Read Kpelle Maafîu 17 Bible Online

Maafîu 17 - Kpelle bible

Maafîu 17

¹Ɣele-kuu lɔ́ɔlu mɛi da tɛ́ɛ pôlu ma, Zîsɛ è Pitɛ sìɣe da Zĩi é pɛ́lɛ ǹêɣe Zɔ̂ŋ ma é lí a dia yée tɔ́ɔ tɔnɔ ma dítee-tee kwaa ma.

²Nya ƃe m̀aa è fàleŋ díŋɛi. Ŋ̀ɛi è kɛ̀ kpɔ́ fóloi yɛ̂ɛ voloi. Ŋɔseɣei kɛ́ kole yɛ̂ɛ yee-fũa.

³Nya ƃe Mose da Ilaza dí kùla díŋɛi, da Zîsɛ-ni díkɛ lono.

⁴Pitɛ è mò Zîsɛ ma, ǹyɛɛ, “Kúnuu-namui, ǹɛ́lɛɛ̂i a gɛɛ kúkaa ƃɛ. A kɛ̀ yà fàa m̀a, ŋa pâi ƃûu saaƃa tɔɔ̂i ƃɛ, dɔnɔ kɛ́ ƃò ímɛni ma, dɔnɔ kɛ́ ƃò Mose mɛni ma, dɔnɔ kɛ́ ƃò Ilaza mɛni ma.”

⁵Gɛ́ɛ niî lônoi, ɣele-kɔlɔŋ kole è dímɛi pɛ̂lɛ. Nya ƃe wóo è kùla ŋele-kɔlɔŋ kolei su, ǹyɛɛi, “Ŋáwɛli-kɛ-maa-Loŋ ká ŋí, nyii m̀aa-mɛni a ńii láai. Ka ŋ̀óo mɛni.”

⁶Tãi ŋɔpôlu-ƃelai dí m̀ɛni lai, dí díŋuŋ pîlaŋ ǹɔii ma, díkɛ yao kpɔ́ a ŋánaa.

⁷Nya ƃe Zîsɛ è pà é ǹyée pɛlɛ dîa, ǹyɛɛ diai, “Ka kámu siɣe, káfe yao.”

⁸Tãi dí díŋuŋ mu sìɣe lai, dífe núu da kélee kaa ni fɛ̂ɛ nɔ Zîsɛ.

⁹Tãi dí kɛ̀ ǹyéei yenîi lai, Zîsɛ è mò dîa, ǹyɛɛi, “M̀ɛnii ká gàai, káfe mo núu da kélee ma é lɛ́ɛ la zu núu-kpune Ǹóŋ é m̀u siɣe saa yêei.”

¹⁰Nya ƃe ŋɔpôlu-ƃelai dí marê kɛ̀, dîyɛɛ mai, “Le-mɛni ƃe ŋaŋ gɔlɔ-pɔ̃yɛ-ƃelai da mò la a gɛɛ fɛ̂ɛ Ilaza é pa fúlɔi?”

¹¹Nya ƃe è díwoo zu tòo, ǹyɛɛi, “Ilaza a pâi kpɔ a tɔ̃yâ. A pâi mɛnii kélee su sãâi.

¹²Ŋá m̀ôi kâa Ilaza a nâa pá, kɛ́lɛ, dífe m̀aa kpɛɛ ni. M̀ɛni ma, m̀ɛnii kélee dí kɛ̀ ŋ̀wɛ̂lii, dí gɛ̀ lai dí gɛ̀ la. Bere nɔ ƃe máŋ núu-kpune Ǹóŋ a pâi mɛni-soli kâai la díyee mu.”

¹³Ŋɔpôlu-ƃelai dí nâa tàre zu a gɛɛ è lòno dípɔ é pîlaŋ Batâi-kɛ-nuui Zɔ̂ŋ ma.

¹⁴Tãi dí sèri la gbɔŋ mai, nalôŋ tɔnɔ è pà bɔ é pɛ́lɛ gɔ́ɔ mu, ǹyɛɛ mai,

¹⁵“Kúnuu-namui, ńoŋ-surɔŋ malôŋ káa, kpɛ́ni fêi, deŋ-deŋ-kɔlɔ-fela kaa mà, gbanaŋɔɔ kpɔ́ mà a ŋánaa, kpɛ́ni fêi, tãi támaa a tôo ŋɔŋ ŋá, tãi támaa gɛ píli ǹyái su.

¹⁶Ŋá pà la ípôlu-ƃelai pɔ, dífe pɔ̂ri ni m̀álôi.”

¹⁷Nya ƃe Zîsɛ è ŋ̀óo su tòo, ǹyɛɛi, “Óo ŋ̀éniɛi ŋí su-ƃelai, laa-la fé káyêei, kálii su fé sãa ni. Fɛ̂ɛ ŋá kɛ́ kákɔlɛ a tãi ɣɛɛlu? Fɛ̂ɛ ŋá ńii kpéle káyêei a tãi ɣɛɛlu? Ka pá la ḿbɔ ƃɛ.”

¹⁸Nya ƃe Zîsɛ è lòno nyînaŋ nyɔ́mɔɔi mà, é kúla zurɔ̂ŋ-loi gbonôi. Zurɔ̂ŋ-loi è ƃàlo kpɔ́ nɔ a maa aƃai ti.

¹⁹Zîsɛ ŋɔpôlu-ƃelai dí pà bɔ dítee-tee kwaa ma, dîyɛɛ mai, “Kúfe pɔ̂ri ni gbɛ̂i le-mɛni ma?”

²⁰È mò dîa, ǹyɛɛi, “Kpɛ́ni fêi, kálaa-lai kuro-têi. Ŋá tɔ̃yâ ƃoi kâa, à kɛ̀ kálaa-lai kɛ́tɛ̂i máŋ yɛ̂ɛ mɛsɛ-kao, ka pâi m̀ôi ǹyéei ŋi ma, ‘Kula ƃɛ í lí manaa-pere,’ ǹyaŋ a pâi kulâi naa. Mɛni kélee bɔri a pâi kɛ̂i kâa. [

²¹Kɛ́lɛ, nyînaŋ nyɔ́mɔɔ-sii ŋí fa kûla núu kponôi, fɛ̂ɛ Ɣâla fɛliɛ da núu piliɛɛ suŋ su.”]

²²Dí kɛ́ɛ siâi gîe ma Galalii-kpiniŋ sui, Zîsɛ è mò dîa, ǹyɛɛi, “Da pâi núu-kpune Ǹóŋ tɛɛ̂i nûa pɔ.

²³Da pâi baâi, é m̀u siɣe saa yêei a ŋele-kuui zaaƃa-ɣelei.” Dílii è sòli kpɔ́ a ŋánaa.

²⁴Tãi dí sèri la Kapɔ̂niai, diai kɛ̀ a Ŋ̀âla-pɛrɛ Kɛ́tɛi mu-ŋuŋ-fela-fei kula-ƃelai dí pà Pitɛ pɔ, dîyɛɛ mai, “Kásɛŋ-lɛ-nuui fa ŋuŋ-fela-fei ŋí da kɔ̀lɛ?”

²⁵È zu tòo, ǹyɛɛi, “A gɔ̀lɛ.” Báa bɛ́rɛi mui, Zîsɛ ǹyaa fulɔi è lòno bɔ, ǹyɛɛ mai, “Íkili-ŋa-siai káa leŋ, Samaŋ? Gbɛ̂ɛ-ni ƃé ŋ̀éniɛi ŋí su-kaloŋ-ŋai da lɔii zûti da ŋuŋ-fela-fei kûla díyêei? Da gùla díkpɔɔ̂i-lonii yêei kpaa ŋɔ̃́ya-ŋa?”

²⁶Tãi è mò la, ǹyɛɛ, “Ŋɔ̃yâ-ŋai,” Zîsɛ è mò ma, ǹyɛɛi, “Mɛni ma díkpɔɔ̂i-lonii ŋuŋ-ma ƃóɔi.

²⁷Kɛ́lɛ, a gɛɛ káfe díkɛ dílii é ŋwána, lí í kpawɔ tóo ǹyái su. Nyɛ̃ɛi ya pâi gulâi a maa-ŋuŋ, ǹá táa, ya pâi sɛŋ-kao kole kâai ǹá. Gula í dɛɛ ǹûai pɔ́ kwa yá kúmɛni ma.”