Read Kpelle Zɛkɛrâya 9 Bible Online

Zɛkɛrâya 9 - Kpelle bible

Zɛkɛrâya 9

¹Yâwɛɛ a pâi tɔ̂ŋ pûi Adura-lɔii ma da Dɛmɛika taa-leei. Kpɛ́ni fêi, daa-lêe-ŋai kélee díkaa Araŋ lɔii sui, díkaa a Yâwɛɛ pɔ́ɔ yɛ̂ɛ berei zîi-ŋai kélee díkaa Eezuɛ-lɔii sui díkaa a bɔ́ɔi.

²Ama máŋ nyii gáa gòyaŋ-pere mai, Taya da Sidɔŋ-ƃelai berei máŋ dítareɛ̂i lai, Yâwɛɛ pɔ́ɔ ƃa dîa.

³Taya-ƃelai dí siɣãŋ tînaŋ dí-taai ma dí sɛŋ-kao kole da gôo ŋá tɛ́ gîe ma yɛ̂ɛ muluŋ.

⁴Kɛ́lɛ Kúnuu-namui a pâi gɔ̃̂liŋ kélee kulâi ǹyêei é gélee píli yúo su é daa-lêei kéreŋ kpɔ́ kpɔlɔwɔ.

⁵Asikɛlɔŋ taa-leei a pâi gâai é yao. Ǹyaŋ Geza taa-leei líi a pâi sɛ̂lɛnii, Ɛkulɔŋ-ƃelai máŋ díkili-kɛ-zui é kpɛ́ɛ. Geza kaloŋ a pâi saâi, núu fé pâi lɛɛ̂i Asikɛlɔŋ taa-leei su.

⁶Yâwɛɛ è mò ǹyɛɛi, “Sîi támaa da pâi seêi Asɔdɔ. Ǹyaŋ ŋa pâi Felesia-ŋai díyoŋka-teei kperâi.

⁷Ŋa pâi dísua ŋãa miɛɛi kperâi da dí tĩ́ya-ŋai miɛɛ. Diai pâi lɛɛ̂i pôlui da pâi kɛ̂i máŋ a ḿbɔ, da pâi kɛ̂i yɛ̂ɛ Zuda ŋɔsuui su-ƃelai da, ǹyaŋ Ɛkulɔŋ a pâi kɛ̂i yɛ̂ɛ Zeƃusai-ŋai.

⁸Ŋa pâi siɣãŋ tínanîi ŋápɛrɛi ma ŋ́gɛ nàa mɛi kâa a gɛɛ kɔ-kûluƃa da fé lɔ̀ naa. Ŋwana-lɔ̂ɔ-nuu fé pâi ŋɔ́nɔ pɛlɛ̂i dímɛi, kpɛ́ni fêi, ŋá gàa berei dí mɛni-sôli kàa lai.”

⁹Óo lii-nɛ̃̂ɛ kúla Zãiyɔŋ-loŋ-nɛnii! Óo Zerusâlɛŋ ǹóŋ-nɛnii, láɣi ɣelêi! Gáa, íkâloŋ káa pâi ípɔ! Zã̂ai ƃálo-laa kɛ́ ƃò ǹyêei, ǹíi maa yeŋɔɔ, gɛ́ ƃò seêni wɛlɛ-sôo-loŋ mɛi.

¹⁰Yâwɛɛ ǹyɛɛi, “Ŋa pâi gɔ́-keleŋ-ŋai kulâi Ifiraŋ, ŋá gɔ́kɔ-sôo-ŋai kúla Zerusâlɛŋ-ƃelai yêei. Ŋa pâi gɔ́kɔ-keraŋ-ŋai su têei. Kákâloŋ a pâi a lii-sêe ǹɔii-ŋûŋ-ŋai pɔ́. Ŋɔlɔii su a pâi kɛ̂tɛi é síɣe yúo ma é tóo yúo ma. É síɣe ŋɔ́nɔ ǹyá-lêei ma é tóo ǹɔii kpɛɛ ŋá ma.”

¹¹Yâwɛɛ ǹyɛɛi, “À kɛ̀ a yá, yɛ̂ɛ berei ŋá ŋãa-sâlaŋ maa kôno tèe kɛ̀ la íyêei, ŋa pâi íkɔ-sôŋ-ŋai ŋuŋ ma ƃôi dí kúla ǹóai su ƃɛ́i yá fé naai.

¹²Káai a gɔ́-sôŋ-ŋai ka lene pôlu a kili-kɛ-zu kásiɣãŋ su. Sâa ŋa pâi kákɔ̂liŋ pɛlɛ̂i gîei feerɛ ŋá dɛɛ kápɔ.

¹³Ŋá Zuda kpíri yɛ̂ɛ ŋákerâŋ, ŋá Ifiraŋ kɛ́ a kerâŋ-ɣɛli. Óo Zãiyɔŋ, ŋa pâi ílônii kɛ̂i a ƃóa-sɔ̂kpɔ-ŋa Gurii-ŋai dílônii mɛi. Ǹyaŋ ŋa pâi íkɛ̂i yɛ̂ɛ kɔ-kûluƃa ŋɔƃóa-sɔ̂kpɔ.”

¹⁴Gɛ̀ ní Yâwɛɛ a pâi pâi dípɔ, ǹyaŋ ŋɔtɔ̃ai a pâi siâi yɛ̂ɛ ŋ̀éle-gbana-kao. Ŋ̀wála-wâla kélee Yâwɛɛ a pâi dúrii fɛ̂ɛi é lí vãa kɛ́tɛi su ǹɔii kwára-pere.

¹⁵Ŋ̀wála-wâla kélee Yâwɛɛ a pâi dímaa kɔ̃ɔ̂i, ǹyaŋ da pâi díkpɔara-ƃelai paâi. Ǹyaŋ da pâi ǹûai ŋãa kpelêi yɛ̂ɛ ŋwã̂ai, dílaa é fɛ́ɛ yɛ̂ɛ kawúlu, dímaa é yɔɔ yɛ̂ɛ berei ŋ̀âla-teƃelei zônoŋ su-ŋai díkaa lai.

¹⁶Maa ɣêlei tí, Yâwɛɛ nyii gáa a Díɣâlai, a pâi díƃâloi, kpɛ́ni fêi, dia ƃé díkaa a ŋɔƃála-ŋai, kpɛ́ni fêi, díkaa yɛ̂ɛ gane-ŋai da kɛ̂ kâloŋ ŋûa-ƃɔrɔ mai, da pâi fôloi ŋɔlɔii su.

¹⁷Tɔ̃yâ ma a pâi kɛ̂i a mɛni lɛ́lɛɛ! Zí-sɛŋ-ŋai da pâi ǹyaŋkpa-ŋai kɛ̂i dí ƃɔlɔ, ǹyaŋ ŋwã̂ai nina é ǹɛyâa-nɛyãai kɛ́ dí ƃɔlɔ.