Read Kpelle Maafîu 4 Bible Online

Maafîu 4 - Kpelle bible

Maafîu 4

¹Nya ƃe M̀ɔlêŋ è lì a Zîsɛ vɛ̃ɛ-kpâlaŋ su a gɛ́ɛ Dɛ̂ƃele é ǹyée láa mà.

²Zîsɛ è pìli suŋ su a ɣele-kuu buu náaŋ da kpíni-kuu buu náaŋ. Tãi è kpɛ̀ɛ la a suŋ siɣeɛ̂i puru è kɛ̀ m̀a a ŋánaa.

³Naa kɛ́ɛ tii, Dɛ̂ƃele è pà bɔ́ gɛ́ ǹyée lâa m̀a. È m̀o m̀a ma, ǹyɛɛi, “A kɛ̀ íkaa a Ɣâla Ǹóŋ, gɔni-ŋai ŋí kɛ́ dí pene a kpólo.”

⁴Kɛ́lɛ, Zîsɛ è Dɛ̂ƃele wóo su tòo, ǹyɛɛi, “Bɔ̃yɛɛ̂i, ‘Núu fa ŋɔfúlu-laai kɛ́ nɔ́ kpólo mii mɛni ma, kɛ́lɛ, a ŋɔfúlu-laai kɛ̂ ŋ̀óoi kélee mɛni ma a kûla Ɣâla lái.’ ”

⁵Nya ƃe Dɛ̂ƃele è lì la daa kɛ́tɛ maa waai su é zee Ŋ̀âla-pɛrɛ Kɛ́tɛi tôŋ su,

⁶è m̀o ma, ǹyɛɛi, “À kɛ̀ íkaa a Ɣâla Ǹóŋ, kúla ítoo, kpɛ́ni fêi, bɔ̃yɛɛ̂i, ‘A pâi ŋ̀óo tɛɛ̂i Ŋɔɣâla-taa-kela-ŋai pɔ́ é pîlaŋ yâ.’ Bɔ̃yɛɛ̂i ŋɔnɔ, ‘Da pâi ímu siɣêi díyee ŋá a gɛɛ ífe íkɔɔ tûa kɔni ma.’ ”

⁷Zîsɛ è mò ma, ǹyɛɛi, “Bɔ̃yɛɛ̂i ŋɔnɔ, ‘Ífe Ínuu-namui Ɣâla su kɔɔŋ.’ ”

⁸Nya ƃe Dɛ̂ƃele è ŋɔnɔ lì a Zîsɛ yée tɔɔ kɛ́tɛ tɔnɔ ma. È ǹɔii-ŋûŋ-ŋai kélee lɛ̀ ma ŋ̀éniɛi su da dífolo-laai.

⁹Dɛ̂ƃele è mò ma ǹyɛɛi, “Ŋa pâi zãâi ŋí kélee tɛɛ̂i ípɔ, à kɛ̀ yà tòo ŋ́gɔɔ mu í ḿvɛli.”

¹⁰Nya ƃe Zîsɛ è mò Dɛ̂ƃele ma, ǹyɛɛi, “Siɣe ŋ́gɔlɛ, Sêtɔŋ! Kpɛ́ni fêi, bɔ̃yɛɛ̂i, ‘Ínuu-namui Ɣâla fɛli, í tíi kɛ́ nɔ́ mì ǹyaa tɔnɔ.’ ”

¹¹Nya ƃe Dɛ̂ƃele è nâa sìɣe gɔlɛ. Ɣâla-taa-kela-ŋa dí pá bɔ díkɛ tíi kɛ̂ mì.

¹²Tãi Zîsɛ è mɛ̀ni la a gɛɛ dí Zɔ̂ŋ sòŋ a pelesinɛi, è lì Galalii.

¹³È kula Nâzarɛi, é pá é see Kapɔ̂nia yuo-loŋ kɔlɛ, Zɛbulɔŋ da Nɛfɛtɛli-kpiniŋ su,

¹⁴a gɛɛ mɛnii Ɣâla ŋɔlóno-kɛ-nuui Azaya è mòi ŋa-see é kɛ́. È mò, ǹyɛɛi,

¹⁵“Zɛbulɔŋ-lɔii da Nɛfɛtɛli-lɔii, nyii-ŋai díkaa yuo-loŋ ma-pere Zɔdiŋ Ya-Leei pôlu, Galalii, ƃɛ́i Zɛ̃tai-ŋai díkaa see ni naai,

¹⁶ǹûai nyii-ŋai kɛ̀ sêe ni kpînii, dí kwaa ponoɔ kɛ́tɛ kàa, nyii-ŋai kɛ̀ see ni saa-taa kpíni su da ŋɔninîŋ mui, kwaa-ponoɔ a kula a dia.”

¹⁷É síɣe maa-tãi tí ḿâ, Zîsɛ è pɛ̀lɛ Ɣâla-woo ƃóɔɔ ma, ǹyɛɛi, “Ka kálii pene, kpɛ́ni fêi, Ŋ̀âla-taa kâloŋ-laai a lɛɣɛ.”

¹⁸Zîsɛ kɛ́ɛ siâi Galalii Poai kɔlɛi, è Samaŋ kàa, nyii ǹáa è kɛ̀ a Pitɛi, da ǹêɣe Aŋdulu, díkɛ deɣaŋ píli ǹyái su, kpɛ́ni fêi, dí kɛ̀ a nyɛ̃ɛ-kpɛ́-ƃela.

¹⁹Nya ƃe è mò dîa, “Ka lɛ̀ɛ ḿbôlu, ŋa pâi kákɛ̂i a núu-soŋ-ƃela.”

²⁰Nya ƃe dí nâa ƃò dídeɣaŋ-ŋai dîa a maa félaa dílɛɛ bôlu.

²¹Tãi è tɛ̀ɛ la naai, è Zɛƃɛdi ǹóŋ Zĩi kàa da ǹêɣe Zɔ̂ŋ, da dínâŋ Zɛƃɛdi-ni dí kɛ̀ dí-deɣaŋ sɔ̀lɔ géleŋ su. Nya ƃe è dítòli.

²²Nya ƃe dí géleŋ lɛ̀ɛ da dínâŋ a maa félaa, dílɛɛ bôlu.

²³Nya ƃe è lì Galalii gwaa kélee gɛ sɛŋ lɛ Díɣâla-fɛli-kêre-ŋai mu, gɛ Ɣâla ŋɔkâloŋ-laai maa-tuŋ lɛlɛɛi ƃo, gɛ kɔlɔ-fela-sii kélee ƃalo ǹûai sama da mɛni-soli-sii kélee.

²⁴Maa-tuŋ è taa-taa Siria lɔii su gwaa kélee. Dí pà bɔ a diai kélee kɛ̀ kɔ́lɛ̂i, kɔlɔ-fela-sii tama-tamaa da mɛni-soli kɛ́ ƃo diai, diai nyinaŋ nyɔ́mɔɔ è kɛ̀ dípôlui, da diai deŋ-deŋ kɔlɔ-fela è kɛ̀ diai, da diai kɛ̀ a dímɛ̃lɛ-mɛ̃lɛŋɔɔ̂i. E díƃàlo.

²⁵Nya ƃe kpɔŋ kɛ́tɛ è lɛ̀ɛ bôlu. Ǹûai ŋi dí kùla Galalii da Daa-puu-lɔii su da Zerusâlɛŋ da Zuda da Zɔdiŋ Ya-Leei pôlu.