Read Kpelle Maafîu 12 Bible Online

Maafîu 12 - Kpelle bible

Maafîu 12

¹Maa-tãi ti ḿâ, Zîsɛ da ŋɔpôlu ƃelai díkɛ̀ tɛɛ̂i wîi kpâlaŋ da-ni ŋá a Vii-tɔɔ-ɣelei. Puru è kɛ̀ ŋɔpôlu-ƃelai kɛ̂i, nya ƃe dí pɛ̀lɛ wîi da teɛɛ ḿâ a gɛɛ dí mii.

²Kɛ́lɛ, tãi Faresii-ŋai dí nyiŋi kàa lai, dí mò ma, dîyɛɛi, “Ípôlu-ƃelai da m̀ɛnii kɛ̂i nyii ve dɔ̂ŋ lá-woo m̀a a gɛɛ núu é gɛ́ a Vii-tɔɔ-ɣelei.”

³Kɛ́lɛ, è mò dîa, ǹyɛɛi, “Káfe niî mɛnii lóno ni Deeƃé da diai kɛ̀ bôlui dí gɛ̀, tãi puru è kɛ̀ la diai,

⁴dí lɔ̀ Ŋ̀âla-pɛrɛi mû dí ǹaa-kpoloi míi nyíi vé dɔ̂ŋ lá-woo ma a gɛɛ é da mii kpaa máŋ diai kɛ̀ bôlui, fɛ̂ɛ nɔ́ zâla láa soŋ-ƃelai?

⁵Kpaa máŋ, káfe niî ǹóno ni dɔ̂ŋ-kɔlɔi su a gɛɛ zâla láa soŋ-ƃelai díkaa Ŋ̀âla-pɛrɛ Kɛ́tɛi mu a Vii-tɔɔ-ɣele-ŋai, da Vii-tɔɔ-ɣelei maa-tɔŋ-ŋai kâra, ǹyaŋ ve a dísɔŋ?

⁶Ŋa m̀ôi kâa, a gɛɛ mɛni da káa ƃɛ gɛ́tɛ̂i é tɛ́ɛ Ŋ̀âla-pɛrɛ Kɛ́tɛi ma.

⁷Kâi kɛ̀ a nyiŋi su-kulai kɔ́lɔŋɔɔ, ‘Ŋa maloŋ-kaai wɛli, kɛ́lɛ, sâla-kúlaa fêi,’ kâi fêi mɛni kara diai dîa dísɔŋ fé diai.

⁸Kpɛ́ni fêi, núu-kpune Ǹóŋ káa a Vii-tɔɔ-ɣelei ǹâmu.”

⁹Nya ƃe è kùla naa é lí Díɣâla-fɛli-kerei mu.

¹⁰Nalôŋ tɔnɔ è kɛ̀ naa, ǹyée sàa ma. Nya ƃe dí marê kɛ̀, dîyɛɛi, “Gáa dɔ̂ŋ lá-woo ma a gɛɛ dí núu ƃálo a Vii-tɔɔ-ɣelei?” Dí mare-kɛɛi ŋí kɛ̀ a gɛɛ dí mɛ̂ni lɛ́ɛ mà.

¹¹Nya ƃe è mò dîa, ǹyɛɛi, “Gbɛ̂ɛ ƃe kásama, à kɛ̀ ƃála tɔnɔ káa ǹyêei à tòo lôai a Vii-tɔɔ-ɣelei, va zoŋ é gula naai?

¹²Núu-kpune mɛni kpanaŋɔɔ̂i é tɛ́ɛ ƃála ma! Mɛni ma gáa dɔ̂ŋ lá-woo ma a gɛɛ núu é mɛni lɛ́lɛɛ kɛ́ a Vii-tɔɔ-ɣelei.”

¹³Nya ƃe è mò ǹalôŋ ma, “Íyee sãa.” Nya ƃe è ǹyée sãa, ǹyée é nâa ƃalo é kɛ́ yɛ̂ɛ gbélii.

¹⁴Kɛ́lɛ, Faresii-ŋai dí díŋuŋ pìlaŋ ǹáa mà a gɛɛ dí bàa-pere kɔ̂ri.

¹⁵Tãi Zîsɛ è nyiŋi mɛ̀ni lai, è kùla dísama. Nya ƃe kpɔŋ kɛ́tɛ è lɛ̀ɛ bôlu. Gɔlɔ-fela ƃelai kɛ̀ naai, é díkelee ƃalo.

¹⁶È dília-woo ƃo a gɛɛ dífe m̀aa-mɛni ƃò ǹûai dîa.

¹⁷È gɛ̀ tí a gɛɛ mɛnii Ɣâla ŋɔlóno-kɛ-nuui Azaya è mòi ŋa-see é kɛ́, nyii è mò, ǹyɛɛi,

¹⁸“Ka Ŋátii-kɛ-nuui káa, nyii ŋá zìɣe zu, ńii-ma tii-kɛ-nuui, nyii m̀aa-mɛni a Ŋámɔ̂leŋ líi láai. Ŋa pâi ŋámɔ̂leŋ pûi gbonôi, ǹyaŋ a pâi dɔ̃yâ-mɛnii lɛ̂i Zɛ̃tai-ŋai dîa.

¹⁹Ve pâi laa-sâa kɛ̂i, kpaa máŋ é lâɣii, núu da kélee fé pâi ŋ̀óo mɛnîi bere-lee-ŋai su.

²⁰Diai dífii kpɛɛ̂i, vé pâi ǹɛɛ̂i naa dí tóo. Diai kili kɛ-zu fé díyêei, a pâi kili-kɛ-zu tɛɛ̂i dípɔ. A pâi pâi a tenîŋ ƃô-laa núu kélee mɛni ma,

²¹ǹyaŋ kili-kɛ-zu a pâi kɛ̂i Zɛ̃tai-ŋai yêei ǹáai su.”

²²Nya ƃe dí pà bɔ a mûgbɛ-naloŋ tɔnɔ, ŋ̀ɛ́i puɔɔ, nyinaŋ nyɔ́mɔɔ kɛ́ ƃo bôlu. Nya ƃe e m̀alo, gɛ nâa lono gɛ kwaa kâa.

²³Gbɔŋ kélee lá è kpàla dîa, dîyɛɛi, “Deeƃé Ǹóŋ ƃe ŋí?”

²⁴Kɛ́lɛ, tãi Faresii-ŋai dí nyiŋi mɛ̀ni lai, dí mò, dîyɛɛi, “Nalôŋ ŋí a nyînaŋ nyɔ́mɔɔ-ŋa kpɛ̀ nɔ Bɛɛziƃɔ sârai, nyii gáa a nyînaŋ nyɔ́mɔɔ-ŋai díkâloŋ.”

²⁵Gɛ́ɛ a díkili-ŋa-siai kɔ́lɔŋ, è mò dîa, ǹyɛɛi, “Gâloŋ-laai nyii kélee zu-ƃela ŋá kɔlɛɛ̂i dítɔɔ díkîe-ni diai, a tôo. Taa, kpaa máŋ pɛ́rɛi mu-ƃela da kɛ̀ a díŋa kɔlɛɛ̂i dítɔɔ díkîe-ni diai, ve pâi tɔɔ̂i.

²⁶A kɛ̀ Sêtɔŋ a Sêtɔŋ kpɛ̀, gɛ̀ ní ŋ̀á kɔlɛɛ̂i gbîŋ ma. A kɛ̀ tí, gɛ̀ ní, ŋɔkâloŋ-laai a pâi tɔɔ̂i leŋ?

²⁷Ǹyaŋ à kɛ̀ ŋà nyînaŋ nyɔ́mɔɔ-ŋa kpɛ̀ Bɛɛziƃɔ ŋɔwala-wala-laai su, gɛ̀ ní gbɛ̂ɛ ŋɔwala-wala-laa su ƃe kálônii da díkpɛ̀ lai? Mɛni ma da pâi kɛ̂i a kámɛni ŋá-tee-ƃela.

²⁸Kɛ́lɛ, à kɛ̀ ŋà nyînaŋ nyɔ́mɔɔ-ŋai kpɛ̀ a Ɣâla Ŋɔmɔ̂leŋ, gɛ̀ ní Ɣâla ŋɔkâloŋ-laai a pá kápɔ.

²⁹Kpaa máŋ, núu a pɔ̂ri lɔ̂i leŋ wala-wala-nuu ŋɔpɛ́rɛ mu é gɔ̃liŋ ŋuma, à kɛ̀ ve ŋwála-wala-nuui ɣiri ní fulɔi? À gɛ̀ tí, gɛ̀ ní, a pâi ŋɔpɛ́rɛi mu-sãa ŋumâi.

³⁰Ǹúui ve ḿbôlui, dɔɔ̂i ḿâ. Ǹúui va kpɔŋ mâ tɛ̀ɛ ḿbɔ kwa ǹyaa kú pá a nûa Ɣâla pɔi a kpɛ̀ Ɣâla ḿâ.

³¹Mɛni ma, ŋá m̀ôi kâa, sɔnyɔ̂ŋ kélee da tɛ-ŋɛi kɛ́ɛ dísu-mɛni a pâi lɛɛ̂i, kɛ́lɛ, à kɛ̀ núu a tɛ-ŋɛi kɛ̀ a M̀ɔlêŋ, zu-mɛni fé pâi wɔlɔ lɛɛ̂i.

³²Ǹúui kélee a lôno a nyɔ́mɔɔ é pîlaŋ nuu-kpune Ǹóŋ mai, zu-mɛni a pâi lɛɛ̂i. Kɛ́lɛ, ǹúui kélee a lôno a nyɔ́mɔɔ é pîlaŋ M̀ɔlêŋ Maa Waai mai, zu-mɛni fé pâi wɔlɔ lɛɛ̂i ŋ̀éniɛi ŋí su, kpaa máŋ ŋ̀éniɛi nyii pâi pâi zu.

³³“À kɛ̀ kà sí-sɛŋ lɛ́lɛɛ sì, m̀á a pâi kɛ̂i a ǹɛ́lɛɛ. A kɛ̀ kà sí-sɛŋ nyɔ́mɔɔ sì, m̀á a pâi kɛ̂i a nyɔ́mɔɔ. Kpɛ́ni fêi, da sí-sɛŋ kɔ̀lɔŋ m̀á ma.

³⁴Kákaa a kali nyɔ́mɔɔ koi-lonii! Ka pɔ̂ri lônoi leŋ a ǹɛ́lɛɛ? Kpɛ́ni fêi, mɛnii gáa núu líi sui, ǹyaa ƃe a mò.

³⁵Núu lɛ́lɛɛ a pâ a m̀ɛni lɛ́lɛɛi nyii a kúla ŋɔmɛni lɛlɛɛi sui. Núu nyɔ́mɔɔ kɛ́ pa a m̀ɛni nyɔ́mɔɔ nyii a kúla ŋɔmɛni-nyɔ́mɔɔ kɛɛi sui.

³⁶Ŋá m̀ôi kâa, ƃoo-wooi kélee núu-kpune a m̀oi, a pâi maa-woo su-kula kɛ̂i a m̀ɛni-ŋa-tee-ɣelei.

³⁷Kpɛ́ni fêi, núu wóo ƃa gɛ̀ ŋɔmɛni é lɛ́lɛɛ, núu wóo kɛ́ gɛ̀ ŋɔmɛni é kara.”

³⁸Nya ƃe gɔlɔ-pɔ̃yɛ-ƃelai da-ni da Faresii-ŋai dí ŋ̀óo su tòo, dîyɛɛi, “Kaamɔ̂ɔ, kwa ŋ̀wɛ̂lii kú ŋɛi-kɛ-maa káa é kúla íyeêi.”

³⁹Kɛ́lɛ, è díwoo su tòo, ǹyɛɛi, “Ŋ̀éniɛi ŋi su-ƃelai díkaa a sɔnyɔ̂ŋ-ƃela da wulu-wulu kɛ-ƃela. Díkaa ŋɛi-kɛ-maa kɔ́rîi, ǹyaŋ dífe pâi ŋɛi-kɛ-maa tɔnɔ kpîŋ sɔlɔ ƃôi é kúla Ɣâla ŋɔlóno-kɛ-nuui Zôna ŋɔŋɛi-kɛ-maai pòlu.

⁴⁰Yɛ̂ɛ berei Zôna è kɛ̀ la nyɛ̃ɛ kɛ́tɛi koi a fólo saaƃa da kpini saaƃai, bere nɔ ƃe núu-kpune Ǹóŋ a pâi kɛ̂i la ǹɔii mu a fólo saaƃa da kpini saaƃa.

⁴¹Ninivɛ-ƃelai da ŋ̀éniɛi ŋí su-ƃela da pâi dímu siɣêi m̀ɛni-ŋa-teɛɛi su. Ninivɛ-ƃelai dí tɔ̂ŋ pu dîa, kpɛ́ni fêi, dí dílii pène Zôna Ŋɔɣâla-woo-ƃóɔi su, ǹyaŋ, ka gáa, sɛŋ da káa ƃɛ gɛ́tɛ̂i é tɛ́ɛ Zôna ma.

⁴²Siƃa-ƃelai díkâloŋ-nɛnîi da ŋ̀éniɛi ŋí su-ƃelai da pâi dímu siɣêi m̀ɛni-ŋa-teɛɛi su. A pâi tɔ̂ŋ pûi dîa, kpɛ́ni fêi, è kùla ǹɔii kóyaŋ ma a gɛɛ é ŋ̀óli tɔɔ Saloma ŋɔtáre-wooi ma. Kɛ́lɛ, ka gáa, sɛŋ da káa ƃɛ gɛ́tɛ̂i é tɛ́ɛ Saloma ma.

⁴³“Nyînaŋ nyɔ́mɔɔ à kùla núu kponôi, a tɛ̂ɛ kwaa kpála-ŋa ma gɛ vii tɔɔ̂i kɔ̀ri. Ǹyaŋ va vii tɔɔ̂i kàa.

⁴⁴Gɛ̀ ní, a mò, ǹyɛɛ, ‘Ŋa pâi liî pôlu ŋápɛrɛi mu ŋá kùla naai.’ Tãi a pâ la naai, a mu kàa a volo, m̀u kɔ́ɔ, mu kpɛ́tɛɛ.

⁴⁵A nâa lì é nyînaŋ nyɔ́mɔɔ lɔ́ɔlu mɛi feerɛ síɣe, nyii-ŋai dísɔŋ nyɔ́mɔɔ̂i é tɛ́ɛ mai, é pá a dia, da dîa-ni dí lɔ́ bɛ́rɛi mu dí kɛ́ ƃò naa. A kɛ̀ ti, maa-nuui tí ŋɔkɛ-ɣeniɛi kɛ-perei gbɛɛ ŋá a pâi kɛ̂i a nyɔ́mɔɔ é tɛ́ɛ duɛ-tuɛi ma. Bere ƃe a pâi kɛ̂i la máŋ a ŋ̀éniɛi su-ƃela sɔŋ nyɔ́mɔɔ-ŋai ŋí.”

⁴⁶Tãi è kɛ̀ niî lônoi la gbɔŋ pɔi, ǹee da ǹêɣe-ni dí pá dí kɛ̀ ƃò tɔɔ̂i ni ŋínii ŋá díkɛ ŋ̀wɛli dí lóno bɔ.

⁴⁷Nya ƃe núu tɔnɔ è mò ma, ǹyɛɛi, “Gáa, ílee da ílêɣe-ni díkaa tɔɔ̂i ni ŋínii ŋá, díkɛ ŋ̀wɛli dí lono ípɔ.”

⁴⁸Nya ƃe è ǹúui wóo su tòo, ǹyɛɛ mai, “Gbɛ̂ɛ ƃa ńee da ńêɣe-ni?”

⁴⁹Nya ƃe è ǹyée sãa ŋɔpôlu-ƃelai pɔ-pere, ǹyɛɛi, “Ka gáa, ńee ní ká ŋí da ńêɣe-ni!

⁵⁰Kpɛ́ni fêi, ǹúui a Ńâŋ nîa-mɛnii kɛ̀ nyii gáa Ɣâla-taai, maa-nuui ƃa ńêɣe, kpaa ńzaaƃɔlɔ kpaa ńee.”