Read Kpelle Maafîu 11 Bible Online

Maafîu 11 - Kpelle bible

Maafîu 11

¹Tãi Zîsɛ è kpɛ̀ɛ la a ŋɔpôlu-ƃela puu kao feerɛi tɛɛ̂i, è kùla naa a gɛɛ é sɛŋ lɛ, gɛ Ɣâla-woo ƃo dítaa-ŋai su.

²Zɔ̂ŋ kɛ́ɛ gbini-pɛrɛi mui, tãi è Kôrai ŋɔtíi maa-mɛni mɛ̀ni lai, è ŋ̀óo tɛ̀ɛ a ŋɔpôlu-ƃelai,

³é m̀o mà, ǹyɛɛi, “ƃia ƃa ǹúui gáa pâi, kpaa máŋ, fɛ̂ɛ kú núu da kpɛ́ni perêi káa?”

⁴Nya ƃe Zîsɛ è díwoo su tòo, ǹyɛɛi, “Ka lí ká mɛni-ŋai ƃó Zɔ̂ŋ ma ká m̀ɛnii da mɛni-ŋai ká gáâi.

⁵Ŋ̀ɛi-pu-ƃelai ŋɛ́i láa káa ƃôi. Gɔɔ-pu-ƃelai díkɛ sia. Gbôdo-ƃelai díkɛ ƃalo. Ŋ̀oli-tínîŋ-ƃelai díkɛ mɛni mɛ̂ni. Zaa-ƃelai da dímu siɣe saa yêei, díkɛ Duŋ Lɛ́lɛɛi ƃo gôlo-ƃelai dîa.

⁶Lûwa káa ǹúui ma ve pâi toôi pôlu ḿaa-mɛni mai.”

⁷Tãi dí lì la pôlui, Zîsɛ e nâa pɛ̀lɛ lónoɔ ma gbɔŋ pɔ é pîlaŋ Zɔ̂ŋ ma: “Le ƃe ká lì gáâi vɛ̃ɛ-kpâlaŋ sui? Kpalo nyii vãai a dúmôi?

⁸Kɛ́lɛ, le ƃe ká lì gáâi? Núu nyii kɛ̀ a maa ɣiriɛ a seɣe ƃɔɔ-fuu sɔ̃ɔ kpanaŋɔɔ̂i? Ka gáa, diai da dímaa ɣîri a seɣe ƃɔɔ-fuu sɔ̃ɔ kpanaŋɔɔ̂i díkaa kâloŋ-ŋa dípɛrɛ-ŋai mu.

⁹Kɛ́lɛ, le ƃe ká lì gáâi? Ɣâla ŋɔlóno-kɛ-nuu? Ooei, ŋa m̀ó kâa, dɔ̃yɛɛ̂i Ɣâla ŋɔlóno-kɛ-nuu ma.

¹⁰Ǹúui ká ŋí dí maa-mɛni pɔ̃yɛ, ‘Gáa, ŋa ŋákelai tɛɛ̂i íŋɛi tuɛ, nyii pâi íperêi kpɛtɛ̂i.’

¹¹“Ŋá tɔ̃yâ ƃôi kâa, diai kélee nɛyâa dí dísɔlɔ ƃôi, da fé kɛ́tɛ ní é tɛ́ɛ Batâi-kɛ-nuui Zɔ̂ŋ ma. É máŋ kɛ́ tí Ŋ̀âla-taa kâloŋ-laai su-ƃelai guro-te-ɣelei kɛ̂tɛi é tɛ́ɛ mà.

¹²E síɣe Batâi-kɛ-nuui Zɔ̂ŋ ŋɔtãi ma é seri sâa ma Ɣâla ŋɔkâloŋ-laai a pâ a wala-wala, ǹyaŋ ŋwála-wala-ƃelai da díyee sèe mu.

¹³Kpɛ́ni fêi, Ɣâla ŋɔlóno-kɛ-ƃelai kélee da dɔ̂ŋ dí Ɣâla maa-mɛni ƃò Zɔ̂ŋ ŋɔtãi é lɛ́ɛ serîi.

¹⁴Ǹyaŋ à kɛ̀ ka ŋ̀wɛ̂lii ka káyee see mu, ǹyaa ƃa Ilaza nyii dí mò a gɛɛ a pâi pâi.

¹⁵Ǹúui wóli káa ŋuŋ ma a gɛɛ é mɛni mɛnii, tɔɔ é m̀ɛni.

¹⁶“Le ƃe ŋa pâi ŋ̀éniɛi ŋí su-ƃelai kɔɔ̂ni ní mai? Díkaa yɛ̂ɛ nîa-pɛlɛɛ ƃe see ni lɔ́ɔ-kpalaŋ ŋá díkɛ díƃarâai toli, dîyɛɛi,

¹⁷‘Kú túru fɛ̀ɛ kâa, kɛ́lɛ, káfe mãla ni. Kú gbeɣêi too, kɛ́lɛ, káfe wɔlɔ ni.’

¹⁸“Kpɛ́ni fêi, Zɔ̂ŋ è pà, vé ǹáa mii ní, vé ŋwã̂ai kpele ní, kɛ́lɛ, dí mò, dîyɛɛi, ‘Nyînaŋ nyɔ́mɔɔ káa bôlu’;

¹⁹Núu-kpune Ǹóŋ è pà gɛ ǹáa mii gɛ ŋwã̂ai kpèle, kɛ́lɛ, dí mò, dîyɛɛ, ‘Ka gáa, gáa a mii-sɛŋ wɛli-nuu gɛ ƃo a ŋwã̂ai-kpele-nuu, gɛ ƃo a ŋuŋ-fela-fei kula-ƃela da sɔnyɔ̂ŋ-ƃela díwɛli!’ Kú táre kɔ́lɔŋ táre ŋɔtíi-ŋai su.”

²⁰Nya ƃe è pɛ̀lɛ lónoɔ ma daa-ŋai su-ƃelai dîa, ƃɛi è ŋɔtíi kpaya-kpayai dámaa kɛ̀ naai, kpɛ́ni fêi, dífe dílii pene ni.

²¹“Kpalo ƃêlai yâ, Koraziŋ! Kpalo ƃélaâi yâ, Bɛsaida! Kpɛ́ni fêi, díi kpaya-kpayai dí gɛ̀ kásui, dîi da kɛ̀ Taya da Sidɔŋ, dîi maloŋ-too-maa seɣe tòo dîa dí luu pú díŋûa dílii pene a tãi su kôya.

²²Kɛ́lɛ, ŋá m̀o kâa, kásɔnyɔ̂ŋ a pâi kɛ̂i a gɛ́tɛ é tɛ́ɛ Taya da Sidɔŋ díwɔ̂i ma a mɛni-ŋa-tee-tãi.

²³Kapɔ̂nia ƃia máŋ, da pâi ímaa tɛ̂i í seri Ɣâla-taa? Da pâi liî a yá Dɛ̂ƃele-taa. Kpɛ́ni fêi, díi kpaya-kpayai dí gɛ̀ ísui, dîi da kɛ̀ Sodɔŋ, eêi lɛ̀ɛ naa sâa é seri.

²⁴Kɛ́lɛ, ŋá m̀o kâa, ŋɔsɔnyɔ̂ŋ a pâi kɛ̂i a gɛ́tɛ é tɛ́ɛ Sodɔŋ-lɔii ŋɔi ma a mɛni-ŋa-tee-tãi.”

²⁵Maa-tãi tí su Zîsɛ è zu tòo, ǹyɛɛi, “Ŋa ísɛɣɛ̂i fêi, Ńâŋ, ŋelei da ǹɔii dínuu-namu, a gɛɛ ya mɛni-ŋai ŋí lóo dáre-ƃelai dîa da zɛŋ-kɔlɔŋ-ƃelai, ya ǹɛ́ ǹîa-pɛlɛɛi dîa.

²⁶Ooei, Ńâŋ, kpɛ́ni fêi, nyíti è kɛ̀ a ínîa-mɛni lɛ́lɛɛ.

²⁷Nàŋ-nuui a sɛŋ kélee tɛ́ɛ ḿbɔ. Núu da fé Nòŋ-nuui kɔ́lɔŋ fɛ̂ɛ Nàŋ-nuui, kpaa máŋ núu da fé Nàŋ-nuui kɔ́lɔŋ fɛ̂ɛ Nòŋ-nuui, bɛlɛɛ ǹúui ma nyii Nòŋ-nuui a zìɣe a gɛɛ é ǹɛ́ mài.

²⁸Ka pá ḿbɔ, káai kélee ka mɔ̃lɛ̂i, da káai tĩa wiɛɛ káa káyêei. Ǹyaŋ ŋa pâi fii-tɔɔ tɛɛ̂i kápɔ.

²⁹Ka ŋákpîrii sìɣe ka ḿaa-mɛni maa kɔ́ri, kpɛ́ni fêi, ḿaa yeŋɔɔ̂i, ńii maa yeŋɔɔ. Gɛ̀ ní, ka pâi fii-tɔɔ sɔlɔ ƃôi kámɔ̂leŋ su.

³⁰Kpɛ́ni fêi, ŋákpîrii lɛ́lɛɛ̂i, vé tela wiɛ ni.”