Read Kpelle Maafîu 8 Bible Online

Maafîu 8 - Kpelle bible

Maafîu 8

¹Gɛ́ɛ a ǹyêei yéŋ kpɔŋ kɛ́tɛ è lɛ̀ɛ bôlu.

²Nya ƃe gbôdo-nuu tɔnɔ e pà bɔ é vɛ̀li, ǹyɛɛi, “Kúnuu-namui, à kɛ̀ yà ŋ̀wɛli, ya pɔ̂ri ḿâloi.”

³Nya ƃe è ǹyée sãa é bɛlɛ mà, ǹyɛɛi, “Ŋa ŋ̀wɛ̂lii. Ƃálo.” Gbôdoi è kpɛ̀ɛ ma ŋ̀á má.

⁴Nya ƃe Zîsɛ è mò ma, ǹyɛɛi, “Ífe mo núu da kélee ma, kɛ́lɛ, lí í íkpîŋ lɛ́ zâla láa soŋ-nuui ma í zâlai kula yɛ̂ɛ berei Mose è mò lai. É kɛ́ a sêre ǹûai díɛ a gɛɛ yâa ƃalo.”

⁵Gɛ́ɛ tɛ̂i Kapɔ̂nia, kɔkuluƃa-mɛi-nuu tɔnɔ è pà bɔ gɛ gbera fé,

⁶ǹyɛɛi, “Kúnuu-namui, ńyee-mu-nuui káa láa ni bɛ́rɛi mu gɛ mɔ̃lɛ mɛ̃lɛ-mɛ̃lɛŋ kɔlɔ-fela yêei.”

⁷Nya ƃe è mò mà, ǹyɛɛi, “Ŋa pâi pâi ŋá m̀álo.”

⁸Kɛ́lɛ, gɔkuluƃa-mɛi-nuui è ŋ̀óo su tòo, ǹyɛɛi, “Kúnuu-namui, ḿaa fé nɛ̃ɛ ni a gɛɛ í lɔ́ ŋápɛrɛi mu. Kɛ́lɛ, m̀ó nɔ́ a íwoo, gɛ̀ ní ńyee-mu-nuui a pâi ƃálôi.

⁹Kpɛ́ni fêi, ńyãa máŋ ŋ́gaa a ǹúui wala-wala-laa káa núu yêei ḿɛi. Ńyãa máŋ kɔluluƃa-ŋa díkaa ńyee mu. Ŋà mò dɔnɔ ma, ‘Lí,’ a lî. Ŋà mò da kpɛni ma, ‘Pá,’ a pâ. Ŋà kɛ̀ ŋáluɛi mâ, ‘Mɛnii ŋí kɛ́,’ a gɛ̀.”

¹⁰Tãi Zîsɛ è nyiŋi mɛ̀ni lai, ǹá è kpàla mà, é mó diai dîa pîlaŋ bôlui, ǹyɛɛi, “Tɔɔ ŋátɔ̃yâ ƃó kâa, fé niî laa-la kɛ́ɛ ŋí kaa ní Eezuɛ.

¹¹Ŋá m̀ôi kâa, núu támaa da pâi kulâi voloi-ƃelai-pere da voloi-lii-pere dí pá a gɛɛ da Eberaɣɛ̃ɛ, Aise bɛlɛɛ Zeeka ma dí see Ŋ̀âla-taa kâloŋ-laai su,

¹²kɛ́lɛ, da pâi gâloŋ-laai su-lonii kulâi dí dípili gbínii su. Da pâi kɛ̂i naa díkɛ wɔ́lɔ díkɛ dínyîŋ-ŋa-mii.”

¹³Nya ƃe Zîsɛ è mò gɔkuluƃa-mɛi-nuui ma, ǹyɛɛi, “Lí. É kɛ́ nɔ yɛ̂ɛ berei ílaa-lai káa lai.” Ǹyaŋ gɔkuluƃa-mɛi-nuui yée-mu-nuui è ƃàlo nɔ a maa-aƃai ti.

¹⁴Tãi Zîsɛ è lɔ̀ la Pitɛ ŋɔpɛ́rɛi mui, è Pitɛ ǹyuâra kàa láa ni gɔlɔ-fãa mà.

¹⁵Nya ƃe è ǹyée sòŋ, gɔlɔ-fãa-maai é tée ma. È m̀u sìɣe é mii-sɛŋ kpɛ̀tɛ mì.

¹⁶Tãi ɣele-wulii è kɛ̀ lai, dí pà bɔ a nûa támaa nyii-ŋai nyînaŋ nyɔ́mɔɔ è kɛ̀ dípôlui. Nya ƃe Zîsɛ è nyînaŋ nyɔ́mɔɔ-ŋai kpɛ̀ a ŋ̀óo. Diai kɛ́ kɔ́lɛ̂i, è díkelee díƃalo,

¹⁷a gɛɛ mɛnii Ɣâla ŋɔlóno-kɛ-nuui Azaya è wɔ́lɔ mòi, ŋa-see é kɛ́. È mò, ǹyɛɛi, “È kúmɛni-soli-ŋai pɛlɛ gbîŋ ma é kúkɔlɔ-fela-ŋai siɣe.”

¹⁸Tãi Zîsɛ è kpɔŋ kɛ́tɛ kàa la dínaŋɔɔ mài, è mò a gɛɛ dí ǹyái tiyeŋ.

¹⁹Nya ƃe kɔlɔ-pɔ̃yɛ-nuu tɔnɔ è pà é m̀ó ma, ǹyɛɛi, “Kaamɔ̂ɔ, ƃɛi kélee ya liî naai, ŋa pâi lɛɛ̂i ípôlu.”

²⁰Nya ƃe Zîsɛ è mò mà, ǹyɛɛi, “Kɛlɛ̂ŋ-ŋa kɛ̂i ƃa loai, ŋɔni-ŋai díkɛ dítaa tɔ̂ɔ ŋelei su, kɛ́lɛ, núu-kpune Ǹóŋ ŋuŋ-laai fé mà.”

²¹Nya ƃe ŋɔpôlu-ƃelai dɔnɔ è mò mà, ǹyɛɛi, “Kúnuu-namui, ǹɛɛ naa ŋá lí ŋá ńâŋ saa lóo fúlɔi.”

²²Kɛ́lɛ, Zîsɛ è mò ma, ǹyɛɛi, “Lɛ́ɛ ḿbôlu, ǹɛɛ naa zaa-ƃelai dí díkpîŋ saa-ƃelai lóo.”

²³Tãi Zîsɛ è tɛ̀ la ǹyá ŋá-keleŋ sui, ŋɔpôlu-ƃelai dí lɛ̀ɛ bôlu.

²⁴Ǹaa kɛ́ɛ tii, fãa kɛ́tɛ è pɛ̀lɛ tɛ̂ɛi ǹyái ŋá, gɛ ǹyái píli géleŋ su. Kɛ́lɛ, Zîsɛ è kɛ̀ nyiî.

²⁵Nya ƃe, ŋɔpôlu-ƃelai dí pà bɔ dí ŋ̀ɛi lá ƃó, dîyɛɛ mai, “Kúnuu-namui, kúƃalo. Kwa saâi.”

²⁶Nya ƃe è mò dîa, ǹyɛɛi, “Le-mɛni ƃe ka yáôi là kpɔ́ ŋí la a ŋánaai! Kálaa-lai kuro-têi” Nya ƃe è m̀u sìɣe é lono vãai pɔ da ǹyái. Vãai da ǹyái díkerâ, nàa é kɛ̀ tɔ̀ŋ.

²⁷Ǹûai lá è kpàla dîa, dîyɛɛ, “Le-nuu ƃéi ŋí, vãai da ǹyái máŋ da ŋ̀óo mɛ̀nii?”

²⁸Tãi è ǹyái tìyeŋ la é pá Gɛ̂rɛsa-ŋai dílɔii sui, núu feerɛ dí kùla m̀olôŋ su, nyînaŋ nyɔ́mɔɔ-ŋa díkɛ ƃo dípôlu. Da dîa-ni dí kòyaŋ. Ǹûai ŋí dí kɛ̀ kpɔ́ a díŋ̀wana-lɔ̂ɔ, dí gɛ́ núu da fé pɔ̂ri ní tɛɛ̂i naa-pere.

²⁹Nya ƃe dí làɣi, dîyɛɛi, “Le ƃe yɛ̂ɛ í gɛ́ a kûa, yái íkaa a Ɣâla Ǹóŋ? Í pà a gɛɛ í kúŋa mɔ̃lɛ tãi é lɛ́ɛ serîi?”

³⁰Ǹyaŋ kwii-ƃoi kpulu kɛ́tɛ è kɛ̀ naa gɛ ǹáa mii. Moi-ŋai dí kɛ̀ a dímaa kôya dîa.

³¹Ǹyînaŋ nyɔ́mɔɔ-ŋai dí Zîsɛ kpera fè, dîyɛɛ mai, “À kɛ̀ yà kúkpɛ̂, kútɛɛ gwii-ƃoi-kpului kponôi.”

³²Nya ƃe Zîsɛ è mò dîa, ǹyɛɛi, “Ka lí.” Dí kùla díkponôi dí lí dí lɔ́ moi-ŋai kponôi. M̀oi-kpului kélee è ǹyéei yèŋ a kîrɛ é lɛ́ɛ ǹyái su.

³³Nya ƃe mòi mɛi-kaa-ƃelai dí pù dí tɛ daai su dí mɛnii kélee ƃo ǹûai dîa, dí ŋɔnɔ ǹûai maa-mɛni ƃo dîa, nyii-ŋai nyinaŋ nyɔ́mɔɔi è kɛ̀ dípôlui.

³⁴Nya ƃe daa-ƃelai kélee dí pà a gɛɛ dí Zîsɛ káa. Tãi dí gàa lai, dí gbera fê a gɛɛ é kúla dílɔii-kpíniŋ su.