Read Kpelle Maafîu 5 Bible Online

Maafîu 5 - Kpelle bible

Maafîu 5

¹Gbɔŋ káa mìi, è tɛ̀ ǹyêei ma. Tãi è sèe lai, ŋɔpôlu-ƃelai dí pà dítinaŋ m̀a.

²Nya ƃe è nâa pɛ̀lɛ lônoi gɛ sɛŋ lɛ dîa, ǹyɛɛi:

³“Lûwa káa diai dîa díkoloɔ̂i dímɔ̂leŋ sui, kpɛ́ni fêi, Ŋ̀âla-taa kâloŋ-laai káa a dípɔɔ.

⁴Lûwa káa diai dîa da wɔ́lɔ̂i, kpɛ́ni fêi, da pâi díŋa nɛnɛ̂i.

⁵Lûwa káa diai dîa dílii maa yeŋɔɔ̂i, kpɛ́ni fêi, dîa ƃe dípɔɔ ƃa ǹɔii.

⁶Lûwa káa diai dîa puru a díkɛ da kpele-wɛli tɔ̃yâ-laa mɛni mai, kpɛ́ni fêi, da pâi pelâi.

⁷Lûwa káa diai dîa maloŋ-kaa káa díyêei, kpɛ́ni fêi, da pâi maloŋ-kaa sɔlɔ ƃôi.

⁸Lûwa káa diai dîa dílii su waâi, kpɛ́ni fêi, da pâi Ɣâla kâai.

⁹Lûwa káa diai dîa da nûa loai kpɛ̀tɛi, kpɛ́ni fêi, da pâi dítolîi a Ɣâla lônii.

¹⁰Lûwa káa diai dîa da díkpɔara tɔ̃yâ-laa mɛni mai, kpɛ́ni fêi, Ŋ̀âla-taa kâloŋ-laai káa a dípɔɔ.

¹¹“Lûwa káa kâa, káai da lôno kâa dí kákpɔara, dí wóo nyɔ́mɔɔ támaa ƃó a kálaa a lɛ́ɛ ḿaa mɛni mai.

¹²Kálii é nɛ̃ɛ kpɔ́ a ŋánaa, kpɛ́ni fêi, káfela-fei kɛ́tɛ̂i Ɣâla-taa. Kpɛ́ni fêi, bere nɔ ƃe dí Ɣâla ŋɔlóno-kɛ-ƃelai kpɔ̂ara la, nyii-ŋai kɛ̀ kátuɛi.

¹³“Káa ƃa ǹɔii ŋɔkpolo-liyeŋ. Kɛ́lɛ, à kɛ̀ gbolo-liyeŋ à ǹíyeŋ làŋ, a pɔ̂ri gɛ̂i leŋ é ǹíyeŋ sɔlɔ ƃo pôlu? Vé ŋɔnɔ lɛlɛ ní sɛŋ da kélee mɛ̂ni ma, fɛ̂ɛ nɔ dí bili núu é ƃɔlɔŋ ma a gɔ́ɔ.

¹⁴“Káa ƃa ǹɔii ŋɔkwaa-ponoɔ. Taa kɛ́tɛ nyii gáa yée mai, va lôo.

¹⁵Kpaa máŋ núu fá laŋpo tɔ̀ɔ a gɛɛ e zèe kpɔ̂lɔ mu, kɛ́lɛ, a zèe ɣelêi, à kɛ̀ tí a kwaa-ponoɔ tɛ̀ɛ bɛ́rɛi mu-ƃelai kélee pɔ.

¹⁶Tɔɔ kákwaa-ponoɔi é fólo ǹûai ŋ́ɛi-tuɛ a gɛɛ dí kátii lɛ́lɛɛi káa, dí Kánâŋ ŋɔfólo-laai maa tɛ́ nyii gáa Ɣâla-taai.

¹⁷“Káfe kákili ŋá sía a gɛɛ ŋá pà Mose ŋɔtɔ̂ŋ kara mɛni ma, kpaa máŋ Ɣâla ŋɔlóno-kɛ-ƃelai. Fé pá ní a gɛɛ ŋa díkara. Kɛ́lɛ, ŋá pà a gɛɛ ŋá díŋa-see kɛ́.

¹⁸Ŋá m̀ôi kâa a tɔ̃yâ, tãi nɔ́ ŋelei da ǹɔii dí káa nîi la naai, dɔ̂ŋ gbùa tɔ̂nɔ kpîŋ fé pâi kulâi m̀a é lɛ́ɛ la zu mɛni-ŋai kélee ŋa-see é kɛ́.

¹⁹Mɛni ma, ǹúui a dɔ̂ŋ-ŋai ŋí guro-têi kàra é maa-pere lɛ́ ǹûai diai, da pâi maa-nuui tólîi a ǹúui guro-têi Ŋ̀âla-taa kâloŋ-laai su. Kɛ́lɛ, ǹúui a díkɛ̀ é tela maa-pere lɛ́ ǹûai, diai, da pâi maa-nuui tólîi a ǹúui gɛ́tɛi Ŋ̀âla-taa kâloŋ-laai su.

²⁰Kpɛ́ni fêi, ŋá m̀ó kâa fɛ̂ɛ kátɔ̃yâ-laai é tɛ́ɛ gɔlɔ-pɔ̃yɛ-ƃelai da Faresii-ŋai díwɔ̂i ma, à wàla kɛ́ tí, káfe pâi wɔlɔ liî Ŋ̀âla-taa kâloŋ-laai su.

²¹“Ka m̀ɛnii mɛ̀ni dí wɔlɔ mò kánuu-pɔlɔ-ŋai diai, ‘Ífe núu pàa. Ǹúui kélee a núu pàai, da pâi tɔ̂ŋ kpɛ̂i maa-nuui tí ma.’

²²Kɛ́lɛ, ŋá m̀ôi kâa, ǹúui kélee a ǹíi ŋwâna gɔlɛ-ma-nuui ḿâ kpɛni-kpɛnii, maa nɛ̃ɛ̂i dí tɔ̂ŋ kpɛ́ maa-nuui tí ma. Ǹúui kélee a gɔlɛ-ma-nuui ŋumɛ̂i, maa nɛ̃ɛ̂i maa-nuui tí é tɔ́ɔ mɛni-ŋá-tee-kpɔŋ ŋ́ɛi-tuɛ. Ǹúui kélee a m̀ó, ‘Íƃoɔɔ̂i!’ maa nɛ̃ɛ̂i maa-nuui tí é kɛ́ Dɛ̂ƃele-taa ŋɔŋ ŋɔmɛni-kpɔ̂lui su.

²³Mɛni ma yà kɛ̀ pâi a ísama-sɛŋ Ŋ̀âla-teƃelei ḿâ, nàa kíli é tóo íŋa a gɛɛ mɛni nyɔ́mɔɔ káa íkɔlɛ-ma-nuui koi é pîlaŋ yâ,

²⁴ísama-sɛŋ é lɛ́ɛ kpɔ Ŋ̀âla-teƃelei lá mu í lí, ka íkɔlɛ-ma-nuui ká káloai kpɛtɛ fulɔi, à kɛ̀ tí, gɛ̀ ní, pá pôlu í ísama-sɛŋ tɛɛ.

²⁵Maa nɛ̃ɛ̂i a gɛɛ ka íkpɔara-nuui ka mɛnii kpɛtɛ a maa félaa tãi kákaa la berei mai. À wàla kɛ́ tí, íkpɔara-nuui a pâi ítɛɛ̂i mɛni-ŋa-tee-nuui pɔ́, mɛni-ŋa-tee-nuui ǹyaŋ a pâi ítɛɛ̂i gɔkuluƃai pɔ́, dí ípili kpini-pɛrɛ mu.

²⁶Ŋa m̀ôi yâ a tɔ̃yâ, pere kélee da fé pâi kɛ̂i naa a gɛɛ í kúla naa, fɛ̂ɛ zɛŋ-kaoi díkɛ̀ í gɔ̀lɛi, í gélee kɔ́lɛ.

²⁷“Ká nyiŋi mɛ̀ni dí wɔlɔ mòi, ‘Ífe wulu-wulu kɛ̀.’

²⁸Kɛ́lɛ, ŋá m̀ôi kâa, ǹúui kélee a ŋ̀ɛ́i pɛ̀lɛ nɔ nɛnî da ma, ŋ̀wɛ́li é zòŋ a wulu-wulu kɛ́ɛ maa-perei, maa-nuui tí a nâa wulu-wulu kɛ́ ǹíi su-pere.

²⁹Ǹyaŋ ílaa-mii-yee-mɛi ŋɛi-gaoi a íkɛ̀ í too sɔnyɔ̂ŋ su, gula í bíli. Kpɛ́ni fêi, maa nɛɛ̂i, a gɛɛ íkpono gbua da é kara é tɛ́ɛ la íkponoi kélee piliɛɛ ma Dɛ̂ƃele-taa.

³⁰Ǹyaŋ à kɛ̀ ílaa-mii-yee a íkɛ̀ í too sɔnyɔ̂ŋ su, dée yâ í bíli. Kpɛ́ni fêi, ǹɛ́lɛɛ̂i a gɛɛ íkponoi gbua da é kara é tɛ́ɛ la íkponoi kélee kéreŋɔɔ ma Dɛ̂ƃele-taa ŋɔ̂ŋ su ma.

³¹“Dí mò ŋɔnɔ a gɛɛ ǹúui a ŋɔnɛnîi lɛ̀ɛi, maa nɛɛ̂i é táa-laa-kɔlɔ tɛɛ bɔ.

³²Kɛ́lɛ, ŋa m̀ôi kâa, ǹúui kélee a ŋɔnɛnîi lɛ̀ɛ mɛni da kpɛni ma é kúla wulu-wulu kɛ́ɛ pôlui, maa-nuui tí a gɛ̀ ŋɔnɛnîi é wulu-wulu kɛ́. Ǹyaŋ ǹúui kélee a ǹɛnîi nyíi ŋɔsurɔ̂ŋ a ǹɛɛ̂i kula a ŋɔnɛnii, maa-nuui tí a wulu-wulu kɛ́.

³³“Ka ŋɔnɔ nyiŋi mɛ̀ni dí wɔlɔ mò nuu pɔlɔ-ŋai diai, ‘Ífe ífòo a wôya-pere, kɛ́lɛ, fɛ̂ɛ í ífòo-wooi ŋa-see kɛ́ nyii í gɛ̀ Ínuu-namui Ɣâla yêei.’

³⁴Kɛ́lɛ, ŋá m̀ó kâa, Káfe káfoo a dɔnɔ kpîŋ, káfe káfoo a Ɣâla-taa láa, kpɛ́ni fêi, naa ƃa Ɣâla seêi.

³⁵Káfe káfòo a ǹɔii mâ láa, kpɛ́ni fêi, naa káa a Ɣâla kɔ́ɔ tɔɔ̂i. Káfe tela káfoo a Zerusâlɛŋ, kpɛ́ni fêi, gâloŋ kɛ́tɛi ŋɔtaa kɛ́tɛi ká ti.

³⁶Ífe ŋɔnɔ ífòo a íŋuŋ, kpɛ́ni fêi, ífa pɔ̂ri íŋuŋ-leɣa kɛ̂i é kole, kpaa máŋ é tɛi.

³⁷Kɛ́lɛ, tɔɔ íwooi é kɛ́ nɔ́ a ‘Ooei, ooei.’ ‘Kpao, kpao.’ Kpɛ́ni fêi, ŋ̀óo-ŋai díkaa nyii-ŋai ŋí pôlui, da kûla sɔnyɔ̂ŋ-nuu lá.

³⁸“Ká nyiŋi mɛni dí wɔlɔ m̀oi, ‘Ŋɛi-gao a ŋɛi-gao pɔɔ-teei tɛ̀ɛ, nyíŋ kɛ́ nyíŋ pɔɔ-teei tɛ̀ɛ.’

³⁹Kɛ́lɛ, ŋá m̀ôi kâa, káfe kɔ sɔnyɔ̂ŋ-nuu pɔ. Kɛ́lɛ, núu à ílòkwa ílaa-mii-yee-mɛi-komai ḿâ, gbélii tínaŋ bɔ-naa-pere máŋ.

⁴⁰À kɛ̀ ŋɔnɔ núu da à íkɔlɔ sîɣe é íyɛkɛi kúla íyeêi, ǹɛɛ naa é íkôtii kúla íyeêi máŋ.

⁴¹Núu à íkɛ̀ a gɛɛ ka ǹyaa ká lí a máâi tɔnɔ, ka ǹyaa ka lí a máâi feerɛ.

⁴²Núu da à ífɛ̀li sɛŋ da ḿâ, dɛ̀ɛ bɔ. Núu da à kɛ̀ ŋ̀wɛli é kpâ sóŋ íyeêi, ífe ŋ̀ɛ́i kpâla.

⁴³“Ká nyiŋi mɛ̀ni dí mòi, ‘Íkɔlɛ-ma-nuui wɛ́li í íkpɔara-nuui kpɔara.’

⁴⁴Kɛ́lɛ, ŋá m̀ôi kâa, ka kákpɔara-ƃelai wɛ́li, ká Ɣâla fɛli diai mɛni ma da kákpɔarâi,

⁴⁵a gɛɛ kákɛ a Kánâŋ nyii gáa Ɣâla-taai ǹônii. Kpɛ́ni fêi, a voloi kɛ̀ é tóo sɔnyɔ̂ŋ-ƃela da tɔ̃yâ-ƃela dîa. É dunai tɛ́ɛ dɔ̃yâ-ƃelai da ŋwôya-ƃelai dîɛ.

⁴⁶Kpɛ́ni fêi, à kɛ̀ ka diai wɛ̀li nɔ dí káwɛli níi, lé ƃe ka pâi gulâi zu? Ŋuŋ-fela-fei kula-ƃelai dífa gɛ tí dia máŋ?

⁴⁷À kɛ̀ ka kála tì nɔ káƃarâai dîa, gɛ̀ ní lé ƃe ka gɛ̀ é tɛɛ káƃarâai dîai? Zɛ̃tai-ŋai dífa gɛ ti dia máŋ?

⁴⁸Mɛni ma kálaa é kɛ́ a vɛ́ɛ a wɛli-kɛ-maa, yɛ̂ɛ berei Káɣâla-taa-Nâŋ láa fɛɛ̂i la a wɛli-kɛ-maai.