Read Kpelle Maafîu 13 Bible Online

Maafîu 13 - Kpelle bible

Maafîu 13

¹Maa-ɣelei tí Zîsɛ è kùla bɛ́rɛi mu é lí é sée nyúo-loŋ kɔlɛ.

²Nya ƃe kpɔŋ kɛ́tɛ è tòo mà é gɛ é píli yá-ŋá keleŋ su é sée naa. Ǹûai kélee dí kɛ̀ tɔɔ̂i ni zîŋ ma.

³Nya ƃe è mɛni támaa ƃò dîa saŋ-woo-ŋa su, ǹyɛɛi, “Ka gáa, zí-sɛŋ sí-nuui è lì sí-sɛŋ sîi.

⁴Gɛ́ɛ zí-sɛŋ-kaoi pilîi, da-ni dí tòo berei ma ŋɔni-ŋai dí pa dí díkpele.

⁵Da-ni dí tòo kɔni-lɔii ma ƃɛi pɔ́rɔ támaa fé kɛ́ ni naai. Dí pɔ̀muŋ kpɔ́ a maa felaa. Kpɛ́ni fêi, bɔ̂rɔi fé kɛ́ ni a ziŋɔɔ naa.

⁶Tãi vóloi è kùla lai, dífɔ̃ya dí kpála, kpɛ́ni fêi, dísame fé lɔ́ ni kɛ̀ ǹɔii mû póŋ-póŋ.

⁷Da-ni dí tòo ɣalêŋ-kpɔlɔ su. Ŋalêŋ-kpɔlɔi è ƃɔlɔ é kpíniŋ a dîa é dípaa.

⁸Da-ni dí tòo lɔii lɛ́lɛɛ ma dí ƃa. Da-ni dí ƃà a ŋuŋ tɔnɔ, da-ni a buu lɔ́ɔlu mɛi da, da-ni a buu saaƃa.

⁹Ǹúui ŋ̀óli káa ŋuŋ mâ a gɛɛ é mɛni mɛ̂nii, tɔɔ é mɛni.”

¹⁰Nya ƃe ŋɔpôlu-ƃelai dí pà bɔ, dîyɛɛ mai, “Ya lônoi dípɔ saŋ-woo su, le-mɛni ma?”

¹¹È díwoo su tòo, ǹyɛɛ diai, “Káa ƃe Ŋ̀âla-taa kâloŋ-laai su loo-mɛni-ŋai kɔ́lɔŋɔɔ tɛɛ̂i kápɔ. Kɛ́lɛ, ve tɛɛ ni dípɔ.

¹²Kpɛ́ni fêi, ǹúui sɛŋ da káa ǹyêei, da pâi dámaa tɛɛ̂i bɔ a gɛ́ɛ é támaa. Kɛ́lɛ, ǹúui sɛŋ da fé ǹyêei, ǹyii máŋ gáa ǹyêei, da pâi kulâi ǹyêei.

¹³Mɛni ma, ŋa lônoi dípɔ saŋ-woo su, kpɛ́ni fêi, berei máŋ díŋɛi a fôlo lai, dífa kwaa kâa. Berei máŋ da díwoli tɔɔ̂i lai, dífa mɛni mɛ̂ni, kpaa máŋ dí mɛni ŋá káa.

¹⁴Dia ƃe m̀ɛnii Azaya è mòi ŋa-see è kɛ̀ dîɛ, ǹyɛɛi, ‘Ka pâi káwoli tɔɔ̂i ka mɛni mɛ́ni, kɛ́lɛ, káfe pâi wɔlɔ tárêi zu. Ka pâi kwaa kâai, kɛ́lɛ, káfe wɔlɔ pâi kwaa ma maa kpɛɛ̂i.

¹⁵Kpɛ́ni fêi, ǹûai ŋí líi su kpanaŋɔɔ̂i, díwolii kpanaŋɔɔ, díŋɛi lá tɛ́ɛ. A gɛɛ dífe kwaa kâa a dí ŋɛi, kpaa máŋ dífe mɛni mɛ̂ni a díwoli, kpaa máŋ dífe tàre m̀ɛni su a dílii, a gɛɛ dífa la pene la pôlu, a gɛɛ ŋá díƃalo Ɣâla ƃé m̀o tí.’

¹⁶“Kɛ́lɛ, lûwa káa kâa, káai káŋɛi a kwaa kâai, da káai káwoli a mɛni mɛnii.

¹⁷Kpɛ́ni fêi, ŋá m̀ôi kâa a tɔ̃yâ a gɛɛ Ɣâla ŋɔlóno-kɛ-ƃela támaa da tɔ̃yâ-ƃela támaa dí kɛ̀ ŋ̀wɛ̂lii dí mɛni-ŋai káa ka gáâi, kɛ́lɛ, dífe gáa ni. Dí mɛni-ŋai mɛni ka mɛnîi, kɛ́lɛ, dífe mɛni ni.

¹⁸“Mɛni ma ka zaŋ-wooi mɛ̂ni nyii bîlaŋɔɔi zí-sɛŋ sí-nuui mai.

¹⁹À kɛ̀ núu da à Ɣâla ŋɔkâloŋ-laai maa-wooi mɛ̀ni, ve táre ni zu, gɛ̀ ní, ŋ̀wana-lɔ̂ɔ-nuui a pâ é ŋ̀óoi kúla ǹíi su, nyii kɛ̀ a zíɛ naai. Ŋ̀óoi ŋí ƃa zí-sɛŋ-kaoi nyii tòo berei mai.

²⁰Zí-sɛŋ-kaoi nyii tòo gɔni-lɔii mai ǹyaa ƃa ŋ̀óoi núu a m̀ɛni é ǹyée sée mu a lii-nɛ̃ɛ.

²¹Kɛ́lɛ, va zame pîlaŋ ǹíi su, a lɔ̂mu nɔ naa a da-loŋ, ǹyaŋ mɛni-kpɔ̂lu da kpɔara da pà bɔ ŋ̀óoi mɛni ma, a tôo pôlu a maa félaa.

²²Nyii tòo ŋalêŋ-kpɔlɔi sui, ǹyaa ƃa ŋ̀óoi núu a m̀ɛni, kɛ́lɛ, ŋ̀éniɛi-su-kpaaŋ da tɔɔ-laa ŋɔyee-laa-maai dí kpiniŋ là va ƃâi.

²³Nyii tòo ǹɔii lɛ́lɛɛi mai, ǹyaa ƃa ǹúui a ŋ̀óoi mɛ̀ni é táre zu é ƃá, m̀á da-ni dí ƃò a ŋuŋ tɔnɔ (100), da-ni a buu lɔ́ɔlu mɛi da, da-ni a buu saaƃa.”

²⁴E sáŋ da kpɛni sɔ̀ɔ dîɛ, ǹyɛɛi, “Ŋ̀âla-taa kâloŋ-laai káa yɛ̂ɛ nalôŋ tɔnɔ nyii sí-sɛŋ lɛ́lɛɛ sì ŋɔkpâlaŋ ŋái.

²⁵Kɛ́lɛ, tãi ǹûai dí kɛ̀ nyiî lai ŋɔkpɔara-nuui è pà é kala sí ŋɔwîi su é síɣe naa é lí.

²⁶Tãi nâa wîi è lɛ̀lɛ la é kúla zui, galai è kùla zu máŋ.

²⁷Nya ƃe gbâlaŋ-namui ŋɔtíi-kɛ-ƃelai dí pà dí marê kɛ́, dîyɛɛ ma, ‘Nalôŋ, ífe sí-sɛŋ lɛ́lɛɛ sí ní kɛ́ gbâlaŋ ŋá? Le ƃe kala támaa káa la naai?’

²⁸È mò dîa, ǹyɛɛ, ‘Ŋ́gbɔara-nuu ƃe nyiŋi kɛ̀.’ Nya ƃe ŋɔtíi-kɛ-ƃelai dí mò ma, dîyɛɛ, ‘Ya ŋ̀wɛ̂lii ku li ku galai kula?’

²⁹E mò dîa, ǹyɛɛi, ‘Kpao, gɛ̀ ní, tãi ka pâi kɛ̂i galai kulâi lai, ka pâi wîi kulâi máŋ.

³⁰Ka ǹɛɛ naa dí lɛ́lɛ nɔ́ tɔnɔ é lɛ́ɛ la zu wîi-tee-tãi é seri. Gɛ̀ ní, ŋa pâi m̀ôi wîi-tee-ƃelai dîa, a gɛɛ dí galai tée fulɔi wîi su dí ŋìri a gɔŋ-ŋa gereŋ mɛni ma. Kɛ́lɛ, ka wîi tée, ká dɛ́ ŋákêrei su.’ ”

³¹E sáŋ da kpɛni sɔ̀ɔ dîɛ, ǹyɛɛ diai, “Ŋ̀âla-taa kâloŋ-laai káa yɛ̂ɛ mɛsɛ-kao tɔnɔ nyii nalôŋ tɔnɔ è zìɣe é zí ŋɔkpâlaŋ ŋái.

³²Berei máŋ gáa la a sí-sɛŋ kao guro-te é tɛ́ɛ la sí-sɛŋ-kao da-ni diai, kɛ́lɛ, a ƃɔ̂lɔ é kpɛtɛ é tɛ́ɛ sí-sɛŋ-kpɔlɔ da-ni dîa. A kɛ́ a wúru, ŋɔni-ŋa dí pa dí dítaa tɔɔ ŋoŋo-ŋai dîa.”

³³E sáŋ da kpɛni sɔ̀ɔ dîɛ, ǹyɛɛi, “Ŋ̀âla-taa kâloŋ-laai káa yɛ̂ɛ kpólo-tɛ-sɛŋ nyii nɛnî tɔnɔ è zìɣe é bène a felaƃa-bɔki tɔnɔ é lɛ́ɛ la zu felaƃai é tɛi.”

³⁴Zîsɛ è mɛni-ŋai ŋí kélee ƃò gbɔŋ ma sáŋ-woo-ŋa su, vé mɛni da kélee ƃô ní dîa kpɛ́ni é kúla sáŋ-woo pôlu.

³⁵È gɛ̀ tí a gɛɛ m̀ɛnii Ɣâla ŋɔlóno-kɛ-nuui è m̀oi ŋa-see é kɛ́, ǹyɛɛi, “Ŋa pâi lônoi nɔ́ a sáŋ-woo-ŋa. Ŋa pâi mɛni-ŋa ƃôi nyii-ŋai díloɔɔ̂i é síɣe ǹɔii kɔ́ɔ pîlaŋ-tãi mai.”

³⁶Zîsɛ è kùla gbɔŋ su é lí bɛ́rɛi mui. Ŋɔpôlu-ƃelai dí pà bɔ, dîyɛɛ mai, “Záŋ nyii bîlaŋɔɔi gbâlaŋ ŋá kala-ŋai diai zu kula kûɛ.”

³⁷Nya ƃe è díwoo su tòo, ǹyɛɛi, “Ǹúui a sí-sɛŋ lɛ́lɛɛ sìi, ǹyaa ƃa núu-kpune Ǹóŋ.

³⁸Ǹyaŋ gbâlaŋ ƃa ŋ̀éniɛi. Zí-sɛŋ lɛ́lɛɛ-ŋai ƃa Ɣâla ŋɔkâloŋ-laai su-lonii. Gala-ŋai ƃa ŋ̀wana-lɔ̂ɔ-nuui ǹônii.

³⁹Gbɔara-nuui nyii a dísîi, ǹyaa ƃa Dɛ̂ƃele. Ǹyaŋ wîi-tee-tãi ƃa ŋ̀éniɛi kpɛɛ ŋá. Wîi-tee-ƃelai ƃa Ŋ̀âla-taa-kela-ŋai.

⁴⁰Mɛni ma, berei nɔ dí gala-ŋai tèe la dí díkereŋ a ŋɔŋ, bere nɔ ƃe da pâi gɛ̂i la a ŋ̀éniɛi kpɛɛ ŋá-tãi.

⁴¹Núu-kpune Ǹóŋ a pâi Ŋɔɣâla-taa-kela-ŋai tɛɛ̂i a gɛɛ dí zãâi kélee ŋá tɛ́ ma nyii-ŋai da núu kɛ̀ é tóo sɔnyɔ̂ŋ sui dí díkula ŋɔkâloŋ-laai su, da diai da mɛni nyɔ́mɔɔ kɛ̀i.

⁴²Da pâi dípilîi ŋɔŋ su. Ǹaa ƃe da pâi kɛ̂i wɔ̂lɔi naa díkɛ dínyîŋ-ŋa-mii.

⁴³Gɛ̀ ní zɔŋ-lɛ́lɛ-ƃelai da pâi fólôi Dínâŋ ŋɔkâloŋ-laai su yɛ̂ɛ fólo. Ǹúui ŋ̀óli káa ŋuŋ ḿâ a gɛɛ é mɛni mɛ́ni, tɔɔ é m̀ɛni.

⁴⁴“Ŋ̀âla-taa kâloŋ-laai káa yɛ̂ɛ tɔɔ-sɛŋ nyii kɛ̀ a ǹoɔ́ɔ gbâlaŋ ŋái. Nalôŋ tɔnɔ è gàa é ŋɔnɔ ǹoo é lí a lii-nɛ̃ɛ é gɔ̃liŋ kélee kɔ́lɛ é gbâlaŋ kpîŋ yá.

⁴⁵“Ŋ̀âla-taa kâloŋ-laai káa yɛ̂ɛ pɔni-tɔɔ-nuu tɔnɔ nyii kɛ̀ kɔyɛ̂ŋ sɔ̃ɔ kpanaŋɔɔ kɔ́rîi.

⁴⁶Tãi è dɔnɔ kàa la nyii kɛ̀ a zɔ̃ɔ kpanaŋɔɔ̂i, è lì é gɔ̃liŋ kélee kɔ́lɛ é nya.

⁴⁷“Ŋ̀âla-taa kâloŋ-laai káa yɛ̂ɛ deɣaŋ nyii dí dòo ǹyái su é nyɛ̃ɛ-sîi kélee sóŋ.

⁴⁸Tãi ǹáa è fɛ̀ɛ lai, dí ŋàla zîŋ ma dí sée dí ǹɛ́lɛɛ-ŋai ɣɛ́ɛ zu dí dípu sɛŋ-folo-ŋa su, kɛ́lɛ, dí ǹyɔ́mɔɔ-ŋai píli.

⁴⁹Bere nɔ́ ƃe a pâi kɛ̂i la a ŋ̀éniɛi kpɛɛ ŋá-tãi. Ŋ̀âla-taa kela-ŋai da pâi pâi dí ŋ̀wana-lɔ̂ɔ-ƃelai ɣɛ́ɛ zɔŋ-lɛlɛ-ƃelai sama

⁵⁰dí dípili ŋɔŋ su. Nàa ƃe da pâi kɛ̂i naa díkɛ wɔ̂lɔ, díkɛ dínyîŋ-ŋa-mii.”

⁵¹Zîsɛ è dímarê kɛ̀ ǹyɛɛi, “Ká táre mɛni-ŋai ŋí kélee su?” Nya ƃe dí mò ma, dîyɛɛi, “Ooei, Kúnuu-namui.”

⁵²Nya ƃe è mò dîa, ǹyɛɛi, “Mɛni ma kɔlɔ-pɔ̃yɛ-nuu kélee nyii dí gɛ̀ a Ŋ̀âla-taa kâloŋ-laai su-nuui dai, gáa yɛ̂ɛ pɛ́rɛ-namu nyii a sɛŋ nina da sɛŋ pɔlɔ kùla ŋɔlaai-kɛ-kwaai mai.”

⁵³Nya ƃe è kɛ̀ tí, tãi Zîsɛ è kpɛ̀ɛ la a záŋ-ŋai ŋí sɔɔ̂i, è kùla dísama é lí.

⁵⁴Gɛ́ɛ a pá gbîŋ-lɔii sui, è sɛŋ lɛ̂ ǹûai dîa Díɣâla-fɛli-kerei mu. Ǹûai lá è kpàla dîa, dîyɛɛi, “Mí ƃe nalôŋ ŋí è dárei ŋí kùla naa, da díi kpaya-kpayai ŋí?

⁵⁵Ŋ̀úru-saa-naloŋ ǹóŋ fei ŋi? Ǹee láa fa Mere? Ǹêɣe-ni láa fa Zĩi da Zosɛ, da Samaŋ é pɛ́lɛ Zudasi ma?

⁵⁶Kwa ŋɔsaaƃɔlɔ-ŋai kélee kúfe kwaa tɔnɔ ma? Mí ŋaŋ ƃe nalôŋ ŋí è mɛni-ŋai ŋí kélee kùla naai?”

⁵⁷Dí díyee kùla mu. Kɛ́lɛ, Zîsɛ è mò dîa, ǹyɛɛi, “ƃâa káa Ɣâla ŋɔlóno-kɛ-nuu ma kwaa kélee ḿâ, kɛ́lɛ, ŋɔlɔii su fêi kpaa máŋ ŋɔpɛ́rɛi mu.”

⁵⁸Ve tíi kpaya-kpaya támaa kɛ́ ní naa, kpɛ́ni fêi, dífe láa ni la.