Read Kpelle Zɛfɛnâya 1 Bible Online

Zɛfɛnâya 1 - Kpelle bible

Zɛfɛnâya 1

¹Yâwɛɛ ŋɔwóoi è pà Zɛfɛnâya pɔ́ nyii kɛ̀ a Kôsi ǹóŋ, Kôsi nyii kɛ́ a Gɛdalia ǹóŋ, Gɛdalia kɛ́ ƃò a Amarîa ǹóŋ, Amarîa kɛ́ ƃò a Ɛsekaya ǹóŋ. Ŋ̀orɛ̂-wooi ŋí è pà ƃɔ́ tãi Amoŋ ǹóŋ Zosâya è kɛ̀ la a kâloŋ Zuda lɔii sui.

²Yâwɛɛ è mò ǹyɛɛi, “Ŋa pâi ǹɔii-su-sãai kélee su karâi,

³núu-kpune da lɔɔ-sûa kélee, ŋá ŋɔni-ŋai su kara da ǹyɛ̃ɛ-ŋai. Ŋa pâi ŋ̀wana-lɔ̂ɔ-ƃelai yée mɛi ɣâlei, ŋa núu-kpune kula ǹɔii ma. Núu tɔnɔ kpîŋ fé pâi lɛɛ̂i ɣele ma.

⁴“Ŋa pâi ńyee pɛlɛ̂i Zuda ma da diai kélee díkaa Zerusâlɛŋ. Ŋa pâi ǹúu-kpɛtɛ ɣâlai Bêe su karâi da ŋɔsâla láa-soŋ-ƃelai é pɛ́lɛ díkɔ̂liŋ kélee ma. Ŋa pâi dísu karâi kpɔ́ núu da fa gɔ̀lɔŋ a gɛɛ díkɛ ƃɛ́ a tãi tɔnɔ ta.

⁵Ŋa pâi ǹûai kélee su karâi nyii-ŋai da pɛ̂lɛ díŋume ŋá dípɛrɛ-ŋai kɔŋ-ma díkɛ ŋ̀elei su sãai fɛ̂lii. Diai da pɛ̂lɛ díŋume ŋá díkɛ dífòo a ńaai, ǹyaŋ díkɛ ŋɔ́nɔ dífòo a ǹúu-kpɛtɛ ɣâlai Milekɔŋ laai.

⁶Ŋa pâi diai su-karâi da kûla ḿbôlui, da diai dífa ŋ́gɔ̀ri kpaa máŋ dí marê kɛ́ a gɛ́ɛ ŋá dímɛi kaai.”

⁷Ímɛi sáa Ɣâla Yâwɛɛ ŋɛ́i túɛ! Yâwɛɛ ŋɔmɛni ŋátee ɣelei a seri. Yâwɛɛ aâ gbîŋ kpɛ̀tɛ a gɛ̀ɛ é ŋɔnûai kúla a sâla. Ǹyaŋ aâ nûa tóli a gɛɛ dípa.

⁸Ǹyaŋ Yâwɛɛ ŋɔsâlai kula ɣêle, Yâwɛɛ è mò ǹyɛɛ, “Ŋa pâi tɔ̂ŋ kpɛ̂i ǹúu-ŋuŋ-tuɛ-ƃelai da gâloŋ-lonii dîa da diai da dímaa ɣîri a ǹɔii da kpɛ́ni su-ƃela maa-ɣîri perei.

⁹Maa ɣêlei tí ŋa pâi tɔ̂ŋ kpɛ̂i diai kélee dîa da ǹɔii da kpɛ́ni su ɣala-ŋai fɛ̂lii da diai da dímɛi-nûui ŋɔpɛ́rɛi láa fɛ̀ɛ a ŋúma-sãa nyii dínuu pàa díkɛ zìɣei.”

¹⁰Yâwɛɛ è mò ǹyɛɛ, “Maa ɣêlei tí láɣi-woo a pâi kulâi ziɣãŋ lá-ƃerei nyii da dòli a Ǹyɛ̃ɛi, wɔ́lɔ-wôo é kúla daai m̀éla veerɛ ma, su-kâra tiŋ kɛ́tɛ é kûla ǹyée-ŋai dîa.

¹¹Óo káai ká seɛɛ káa ǹɔ́ɔ-kpâlaŋ ŋái, ka gbêɣe tóo, kpɛ́ni fêi, da bɔni-tɔɔ-ƃelai kélee páa da diai kélee da sɛŋ-kao maa fâleŋ.

¹²“Maa ɣêlei tí ŋa pâi Zerusâlɛŋ maa kpɛɛ̂i a lâŋpo, ŋa diai kɔ́ri ŋa dí kula maa kɛ́ nyii-ŋai dílii lâai dísɔnyɔ̂ŋ sui, da diai dífe kpáaŋ ní ḿaa mɛ̂ni mai. Ŋa pâi diai kula maa kɛ̂i da mò dîyɛɛ, ‘Yâwɛɛ fé pâi mɛni da kɛ̂i a kúai.’

¹³Da pâi díkɔ̂liŋ kulâi díyêei a wála-wâla-laa, dípɛrɛ-ŋai dí lɛ́ɛ a gbolôŋ. Berei máŋ da pâi pɛ́rɛ-ŋa tɔɔ̂i la díkpîŋ mɛni mai, vé pâi kɛ̂i a dípɔɔ, berei máŋ da pâi kpɔmɔ-kpâlaŋ-ŋa lâai lai, dífe pâi maa-ŋwã̂ai da kpelêi.”

¹⁴Yâwɛɛ ŋɔɣele kɛ́tɛi a lɛɣɛ, ǹyaŋ a pâi a maa-felaa! Yâwɛɛ ŋɔpa-ɣelei a pâi kɛ̂i a mɛni kpɔ̂lu-ɣele. A pâi kɛ̂i a mɛni kpɔ̂lu-ɣele nyii pâi gɛ̂i ŋ̀wála-wâla-nuui a pâi wɔ̂lɔi naa.

¹⁵A pâi kɛ́i a tɔŋ-kpɛ́-maa ɣêle, maloŋ-too-maa ɣêle, mɛni kpɔ̂lu, mɛni-sôli ɣele, da su-kâra-ɣele. Maa-ɣêlei tí a pâi kɛ̂i a kpíni núu fa kwaa maa káa. Maa-ɣêlei tí ŋ̀ele-kɔ̂lɔŋ-kolei a pâi kɛ̂i a zu kpíniɛɛ.

¹⁶A pâi kɛ̂i a kɔ́-kɔ tûru fɛ́ɛ ɣêle, kɔ́-kɔ-ƃela díkɛ làɣi tãi da kɔ́ pɛ̀lɛ la daa-lêe-ŋai dîa nyii-ŋai dímaa tínaŋɔ̂ɔi a siɣãŋ-ŋai yeŋkêŋ kôyaa-ŋa díkɛ ƃò naai.

¹⁷Yâwɛɛ è mò ǹyɛɛi, “Ŋa pâi mɛni kpɔ̂lu lâai núu-kpune ma kpɛ́ni fêi da sɔnyɔ̂ŋ kɛ́ a ńyãa. Pɔri mâ fé pâi kɛ̂i dîɛ yɛ̂ɛ ŋ̀ɛ́i-pu-nuu nyii gáa berei kɔ̂rii. Díŋãa a pâi pûi yɛ̂ɛ yá. Ǹyaŋ dípoma a pâi lûlai ǹɔii ma.”

¹⁸Dísɛŋ-kao-kolei da dígôoi fé pâi díkulâi Yâwɛɛ ŋɔlii-ŋwânai su a ma ɣêlei tí. Ŋɔtólo lii-ŋwana kpɛɛ pôlui su, a pâi ŋ̀éniɛi kélee su-karâi. Tɔ̃yâ ma a pâi ǹɔii-su-ƃelai kélee su karâi a maa félaa.