Read Kpelle Maafîu 9 Bible Online

Maafîu 9 - Kpelle bible

Maafîu 9

¹È tɛ̀ yá-ŋá-keleŋ su é ǹyái tiyeŋ é seri bɔ-taai.

²Nya ƃe nûa dí pà a mɛ̃lɛ-mɛ̃lɛŋ-nuu tɔnɔ bɔ. E kɛ̀ laa ni gara ma. Tãi Zîsɛ è ǹûai dílaa-lai kàa lai, è mò m̀ɛ̃lɛ-mɛ̃lɛŋ-nuui ma, ǹyɛɛi, “Ńoŋ, ílii kpéle. Ísɔnyɔ̂ŋ-ŋai su-mɛni a lɛɛ.”

³Nya ƃe gɔlɔ-pɔ̃yɛ-ƃelai da-ni dí mò díkili ŋá, dîyɛɛ, “Nalôŋ ŋí a tɛ-ŋɛi kɛ̂i a Ɣâla.”

⁴Zîsɛ è díkili-ŋa-siai kɔlɔŋ, é m̀ó dîa, ǹyɛɛi, “Ka mɛni nyɔ́mɔɔ kpɛtɛ̂i kálii su le-mɛni ma?

⁵Nênɛ ƃe gɛ́-la nɛɛ̂i a gɛɛ ŋá mói, ‘Ísɔnyɔ̂ŋ su-mɛni a lɛɛ,’ kpaa máŋ, ‘Ímu siɣe í sia’?

⁶Kɛ́lɛ, ŋa pâi ǹɛɛ̂i naa ká gɔ́lɔŋ a gɛɛ wala-wala-laa káa núu-kpune Ǹóŋ yêei é sɔnyɔ̂ŋ su-mɛni lɛɛ ǹɔii ma ƃɛ.” È mò m̀ɛ̃lɛ-mɛ̃lɛŋ-nuui ma, “Ímu siɣe í ígarai síɣe í lí ípɛrɛi lá.”

⁷È mù sìɣe é lí ŋɔpɛ́rɛi lá.

⁸Tãi gbɔŋ è nàa kàa lai, ǹûai dí yào, díkɛ Ɣâla ŋɔfólo-laai maa tɛ a gɛɛ a ŋwála-wala-laai ti tɛ́ɛ núu pɔ.

⁹Tãi Zîsɛ è kɛ̀ tɛɛ̂i la nàa kɔlɛ mai, è nalôŋ tɔnɔ kàa see ni ŋuŋ-fela-fei kula-pɛrɛi lá, da kɛ̂ mà Maafîu. È mò ma, ǹyɛɛi, “Lɛ́ɛ ḿbôlu.” È m̀u sìɣe é lɛ́ɛ bôlu.

¹⁰Tãi Zîsɛ è kɛ̀ see ni la bɛ́rɛi mu gɛ ǹáa mii, ŋuŋ-fela-fei kula-ƃela támaa da sɔnyɔ̂ŋ-ƃela dí pâ dí see gɔlɛ da ŋɔpôlu-ƃelai ni.

¹¹M̀ɛnii ŋí nàa káa Faresii-ŋai dîɛi, dí mò ŋɔpôlu-ƃelai dîa, dîyɛɛi, “Kásɛŋ-lɛ-nuui da ŋuŋ-fela-fei kula-ƃela da sɔnyɔŋ-ƃela da dílaa miî gîe ma, le-mɛni ma?”

¹²Tãi è mɛ̀ni lai, è mò dîa, ǹyɛɛi, “Diai díkɔlɔ̂i ponoɔ̂i, dífa sále-kɛ-nuu wɛ́li kɛ́, fɛ̂ɛ diai díkaa kɔ́lɛ̂i.

¹³Ka lí ká nyiŋi su-kulâi maa kɔ́ri, ‘Ŋa malôŋ-kaa wɛlii, kɛ́lɛ, sâla kúla fêi.’ Fe pa ni a gɛɛ ŋa tɔ̃yâ-ƃela toli fɛ̂ɛ sɔnyɔ̂ŋ-ƃela.”

¹⁴Zɔ̂ŋ ŋɔpôlu-ƃelai dí pà bɔ dîyɛɛ mài, “Le ƃe kwa Faresii-ŋai kwa pîli suŋ su (a dámaa), kɛ́lɛ, ípôlu-ƃelai dífa pîli suŋ sui?”

¹⁵Nya ƃe Zîsɛ è mò dîa, ǹyɛɛi, “À kɛ̀ nɛnî-kula-surɔŋ à kɛ̀ naa, nɛni-kula-kúui su-ƃelai da wɔ̂lɔ? Ŋele-kuu-ŋai da pâi pâi, tãi da pâi nɛnî-kula-surɔŋ kulâi la díyêei. Maa-tãi tí ƃe da pâi pilîi la súŋ su.

¹⁶Núu fa seɣe pɔlɔ pɛ́ŋ pɛlɛ a seɣe kpua nina. A kɛ̀ à gɛ̀ tí, gɛ̀ ní, zeɣe kpua ninai a pâi zeɣe pɔlɔi fálâi. Gɛ̀ ní, ǹóai su a pâi kɛ́tɛ̂i é tɛ́ɛ bɔlɔi ma.

¹⁷Núu fa ŋwã̂ai nina pu sua-kɔlɔ-gonoŋ pɔlɔ-ŋa su. À gɛ̀ tí, ŋwã̂ai a pâi zua-kɔlɔ-gonoŋ-ŋai ƃɔ́i é pú. Gɛ̀ ní, zua-kɔlɔ-gonoŋ-ŋai da pâi karâi. Kɛ́lɛ, da ŋwã̂ai nina pù sua-kɔlɔ-gonoŋ nina-ŋa su, à kɛ̀ tí dífeerɛŋɔɔ dífe pâi karâi.”

¹⁸Tãi Zîsɛ è kɛ̀ m̀ɛni-ŋai ŋí ƃò la diai, nuu-mɛi-nuu tɔnɔ è pà é vɛ̀li, ǹyɛɛi, “Ńoŋ-nɛnîi aâ saa nɔ́ lonii ma. Kɛ́lɛ, pá í íyee pɛ́lɛ mà, gɛ̀ ní, a pâi ŋɔnɔ kɛ̂i a vulu.”

¹⁹Nya ƃe Zîsɛ è mu sìɣe é lɛ́ɛ bôlu da ŋɔpôlu-ƃelai.

²⁰Nya ƃe ǹɛnî tɔnɔ è kɛ̀ naa, nyii ŋãa-kɔlɔ-fela è kɛ̀ ma kóraŋ puu kao feerɛ yée mu. È pà Zîsɛ pôlu-pere é ŋɔyokpoi wóŋ soŋ.

²¹Ǹɛnîi ŋí è mò goi-pere, ǹyɛɛi, “A kɛ̀ nɔ ŋà ńyee pɛ̀lɛ ŋɔyokpoi ma, ŋa pâi ƃálôi.”

²²Zîsɛ è tinaŋ é gáa é m̀ó ma, ǹyɛɛ ma, “Ńoŋ-nɛnii, ílii kpéle, ílaa-lai a íƃalo.” Ǹyaŋ è kɛ̀ kpɔ́ nɔ́ tí, nɛnîi é nâa ƃàlo a maa-aƃai ti.

²³Ǹyaŋ tãi Zîsɛ è lɔ̀ la ǹúu-mɛi-nuui ŋɔpɛ́rɛi mu, é dúru-fɛɛ-ƃelai káa da kpɔŋ díkɛ yóo-yoo kɛi,

²⁴è mò dîa, ǹyɛɛi, “Ka kúla kâa, kpɛ́ni fêi, nɛnî-loi fé saa ní, kɛ́lɛ, gáa nyiî.” Nya ƃe díkɛ̀ ɣɛ́lɛ-maa kulâi gbonôi.

²⁵Kɛ́lɛ, tãi dí gbɔŋ kùla lai, è lɔ̀ é nɛnî-loi soŋ a ǹyée, nɛnî-loi è m̀u siɣe.

²⁶Nya ƃe mɛnii ŋi duŋ è taa-taa kpɔ ǹɔii tí gwaa kélee ḿâ.

²⁷Zîsɛ kúlaa naa gɛ tɛɛ̂i, ŋɛ́i-pu-ƃela feerɛ dí lɛ̀ɛ bôlu díkɛ wɔ̂lɔ, dîyɛɛi, “Kúmalôŋ káa, yai íkaa a Deeƃé Ǹóŋ.”

²⁸Tãi Zîsɛ è pà la bɛ́rɛi mui, ŋ̀ɛi-pu-ƃelai dí pà bɔ. Nya ƃe Zîsɛ è mò dîa, ǹyɛɛi, “Ka lâai la a gɛɛ ŋa pɔ̂ri nyiŋi kɛ̂i?” Dí mò ma, dîyɛɛi, “Ooei, Kúnuu-namui.”

²⁹Nya ƃe è ǹyée pɛ̀lɛ díŋɛi ma, ǹyɛɛ diai, “É kɛ́ nɔ yɛ̂ɛ berei kálaa-lai káa lai.”

³⁰Nya ƃe díŋɛi lá è ƃò. Zîsɛ è dília-wôo ƃò a gbanaŋɔɔ, ǹyɛɛ dîai, “Káfe ǹɛɛ naa núu da kélee é gɔlɔŋ.”

³¹Kɛ́lɛ, dí lì dí maa-tûŋ táa-tâa ǹɔii tí gwaa kélee.

³²Díkɛɛ kulâi naai, dí pà bɔ a mûgbɛ-naloŋ tɔnɔ nyii nyînaŋ nyɔ́mɔɔ è kɛ̀ bôlui.

³³Tãi è nyînaŋ nyɔ́mɔɔi kpɛ̀ la mûgbɛ-naloŋ pôlui, mûgbɛ-naloŋ è lòno. Nya ƃe gbɔŋ lá è kpàla dîa, dîyɛɛi, “Mɛni kɛ́ɛ ŋi da fé tá wɔ́lɔ kɛ́ ni Eezuɛ.”

³⁴Kɛ́lɛ, Faresii-ŋai dí mò, dîyɛɛi, “Ǹyînaŋ nyɔ́mɔɔ-ŋai díkâloŋ sârai ƃe a nyînaŋ nyɔ́mɔɔ-ŋa kpɛ̀ la.”

³⁵Nya ƃe Zîsɛ è lì daa kpaya-kpayai kélee su da gbanâŋ-ŋai kélee lá, gɛ sɛŋ lɛ Díɣâla-fɛli-kêre-ŋai mu. Gɛ Ɣâla ŋɔkâloŋ-laai maa-tuŋ lɛ́lɛɛi ƃo, gɛ kɔlɔ-fela-sii kélee ƃalo da mɛni soli-sii kélee.

³⁶Kɛ́lɛ, tãi è gbɔŋ kàa lai, dímalôŋ è zòŋ. Kpɛ́ni fêi, dí kɛ̀ mɔ̃lɛ̂i, dílaŋɔɔ nɔ yɛ̂ɛ ƃála-ŋa ƃe dímɛi-kaa-nuu fé ma.

³⁷Nya ƃe è mò ŋɔpôlu-ƃelai dîa, ǹyɛɛi, “Tɔ̃yâ ma, mɔlɔŋ mɔ̃ɔ̂i a zu kɛ́tɛ, kɛ́lɛ, dée-ƃelai dífe tama ni.

³⁸M̀ɛni ma, ka mɔlɔŋ-namui marê kɛ́ a gɛɛ é mɔlɔŋ-tee-ƃela tɛɛ ŋɔmɔlɔŋ-kpalaŋ ŋá.”