Read Kpelle Maafîu 14 Bible Online

Maafîu 14 - Kpelle bible

Maafîu 14

¹Ǹaa kɛ́ɛ tí, gâloŋ kɛ́tɛi Ɛɛlɔ è Zîsɛ maa-tuŋ mɛni.

²Nya ƃe è mò ǹyée-mu-ƃelai dîa, ǹyɛɛi, “Batâi-kɛ-nuui Zɔ̂ŋ ká ŋi, a m̀u siɣe saa yêei, maa-mɛni ƃe ŋwála-wala-ŋai ŋi da tíi kɛ̂i la gbonôi.”

³Kpɛ́ni fêi, Ɛɛlɔ è Zɔ̂ŋ sòŋ é ŋìri é bili kpini-pɛrɛ mu, ǹêɣe Fele ŋɔnɛnîi Ɛɛlôdia mɛni ma. Kpɛ́ni fêi, Zɔ̂ŋ è mò ma, ǹyɛɛi,

⁴“Ve dɔ̂ŋ lá-woo ma a gɛɛ í nɛnîi tí sɔlɔ ƃó.”

⁵Ɛɛlɔ è kɛ̀ ŋ̀wɛ̂lii é Zɔ̂ŋ páa. Kɛ́lɛ, è kɛ̀ yaôi gbɔŋ ma, kpɛ́ni fêi, ǹûai dí Zɔ̂ŋ siɣe a Ɣâla ŋɔlóno-kɛ-nuu.

⁶Kɛ́lɛ, tãi dí kɛ̀ Ɛɛlɔ maa sɔlɔ ƃó-kuui bêle kɛ̂i lai, Ɛɛlôdia ǹóŋ-nɛnîi è mãla kpɔ́ gbɔŋ su é Ɛɛlɔ líi laa.

⁷Nya ƃe Ɛɛlɔ è góno tèe é vóo ǹôloŋ ǹyêei a gɛɛ a pâi zɛŋ nyii kélee a marê kɛ̀ mɛni mai tɛ̂ɛi bɔ.

⁸Ǹee kɛ́ɛ a dárei, è mò Ɛɛlɔ ma, ǹyɛɛi, “Batâi-kɛ-nuui Zɔ̂ŋ ŋuŋ tɛ́ɛ ḿbɔ kawuru su.”

⁹Malôŋ è tòo gâloŋ ma. Kɛ́lɛ, ŋɔfóo-wooi mɛni ma da diai da dîa-ni dí kɛ̀ dílaa miî, è mò a gɛɛ é kɛ́ tí.

¹⁰Nya ƃe è núu tɛ̀ɛ dí Zɔ̂ŋ paa gbini-pɛrɛi mu.

¹¹Dí pà a ŋ̀uŋ kawuru su, dí dɛɛ nɛnî-loi pɔ é pá la ǹee pɔ.

¹²Nya ƃe Zɔ̂ŋ ŋɔpôlu-ƃelai dí pà dí boma siɣe dí ǹoo dí li dí m̀o Zîsɛ ma.

¹³Tãi Zîsɛ è nyiŋi mɛ̀ni lai, è kùla naa é ya-ŋa-keleŋ siɣe é li vɛ̃ɛ-kpâlaŋ su ǹyaa tɔnɔ kwaa ma. Tãi ǹûai dí mɛ̀ni lai, dí lɛ̀ɛ bôlu dí sia díkɔɔ ŋá dí kúla daa-ŋai su.

¹⁴Tãi è pìlaŋ la zîŋ mai, è ǹûai kâa dímalôŋ é zoŋ, è gɔlɔ-fela-ƃelai ƃàlo.

¹⁵Tãi ɣele-wulii è kɛ̀ lai, Zîsɛ ŋɔpôlu-ƃelai dí pà bɔ, dîyɛɛ mai, “Fɛ̂ɛ-kpalaŋ su ká ŋi, ǹyaŋ voloi a kɛ́ liî. Ǹûai tɛ́ɛ dí lí gbanâŋ-ŋai lá dí mii-sɛŋ ya díkpîŋ mɛni ma.”

¹⁶Kɛ́lɛ, Zîsɛ è mò dîa, ǹyɛɛi, “Maa fé nɛ̃ɛ ní a gɛɛ dí lí. Ka sɛŋ da tɛɛ dípɔ dí mii.”

¹⁷Kɛ́lɛ, dí mò ma, dîyɛɛi, “Kpólo-kpâla lɔ́ɔlu nɔ ƃe kúyêei ƃɛ da nyɛ̃ɛ feerɛ.”

¹⁸E mò dîa, ǹyɛɛi, “Ka pá a dia ḿbɔ.”

¹⁹Nya ƃe è mò a gɛɛ ǹûai dí see galai ŋá. È gbólo-kpâla lɔ́ɔlui sìɣe da nyɛ̃ɛ feerɛi é ŋɛ́i tɛ́ ŋelei su é lûwa too é gbólo-kpalai su ɣále é dɛɛ ŋɔpôlu-ƃelai pɔ, ŋɔpôlu-ƃelai dí dɛɛ ǹûai pɔ.

²⁰Díkelee dí mìi dí pela. Dí gbólo-pɛnɛi ŋá tɛ̀ ma é kpɔ̂lɔ puu kao feerɛ láa fɛɛ.

²¹Ǹyaŋ diai dílaa mìi dí kɛ̀ yɛ̂ɛ kpakolo wála lɔ́ɔlu (5,000) é kúla nɛyâai da ǹîa-pɛlɛɛi pôlu.

²²Nya ƃe Zîsɛ è gɛ̀ ŋɔpôlu-ƃelai dí píli kpɔ́ ǹyá ŋá-keleŋ su a maa felaa a gɛɛ dí li duɛ ǹya-ƃelai kpéli ma-pere é lɛ́ɛ la zu é ǹûai tɛɛ dí li.

²³Tãi è ǹûai tɛ̀ɛ la dí liî, è lì ǹyéei ma ǹyaa tɔnɔ kwaa ma é Ɣâla fɛli. È lɛ̀ɛ naa ǹyaa tɔnɔ ɣele-wulii é kɛ́.

²⁴Géleŋ è nâa kɛ̀ ǹyái sama, nya-ɣiliŋ kɛ́ ǹokwa, kpɛ́ni fêi, géleŋ è kɛ̀ vãai ŋɛ́i nyɔ́mɔɔ ma-pere.

²⁵Zîsɛ è sìa ǹyái ŋá é li dípɔ-pere a ɣele-ƃɔi-kpini.

²⁶Tãi ŋɔpôlu-ƃelai dí gàa la gɛ sia ǹyái ŋái, ŋuŋ-kɔlɔŋ è yeŋ a dia, dîyɛɛi, “Nyînaŋ ká tí!” Dí yao kpɔ́, díkɛ làɣi a ŋánaa.

²⁷Kɛ́lɛ, Zîsɛ è lòno dípɔ a maa felaa, ǹyɛɛi, “Ka kálii kpele. Ńyãa ká tí! Káfe yao!”

²⁸Nya ƃe Pitɛ è ŋ̀óo su tòo, ǹyɛɛi, “Kúnuu-namui, à kɛ̀ yá ƃe tí, ŋ́gɛ ŋá sía ǹyái ŋá, ŋá pá ípɔ.”

²⁹È mò m̀a, ǹyɛɛi, “Pá!” Nya ƃe Pitɛ è kùla géleŋ su gɛ̀ sia ǹyái ŋá gɛ̀ lì Zîsɛ pɔ́ pere.

³⁰Kɛ́lɛ, tãi è vãai kàa lai, è kɛ̀ yaôi. Gɛ́ɛ lɔ̂i ǹyái mui, è làɣi ǹyɛɛi, “Kúnuu-namui, ḿalo!”

³¹Nya ƃe Zîsɛ è ǹyée sãa kpɔ́ a maa felaa é Pitɛ zoŋ, ǹyɛɛ mai, “Óo ƃiai ílaa-lai kuro-têi, í sìa tòo ílii su le-mɛni ma?”

³²Tãi dí tɛ̀ la géleŋ sui, vãai è kpèra.

³³Diai kɛ̀ géleŋ sui, dí vɛ̀li, dîyɛɛ mai “Tɔ̃yâ ma, íkaa a Ɣâla Ǹóŋ.”

³⁴Ǹyái tíyeŋɔɔ dîɛi, dí pà Gɛnɛ̂sarɛ-lɔii ma.

³⁵Tãi ǹɔii ti su-ƃelai dí Zîsɛ kɔ̀lɔŋ lai, dí worɛ̂ tɛ̀ɛ nàa kɔlɛ ma taa-ŋai kélee su dí pa bɔ a diai kélee kɛ̀ kɔlɛɛ̂i.

³⁶Dí gbera fê a gɛɛ dí ŋɔyokpoi wóŋ sóŋ nɔ́. Ǹyaŋ diai kélee ŋɔyokpoi wóŋ sòŋ, dí ƃàlo.