Read Kpelle Zɛfɛnâya 2 Bible Online

Zɛfɛnâya 2 - Kpelle bible

Zɛfɛnâya 2

¹Óo lɔii-ŋûŋ, yái ŋume fé yâi, kpɔŋ tóo,

²Ka kpɔŋ tóo ka falâa koôŋ la yɛ̂ɛ da sɛŋ fɛ̂ɛ a lâa. Yâwɛɛ ŋɔlii-ŋwânai fa-lâa pá la kápɔ tãi ŋɔtɔ̂ŋ-kpɛ-maa ɣelei a pâ lai.

³Ka tínaŋ Yâwɛɛ pɔ́ káai kálii maa yeŋɔɔ̂i ǹɔii sui, káai kà ŋɔtɔ̂ŋ mɛi kâai, ká mɛni sãa kɛ́. Ka ká maa yéŋ Yâwɛɛ ŋɛ́i-tuɛ tãi da ka pɔ̂ri kɛ̂i a káloɔɔ a Yâwɛɛ ŋɔlii-ŋwâna ɣelei.

⁴Geza taa-leei a pâi lɛɛ̂i a vólo, Asikɛlɔŋ taa-leei é lɛ́ɛ kpɛ́ni-kpɛni. Da pâi Asɔdɔ-ŋai yée mɛi ɣâlei a fólo tɛ́ɛ ŋuŋ ma tãi, dí Ɛkulɔŋ-taai wólo. Da pâi ǹaa su karâi núu tɔnɔ kpîŋ fé pâi lɛ̂ɛi naa.

⁵Kpalo ƃêlai kâa káai a Felesia-ŋai ká káa ǹyái kóo ma Keena-ŋai dílɔɔi sui kpɛ́ni fêi m̀ɛni ŋá téeɛi ŋí káa máŋ ká mɛni ma.

⁶Óo káai a Felesia-ŋai ká káa Yúo kɔlɛ mai, kálɔii a pa kɛ̂i a lɔɔ-pûŋ ƃɛ́i ƃála-mɛi-káa-ƃela nɔ́ ƃé pâi kɛ̂i naa díƃûui púɔ naa dímɛni ma da díƃala-ŋai.

⁷Yúo kɔlɛ ma lɔii a pâi kɛ̂i a pɔɔ-sɛŋ Zuda ŋɔpɛ́rɛi mu-ƃelai mɛni ma nyii-ŋai pâi lɛɛ̂i ɣele mai. Nàa a pâi kɛ̂i a díkpâlaŋ ŋá dítaa tûlɛ-ŋai mɛni ma. Da pâi ǹyîi Asikɛlɔŋ ŋɔpɛ́rɛ-ŋai mu a ɣele wûlii ǹyaŋ Yâwɛɛ a pâi dímɛi kâai é díƃalo.

⁸“Ŋá Môa-ŋai da Amɔŋ-ŋai dílono nyɔ́mɔɔ-ŋai mɛ̂ni da gɛ̂i ŋánûai dîa da díyoŋka-teɛɛi da gɛ̂i ŋánûai dílɔii kpîniŋ mɛi.”

⁹Nya ƃe Ŋ̀wála-wâla kélee Ɣalai, Eezuɛ-ŋai Díɣâlai è vòo ǹyɛɛi, “Tɔ̃yâ kpîŋ ma, tãi nɔ́ ŋ́gaa la ɣele mai, Môa a pâi kɛ̂i yɛ̂ɛ Sodɔŋ, Amɔŋ-ŋai da pâi kɛ̂i yɛ̂ɛi Gomora, ŋalêŋ kpɔlɔ a pâi kɛ̂i naa da fɛ̃ɛ-kpâlaŋ tee-tee yɛ̂ɛ ƃɛ́i da mii-kpolo kula naai. Ŋánûai nyii-ŋai lɛ̂ɛ a dífului, da pâi ǹaa yée mɛi ɣâlei, dí dísãâi kúla díyêei, dí sée dílɔii ma.”

¹⁰Nyíŋi a pâi kɛ̂i a dítɔ̂ŋ kpɛ́-maai, díyoŋka téɛɛi mɛni ma, kpɛ́ni fêi, da ɣɛ́lɛ-maa kúla Ŋ̀wála-wâla kélee Yâwɛɛi ŋɔnûai kponôi díkɛ yoŋka tèe dímɛi.

¹¹Yâwɛɛ a pâi mɛni-kpɔ̂lu lâai ŋɔkpɔara-ƃelai dîa. Tɔ̃ya ma, a pâi díɣâla-ŋai kélee su karâi ŋ̀éniɛi su. Ǹɔii-ŋûŋ tɛi-tɛi kélee a pâi pɛlɛ̂i gɔ́ɔ mu, dí vɛli díkpɔɔi lɔii-ŋai su tɛi-tɛi.

¹²Óo Itiopia-lɔii su-ƃelai, ŋa pâi ká pâai a ŋáƃoa-sɔkpɔi.

¹³Ǹyaŋ Yâwɛɛ a pâi Asiria-lɔii su karâi. A pâi Ninivɛ taa-leei kɛ̂i yɛ̂ɛ fɛ̃ɛ-kpâlaŋ su.

¹⁴Ǹɔɔ-sua-ŋai da pâi kɛ̂i Ninivɛ. Sua sîi támaa da pâi kɛ̂i nyiî daa-lêe-ŋai bilêŋ ŋá. Mûu-ŋa da pâi kɛ̂i fâai wôna ŋai lá, gɔ̃ɔ-ŋai wóo kɛ́ tɛ̀ɛ bɛ́rɛ-ŋai mu. Da pâi sîda wuru-ƃelai kulâi ká pɛ́rɛ-ŋai dîa.

¹⁵Nyíŋi ƃé kɛ̀ a daa-lêei nyii kɛ̀ dɔɔ́, maa tínaŋɔɔ a siɣãŋ, lii-nɛ̃̂ɛ kɛ́ ƃò ǹaa-ƃelai dîa, dí kɛ́ mò dîyɛɛ, “Itɔɔi kɛ̂tɛi é tɛ́ɛ daa kpéli-ŋai dîa.” Ká gáa berei káa ǹaa è la a vólo é kɛ́ a lɔɔ-sûa-ŋa kɛ̂i! Núui kélee a tɛ̂ɛ nàai, fɛ̂ɛ é ŋuŋ kpɛ́mɛŋ.