Read Kpelle Zɛkɛrâya 7 Bible Online

Zɛkɛrâya 7 - Kpelle bible

Zɛkɛrâya 7

¹Dâlɔ kɛ́ɛ a kâloŋ ŋɔkóraŋ ǹáaŋ su worɛ̂-woo è kùla Yâwɛɛ yêei é pá Zɛkɛraya pɔ́ ŋ̀áloŋ ǹɔ́ɔlu mɛi náaŋ ŋɔɣele-kûu náaŋ su nyii da dòli a Kesilɛi.

²Nya ƃe ǹûai kɛ̀ Bɛtɛi dí Sarɛsɛ da Lɛgɛmɛlɛ tɛ̀ɛ da sinâa da-ni a gɛɛ dí Ŋ̀wála-wâla kélee Yâwɛɛ marê kɛ́ kpɔŋ-mâa mɛni ma,

³a gɛɛ dí zâla láa-soŋ-ƃelai marê kɛ́ Yâwɛɛ Ŋɔpɛ́rɛi mu da ŋɔlóno kɛ́-ƃelai a bere sîi ŋí, “Ǹɛ̂lɛɛi ŋá malôŋ see ƃé, ŋá suŋ siɣe ŋ̀áloŋ ǹɔ́ɔlui su yɛ̂ɛ berei ŋá wɔ́lɔ gɛ̀ la kóraŋ támaa yée mui?”

⁴Yâwɛɛ ŋɔwóoi è pà ḿbɔ́ ǹyɛɛi,

⁵“M̀ó ǹûai kélee dîa díkaa ǹɔii mai da zâla láa-soŋ-ƃelai. Tãi ká kɛ̀ sûŋ siɣêi la ŋ̀áloŋ ǹɔ́ɔlui da mɛi feerɛi su, ká kɛ́ malôŋ sèe ƃò góraŋ buu lɔ́ɔlu mɛi feerɛ ŋí yée mui, ká kɛ̀ gɛ̂i ḿɛni ma?

⁶Tãi ká kɛ̀ mii-sɛ̂ŋ miî la ká kɛ́ kákpele, káfe mii ní ká kɛ́ kákpele kákpîŋ mɛni ma?”

⁷Tãi Zerusâlɛŋ è kɛ̀ la a ǹáa fɛ́ɛ a núu-kpune da tɔɔ-sã̂a, ŋɔtaa-lêe-ŋai tínaŋɔɔ ma ǹɔii kwára-pere da diŋ-tiŋ kélee láa fɛ́ɛ a núu-kpunei, Yâwɛɛ ŋɔlóno kɛ́-ƃelai dífe ŋ̀óo-ŋai ŋí ƃó ní?

⁸Yâwɛɛ ŋɔwóoi è pà Zɛkɛraya pɔ́ ǹyɛɛi,

⁹“Ká mɛni-sâa ŋáa tée a zã́a, ká mɛni lɛ́lɛɛ kɛ́ kákîe-ni dîɛ, ká kákîe-ni malôŋ káa.

¹⁰Káfe mɛni nyɔ́mɔɔ kɛ̀ a pɔ́ɔ-nɛ̂ni, tee-lôŋ, ŋɔ̃́ya, kpaa máŋ kôlo-nuu, káfe mɛni nyɔ́-mɔɔ kpɛ̀tɛ kálii su kákîe-ni mɛni ma.”

¹¹“Kɛ́lɛ dífe díwolii tɔɔ ní, dí díkoôŋ tɛ̀ a dia dí díwoli láa tɛ́ a gɛɛ dífe mɛni mɛ̂ni,

¹²dí dílii su kpànaŋ yɛ̂ɛ kɔni a gɛɛ dífe díwoli tɔ̀ɔ dɔ̂ŋ ma da ŋ̀óo-ŋai ŋá dɛ̀ɛ ŋálono kɛ́-ƃelai maa-ŋuŋ-ŋai pɔ́ ŋámɔ̂leŋ sârai. M̀ɛni ma ńii è ŋwàna a gɛ́tɛ dímɛni ma.

¹³Tãi ŋá dítòli lai, dífe díwoli tɔɔ ní. M̀ɛni ma tãi dí ńdòli lai, fé ŋ́oli tɔ̀ɔ ní.

¹⁴Ǹyaŋ ŋá dítaa-taa dí lí ǹɔii gwaa kélee yɛ̂ɛ fãa kɛ́tɛ ƃɛ́i dífe kɛ́ ní a nàa kɔ́lɔŋɔɔi. M̀ɛni ma ǹɔii dí nɛ̀ɛ dípôlui, núu fé lɛɛ ní naa, núu fé ŋɔ́nɔ li ní naa, núu fé kula ní naa. M̀ɛni ma ǹɔii lɛ́lɛɛi tí è lɛ̀ɛ nɔ́ naa kpɛ́ni-kpeni.”