Read Kpelle Maafîu 10 Bible Online

Maafîu 10 - Kpelle bible

Maafîu 10

¹Nya ƃe è ŋɔpôlu-ƃela puu kao feerɛi tòli é wala-wala-laa tɛɛ dípɔ nyînaŋ nyɔ́mɔɔ-ŋa mɛi a gɛɛ dí díkpɛ dí kɔlɔ-fela-sii kélee ƃalo da mɛni-soli-sii kélee.

²Ǹyaŋ ŋɔpôlu-ƃela puu kao feerɛi láa ka ŋí: Maa-ŋuŋ ƃa Samaŋ, nyii da kɛ̂ ma Pitɛi, ǹêɣe Aŋdulu, Zɛƃɛdi ǹóŋ Zĩi da ǹêɣe Zɔ̂ŋ,

³Fele da Batâlomio, Tama da ŋuŋ-fela-fei kula-nuui Maafîu, Afîa ǹóŋ Zĩi da Tâadia,

⁴Samaŋ nyii kɛ̀ a ŋɔlɔii wɛ́liɛɛi, da Zudasi Sekaria ma, nyii kùla bôlui.

⁵Núu puu kao feerɛi ŋí Zîsɛ è dítɛ̀ɛi, è mò dîa, ǹyɛɛi, “Káfe li Zɛ̃tai-ŋai pɔ-naa-pere, káfe tela li Sameria-ƃelai dítaa kpaya-kpayai da su.

⁶Kɛ́lɛ, ka lí m̀ála láŋɔɔ-ŋai pɔ diai díkaa a Eezuɛ-ŋai dísuui su-ƃelai.

⁷Ka lí ká Ɣâla-woo ƃó kâai, ‘Ŋ̀âla-taa kâloŋ-laai a lɛɣɛ.’

⁸Ka kɔlɔ-fela-ƃela ƃálo, ká saa-ƃela mu siɣe saa yêei, ka gbôdo-ƃela ƃálo, ká nyînaŋ nyɔ́mɔɔ-ŋa kpɛ́. Berei ká zɔlɔ ƃô la kpɛni-kpɛni, ka dɛɛ nɔ́ tí kpɛni-kpɛni.

⁹Káfe gôo, kpaa sɛŋ-kao kole, kpaa máŋ kane sìɣe Kábɛ̂bɛ-ŋai su.

¹⁰Káfe kolâ siɣe kásiai mɛni ma, kpaa yɛkɛ feerɛ, kpaa máŋ kpaŋ-kpali, kpaa máŋ sia-wuru. Kpɛ́ni fêi, maa nɛɛ̂i dii-kɛ-nuui é gɔ́nɔŋ sɔlɔ ƃó.

¹¹“Taa kɛ́tɛ kélee ka tɛ̂ zui, kpaa kpanâŋ kélee, ka ǹúui kɔ́ri nyii zɔŋ lɛ́lɛɛ̂i, kakɛ bɔ naa é lɛ́ɛ la zu ká kúla naa ma.

¹²Kà lɔ̀ bɛ́rɛi mu, ka laa-ti-maa kɛ́.

¹³À kɛ̀ bɛ́rɛi mu-ƃelai sɔŋ lɛ́lɛɛ̂i, kálii-sêei é kɛ́ dîa. Kɛ́lɛ, à kɛ̀ dísɔŋ fé lɛlɛ ni, kálii-sêei é pá pôlu kápɔ.

¹⁴Núu da kélee a wàla ǹyée see kámu, kpaa máŋ da wàla díwoli tɔ́ɔ káwoo ma, gɛ̀ ní, kà kɛ̀ kulâi maa-pɛrɛi mu kpaa maa-taai su, ka muluŋ kpɛ́mɛŋ kákɔɔ ŋá.

¹⁵Ŋá tɔ̃yâ ƃôi kâa, m̀aa taai tí ŋɔsɔnyɔ̂ŋ a pâi kɛ̂i a dɛ́ɛ Sodɔŋ da Gomora lɔii ŋɔi ma a mɛni-ŋa-tee-tãi.

¹⁶“Ka gáa, ŋa kátɛɛ̂i yɛ̂ɛ ƃála-ŋa ƃe díkaa kɔ́li-saŋ su. M̀ɛni ma, ka kɛ́ a kátareɛ yɛ̂ɛ kali, ka ƃo a kálii lɛ́lɛɛ yɛ̂ɛ tòloŋ.

¹⁷Kɛ́lɛ, ka kámɛi káa a núu-kpune-ŋa. Kpɛ́ni fêi, da pâi kátɛɛ̂i koyâŋ-ŋa su, dí kálôkwa a ŋánaa Díɣâla-fɛli-kêre-ŋai mu.

¹⁸Da pâi kátɔɔ̂i ǹúu-laa-tuɛ ƃelai ŋ́ɛi-tuɛ da kâloŋ-ŋa, ḿaa-mɛni ma a gɛɛ ka sêre-faa kɛ́ díŋɛi da Zɛ̃tai-ŋai.

¹⁹Kɛ́lɛ, da lì a kâa, kálii fé sɛlɛŋ m̀ɛnii ḿâ ka pâi m̀ôi da berei ka pâi m̀ôi lai. Kpɛ́ni fêi, m̀ɛnii ka pâi m̀ôi, da pâi doôi kákili ŋá a maa-aƃai tí.

²⁰Kpɛ́ni fêi, káa fé pâi ǹónôi kɛ̂i, kɛ́lɛ Kánâŋ Ŋɔmɔ̂leŋ nyii gáa kákponôi ƃe pâi lônoi.

²¹“Lia-nuu da leɣe-nuu da pâi díkîe tɛɛ̂i saa pɔ. Nàŋ-nuu kɛ́ ǹóŋ tɛ̀ɛ máŋ. Nîa-pɛlɛɛ da pâi tɔɔ̂i díkaa-ƃela dîa dí dípaa.

²²Ǹyaŋ núu kélee a pâi kákpɔarâi ńaai mɛni ma. Kɛ́lɛ, ǹúui a ǹíi kpèle é lɛ́ɛ la zu gbɛɛ-ŋai é serii, a pâi ƃálôi.

²³A kɛ̀ da kákpɔ̀ara taa kɛ́tɛi tɔnɔ su, ká kula naa ká lí da kpɛni su. Ŋa tɔ̃yâ ƃôi kâa, káfe pâi serîi Eezuɛ-taa-ŋai kélee su é lɛ́ɛ la zu Núu-kpune Ǹóŋ é pá.

²⁴“Núu-polu-nuu fé tɛɛ ní ŋɔsɛŋ-lɛ-nuui ma, kpaa máŋ yée-mu-nuu fé tɛɛ ní ŋɔnuu-namui ma.

²⁵Maa nɛɛ̂i núu-polu-nuu é kɛ́ nɔ́ yɛ̂ɛ ŋɔsɛŋ-lɛ-nuui, kpaa máŋ yée-mu-nuu é kɛ́ nɔ́ yɛ̂ɛ ŋɔnuu-namui. À kɛ̀ dí bɛ́rɛ-mɛi-nuui tòli a Bɛɛziƃɔ, gɛ̀ ní, da pâi laa-nyɔŋ seêi ŋɔpɛ́rɛi-mu-ƃelai dîa máŋ.

²⁶“Mɛni ma, káfe yao dîa, kpɛ́ni fêi, sɛŋ da fé naa mɛi pɛlɛɛ̂i nyii mɛi fé pâi siɣêi, kpaa máŋ noɔɔ nyii dífe pâi gɔ́lɔnîi.

²⁷M̀ɛnii ŋá mò kâa kpínii, ka m̀ó pono ŋá. M̀ɛnii ka mɛ̂ni a káwolii, ka doo a lolo.

²⁸Káfe yâo diai dîa da núu kpono pâa kɛ́lɛ, dífa pɔ̂ri ŋɔmɔ̂leŋ paâi. Kɛ́lɛ, fɛ̂ɛ ka yao ǹúui ḿâ nyii a pɔ̂ri núu kponoi da ŋɔmɔ̂leŋ su karâi Dɛ̂ƃele-taai.

²⁹Dífa lîyeŋ feerɛ kɔ̀lɛ a kâpa tɔnɔ? Ǹyaŋ dɔnɔ kpîŋ fa too ǹɔii ma Kánâŋ ŋɛ́i pôlu.

³⁰Kɛ́lɛ, káŋuŋ-leɣai kpîŋ káŋûai gélee lónoɔ̂i.

³¹Mɛni ma káfe yao. Kámaa-mɛni kpanaŋɔɔ̂i é tɛ́ɛ lîyeŋ támaa ma.

³²“Mɛni ma, ǹúui kélee a ḿaa mɛni ƃò nûa ŋɛi, ńyãa máŋ ŋa pâi m̀aa-mɛni ƃôi Ŋáɣâla-taa-Naŋ ŋɛ́i.

³³Kɛ́lɛ, ǹúui kélee a ḿaa sîa tòo ǹûa ŋɛi, ńyãa máŋ ŋa pâi m̀aa sîa toôi Ŋáɣâla-taa-Naŋ ŋɛ́i.

³⁴“Káfe kákili ŋá sia a gɛɛ ŋá pà a gɛɛ ŋá lii see tɛɛ ǹɔii pɔ. Fé pá ní a gɛɛ ŋá lii-sêe tɛɛ ǹɔii pɔ, fɛ̂ɛ ƃóa-sɔkpɔ.

³⁵Kpɛ́ni fêi, ŋá pà a gɛɛ ŋá lóŋ-surɔŋ kɛ́ é tɔ́ɔ ǹâŋ ma, ŋá lóŋ-nɛni kɛ́ é tɔ́ɔ ǹee ma, ŋa lóŋ-nɛni kɛ́ é tɔ́ɔ ǹyuâra ma.

³⁶Núu ŋɔkpɔara-ƃela da pâi kɛ̂i a ŋɔpɛ́rɛi mu-ƃela.

³⁷“Ǹúui a ǹâŋ kpaa ǹee wɛ̀li é tɛ́ɛ ḿâi, m̀aa fé nɛ̃ɛ ní maa-nuui é kɛ́ a ḿbôlu-nuui da. Ǹúui a ǹóŋ-surɔŋ kpaa máŋ ǹóŋ-nɛnii wɛ̀li é tɛ́ɛ ḿâi, m̀aa fé nɛ̃ɛ ní maa-nuui é kɛ́ a ḿbôlu-nuui da.

³⁸Ǹúui va ŋɔsaa-wurii siɣe é lɛ́ɛ ḿbôlui, m̀aa fé nɛ̃ɛ ní maa-nuui é kɛ́ a ŋápôlu-nuui da.

³⁹Ǹúui a ŋɔfúlu-laai kɔ̀rii, a pâi ǹánîi. Ǹúui a ŋɔfúlu-laai laŋ ḿaa-mɛni mai, a pâi gáâi.

⁴⁰“Ǹúui a ǹyée sèe kámui, maa-nûui a ǹyée sée ḿû. Ǹyaŋ ǹúui a ǹyée sèe ḿûi, a ǹyée sée ǹúui mù ńdɛ̀ɛi.

⁴¹Ǹúui a ǹyée sèe Ɣâla ŋɔlóno-kɛ-nuu mu, kpɛ́ni fêi, gáa a Ɣâla ŋɔlóno-kɛ-nuui, maa-nûui a pâi Ɣâla ŋɔlóno-kɛ-nuui ŋɔsama-sɛŋ sɔlɔ ƃôi. Ǹúui a ǹyée sèe tɔ̃yâ-nuu mu, kpɛ́ni fêi gáa a tɔ̃yâ-nuui, a pâi tɔ̃yâ-nuu ŋɔsama-sɛŋ sɔlɔ ƃôi.

⁴²Ǹyaŋ ǹúui kélee a ya-laɣi-kɔpu tɔnɔ kpîŋ tɛ̀ɛ ǹîa-pɛlɛɛi ŋí dɔnɔ pɔ a gɛɛ é gbèle, kpɛ́ni fêi, gáa a ŋápôlu-nuui, tɔ̃yâ ma, ŋá m̀ó kâa, maa-nuui tí fé pâi ŋɔfela-féi lánîi a dɔnɔ kpîŋ.”