Read Kpelle Mâki 1 Bible Online

Mâki 1 - Kpelle bible

Mâki 1

¹Duŋ Lɛ́lɛɛi bîlaŋɔɔi Ɣâla Ǹóŋ Zîsɛ Kôrai mai, gɔ́ɔ pîlanii ká ŋí.

²Ɣâla ŋɔlóno kɛ́-nuui Azaya è m̀o ǹyɛɛi, “Ɣâla ǹyɛɛ, ‘Gáa, ŋa ŋákelai tɛɛ̂i ítûɛ-pere, ǹyaa ƃé pâi berei kpɛtɛ̂i yɛ̂.’

³Ǹyaa ƃa ǹúui ŋ̀óo káa tɛ̂i vɛ̃ɛ-kpâlaŋ su, ǹyɛɛi, ‘Ka Kánuu-namui ŋɔpere-ŋai kpɛtɛ, ká dísu sã́a m̀i a gɛ́ɛ é tɛ́ɛ naa.’ ”

⁴Batâi Kɛ́-nuui Zɔ̂ŋ è pà vɛ̃ɛ-kpâlaŋ su é ɣâla-woo ƃó naa ǹûai dîa. È m̀o dîa ǹyɛɛi, “Ka kálii-pene ŋá kábatâi kɛ́ a gɛ́ɛ Ɣâla é kásu mɛni lɛɛ zɔnyɔ̂ŋ-ŋai ka gɛ̀i mɛni ma.”

⁵Nya ƃe Zuda-ƃelai da Zerusâlɛŋ-ƃelai kélee dí pà bɔ́. Dí dísɔnyɔ̂ŋ-ŋai ƃò m̀a, é díbatâi kɛ́ Zɔdiŋ Yai su.

⁶Zɔ̂ŋ ŋɔseɣei è kɛ̀ a gbɛ́tɛɛ a soo-fáleŋ leɣa záma ma ɣiri seɣe kpuai è kɛ̀ ƃò a gbɛ́tɛɛ a sua-kɔlɔ. Gotó da kwɛ̃ŋ wulɔ ƃé kɛ̀ a gɔ́lɔŋ.

⁷È Ɣâla-woo ƃò ǹûai dîa. È m̀o dîa ǹyɛɛi, “Núu tɔnɔ káa pâi ḿbôlu ma, ŋɔwála-wala-laai tɛɛ̂i ŋ́ɔ̂i ma. Ḿaa fé nɛ̃ɛ ní máŋ ŋá ḿaa pɛlɛ ŋá ŋɔkpaŋ-kpalii ɣɛli fúloŋ.

⁸Ŋa kábatâi kɛ̂i a yá, kɛ́lɛ, a pâi kábatâi kɛ̂i a M̀ɔlêŋ Maa Waai.”

⁹Zîsɛ kúlaa Nâzarɛ, Galalii kpiniŋ su ɣele kûu kpɛ́-kpɛ̂ɛ tɛ̂ɛi pôlu mai, Zɔ̂ŋ è ŋɔbatâi kɛ̀ Zɔdiŋ Ya-leei su.

¹⁰Zîsɛ kúlaa ǹyái sui, è ŋ̀ele-kɔlɔŋ su kàa ǹá ƃóɔɔ. M̀ɔlêŋ Maa Waai è kùla naa gɛ́ɛ yɛ̂ɛ tòloŋ é pîlaŋ mà.

¹¹Nya ƃe wóo da è kùla ŋ̀elei su, ǹyɛɛi, “Yá ƃa ŋáwɛli kɛ́-maa Loŋ. Ńii lâai a ímaa mɛni.”

¹²Ǹaa kɛ́ɛ tíi, M̀ɔlêŋ Maa Waai è gɛ̀ Zîsɛ é lí vɛ̃ɛ-kpâlaŋ su.

¹³È kɛ̀ naa a ɣele kûu buu náaŋ Sêtɔŋ kɛ́ ǹyée làa ma. È kɛ̀ naa lɔɔ sua-ŋa sáma. Kɛ́lɛ ɣâla-taa kela-ŋa dí kɛ̀ naa máŋ díkɛ m̀ɛi kàa.

¹⁴Zɔ̂ŋ kɛ́ɛ da sòŋ a pelesinɛ da bú kpini-pɛrɛ mui, Zîsɛ è lì Galalii gɛ Duŋ Lɛ́lɛɛi ƃo naa é pîlaŋ Ɣâla ma,

¹⁵ǹyɛɛi, “Ɣâla ŋɔkâloŋ-laai a lɛɣɛ a tɔ̃yâ kpîŋ. Ka kálii pene ká láa a Duŋ Lɛ́lɛɛi maa mɛni.”

¹⁶Zîsɛ kɛ́ɛ siâi kɛ̀ Galalii Poai kɔlɛi, è Samaŋ kàa da ǹêɣe Aŋdulu díkɛ nyɛ̃́ɛ sòŋ a dídeɣaŋ ǹyái su. Ǹûai ŋí díkɛ̀ a ya kɔ̃liŋ kɛ́-ƃela.

¹⁷Zîsɛ è mò dîa ǹyɛɛi, “Ka pîlaŋ ḿbôlu. Ŋa pâi kákɛ̂i a nûa-soŋ-ƃela.”

¹⁸Dí nàa ƃò dídeɣaŋ ma a maa félaa dí pîlaŋ bôlu.

¹⁹Zîsɛ kɛ́ɛ a lí tuɛ-pere a guroi, è Zɛƃɛdi ǹóŋ Zĩi kàa da ǹêɣe Zɔ̂ŋ. Díkɛ̀ díkeleŋ su díkɛ dídeɣaŋ sɔ̀lɔ.

²⁰È dítòli nɔ́, dí dínâŋ Zɛƃɛdi lɛɛ géleŋ su da ǹyée-mu-ƃelai, dí pîlaŋ bôlu.

²¹Nya ƃe Zîsɛ da ŋɔpôlu-ƃelai dí lì Kapɔ̂nia. Bôlu ma ɣelei è a kɛ̀ Vii-tɔɔ-ɣelei. Zîsɛ è lì Zûu-ŋai díkoyâŋ too kwaai ma é pɛ́lɛ sɛŋ lɛ̂i naa ǹûai dîa.

²²Kɛ́lɛ ŋɔsɛŋ lɛ́ɛi è ǹûai kíli ŋá pù, kpɛ́ni fêi, zɛŋ lɛ́ɛi kpîŋ è kɛ̀ a da kpɛ́ni Dɔ̂ŋ lɛ̂-ƃelai díwɔ̂i ma. Wála-wala è kɛ̀ zu.

²³Nalôŋ tɔnɔ è kɛ̀ goyâŋ too kwaai ŋí ma, nyînaŋ nyɔ́mɔɔ kɛ́ ƃo bôlu.

²⁴Nya ƃe nyînaŋ nyɔ́mɔɔi kpîŋ è làɣi Zîsɛ láa ǹyɛɛi, “Nâzarɛ Zisɛi, lé ƃé yâ ŋ̀wɛ̂lii í gɛ a kúai? Ya pá a gɛ́ɛ í kúsu kara? Ŋá íkɔlɔŋ. Yá ƃé íkaa a Ɣâla Ŋɔnúu Maa Waai.”

²⁵Kɛ́lɛ, Zîsɛ è nyînaŋ kpèra ǹyɛɛ m̀ai, “Ímɛi sáa í síɣe ǹalôŋ pôlu!”

²⁶Nya ƃe nyînaŋ nyɔ́mɔɔi è ǹaloŋ tùmo-tumo a ŋánaa é láɣi a ŋ̀óo su kɛ́tɛ é síɣe bôlu.

²⁷M̀ɛnii ŋí è ǹûai kélee pɛ́lɛ pù díkɛ díkîe-ní marê kɛ̀, dîyɛɛi, “Lé ƃe ŋí? Sɛŋ lɛ́ɛ nína ká ŋí! A lôno ǹyînaŋ nyɔ́mɔɔ-ŋai pɔ́ a ŋɔwála-wala-laai é gɛ́ dí ŋ̀óo mɛni.”

²⁸Nya ƃe duŋ ŋí è tàa-taa Galalii lɔii gwaa kélee ma da naa kɔlɛ ma kpiniŋ-ŋai a maa félaa.

²⁹Zîsɛ da ŋɔpôlu díkulaa Zûu-ŋai koyâŋ too kwaai mai dí lì Samaŋ da Aŋdulu ní dípɛrɛi lá. Ŋɔpôlu-ƃelai feerɛi Zĩi da Zɔ̂ŋ dí kɛ̀ díƃarâai sáma.

³⁰Dí liɛɛ, dí Samaŋ ǹyuâra kàa laai ni ŋɔgbìŋ ŋá gɔlɔ fãa ma. Dí díkàa nɔ́ dí m̀aa mɛni ƃò ma a maa félaa.

³¹Nya ƃe è lì bɔ́ naa é zoŋ a ǹyée é m̀u siɣe, gɔlɔ fãa-maai ŋáa é yéŋ ma kpɔ́ nɔ́ ŋ̀áa ma é m̀u sìɣe é mii-sɛŋ dîɛ.

³²Vólo-káoi kɛ́ɛ a yèŋ a maa ɣele-wulii ti, dí pà a gɔlɔ fela-ƃela támaa Zîsɛ pɔ́ naa da diai nyînaŋ nyɔ́mɔɔ-ŋa díkɛ̀ dípôlui.

³³Daai su-ƃelai kélee dí díŋaa tɛ̀ ma bɛ́rɛi tí lá.

³⁴È gɔlɔ fela-ƃelai ŋí kélee ƃàlo. Kɛ́lɛ vé ǹɛɛ ní naa ǹyînaŋ nyɔ́mɔɔ-ŋai da é lóno, kpɛ́ni díkɛ̀ a gɔ́lɔŋɔɔ. È díkpɛ̀ diai pôlu díkɛ̀ díkpaanii.

³⁵Zîsɛ è m̀u sìɣe a ɣele-ƃɔ́i kpini é kúla bɛ́rɛi mu. È kùla daai su é lí ǹyaa tɔnɔ kwaa ma e Ɣâla fɛli naa.

³⁶Nya ƃe Samaŋ da m̀arâai dí pɛ̀lɛ gɔ̂rii.

³⁷Gáa dîɛi, dí mò ma dîɛi, “Ǹûai kélee da íkɔrîi.”

³⁸Kɛ́lɛ Zîsɛ è mò dîa ǹyɛɛi, “Fɛ̂ɛ kwaa lí gbanaŋ kpeli-ŋai lá kú ɣâla-woo ƃó naa máŋ, kpɛ́ni fêi, maa mɛni ƃé ŋá pà la.”

³⁹Nya ƃe è lì Galalii gwaa kélee kpɔ́ ma, é Ɣâla-woo ƃó Zûu-ŋai díkoyâŋ kwaa-ŋai ma é ɣâla-woo ƃó naa é nyînaŋ nyɔ́mɔɔ-ŋa kpɛ́ naa nûa pôlu.

⁴⁰Gbôdo naloŋ tɔnɔ è kɛ̀ naa gbôdoi a gɔlɔ kara-kâra ma. È pà Zîsɛ pɔ́ é pɛ́lɛ ŋume ŋá gɔ́ɔ mu, é gbera fé, ǹyɛɛ mai, “À kɛ̀ yà ŋ̀wɛli, ya pɔ̂ri ḿalôi.”

⁴¹Zîsɛ è m̀alôŋ kàa é ǹyée sãa é bɛlɛ mà, ǹyɛɛ ma, “Ŋa ŋ̀wɛ̂lii, ye ƃálo.”

⁴²A naa maa félaa gbôdoi è kpɛ̀ɛ ǹalôŋ ma gɔlɔ maa é síɣe.

⁴³Zîsɛ e ǹîa-woo ƃò a gbanaŋɔɔ ǹyɛɛ m̀a lí a maa félaa.

⁴⁴Ǹyɛɛ ma, “Kɛ́lɛ yà lì, íla mɛi káao, ífe m̀ɛnii ŋí ƃo núu da kélee ma. Lí í íkpîŋ lɛ́ zâla láa soŋ-nuui ma é ímaa ǹyaa kpîŋ é m̀ó yâ a gɛ́ɛ ya ƃálo. À kɛ̀ tí, ye sâla kula íƃalo-laai mɛni ma, yɛ̂ɛ berei Mose ŋɔtɔ̂ŋ lá-wooi káa lai.”

⁴⁵Kɛ́lɛ, ǹalôŋ è lì é pɛ́lɛ ŋɔƃálo mɛnii ŋí ƃôi nûa támaa dîa, maa tuŋ kɛ́ lì kpɔ́ kwaa kélee ma. Mɛni ƃé Zîsɛ fé pɔ̂ri ní tɛɛ̂i la támaa su kpɛ́ni ti, kɛ́lɛ, è tɛ̀ɛ kɛ̀ ǹɔɔi su ǹûai díkɛ kula kwaa kôya-kôyaa-ŋa ma, díkɛ pâ bɔ́.