Read Kpelle Maafîu 22 Bible Online

Maafîu 22 - Kpelle bible

Maafîu 22

¹Nya ƃe Zîsɛ è díwoo su tòo, é lono ŋɔnɔ dípɔ sáŋ-woo su, ǹyɛɛi,

²“Ŋ̀âla-taa kâloŋ-laai káa yɛ̂ɛ kâloŋ tɔnɔ nyii nɛnî-kula-kuu kɛ̀ ǹóŋ-surɔŋ mɛni mai.

³È ǹyée-mu-ƃelai tɛ́ɛ a gɛɛ dí diai è ƃɛlɛ-toli ƃò a dia nɛnî-kula-kuui mɛni mai tóli. Kɛ́lɛ, dífe kɛ́ ni ŋ̀wɛ̂lii dí pa.

⁴È ŋɔnɔ yée-mu-ƃelai da kpɛni-ŋa tɛ̀ɛ, ǹyɛɛ dîa, ‘Ka m̀ó diai ŋá ƃɛlɛ-toli ƃò a diai dia, ka gáa, ŋa ŋámii-sɛŋ kpɛtɛ. Ŋa ŋániŋa-sirɛ-ŋai da ŋátaa-tulɛ wúlɔɔ-ŋai paa. Ŋa nâa zãâi kélee kpɛtɛ. Ka pá nɛnî-kula-kuui su.’

⁵Kɛ́lɛ, dí m̀ɛni fòaŋ dîa dí lí dínîa-kwaa-ŋa ma. Dɔnɔ è lì ŋɔkpâlaŋ ŋá. Dɔnɔ è lì ŋɔpɔni tɔɔ̂i.

⁶Nya ƃe gbéli-ŋai dí ǹyée-mu-ƃelai sòŋ dí ŋumɛ-tua kɛ́ a dia, dí dípaa.

⁷Gâloŋ è ńii ŋwàna é ŋɔkɔ́-kuluƃa-ŋai tɛ́ɛ dí ǹúu-paa-ƃelai tí páa dí dítaai kereŋ.

⁸Nya ƃe è mò ǹyée-mu-ƃelai dîa, ǹyɛɛi, ‘Ǹɛnî-kula-kuui dãi a seri. Kɛ́lɛ diai ŋá ƃɛlɛ-tôli ƃò a diai, dímaa fé kɛ́ ní a nɛ̃ɛ.

⁹M̀ɛni ma ka lí bere-tãaŋ-ŋai lá ǹûai ka díkàai, ká ƃɛlɛ-tôli ƃó a dia dí pa ǹɛnî-kula-kûui su.’

¹⁰Nya ƃe ǹyée-mu-ƃelai dí lì bere-tãaŋ-ŋai lá dí ǹûai kélee ŋá tɛ gîe ma dí díkàai, núu nyɔ́mɔɔ-ŋa da núu lɛ́lɛɛ-ŋa. Nya ƃe ǹɛnî-kula-pɛrɛi lá è fɛ̀ɛ a ŋɔ̃yâ-ŋa.

¹¹“Kɛ́lɛ, tãi gâloŋ è lɔ̀ la a gɛɛ é ŋɔ̃yâ-ŋai káai, è nalôŋ tɔnɔ kàa nyii ǹɛnî-kula-kuui su-seɣe da fé kɛ́ ní mai.

¹²Nya ƃe è mò ma, ǹyɛɛi, ‘Ŋ́wɛlii, í pá-pere kɛ̀ leŋ ƃɛ́, gúui su-seɣei da fé yâi?’ Nya ƃe ǹúui gúui-su seɣei da fé kɛ́ ní m̀ai fé pɔ̂ri ní lônoi.

¹³Nya ƃe gâloŋ è mò ǹyée-mu-ƃelai dîa, ǹyɛɛi, ‘Ka ŋíri ǹyée da gɔ́ɔ ḿâ ká bili gbínii su. Ǹaa ƃe a pâi kɛ̂i naa gɛ̀ wɔ̂lɔ, gɛ nyíŋ-ŋa-mii.’

¹⁴Kpɛ́ni fêi, da núu támaa tòli, kɛ́lɛ, da-ŋa nɔ ƃe da ŋɛ̀ɛ zu.”

¹⁵Nya ƃe Faresii-ŋai dí lì dí díŋuŋ pîlaŋ berei da pɔ̂ri zonîi la ǹóno-woo sui.

¹⁶Dí dípôlu-ƃelai tɛɛ bɔ naa é pɛ́lɛ Ɛɛlɔ-ƃelai dîa, dîyɛɛi, “Kaamɔ̂ɔ, ku gɔ́lɔŋ a gɛɛ íkaa a tɔ̃yâ-nuu, íkɛ Ɣâla ŋɔperei lɛ́ a tɔ̃yâ, ífa yao núu da kélee ma. Ífe kpaaŋ ni núu tɔɔ̂i mɛni ma.

¹⁷Mɛni ma, m̀ó kûa lé ƃe gáa íkili ŋá. Gáa dɔ̂ŋ lá-woo ma a gɛɛ kú ŋuŋ-fela-fei tɛ́ɛ Gâloŋ Siizɛ pɔ, kpaa ve ti?”

¹⁸Kɛ́lɛ, Zîsɛ è díŋ̀wana-lɔ̂ɔ-lii kâa, é m̀ó dîa, “Káai a kíri-ƃelai, ka káyee lâai ḿâ le-mɛni ma?

¹⁹Káŋuŋ-fela-fei sɛŋ-kaoi lɛ́ mâ.” Nya ƃe dí pà a sɛŋ-kao bɔ.

²⁰È mò dîa, ǹyɛɛi, “Gbɛ̂ɛ pɔɔkɔ̂ŋ da ǹáa ƃé ŋí mai?”

²¹Díyɛɛ ma, “Gâloŋ Siizɛ.” Nya ƃe è mò dîa, “Gɛ̀ ní zɛŋ gáa a Gâloŋ Siizɛ pɔ́ɔi, ka dɛɛ Gâloŋ Siizɛ pɔ, ǹyaŋ zɛŋ gáa a Ɣâla pɔ́ɔi, ká dɛɛ Ɣâla pɔ.”

²²Tãi dí nyiŋi mɛ̀ni lai, díla è kpàla dîa, dí kula ŋ̀ɛ́i dí li.

²³Maa ɣelei tí, Sâdusii-ŋai nyii-ŋai dífe láa ni a mu-siɣe-saa yeei da-ni dí pà bɔ, dí m̀arê kɛ́,

²⁴dîyɛɛi, “Kaamɔ̂ɔ, Mose è mò, a gɛɛ, ‘À kɛ̀ núu à sàa, ve lóŋ kaa ní, fɛ̂ɛ ǹeɣe-ɣelei é bɔɔ-nɛnîi kúla é lóŋ kaa ma ǹîa mɛni ma.’

²⁵Lee-kaa-sinâa lɔ́ɔlu mɛi feerɛ dí kɛ̀ kúpɔ-naa, ǹia-ɣelei è nɛnî kùla, vé lóŋ káa ní ma, è saa é nɛnîi lɛ́ɛ ǹêɣe yêei.

²⁶Bere nɔ ƃe máŋ ǹêɣe ǹúui veerɛ-ɣelei è gɛ̀ la da zaaƃa-ɣelei é lɛ́ɛ la zu é séri ǹɔɔlu mɛi feerɛi-ɣelei ma.

²⁷Tãi díkelee dí sàa lai, nɛnîi máŋ è sàa.

²⁸Mɛni ma, mu-siɣe saa-yeei-tãi à sèri, ǹúu lɔ́ɔlu mɛi feerɛi tí, gbɛ̂ɛ ƃe bɔ́ɔ a pâi kɛ̂i a nɛnîi? Kpɛ́ni fêi, díkelee dí gùla a nɛnî.”

²⁹Kɛ́lɛ, Zîsɛ è díwoo su tòo, ǹyɛɛ diai, “Ka pɔara-maa kɛ̂i. Káfe Ŋ̀âla-kɔlɔi kɔlɔŋ kpaa máŋ Ɣâla ŋɔwala-wala-laai.

³⁰Kpɛ́ni fêi, mu-siɣe saa-yeei-tãi ma, surɔ̂ŋ fé pâi nɛnî kulâi, kpaa máŋ nɛnî e surɔ̂ŋ kula. Kɛ́lɛ, da pâi kɛ̂i nɔ́ yɛ̂ɛ Ɣâla-taa-kela-ŋa.

³¹Káfe nîi m̀ɛnii lono ni Ɣâla è mò é pîlaŋ mu-siɣe saa-yeei maa mɛnii mai? È mo, ǹyɛɛi,

³²‘Ńyãa ƃa Eberaɣɛ̃ɛ Ŋɔɣâlai, Aise Ŋɔɣâlai, da Zeeka Ŋɔɣâlai’? Ɣâla fé a zaa-ƃelai Díɣâla, fɛ̂ɛ vulu-ƃelai.”

³³Tãi gbɔŋ-su-ƃelai dí mɛ̀ni lai, ŋɔsɛŋ-lɛɛi è díla kpàla dîa.

³⁴Kɛ́lɛ, tãi nâa Faresii-ŋai dí mɛ̀ni la a gɛɛ a Sâdusii-ŋai kɛ̂ da dímɛi sáai, dí díŋa tɛ̀ gîe ma.

³⁵Dɔnɔi, nyii kɛ̀ a tɔ̂ŋ-lɛ-nuui, è marê kɛ̂ a gɛɛ é ǹyée láa ma, ǹyɛɛ,

³⁶“Kaamɔ̂ɔ, dɔ̂ŋ nênɛ ƃe gɛ́tɛ̂i dɔ̂ŋ sui?”

³⁷Nya ƃe Zîsɛ è zu tòo, ǹyɛɛi, “Ínuu-namui Ɣâla wɛ́li a ílii kélee, ímɔ̂leŋ kélee da íkili kélee.

³⁸Dɔ̂ŋ gɛ́tɛi da maa-ŋuŋ ká ŋí.

³⁹Ǹyaŋ veerɛi moloŋɔɔ̂i mai, ǹya ká ŋí, Íkɔlɛ-ma-nuui wɛ́li yɛ̂ɛ yá kpîŋ.

⁴⁰Dɔ̂ŋ feerɛi ŋí ƃe gáa a dɔ̂ŋ-ŋai kélee da Ɣâla ŋɔlóno-kɛ-ƃelai sɛ̂lɛŋ-ɣɛli.”

⁴¹Tãi Faresii-ŋai dí díŋa tɛ̀ la gîe mai, Zîsɛ è dímarê kɛ̀,

⁴²ǹyɛɛi, “Kákili-ŋa-siai káa leŋ é pîlaŋ Kôrai ma? Gbɛ̂ɛ ǹóŋ ƃe tí?” Dí mò ma, “Deeƃé ǹóŋ ƃe.”

⁴³È mò dîa, ǹyɛɛi, “Gɛ̀ ní, le ƃe Deeƃé a dòli la a Nuu-namu M̀ɔlêŋ sârai, ǹyɛɛi,

⁴⁴‘Nùu-namui-nuui è mò Ŋánuu-namui ma, See ńaa-mii-yee mɛi é lɛ́ɛ la zu ŋá íkpɔara-ƃelai pú íkɔɔ mu?’

⁴⁵À kɛ̂ ǹyaŋ Deeƃé a dòli a Nuu-namu, a pɔ̂ri kɛ̂i leŋ a ǹóŋ?”

⁴⁶Ǹyaŋ núu tɔnɔ kpîŋ fé pɔ̂ri ni ŋ̀óo su toôi a wóo da, kpaa máŋ é siɣe voloi tí ma núu da líi fé kpele ní kɛ̀ é marê kɛ́ ŋɔnɔ.