Read Kpelle Maafîu 6 Bible Online

Maafîu 6 - Kpelle bible

Maafîu 6

¹“Ka kámɛi káa a gɛɛ káfe kátɔ̃yâ-laa kɛɛ̂i kɛ̀ nɔ́ nûa ŋ́ɛi a gɛɛ dí kákaa. Kà gɛ̀ ti, gɛ̀ ní káfe pâi fela-fei sɔlɔ ƃôi Káɣâla-taa-Naŋ yêei.

²“Mɛni ma, yà kɛ̀ sama-sɛŋ tɛɛ̂i, ífe m̀aa tûŋ too yɛ̂ɛ berei giri-ƃelai da gɛ̀ la Ŋ̀âla-fɛli-kêre-ŋai mu da bere-ŋai su, a gɛɛ núu-kpune é dílaa maa tɛi. Ŋa m̀ôi kâa a tɔ̃yâ a gɛɛ, da dífela-fei sɔlɔ ƃô.

³Kɛ́lɛ, yà kɛ̀ sama-sɛŋ tɛɛ̂i, ífe ǹɛɛ naa íkɔɔ-yee fé m̀ɛnii kɔ́lɔŋ ílaa-mii-yee káa gɛ̂i,

⁴a gɛɛ ísama-sɛŋ maa-mɛni é kɛ́ loo-pere su. Ǹyaŋ Ínâŋ nyii a loo-mɛni su kàai, a pâi ífela fêi (nûa ŋɛ́i).

⁵“Yà kɛ̀ Ɣâla fɛlîi, ífe gɛ̀ yɛ̂ɛ giri-ƃelai. Kpɛ́ni fêi, da ŋ̀wɛli dí tɔɔ Ŋ̀âla-fɛli-kêre-ŋai mu da bere-tãaŋ-ŋai lá díkɛ Ɣâla fɛ̀li a gɛɛ nûa dí díkaa. Ŋá tɔ̃yâ ƃoi kâa, da dífela-fei sɔlɔ ƃô.

⁶Kɛ́lɛ, yà kɛ̀ Ɣâla fɛlîi, lɔ́ íloŋpoi su, í bɛ́rɛi lá tɛ́, í Ínâŋ fɛli nyii gáa loo-pere sui. Ǹyaŋ Ínâŋ nyii a loo-mɛni su kàai, a pâi ífela fêi (nûa ŋɛ́i).

⁷“Kɛ́lɛ, kà kɛ̀ Ɣâla fɛlîi, káfe kɛ̀ wóo fólo-ŋa ƃôi yɛ̂ɛ berei Zɛ̃tai-ŋai da gɛ̀ lai. Kpɛ́ni fêi, da gàa a gɛɛ díwoo à tɛ̀ a dámaa da pâi díwoo mɛnîi.

⁸Mɛni ma, káfe kɛ̀ yɛ̂ɛ dia, kpɛ́ni fêi, Kánâŋ è zɛŋ kɔ́lɔŋ ka ŋ̀wɛ̂lii, ká lɛ́ɛ pâi m̀arê kɛ̂i.

⁹Mɛni ma, ka Ɣâla fɛli a bere-sii ŋi. ‘Kúnâŋ gáa ŋele sui, Tɔɔ ku ílaâi síɣe a maa waa.

¹⁰Tɔɔ Íkâloŋ-laai é pá, Tɔɔ ínîa-mɛni é kɛ́, Ǹɔii ma ƃɛ́ yɛ̂ɛ berei gáa la Ɣâla-taai.

¹¹Kúkɔ sâa a kúɣele-kuu tɔnɔ-tɔnɔ mii-sɛŋ;

¹²Í ípôlu fé kútɔ̂ŋ-karaa-ŋai dîa, Yɛ̂ɛ berei kwa kúpôlu fè la kúƃarâai dítɔ̂ŋ-karaa-ŋai diai;

¹³Tɔɔ kútuɛ kúfe píli yee-laa-maa su, Kɛ́lɛ, í kúkula mɛni nyɔ́mɔɔ su. (Kpɛ́ni fêi, ƃia ƃe ípɔɔ ƃa gâloŋ-laai, ŋwála-wala-laai, da vólo-laai, wɔlɔ-wɔlɔ da wɔlɔ-wɔlɔ. É kɛ́ tí.’)

¹⁴“Kpɛ́ni fêi, à kɛ̀ ka nûa su-mɛni lɛ̀ɛ dítɔ̂ŋ-karaa-ŋai mɛ̂ni m̀a, Káɣâla-taa Nâŋ a pâi máŋ kásu-mɛni lɛɛ̂i.

¹⁵Kɛ́lɛ, kà wàla nûa dítɔ̂ŋ-karaa-ŋai su-mɛni lɛɛ, Kánâŋ fé pâi máŋ kátɔ̂ŋ-karaa-ŋai su-mɛni lɛɛ̂i.

¹⁶“Kà kɛ̀ pilîi suŋ su, káfe káŋɛi ɣiri yɛ̂ɛ giri-ƃelai, kpɛ́ni fêi, da díŋɛi maa yiki a gɛɛ nûa dí gɔlɔŋ díkaa suŋ su. Ŋa tɔ̃yâ ƃôi kâa, da dífela-fei sɔlɔ ƃô.

¹⁷Kɛ́lɛ, yà kɛ̀ pilîi suŋ su, wulɔ sia íŋûa í íŋɛi waa,

¹⁸a gɛɛ nûa da íkàa, dífe gɔlɔŋ a gɛɛ íkaa suŋ su, fɛ̂ɛ Ínâŋ nyíi gáa loo-pere sui. Ǹyaŋ Ínâŋ nyíi a loo-mɛni su kàai, a pâi ífela fêi.

¹⁹“Káfe tɔɔ-sãa lâai kɛ̀ ǹɔii su kákpîŋ mɛni ma ƃɛi fili da kpɛ̃ɛ da pɔ̂ri garâi naai, da ƃɛi ŋúma-ƃelai da pɔ̂ri liî naa dí ŋumai.

²⁰Kɛ́lɛ, ka kátɔɔ-sãai lâai kɛ́ Ɣâla-taa kákpîŋ mɛni ma, ƃɛi fili da kpɛ̃ɛ dífa pɔ̂ri garâi naai, da ƃɛi ŋúma-ƃela dífa pɔ̂ri liî naa dí ŋumai.

²¹Kpɛ́ni fêi, ƃɛi ítɔɔ-sãai díkaa naai, nàa ƃe ílii a pâi kɛ̂i naa máŋ.

²²“Kpono ŋɔkwaa-ponoɔi ƃa ŋ́ɛi. Mɛni ma, à kɛ̂ íŋɛi a kwaa kâa a ǹɛ́lɛɛ, gɛ̀ ní íkponoi láa a pâi kɛ̂i a vɛ́ɛ a kwaa-ponoɔ.

²³Kɛ́lɛ, à kɛ̀ íŋɛi fa kwaa kâa, gɛ̀ ní, íkponoi láa a pâi kɛ̂i a vɛ́ɛ a kpíni. Mɛni ma, à kɛ̀ gwaa-ponoɔi íkponôi gáa a kpíni, gɛ̀ ní, gbínii kɛ́tɛ̂i kpɔ́ a ŋánaa!

²⁴“Núu tɔnɔ fa pɔ̂ri tíi kɛ̂i nuu-mɛi-ƃela feerɛ dîɛ, kpɛ́ni fêi, a pâi dɔnɔ kpɔarâi é gbélii wɛ́li, kpaa máŋ a pâi kánanîi dɔnɔ ma é ŋ̀ɛi pôlu fé gbélii mì. Káfa pɔ̂ri kɛ̂i Ɣâla yée mu da sɛŋ-kao.

²⁵“Mɛni ma, ŋá m̀ôi kâa, kálii fé sɛlɛŋ káfulu-laai mɛ̂ni ma, zɛŋ ka pâi miî, kpaa máŋ zɛŋ ka pâi gbelêi, kpaa máŋ zɛŋ ka pâi doôi kâai. Ǹyaŋ vulu-laai fé tɛɛ ni mii-sɛŋ ḿâ, gbonoi tɛ̂ɛi seɣe ma?

²⁶Ka ŋɔni-ŋai kâa ŋelei sui. Dífa sí-sɛŋ sì, kpaa máŋ dí dée dí dɛ́ kêrei, ǹyaŋ Káɣâla-taa-naŋ a díŋa kɔ̀ŋ. Ǹyaŋ kámaa-mɛni fé kpanaŋ ní é tɛ́ɛ dîa?

²⁷Gbɛ̂ɛ ƃa pɔ̂ri ŋɔfúlu-laai da pûi ma a lii-sɛlɛŋ?

²⁸Le ƃe kɛ̀ seɣe ḿaa lii-sɛlɛŋ káa kâai? Ka kákili ŋá sía é pîlaŋ ŋ̀úru-ŋai dîa berei da ƃɔ̂lɔ lai. Dífa tíi kɛ̀, dífa yee pɔ̃lɔ.

²⁹Kɛ́lɛ, ŋá m̀ôi kâa, Saloma kpîŋ ŋɔfólo-laai kélee su, vé kɛ́ ní a maa ɣiriɛ yɛ̂ɛ berei ŋ̀úru-ŋai ŋí dɔnɔ káa lai.

³⁰A kɛ̀ Ɣâla a galai maa ɣiri díkaa ǹɔɔi sú, nyii gáa sâa a vulu, kɛ́lɛ, tínaa da dèe dí bili ŋɔŋ sui, gɛ̀ ní, va pɔ̂ri kpɔ́ kámaa ɣirîi é tɛ́ɛ nyíti ḿâ. Kálaa-lai kuro-têi lé mɛ̂ni m̀a?

³¹Mɛni ma, kálii fé sɛlɛŋ, ká m̀ó kâa, ‘Lé ƃé kwa pâi miî?’ Kpaa ‘Lé ƃé kwa pâi gbelêi?’ Kpaa, ‘Lé ƃé kwa pâi ŋirîi kûa?’

³²Zãâi ŋí ƃe Zɛ̃tai-ŋai da gɔ́rii. Káɣâla-taa-naŋ è gɔ́lɔŋ a gɛɛ ka zãâi ŋí kélee wɛ̂lii.

³³Kɛ́lɛ, ka ŋɔkâloŋ-laai kɔ́ri da ŋɔtɔ̃yâ-laai fulɔi. À kɛ̀ ti, gɛ̀ ní, zãâi ŋí kélee a pâi kɛ̂i a kápɔɔ.

³⁴“Mɛni ma kálii fé sɛlɛŋ tínaa mɛni ma, kpɛ́ni fêi, tínaa líi a pâi sɛ́lɛnîi gbîŋ mɛni ma. Tɔɔ fólo tɔnɔi ŋɔmɛni nyɔ́mɔɔi é kɛ́ nɔ́ a gula-kɛ̂ɛ-ƃoɔɔ vólo tɔnɔi kpîŋ mɛni ma.