Read Kpelle Zɛkɛrâya 1 Bible Online

Zɛkɛrâya 1 - Kpelle bible

Zɛkɛrâya 1

¹Dâlɔ kɛ́ɛ a kâloŋ Pɛsia-lɔii mɛi ŋɔkóraŋ feerɛi ŋɔɣáloŋ lɔ́ɔlu mɛi saaƃa su, Yâwɛɛ è worɛ̂ tɛ̀ɛ a ŋɔlóno kɛ́-nuui Zɛkɛraya nyii kɛ̀ a Beresa ǹóŋ nyii ǹâŋ ŋɔnàŋ láa è kɛ̀ a Idooi.

²Ŋ̀wála kélee Yâwɛɛ è mò Zɛkɛraya ma a gɛɛ é mó ǹûai dîa, “Ńyãai a Yâwɛɛ, ŋá kɛ̀ a ńii ŋwánaa kánuu-pɔ̂lɔ-ŋai dîa.

³Kɛ́lɛ ŋaâ nâa m̀ó káa, ka ŋɔ́nɔ tínaŋ ḿbɔ-naa-pere, ŋá pâi ŋɔ́nɔ tínanîi kápɔ-naa-pere.

⁴Káfe kɛ̀ yɛ̂ɛ kánuu-pɔ̂lɔ-ŋai. Tãi su kôya tɛ̀ɛ pôlu ma, ŋálono kɛ́-ƃelai dí ŋáworɛ̂-wooi ƃò dîa a gɛɛ dífe mɛni nyɔ́mɔɔ kɛ̀. Kɛ́lɛ dífe díwoli tɔɔ ní ḿâ kpaa máŋ dí ŋ́oo síɣe.

⁵Kánuu-pɔ̂lɔ-ŋai da Ɣâla ŋɔlóno kɛ́-ƃelai dífe ŋɔ́n ɣele ma.

⁶Ŋálono kɛ́-ƃelai sârai, ŋá tɔ̂ŋ tɛ̀ɛ kánuu-pɔ̂lɔ-ŋai pɔ́ da lia-wôo-ŋa, kɛ́lɛ dífe díwoli tɔɔ ní ḿâ, ǹyaŋ dí mɛni-kpɔ̂lu kàa a gɛɛ dí ŋ́gɔlɔŋ a gɛɛ ńyãa ƃa Ŋ̀wála-wâla kélee Yâwɛɛ ŋá díkula maa kɛ̀ yɛ̂ɛ berei è kɛ̀ la a ǹɛ́lɛɛ dímɛni mai, yɛ̂ɛ, berei ŋɔ́nɔ ŋá gbɛ̀tɛ la a gɛɛ ŋá gɛ́ a diai.”

⁷Dâlɔ kɛ́ɛ a kâloŋ ŋɔkóraŋ veerɛi su ŋɔɣáloŋ puu kao tɔnɔi (nyii da dòli a Siiƃa) ŋɔɣele-kûu buu-feerɛ kao náaŋ su, Yâwɛɛ è worɛ̂ tɛ̀ɛ a ńyãa zĩ̂a su a kpíni.

⁸Ŋá núu kàa seê-ni soo kpɔ̂lu mɛi gɛ́ sia la. Zooi è kpèra kpɔlɔ da su tiŋ-tiŋ ŋá, ǹyaŋ soo-ŋai dí kɛ̀ tɔɔ̂ni bôlu-pere da kpɔluɔ da pɔ̃yɛɛ, gbelii kɛ́ kole.

⁹Ŋá m̀arê kɛ̀ ńyɛɛi, “Ŋánuu-namui, zoo-ŋai ŋí díkaa lé mɛni ma?” Ŋ̀âla-taa-kelai è ŋ́oo su-tòo ǹyɛɛi, “Ŋa pâi dímaa mɛ̂ni su-kulâi lɛ̂i yâ.

¹⁰Yâwɛɛ ƃé dítɛ̀ɛ a gɛɛ dí lí dí ǹɔii su maa kpɛ́ɛ.”

¹¹Dí Ŋ̀âla-taa-kelai kíli-ŋa pòno dîyɛɛi, “Kwaa sia ǹɔii gwaa kélee, kwaa gáa a gɛɛ ǹɔii kélee seeɛ̂i tɔŋ.”

¹²È kɛ̀ tí, Ŋ̀âla-taa-kelai è mò ǹyɛɛi, “Óo Ŋ̀wála-wâla kélee Yâwɛɛ, ƃa ílii Ŋwána Zerusâlɛŋ ma da daa-lêe-ŋai díkaa Zuda-lɔii su kóraŋ buu lɔ́ɔlu mɛi feerɛ yée mu. Tãi ɣɛɛlu ƃé ƃa pâi ziɣêi í lɛ́ɛ pâi dímalôŋ kâai?”

¹³Yâwɛɛ è Ŋ̀âla-taa-kelai wóo su tòo a ŋanɛ̂nɛ woo-ŋa.

¹⁴Ŋ̀âla-taa-kelai è mò a gɛɛ ŋá m̀ɛnii kélee ƃó nyii Ŋ̀wála-wâla kélee Yâwɛɛ è mò ḿâi, “Wɛli-kɛ́-maa kɛ́tɛ káa ńii su Zerusâlɛŋ mɛni ma nyii gáa a ŋátaa-lêe maa waai da Zãiyɔŋ.

¹⁵Ǹyaŋ ńii ŋwânaai ǹɔii-ŋûŋ-ŋai dîa diai lii-nɛ̃̂ɛ káa díyêei da lii-sêei. Tãi ńii è kɛ̀ nîi a ŋwánaa la ŋánûai diai, ǹɔii-ŋûŋ-ŋai tí dí ŋánûai dímɛni-sôli-ŋai su kɛ̀tɛ.

¹⁶M̀ɛni ma ŋa pá pôlu Zerusâlɛŋ taa-leei su a gɛɛ ŋá ŋámalôŋ-kâai lɛ́ mà. Ŋá Ɣâla-pɛrɛ kɛ́tɛi a pâi pâi pôlu ŋátaa-lêei é tɔ́ɔ ŋɔ́nɔ pôlu.”

¹⁷Ŋ̀âla-taa-kelai è mò ḿâ a gɛɛ ŋá Ɣâla-woo ƃó máŋ: Ŋ̀wála-wâla kélee Yâwɛɛ a môi ǹyɛɛi, “Ŋátaa-lêe-ŋai da pâi ƃûu ƃôi ŋɔ́nɔ, ŋa pâi kpɔnîi Zerusâlɛŋ ma ŋɔ́nɔ é kɛ́ a ŋ́gbîŋ taa-lee.”

¹⁸Ŋá sua mĩla náaŋ kàa zĩ̂ai da kpɛ́ni su.

¹⁹Ŋá Ŋ̀âla-taa-kelai marê kɛ̀ nyii kɛ̀ lônoi ḿbɔi ńyɛɛi, “Zua-mĩla-ŋai ŋí su-kulâi ƃa lé?” È ŋ́oo su tòo ǹyɛɛi, “Dia ƃa ǹɔii su wala-wala-ƃelai diai da Zuda-ƃelai, Eezuɛ-ƃelai da Zerusâlɛŋ-ƃelai táa-tâai.”

²⁰Yâwɛɛ è kɔli-ɣale-nuu náaŋ lɛ̀ ḿâ.

²¹Nya ƃe ŋá m̀arê kɛ́ɛ kɛ̀ ńyɛɛi. “Gbakolo náaŋ dí pà lé kɛ̂i?” Nya ƃe è ŋ́oo su tòo ǹyɛɛi, “Dí pà a gɛɛ dí kɔ́ ǹɔii ŋûŋ-ŋai tí pɔ́ dí díyee mɛi ɣále diai da Zuda-lɔii wólo da zu-ƃelai kélee táa-tâai.”