká ŋí Yâwɛɛ è dɛ̀ɛ ŋɔlóno kɛ́-nuui Abaku pɔ́ é pîlaŋ ǹûai díwôya mɛnii ma.

²Óo Yâwɛɛ, ŋa ímarê kɛ́ kpɔŋ mâa mɛni ma a tãi su kôyaa, lé mɛni ƃé ífe íwoli tɔɔ̂i la ḿâi? Kpaa máŋ ŋa wɔ̂lɔi, kpɛ́ni fêi, da ŋwana-lɔɔ kɛ́ a ńyãa, ǹyaŋ ífe ḿâloi?

³Lé ƃé ƃa gɛ̀ ŋ́gɛ mɛni nyɔ́mɔɔ-ŋa ŋɛ́i kàa da mɛni kpɔ̂lu-ŋai? Núu su-kara-ƃela da ŋwana-lɔ̂ɔ kɛ́-ƃela díkaa ŋ́gɔlɛ ma, laa-sâa da woo-taa-taa kɛ́ ƃò ḿbôlu.

⁴Mɛni ma dɔ̂ŋ la-wooi ŋá-see fé kɛ́ ní, tɔ̃yâ-mɛni kɛ́ɛ fa kɛ̂ naa. Ŋ̀wana-lɔ̂ɔ-ƃelai yée tɛɛ̂i dɔ̃yâ-ƃelai dîa, mɛni ma tɔ̃yâ-laa su a kara.

⁵Yâwɛɛ è mò ŋɔnûai dîa ǹyɛɛi, “Ka káŋɛi sía ǹɔii-ŋûŋ-ŋai su, a pâi kɛ̂i a guláa a káa kpɛ́ni fêi, ŋátii-ŋai ŋa gɛ̂i kákɛ̀ ɣéniɛi sui, da mò kâa, káfe pâi lâai la.

⁶Ka ƃɛ́ káa, ŋa nûa tɛɛ̂i dí kúla Babelɔŋ-lɔii su, díkaa a ŋwana-lɔ̂ɔ-ƃela, dílii ŋwânai, da siâi ǹɔii gwaa kélee a gɛɛ dí pá dí taa-ŋa siɣe nyii vé a dípɔɔi.

⁷Dímaa pɔlɔ-pɔ̂lɔi, nûa díkɛ yào dîa. Da dítɔ̂ŋ-ŋai kpɛ̀tɛ dia kpîŋ yɛ̂ɛ berei da ŋ̀wɛ̂lii lai.

⁸“Dísoo-ŋai kɔ́ɔ maa félaai é tɛ́ɛ kɔ́li ma, díkpeɣeɛɛi é tɛ́ɛ lɔɔ-ɣîla ma nyii a tûa a purui. Dísoo-sia-ƃelai da sîa a dísoo-ŋai a yoŋka-pere. Tɔ̃yâ ma dísoo-sia-ƃelai da kûla kwaa kôyaa ma. Da kôoŋ yɛ̂ɛ kuɛ a kɛ̀ yenîi gɔ́nɔ̃ŋ soŋ mɛ̂ni ma.

⁹“Díkelee da pà ŋwana-lɔɔ kɛ́-mɛni ma. Da kɛ̀ pâi, ǹúai kélee da kɛ̂ yaôi. Dí kɔ-sôŋ-ŋai tâmaai yɛ̂ɛ ŋãya.

¹⁰Da ɣɛ́lɛ-maa kûla kâloŋ-ŋa kponôi, da ǹuu-ŋuŋ-tuɛ-ƃelai kɛ́ a dípele-kɛ-sɛŋ. Da ɣɛ̂lɛi daa-lêe ŋai dîa dímaa tínaŋɔ̂ɔi a siyãŋ. Da pɔ̂rɔ ŋáa tɛ̀ ma yɛ̂ɛ yeŋkêŋ dí tɛ́ mɛi dí daai kúla.

¹¹Ǹyaŋ dí tɛ̀ɛ naa yɛ̂ɛ fãa kɛ́tɛ dí lí. Dítûa-pere fé lɛ́lɛ ní, díwala-wâlai ƃa díɣâlai!”

¹²Óo Ŋáɣâlai Yâwɛɛ, yái ímaa waai, ífe ɣele ma wɔ́lɔ-wɔlɔ da wɔ́lɔ-wɔlɔ? Ífe ǹɛɛ naa kú sáa. Óo Yâwɛɛ kúkili tɔɔ̂i ya. Yá óo kú Kɔnii, ƃa gɛ́ Babelɔŋ-ŋai da wála-wâla da pá a mɛni ŋa-téɛɛ kúmɛni ma. Ya díkpɛtɛ kúkula-maa kɛ́ mɛni ma.

¹³Yái ífe ŋ̀wɛ̂lii í íŋɛi pɛ́lɛ sɔŋyɔ̂ŋ mai, yái ífe wɛ́li-ni a wôya-mɛnii, lé mɛni ƃé ƃa ǹɛɛ naa ŋ̀wana-lɔ̂ɔ-ƃelai díkɛ sɔŋyɔ̂ŋ kɛ̀ nɔ́, lé ƃé ƃa ŋ̀wana-lɔ̂ɔ-ƃelai kâai la díkɛ mɛni nyɔ́mɔɔ kɛ̀ a ǹúui zɔŋ lɛ̂lɛɛi é tɛɛ dîa, í mɛi saá nɔi?

¹⁴Ƃa núu-kpune kɛ́ yɛɛ ǹyã́ɛ-ŋai yúo sui, díkaa yɛ̂ɛ tɔara-sãa nyii-ŋai dímɛi-nuu fé mai.

¹⁵Da dí sòŋ a kpawɔ, dí díɣala a dítumai dí dípu dísooi su, m̀ɛni ma dílii nɛ̃ɛ̂i dímɛni ma.

¹⁶M̀ɛni ma da sâla kùla dítumai mâ dí kéreŋ-sɛŋ kúŋ nɛ̃ɛ kéreŋ dí sóoi ma, kpɛ́ni fêi dítumai da dí sóoi a dí kɛ́ a tɔɔ-ƃela, ǹyaŋ dímii-sɛŋ a kɛ̂ a nɛ̃ɛ.

¹⁷Gáa a seŋ Babelɔŋ-ŋai ŋí díkɛ nɔ́ a mɛni ŋa tée-ƃela núu mɛni ma? Gáa a sɛŋ díkɛ ǹɔii-ŋûŋ-ŋai wôlo nɔ́ a tãi kélee wɔ́lɔ-wɔlɔ da wɔlɔ-wɔlɔ?