Read Kpelle Abaku 3 Bible Online

Abaku 3 - Kpelle bible

Abaku 3

¹Ɣâla ŋɔlóno-kɛ-nuui Abaku ŋɔɣâla-fɛli-wooi ká ŋí wule-woo su.

²Óo Yâwɛɛ, ŋá m̀ɛnii mɛ́ni é pîlaŋ ítii-kpaya-kpaya-ŋai dîa. M̀ɛni ma ḿbɛlɛ a pû a dámaa ítii-ŋai mɛni ma. Ítii-ŋai lɛ́ góraŋ-ŋai ŋí su. Ítii-ŋai lɛ́ ŋɔ́nɔ góraŋ ŋí su. Ílii ŋwânai su, maloŋ-kâa é kɛ́ naa.

³Ɣâla è kùla Temaŋ-lɔii su ǹyaŋ Ǹúui Maa Waai é kúla Paraŋ Yeei ma. Ŋɔfólo-laai è Ɣâla-taa sîɣe é ŋ̀ele-kɔlɔŋ mɛi pɛ́lɛ, ǹyaŋ ǹɔii láa è kɛ̀ a vɛ́ɛ a ŋɔlaa-maa tɛ̂i.

⁴Ŋɔfólo-laai è kɛ̀ yɛ̂ɛ kwaa ponoɔɔ, maa kpãle kɛ́ kùla ǹyêei, ǹyaŋ nàa ƃé è ŋɔwála-walai lòo naa.

⁵Kɔlɔ-fela-ŋa díkaa dúɛ pere, saa kɛ́ ƃò bólu pere.

⁶À tɔɔ ǹɔii è kpɛ̃liŋ, à kwaa kâa, ǹɔii-ŋûŋ-ŋai dí kpɛ̃liŋ. À kɛ̀ tí, ǹyée-ŋai wɔ́lɔ-wɔlɔ kɛ̀ naai, dí taa-taa, dí lɔ́ ǹɔii mu, ƃɛ́i a kâa tɛ̀ɛ naa a bɔlɔi.

⁷Ŋa Kúsaŋ-ƃelai kâa díkɛ yào a dámaa dí sua-kɔlɔ-pɛrɛ-ŋai mu mɛni kpɔ̂lu su. Ǹûai kɛ̀ bɛ́rɛi mu Midiaŋ-lɔii sui díyao dí kpɛ̃lîŋ.

⁸Óo Yâwɛɛ, ílii ŋwânai káa ǹyá-lêe-ŋai dia? Ílii ŋwânai káa ǹyá-ŋai mɛni ma? Kpaa máŋ ílii ŋwânai yúo ma, tãi í kɛ̀ la íkɔ-kɔ-soo-ŋai pôlu, íkɔ-kɔ-keleŋ su íkɛ lì a kɔ́ kpɛ́ siai?

⁹Ya íkerâŋ kúla daâi, ya ítɔ̃ai sée gerâŋ ŋá. Ƃa ǹɔii ŋáa kɔ́lɛ a ǹyá-lêe-ŋai.

¹⁰Ǹyée-ŋai dí íkàa, dí kpɛ̃lîŋ. Ǹyái è tɛ̀ɛ dímɛi ƃɛ́i naa siŋɔ̂ɔi, naa-tiŋ kɛ́ kùla, ǹyái ŋɔzikɛ-zikɛ kɛ́ tɛ̀ ɣelêi.

¹¹Vóloi da ŋáloŋ dí kɛ̀ nɔ́ tɔɔ̂ni dítɔɔ̂i, tãi ítɔ̃a-ŋai dí kɛ̀ fôloi la díkɛ tɛ̀ɛ, yɛ̂ɛ ŋ̀ele-gbâna ŋɔmãla-mãlai.

¹²Ƃa sia ǹɔii su a lii-ŋwâna. Ƃa sia ǹɔii-ŋûŋ-ŋai mɛi a lii-ŋwâna.

¹³Í lì ínûai ƃálo mɛni ma da ǹúui í íyee lɛ̀ mai. Í zɔnyɔ̂ŋ ƃelai ŋuŋ tuɛ ǹúui su kara dípɛrɛi é lɛ́ɛ a gbolôŋ.

¹⁴Ítɔ̂a-ŋai dí gɔ́-kuluƃai ƃɔ́ ŋɔpôlu-ƃelai sáma diai da pà yɛ̂ɛ fãa kɛ́tɛ a gɛɛ díkutaa-tâai, díkɛ lii-nɛ̃ɛ kulâi, kpɛ́ni fêi, dí kɛ́ gâai da pâi gôlo-ƃelai lúwanîi nyii ŋai kɛ̀ loo-pere su.

¹⁵Ƃa sia yúo su a íkɔ-kɔ-soo-ŋai vile kɛ́ tɔ̀ɔ.

¹⁶Ŋa díŋ mɛ̀ni, ḿaa kɛ́ kpɛ̃liŋ, díŋ è gɛ̀ ńagbɔ é kɛ́ soo-soo, ŋ́gao kɛ́ sàa ŋ́gbonôi, záza kɛ́ ńdòo. Ŋá pâi ḿɛi saâi ŋá tãi maa kpɛ́ŋ tãi mɛni-kpɔ̂lu a pâi lâai la diai dîa da ŋ̀wɛ̂lii dí kúsu karai.

¹⁷Berei máŋ fîi-wurii fé pâi poâi lai, kpaa máŋ kpɔmɔ-kpalaŋ é ƃá, mii-sɛŋ fa lɛ̂lɛ gbâlaŋ ŋá, m̀ála-ŋai dífe pâi lɛ̂ɛ díkoraŋ su, ǹyaŋ daa-tûlɛ díkoraŋ-ŋai dí lɛ́ɛ a vólo,

¹⁸berei máŋ è kɛ̀ tí lai, ŋa pâi lii-nɛ̃ɛ kulâi, Yâwɛɛ sârai, ŋá lii nɛ̃ɛ kúla Ŋáɣâlai mɛni ma nyii gáa a ŋáƃalo nuui.

¹⁹Ŋ̀wála-wâla kélee Yâwɛɛ ƃa ŋáwala-walai. A ŋ́gɔɔ kɛ́ yɛ̂ɛ lóma kɔɔ, é gɛ́ ŋá pili kwaa kôya-koya-ŋa mɛi.