Read Kpelle Abaku 2 Bible Online

Abaku 2 - Kpelle bible

Abaku 2

¹Ŋá pâi tɛ̂i yeŋkêŋ ŋá, ŋá mɛni maa kpɛ́ɛ, ŋá gáa m̀ɛnii Yâwɛɛ a pâi môi ḿâi, ǹyaŋ ŋa pâi gâai berei a pâi ŋ́oo su toôi la é pîlaŋ ŋásɔŋ-pu-maai mai.

²Yâwɛɛ è ŋ́oo su tòo ǹyɛɛ, “Zĩ̂ai ŋí pɔ̃yɛ. Bɔ̃yɛ a gbaya-kpaya, núu é máŋ kɛ́ kîrɛ siɣêi é pɔri ǹônoi.

³Kɛ́lɛ zĩ̂ai fé niî pá ní. Gáa pâi a maa félaa. Vé a lɛ́ɛ. A wàla kɛ́ pâi a maa-felaa, maa kpɛ̂ŋ kɛ́. Tɔ̃yâ ma a pâi pâi, nàa fé pâi tûai.

⁴Gáa, ǹúui nyii vé a tɔ̃yâ-nuui a pâi saâi, kɛ́lɛ dɔ̃yâ-nuui a pâi ƃâloi ŋɔlaa-laai sârai.”

⁵Tɔɔ-lâa káa a núu-pɛlɛ-sɛŋ. Sɛŋ wɛ̂li-nuu a yoŋka tèe, ǹyaŋ dí líi fa lâa, dí kaa nɔ́ yɛ̂ɛ ŋ̀aa-mûa-taa ƃɛ́i ǹaa láa fa fɛ̂ɛ, dí káa nɔ́ ǹaa-ƃela kɔ̂rii a tãi kéleei! M̀ɛni ma zɛŋ wɛ̂li-ƃelai da kɛ̂ nɔ́ ǹɔii-ŋûŋ-ŋai kélee yée mɛi ɣâlei, díkɛ zu-ƃela kélee kɛ̀ a dí pɔ́ɔ.

⁶Ǹûai ŋí kélee da pâi sáŋ sɔɔ̂i é pîlaŋ mà, díkɛ ɣɛ́lɛ-maa kùla gbonôi dîyɛɛi, “Kpalo ƃêlai ǹúui ma a sɛŋ sɔlɔ ƃô nyii bɔ́ɔ fêi, gɛ́ sɛ́ɣɛ-ŋa ŋáa tɛ̀ mai! Tãi nênɛ ƃé a pâi kperâi la m̀ɛnii ŋí kɛ̂i?”

⁷Ífe gɔ́lɔŋ íkpa-soŋ-ƃelai da pâi dímu siɣêi a maa félaa dí tɔ́ɔ yâ, ǹyaŋ ǹûai ŋí dí íkɛ í kpɛ̃lîŋ? Ǹyaŋ ƃa pâi kɛ̂i a dípɔɔ.

⁸Ƃa lɔii-ŋûŋ támaa su-sãa siɣe. Diai lɛ̂ɛ pôlui, da pâi í wɔ̂i siɣêi a wála-wâla kpɛ́ni fêi, ƃa mɛni nyɔ́mɔɔ támaa kɛ́, ƃa núu támaa páa ǹɔii su da diai díkaa daa kpaya-kpaya-ŋai sui.

⁹Kpalo ƃêlai ǹúui ma a sɛŋ sɔlɔ ƃô a wôya-pere ŋɔpɛ́rɛi mɛni ma, é ŋɔpɛ́rɛi tɔ́ɔ ɣelêi a gɛɛ mɛni nyɔ́mɔɔ fé seri mai.

¹⁰Ƃa pá a ŋumɛ ípɛrɛi mu. Ƃa íkpîŋ su kara, kpɛ́ni fêi, ƃa núu támaa páa.

¹¹Ípɛrɛ kaŋ su koni-ŋai da pâi lônoi é pîlaŋ ímɛni nyɔ́mɔɔi ma, ǹyaŋ bɛ́rɛ-kpãya-wûru-ŋai da pâi mu soŋ-nîi.

¹²Kpalo ƃêlai ǹúui ma a taa tɔ̂ɔ a ŋãai, é daa-lêei tɔ́ɔ wôya-pere sui!

¹³Ǹûai da tíi kɛ̀ dífii kɛ̀ kpɛ̀ɛ kpɛ́ni-kpɛni, díi nyii kélee da gɛ̀i, a pâi kéreŋ nîi, ǹyaŋ Yâwɛɛ nyii gáa a Ŋ̀âla-wala-kélee Ɣalai ƃe a gɛ̀ tí.

¹⁴Ǹɔii láa a pâi fɛ̂ɛi a Yâwɛɛ ŋɔfólo-laai, yɛ̂ɛ berei ǹyá-ŋai da yúo láa fɛ̀ɛ lai.

¹⁵Kpalo ƃêlai ǹúui ma a gɛ̀ gɔlɛ ma-ƃelai dí díkpele ŋɔlii ŋwâna kɔɛɛi sui, é gɛ́ díkɛ kɛ̀ tàka-taka yɛ̂ɛ núu a lɔɔ kpêle!

¹⁶Ŋumɛ a pâi ísonîi, ífe pâi laa-maa tɛ̂ sɔlɔ ƃôi. Íkpele yâi máŋ a pâi í kɛ̂i tàka-taka! Yâwɛɛ ŋɔkpele-kɔɛɛi gáa ǹáa-mii-yee mɛi, a pâi í ŋumɛ̂i ínuu kɛ́tɛ-laai su!

¹⁷Ŋ̀wana-lɔ̂ɔ tuai í gɛ̀ Lɛƃanɔŋ lɔii sui, a pâi pâi pôlu ípɔ. Zua-ŋai kélee í ƃàai, da pâi pâi dí ímaa yáo. Nyíŋi a pâi kɛ̂i kpɛ́ni fêi ƃa núu támaa páa, ǹyaŋ kpɛ́ni fêi ƃa mɛni nyɔ́mɔɔ támaa kɛ́ a ǹûai dítaa-lêe-ŋai su, da dílɔii-ŋûŋ ŋai su.

¹⁸Lé ƃé ƃa pâi gulâi núu-kpɛtɛ ɣâla yêei. Gbɛtɛ-nûui a lâa a zɛŋ è gbɛ̀tɛ nyii vá lônoi.

¹⁹Kpalo ƃêlai ǹúui ma a mò wúru gbua ma, “Íŋɛi lá ƃó.” Gɛ́ mò kɔni ma nyii vá mɛni mɛ̂nii, “Ímu siɣe í tɔ́ɔ!” Nyíŋi a pɔ̂ri mɛni lɛ̂i? Gáa, gbɛtɛ̂ɛi a gôo da káne, ǹyaŋ ǹɛ̂wo fé gbonôi.

²⁰Kɛ́lɛ Yâwɛɛ káa ŋɔpɛ́rɛ maa waai mu. Tɔɔ ǹɔii kélee é m̀ɛi sáa ŋ̀ɛ́i túɛ.