Read Kpelle Zɛfɛnâya 3 Bible Online

Zɛfɛnâya 3 - Kpelle bible

Zɛfɛnâya 3

¹Kpalo ƃêlai Zerusâlɛŋ taa-leei ma dɔɔ̂i Ɣâla mai, gɛ́ ŋɔnûai lûwaŋ!

²Va núu wóo mɛni, va ǹyée see lia-wôo mu. Vé láa ní a Yâwɛɛ, va lɛ̂ɣɛ Ɣâla kɔlɛ ma.

³Ŋɔgɔmɛnɛ-ƃelai díkaa yɛ̂ɛ yala-sûlu kpéɣɛɛ-ŋa. Ŋɔmɛni-sâa ƃó-ƃelai díkaa yɛ̂ɛ ɣele-wûlii lɔɔ-ɣila-ŋa nyii-ŋai dífa mii-sɛ̂ŋ kélee lɛ̀ɛ naa é lɛ́ɛ la zu ɣele é ƃɔ.

⁴Ɣâla ŋɔlóno-kɛ-ƃelai naai, maloŋ-kaa fé díyêei, láa-laa fé díyêei. Ŋɔsâla láa-soŋ-ƃelai da ƃâa kùla m̀ɛnii ma gáa a mɛni-maa-waa, da dɔ̂ŋ kàra.

⁵Kɛ́lɛ Yâwɛɛ káa dísama. A tɔ̃yâ-mɛni kɛ̀, va mɛni nyɔ́mɔɔ kɛ̀. Ɣele-wâla kélee a ŋɔtɔ̃yâ-laai lɛ̂, ɣele ƃɔ́ɔ kélee va fɛ̂ɣɛ, kɛ́lɛ ŋumɛ fé wôya-nuu ma.

⁶Yâwɛɛ ǹyɛɛi, “Ŋa ǹɔii-ŋûŋ-ŋai su kàra, ŋá dísiyãŋ da díyeŋkêŋ-ŋai wólo. Ŋá bere-ŋai loai kâra, núu fá ŋɔ́nɔ tɛ̀ɛ naa, ŋá dítaa-lêe-ŋai wólo, ǹaa a lɛɛ a vólo.

⁷Ŋá mò ńyɛɛ, tɔ̃yâ ma a pâi yaôi mâ, a pâi ŋália-wooi siɣêi, vé pâi ŋ̀ɛ́i nâŋinii m̀ɛnii kélee mɛi ŋá nɛ̀ mai. Kɛ́lɛ dí kɛ̀ nɔ́ dísɔnyɔ̂ŋ-ŋai pôlu.”

⁸Yâwɛɛ è mò ǹyɛɛ, “Maa kpɛ́ŋ nɔ́ tãi ŋa pâi mu siɣêi la a gɛɛ ŋá sere-faa kɛ́. Kpɛ́ni fêi ŋá mɛni-kpɛtɛɛi ƃà a gɛɛ ŋá ǹɔii-ŋûŋ-ŋai kélee pú gîe ma ŋá dí tóli a gɛɛ ŋá ŋálii-ŋwânai pú dîa, ŋá núu kula-maa kɛ́ yɛ̂ɛ ŋɔŋ nyii ǹɔii kélee kèreŋ.

⁹“Tɔ̃yâ ma, maa ɣêlei tí ŋa pâi ǹûai lóno-woo ma fálenîi a gɛɛ dí lóno a zã́a, a gɛɛ díkelee dí ńaa tóli dí tíi kɛ́ ḿî a woo-kɛ-zu tɔnɔ.

¹⁰Ŋánûai diai da ḿvɛ̂li dítaa-taai ǹyá-lêe-ŋai pôlu Itiopiai, da pâi pâi a dísama-sãai ḿbɔ.

¹¹Maa ɣêlei tí dífe pâi íŋumɛ̂i ímɛni nyɔ́mɔɔ-ŋai ƃa gɛ́ a ńyãai m̀ɛni ma, kpɛ́ni fêi, ŋa pâi ǹyoŋka ƃela kpɛ́ni-kpɛni-ŋai kulâi kásama, ǹyaŋ yoŋka-nuu fé ŋɔ́nɔ pâi kɛ̂i ŋáyee maa waai ma.

¹²Kpɛ́ni fêi, ŋa pâi ŋa-yêŋ-ƃela da woo-mɛni-ƃela lɛ̂i kásama. Da pâi díkɛ̂i kɔ̂rii ńyãa Yâwɛɛ ńaai su.

¹³Diai lɛ̀ɛ pôlu Eezuɛi, dífe pâi mɛni nyɔ́mɔɔ kɛ̂i, dífe pâi lɛ́ɛ kɛ̂i, dífe pâi lɛ́ɛ kɛ̂i kpaa máŋ núu-pɛlɛ-wôo é kúla díla. Da pâi dílaa miî dí nyíi, sɛŋ da fé pâi dímaa yaôi.”

¹⁴Óo Zãiyɔŋ ǹóŋ-nɛnii, láɣi a wule-woo, óo Eezuɛ, láɣi! Óo Zerusâlɛŋ ǹóŋ nɛnii, lii nɛ̃̂ɛ kula a ílii kélee!

¹⁵Yâwɛɛ a kátɔŋ-kpɛ́ maai síɣe pôlu, a kakpɔara-ƃelai kélee su kara. Eezuɛ ŋɔkâloŋ Yâwɛɛ káa ká kɔlɛ ma. Káfe ŋɔ́nɔ yòo.

¹⁶Maa ɣêlei tí da pâi môi Zerusâlɛŋ ma, “Óo Zãiyɔŋ, ífe yào, ífe nɛ̀ɛ naa íyee su é sáa.

¹⁷Íɣâlai Yâwɛɛ káa íkɔlɛ. Ŋɔwála-wala-laai à gɛ̀ íyee é tɛ́ɛ íkpɔara-ƃelai dîa. A pâi lii-nɛ̃ɛ kulâi í mɛni ma, a pâi ísɔnyɔ̂ŋ su-mɛni lɛɛ̂i ŋɔwɛ̂li-kɛ-maai mɛni ma. A pâi wule toôi é lii-nɛ̃ɛ kula ímɛni ma

¹⁸yɛ̂ɛ da kɛ̀ kúu kɛ̂i.” Yâwɛɛ è mò ǹyɛɛ, “Ŋa pâi íkulâi mɛni-kpɔ̂lui su a gɛɛ ífe ŋɔ́nɔ tɔŋ-kpɛ́-maa sɔlɔ ƃô.

¹⁹Gáa, maa tãi tí su, ŋa pâi mɛni kpɔ̂lu lâai íkpɔara-ƃelai dîa. Ŋa pâi gɔɔ-pu-ƃela kɛ̂i dí sía, ŋá kpáaŋ diai mɛ̂ni ma núu fé kpáaŋ ní dímɛni mai, ŋá díŋumɛ-mɛnii kɛ́ a láa-maa tɛ̂, ŋá laa-maa tɛ̂ tɛɛ dípɔ ǹɔii gwaa kélee.

²⁰Maa ɣêlei tí, ŋa pâi pâi a ínûai pôlu dípɔ-taai nyii-ŋai dí táa-tâai, tãi ŋa pâi dítôlii la kwaa tɔ̂nɔ mai. Tɔ̃yâ ma ŋa pâi ƃaa-kɛ-maa da láa-maa-tɛ̂ tɛɛ̂i kápɔ ǹûai kélee sáma ǹɔii su, ŋ̀elei ŋa pâi pâi la a ŋánûai pôlu ŋá dí kúla-luɛ-laa sui.”