Read Kpelle Maafîu 25 Bible Online

Maafîu 25 - Kpelle bible

Maafîu 25

¹“Ŋ̀âla-taa kâloŋ-laai a pâi kɛ̂i yɛ̂ɛ nɛnî-kpela puu nyii-ŋai dílaŋpo-ŋai sìɣe dí li ǹɛnî-kula-surɔŋ tuɛ tɔɔi (da nɛnîi).

²Ǹɔ́ɔlu è kɛ̀ a moɔɔ, ǹɔ́ɔlu táreɛ.

³Kpɛ́ni fêi, tãi moo-ƃelai dí dílaŋpo-ŋai sìɣe lai, dífe wúlɔ da siɣe ni dí li la.

⁴Kɛ́lɛ, dáre-ƃelai dí lì a wúlɔ dísane-ŋai su da dílaŋpo-ŋai.

⁵Tãi ǹɛnî-kula-surɔŋ è tùa lai, nyii è tɛ̀ɛ a díkelee díkɛ ǹyii.

⁶“Kɛ́lɛ, tãi gbínii samai è seri lai, dí lolo-woo mɛ̀ni, ‘Ka nɛnî-kula-surɔŋ káa! Ka pá ká duɛ tɔ́ɔ.’

⁷È kɛ̀ tí, nɛnî-kpela-ŋai tí kélee dí dímu siɣe dí dílaŋpo-ŋai ŋáa tɛ́.

⁸Nya ƃe moo-ƃelai dí mò dáre-ƃelai dîa, dîyɛɛ, ‘Ka káwulɔ̂i da tɛ̀ɛ kúpɔ. Kpɛ́ni fêi, kúlaŋpo-ŋai da kɛ́ lîinii.’

⁹Kɛ́lɛ, dáre-ƃelai dí díwoo su tòo, dîyɛɛi, ‘Ɣele da vé pâi kɛ̂i a dámaa kúmɛni ma da kâa ni. Ka lí bɔni-tɔɔ-ƃelai pɔ ká da yá kámɛni ma.’

¹⁰Díkɛɛ liî ǹyâi, ǹɛnî-kula-surɔŋ è pà. Nya ƃe diai kɛ̀ a díkpɛtɛɛ̂i da ǹɛnî-kula-surɔŋ-ni dí lì ǹɛnî-kula-kuui su, dí bɛ́rɛi lá tɛ.

¹¹“Nyíti pôlu ma ǹɛnî-kpelai gbéli-ŋai dia máŋ dí pà, dîyɛɛi, ‘Kúnuu-namui, Kúnuu-namui, bɛ́rɛi lá ƃó kûɛ.’

¹²Kɛ́lɛ, è díwoo su tòo, ǹyɛɛi, ‘Ŋa tɔ̃yâ ƃoi kâa, fé kákɔlɔŋ.’ ”

¹³Nya ƃe Zîsɛ è m̀o dia nyɛɛi, “Mɛni ma, ka kámɛi káa. Kpɛ́ni fêi, káfe ŋelei kɔlɔŋ kpaa máŋ aƃai núu-kpune Ǹóŋ a pâi pâi lai.”

¹⁴“Ŋ̀âla-taa kaloŋ laai a pâi kɛ̂i nɔ́ yɛ̂ɛ núu kɛ́ɛ liî sia ma, é ǹyée-mu-ƃelai tôli é gɔ̃liŋ tɛɛ dípɔ a gɛɛ dí m̀ɛi káa.

¹⁵È dâla wála lɔ́ɔlu (5,000) tɛ̀ɛ dɔnɔ pɔ. É dâla wála feerɛ (2,000) tɛ́ɛ ŋɔnɔ dɔnɔ pɔ. É dâla wála tɔnɔ (1,000) tɛ́ɛ gbélii pɔ. È dɛ̀ɛ dípɔ tɔnɔ-tɔnɔ yɛ̂ɛ berei dítarei è kɛ̀ lai. É nâa lí ŋɔsiai ma.

¹⁶Nya ƃe ǹúui nyii dâla wála lɔ́ɔlui (5,000) sɔlɔ ƃôi, è pɔni-tɔ̀ɔ la a maa felaa é dâla wála lɔ́ɔlu (5,000) sɔlɔ ƃó a gêni.

¹⁷Bere-sii tɔnɔi tí su, ǹúui nyii dâla wála feerɛi (2,000) sɔlɔ ƃôi, è dâla wála feerɛ sɔlɔ (2,000) ƃó a gêni.

¹⁸Kɛ́lɛ, ǹúui nyii dâla wála tɔnɔi (1,000) sɔlɔ ƃôi, è lì é lóa tée é ŋɔnuu-namui ŋɔsɛŋ-kaoi loo ǹɔii mu.

¹⁹Tãi su kôya tɛ̂ɛi pôlu ma, ǹyée-mu-ƃelai dínuu-namui è nâa pà, é dímarê kɛ́ ŋɔsɛŋ-kaoi mɛni ma.

²⁰Ǹúui nyii dâla wála lɔ́ɔlui (5,000) sɔlɔ ƃôi, è pà a dâla wála lɔ́ɔlu (5,000) é bɛ̀lɛ bɔlɔi ma, ǹyɛɛ mai, ‘Gáa, Kúnuu-namui, í dâla wála lɔ́ɔlu (5,000) tɛ̀ɛ ḿbɔ, ŋa dâla wála lɔ́ɔlu (5,000) pɛ́lɛ ma a gêni.’

²¹Nya ƃe ŋɔnuu-namui è mò m̀a, ǹyɛɛi, ‘Í gɛ̀ a ǹɛ́lɛɛ, íkaa a yée-mu-nuu sãa lɛ́lɛɛ. Ya tûa sãa kɛ́ sɛŋ-loŋ mɛi. Ŋa pâi seêi sãâ támaa mɛi. Lɔ́ ínuu-namui ŋɔlii-nɛ̃ɛ su.’

²²Ǹúui nyii dâla wála feerɛi (2,000) sɔlɔ ƃôi, è pà, ǹyɛɛi, ‘Gáa, Kúnuu-namui, í dâla wála feerɛ (2,000) tɛ̀ɛ ḿbɔ, ŋa dâla wála feerɛ (2,000) pɛ́lɛ ma a gêni.’

²³Ŋɔnuu-namui è mò m̀a, ǹyɛɛi, ‘Í gɛ̀ a ǹɛ́lɛɛ, íkaa a yée-mu-nuu sãa lɛ́lɛɛ. Ya tua sãa kɛ́ sɛŋ-loŋ mɛi. Ŋa pâi íseêi sãâ támaa mɛi. Lɔ́ ínuu-namui ŋɔlii-nɛ̃ɛ su.’

²⁴Ǹúui máŋ dâla wála tɔnɔi (1,000) sɔlɔ ƃôi è pà, ǹyɛɛi, ‘Ŋánuu-namui, ŋá íkɔlɔŋɔɔ a gɛɛ íkaa a ǹúui ŋɔmɛni kpanaŋɔɔ̂i. Ya sí-sɛŋ ƃá kùla ƃɛi ífe zí ní naa, íkɛ sɛŋ ŋá tɛ gîe ma ƃɛi ífe daa-tâa ni naai.

²⁵M̀ɛni ma, ŋá kɛ̀ yáôi. Nya ƃe ŋá lì ŋá ísɛŋ-kaoi lóo ǹɔii mu. Ísɛŋ-kaoi ká.’

²⁶Kɛ́lɛ, ŋɔnuu-namui è ŋ̀óo su tòo, ǹyɛɛ mai, ‘Íkaa a ŋ̀wana-lɔ̂ɔ yée-mu-nuu nyɛ̃-nyɛ̃ŋɔɔ! Í kɛ̀ a gɔ́lɔŋɔɔ a gɛɛ ŋá sí-sɛŋ ƃá kùla ƃɛi fé zí ni naai, ŋ́gɛ sɛŋ ŋá tɛ gîe ma ƃɛi fé dâa-taa ni naai?

²⁷Mɛni ma eêi pɔ̂ri kɛ̂i a sɛŋ í ŋásɛŋ-kaoi tɛ́ɛ zɛŋ-kao mɛi-kaa-ƃelai pɔ́ a gɛɛ, tãi ŋà pà lai, ŋá zɔlɔ ƃó ŋá gêni sɔlɔ ƃó bôlu.

²⁸Mɛni ma ka zɛŋ-kaoi kúla ǹyêei ká dɛɛ ǹúui pɔ nyii dâla wála puui (10,000) káa ǹyêei.

²⁹Kpɛ́ni fêi, ǹúui kélee sɛŋ da káa ǹyêei, da pâi dámaa tɛɛ̂i bɔ. Kɛ́lɛ, ǹúui nyii sɛŋ da fé ǹyêei, nyíi máŋ gáa ǹyêei, da pâi gulâi ǹyêei.

³⁰Ka ǹyée-mu-nuu kpɛni-kpɛnii píli gbínii su. Ǹaa ƃe a pâi kɛ̂i naa gɛ̀ wɔ́lɔ gɛ̀ ǹyíŋ-ŋa-mii.’

³¹“Kɛ́lɛ, tãi núu-kpune Ǹóŋ a pâi pâi la ŋɔfólo-laai su da Ŋ̀âla-taa kela-ŋai kéleei, a pâi seêi ŋɔfólo-laai su-kaloŋ-see-sɛŋ ŋá.

³²Da pâi ŋ̀éniɛi-su-ƃelai kélee ŋá tɛ̂i díkîe-ma ŋ̀ɛi tuɛ. Ǹyaŋ a pâi díkulâi díkîe-ni sama, yɛ̂ɛ berei m̀ála mɛi-kaa-nuui a m̀ála-ŋai kûla la m̀oli-ŋai samai.

³³Ǹyaŋ a pâi m̀ála-ŋai pûi ǹáa-mii-yee mɛi-pere, é m̀oli-ŋai pu gɔɔ-yee mɛi-pere.

³⁴Gɛ̀ ní, gâloŋ a pâi môi diai díkaa ǹáa-mii-yee mɛi-perei dîa, ǹyɛɛi, ‘Ka pá, káai Ńâŋ ŋɔlûwai káa kâai. Ka kɛ́ gâloŋ-laai su nyii gbɛtɛɛ̂i kámɛni ma é síɣe ŋ̀éniɛi kɔ́ɔ-pîlaŋ-tãi mai.

³⁵Kpɛ́ni fêi, puru è kɛ̀ ŋ́gɛ̂i, ká mii-sɛŋ tɛɛ ḿbɔ. Kpele-wɛ̂li è kɛ̀ ŋ́gɛ̂i, ká yá tɛ́ɛ ḿbɔ. Ŋá kɛ̀ a ŋɔ̃́ya, ká káyee sée ḿû.

³⁶Ŋá kɛ̀ a ŋ́gaŋ, ká seɣe tɛ́ɛ ḿbɔ. Ŋá kɛ̀ kɔ́lɛ, ká ńaa káa. Ŋá kɛ̀ kpini-pɛrɛ mu, ká pá ḿbɔ-naa.’

³⁷Nya ƃe dɔ̃yâ-ƃelai dí marê kɛ̀, dîyɛɛ mai, ‘Kúnuu-namui, mí tãi ƃe kú íkàa la puru kɛ́ íkɛ̀, kú mii-sɛŋ tɛɛ ípɔi, kpaa máŋ kpele-wɛli kɛ́ íkɛ̀ kú yá tɛɛ ípɔi?

³⁸Mí tãi ƃe kú íkàa la a ŋɔ̃yâ kú kúyee see ímui, kpaa máŋ kú íkàa a íkaŋ, kú seɣe tɛɛ ípɔi?

³⁹Mí tãi ƃe kú íkàa la kɔ́lɛ, kpaa máŋ kpini-pɛrɛ mu, kú pa ípɔi?’

⁴⁰Ǹyaŋ gâloŋ a pâi díwoo su toôi, ǹyɛɛ diai, ‘Ŋa tɔ̃yâ ƃoi kâa, yɛ̂ɛ berei máŋ ká gɛ̀ la ŋáwɛli-kɛ-maa-ƃelai ŋí guro-têi mìi, ká gɛ̀ mî.’

⁴¹Gɛ̀ ní, a pâi ŋɔnɔ m̀ôi diai díkaa gɔɔ-yee mɛi-perei dîa, ǹyɛɛ diai, ‘Ka siɣe ŋ́gɔlɛ. Kpalo-ƃelai kâa. Ka lí ŋ̀ɔ́lɔ-wɔlɔ-ŋɔŋ su nyii gbɛtɛɛ̂i Dɛ̂ƃele da ŋɔkéla-ŋai mɛ̂ni mai.

⁴²Kpɛ́ni fêi, puru è kɛ̀ ŋ́gɛ̂i, káfe mii-sɛŋ tɛɛ ni ḿbɔ. Kpele-wɛli è kɛ̀ ŋ́gɛ̂i, káfe yá tɛɛ ni ḿbɔ.

⁴³Ŋá kɛ̀ a ŋɔ̃́ya, káfe káyee see ní ḿû. Ŋá ƃò a ŋ́gaŋ, káfe seɣe tɛɛ ní ḿbɔ. Ŋá kɛ̀ kɔ̂lɛi, ŋ́gɛ ƃò kpini-pɛ̂rɛ mu, káfe ńaa kaa ní.’

⁴⁴Dia máŋ da pâi marê kɛ̂i, dîyɛɛ mai, ‘Kúnuu-namui, mí tãi ƃe kú íkàa la, puru kɛ́ íkɛ̀, kpele-wɛli kɛ́ íkɛ̀, í ƃo a ŋɔ̃yâ, í kɛ́ ƃo a íkaŋ, íkɛ kɔlɛ, kpaa máŋ í kɛ́ ƃo kpini-pɛrɛ mu, kúfe kpɔŋ-maa tɛɛ ni ípɔi?’

⁴⁵Gɛ̀ ní, a pâi díwoo su toôi, ǹyɛɛ diai, ‘Ŋa tɔ̃yâ ƃoi kâa, yɛ̂ɛ berei máŋ káfe gɛ̀ ní la ŋáwɛli-kɛ-maa-ƃelai ŋí guro-têi mìi, káfe gɛ̀ ní mî.’

⁴⁶Ǹyaŋ nyii-ŋai da pâi liî wɔlɔ-wɔlɔ tɔŋ-kpɛ́-maa su. Kɛ́lɛ, zɔŋ-lɛlɛ-ƃelai da pâi liî wɔlɔ-wɔlɔ-fulu-laa su.”