Read Kpelle Mâki 10 Bible Online

Mâki 10 - Kpelle bible

Mâki 10

¹Zîsɛ è sìɣe naa é lí Zuda kpiniŋ su Zɔdiŋ Yai pôlu. Kpɔŋ è ŋɔ́nɔ ŋ̀á tɛ̀ mà gɔlɛ é ŋɔ́nɔ Ɣâla mɛni lɛ̀ dîa yɛ̂ɛ berei è kɛ̀ gɛ̂i lai.

²Faresii-ŋa dí pà bɔ́ a gɛ́ɛ dí zu kɔɔ̂ŋ. Dí m̀arê kɛ̀, dîyɛɛ mai, “Gáa dɔ̂ŋ lá-wooi ma a gɛ́ɛ núu é ŋɔnɛnîi lɛ́ɛ?”

³È dímarê-kɛ̂ɛ, ǹyɛɛ dîai, “Lé tɔŋ ƃé Mose è dɛ̀ɛ kápɔ é pîlaŋ nyíŋí mai?”

⁴Dí mò ma, “Mose è fàa ma a gɛ́ɛ núu é táa-laa-kɔlɔ pɔ̃yɛ é dɛɛ ŋɔnɛnîi pɔ́ é ǹɛɛ.”

⁵Kɛ́lɛ, Zîsɛ è m̀o dîa, “Káwolii kpɔ̂lɔ mɛni ƃé è dɔ̂ŋ ŋí pɔ̃yɛ la.

⁶Kɛ́lɛ, maa-ŋuŋ su, Ɣâla è ǹɔii kpɛ̀tɛ, é núu kpɛtɛ, a surɔ̂ŋ da nɛnî.

⁷Nyíŋi mɛni ma surɔ̂ŋ a pâi ǹâŋ lɛɛ̂i da ǹee é kánaŋ ŋɔnɛnîi ma,

⁸da ǹyaa da pâi a kpono tɔnɔ. Dífa ŋɔ́nɔ kɛ̀ a kpono feerɛ, kɛ́lɛ, díkaa a kpono tɔnɔ.

⁹Mɛni ma, sɛŋ Ɣâla a bú gîe mai, núu fé gula gîe ma.”

¹⁰Zîsɛ ŋɔpôlu-ƃelai dí ŋɔ́nɔ m̀arê kɛ̀ bɛ́rɛi mu é pílaŋ mɛni tɔnɔi ŋí ma.

¹¹È zu tòo ǹyɛɛ dîai, “Núu à ŋɔnɛnî lɛ̀ɛ é nɛnî da kpɛ́ni kula, gɛ̀ ní m̀aa nuui tí a wulu-wulu kɛ́.

¹²À kɛ̀ nɛnî da à ŋɔsurɔ̂ŋ lɛ̀ɛ é surɔ̂ŋ da kpɛ́ni kula, m̀aa nɛnîi ǹyaa máŋ a wulu-wulu kɛ́.”

¹³Nûa dí kɛ̀ nâa pâi a ǹîa-pɛlɛɛi Zîsɛ pɔ́ a gɛ́ɛ é ǹyée pɛlɛ dîa. Kɛ́lɛ, ŋɔpôlu-ƃelai dí díkpèra.

¹⁴M̀ɛnii ŋí naa káa Zîsɛ mii, è ǹíi ŋwàna é m̀o dîa ǹyɛɛi, “Ka ǹîa-pɛlɛɛi lɛ́ɛ naa dí pá ḿbɔ, káfe díkpera, kpɛ́ni fêi, ǹúu kɛ́ɛ-ŋai ŋí ƃé Ɣâla ŋɔkâloŋ-laai káa dímɛni ma.

¹⁵Tɔ̃yâ ma, ŋá m̀ó kâa, ǹúui va ǹyée sèe Ɣâla ŋɔkâloŋ-laai mu yɛ̂ɛ lôloŋ, va li naa.”

¹⁶Nya ƃe è ǹyée zãa é bɛ̀lɛ ǹîa-pɛlɛɛi dîa é lûwa tòo dîa.

¹⁷Zîsɛ kɛ́ɛ liî ŋɔsiâi mai, nalôŋ tɔnɔ è pà bɔ́ a kîrɛ é pɛ́lɛ ŋume ŋá dúɛ ǹyɛɛ m̀ai, “Kaamɔ̂ɔ lɛ́lɛɛ, lé ƃé ŋa pɔ̂ri gɛ̂i a gɛ́ɛ ŋá wɔ́lɔ-wɔlɔ fulu-laa sɔlɔ ƃói?”

¹⁸Zîsɛ ǹyɛɛ m̀ai, “Yâ kɛ̂i ḿâ núu lɛ́lɛɛ, lé mɛni ma? Núu da fé lɛ́lɛ ní, fɛ̂ɛ nɔ́ Ɣâla ǹyaa tɔnɔ.

¹⁹Í dɔ̂ŋ-ŋai kɔ́lɔŋ: ‘Ífe núu pàa, ífe wulu-wulu kɛ̀, ífe ŋúma kɛ̀, ífe wôya sere-faa kɛ̀, ífe wôya kɛ̀, ƃâa kɛ́ ínâŋ ma da ílee.’ ”

²⁰Ǹalôŋ è mò Zîsɛ ma ǹyɛɛi, “Kaamɔ̂ɔ, ŋa dɔ̂ŋ-ŋai ŋí kélee mɛi káa, é sìɣe ŋásurɔ̂ŋ-loo tãi ma.”

²¹Zîsɛ è ŋ̀ɛi pìlaŋ mà a wɛli kɛ́-maa pere, ǹyɛɛ m̀ai, “Mɛni tɔnɔ ƃé a lɛɛ. Lí íyeêi sãai kélee kɔ́lɛ, zɛŋ yâ gula zui, dɛɛ gôlo-ƃelai pɔ́, gɛ̀ ní, laai-kɛ-sɛŋ a pâi kɛ̂i íyeêi Ɣâla-taa. Nyíŋí pôlu ma, pá í kɛ́ ḿbôlu.”

²²Ǹalôŋ kɛ́ɛ a ŋ̀óoi ŋí mɛnîi, è ŋ̀ɛ́i yèŋ zu é lí a malôŋ pere, kpɛ́ni fêi, sãa támaa è kɛ̀ ǹyêei.

²³Zîsɛ è tìnaŋ, é m̀ó ŋɔpôlu-ƃelai dîa ǹyɛɛi, “Gbanaŋɔɔ̂i kpɔ́ a gɛ́ɛ diai tɔɔ sãa támaa a díyêei dí lí Ɣâla ŋɔkâloŋ-laai su!”

²⁴Bôlu-ƃelai kíli ŋá e tɛ̀i a ŋ̀óoi ŋí. Kɛ́lɛ, Zîsɛ è ŋɔ́nɔ lì tuɛ pere a ŋ̀óo ǹyɛɛ dîai, “Ńônii, gbanaŋɔɔ̂i kpɔ́ a gɛ́ɛ núu é lí Ɣâla ŋɔkâloŋ-laai su (à kɛ̀ a gíli kɛ̀ tɔɔ-laa ma)!

²⁵Tɔɔ-nuu liɛ́ɛ Ɣâla ŋɔkâloŋ-laai su kpanaŋɔɔ̂i é tɛ́ɛ la soo-fáleŋ tɛ̂ɛi ma saɣílaŋ-wôlo su.”

²⁶Ŋ̀óoi ŋí è ŋɔpôlu-ƃelai kíli ŋá e tɛ̀i kpɔ́ a ŋ̀ánaa, dîyɛɛ m̀ai, “Gɛ̀ ní, gbɛ̂ɛ ƃé ŋaŋ a pɔ̂ri ƃâloi?”

²⁷Zîsɛ è díkàa kpɔ́ sĩ́i ǹyɛɛ dîai, “Bɔri fé núu mi, fɛ̂ɛ nɔ́ Ɣâla ǹyaa tɔnɔ. Mɛni kélee m̀aa pɔ̂ri káa mì.”

²⁸Pitɛ è m̀o m̀a ǹyɛɛi, “Gáa. Kwâa kúyêei sãa kélee lɛ́ɛ kwa pîlaŋ ípôlu.”

²⁹Zîsɛ ǹyɛɛ dîai, “Tɔ̃yâ ma, ŋá m̀ó kâa, núu da à bôlu fè ŋɔpɛ́rɛi ma, kpaa máŋ ǹîa-ní, ǹéɣe-ní, ǹee, ǹâŋ, ǹônii, da ŋɔlɔii ma ḿaa mɛni ma da Duŋ Lɛ́lɛɛi,

³⁰m̀aa nuui tí a pâi pɛ́rɛ-ŋa sɔlɔ ƃôi é tɛ́ɛ ŋ̀uŋ támaa ma ŋ̀éniɛi ŋí su, da lia-surɔŋ da nɛnî-ŋa, leɣe-surɔŋ da leɣe-nɛnî-ŋa, ǹee-ní támaa, nîa-pɛlɛɛ támaa kɛ́ ƃò ǹyêei da lɔii, gbɔara-ƃela támaa máŋ. Ǹyaŋ a pâi wɔ́lɔ-wɔlɔ fulu-laai sɔlɔ ƃôi tuɛ-pere ɣéniɛi su.

³¹Diai díkaa a duɛ-tuɛi, da pâi kɛ̂i a gbɛɛ ŋái, diai a gbɛɛ ŋái díkɛ ƃo a duɛ-tuɛi.”

³²Nya ƃe dí kɛ̀ berei su, díkɛ li Zerusâlɛŋ, Zîsɛ kɛ́ sia dítuɛ dípɛlɛ púɔɔ. Diai kélee pîlaŋ bôlui dí kɛ̀ yaôi. È ŋɔpôlu-ƃela puu kao feerɛi sìɣe ŋɔ́nɔ, gɛ́ m̀ɛni-ŋai ƃo dîa, nyii pâi kɛ̂i lai.

³³È m̀o dîa ǹyɛɛi, “Ka gáa. Kwa nâa kɛ́ liî Zerusâlɛŋ. Nàa ƃé da pâi núu-kpune Ǹóŋ sonîi naa, dí dɛɛ zâla láa soŋ-ƃela kpaya-kpayai pɔ́ da Dɔ̂ŋ lɛ́-ƃelai. Da pâi tɔ̂ŋ pûi ma a gɛ́ɛ é sáa, dí dɛɛ Zɛ̃tai-ŋai pɔ́.

³⁴Da pâi ɣɛ́lɛ-maa kulâi gbonôi, dí díla-ya pú ma, dí ǹokwa, dí bàa. Kɛ́lɛ, ɣele kûu saaƃa à tɛ̀ɛ, a pâi m̀u siɣêi ŋɔ́nɔ saa yêei.”

³⁵Zɛƃɛdi ǹóŋ Zĩi da Zɔ̂ŋ dí kùla díƃarâai sáma, dí pá bɔ́ dí m̀o ma, “Kaamɔ̂ɔ, kwa ŋ̀wɛ̂lii í mɛnii kɛ́ kûɛ.”

³⁶Ǹyɛɛ dîai, “Lé ƃé ka ŋ̀wɛ̂lii ŋá gɛ́ kâai?”

³⁷Dí mò m̀a, “Gɛ́ kútɔnɔ da é sée ílaa-mii-yee mɛi, gbelii é sée íkɔɔ-yee mɛi-pere yâ kɛ̀ ífolo-laai su.”

³⁸Kɛ́lɛ, Zîsɛ è m̀o dîa, “Káfe m̀ɛnii kɔ́lɔŋ ka vɛlîi. Ka pɔ̂ri kákpelêi a gbele-kɔɛi ŋa ŋ́gbele lai? Ka pɔ̂ri káyee seêi batâi sii mu da ŋábatâi kɛ̀ lai?”

³⁹Dí mò ma, “Kwa pɔ̂ri.” Zîsɛ è m̀o dîa, “Gbele-kɔɛi ŋa ŋ́gbele lai, ka pâi kákpelêi la, berei da pâi ŋábatâi kɛ̂i lai bere ƃé da pɔri kábatâi kɛ̂i la.

⁴⁰Kɛ́lɛ, a gɛ́ɛ núu da é sée ńaa-mii-yee mɛi, kpaa máŋ ŋ́gɔɔ-yee mɛi pere m̀aa ŋuŋ ma ƃò fé a ńyêei, kɛ́lɛ, gáa diai mɛni ma Ɣâla a naa kpɛtɛ dímɛni mai.”

⁴¹Bôlu-ƃela puui kɛ́ɛ da m̀ɛnii, dí dílii ŋwàna Zĩi da Zɔ̂ŋ dia.

⁴²Zîsɛ e dítòli è m̀o dîa, “Ká gɔ́lɔŋ a gɛ́ɛ diai da sîa a wala-wala-laa Zɛ̃tai-ŋai mɛi, da gɛ̀ a ŋɛi-kpala. Dínuu kɛ́tɛ-ŋai da wála-wala-laa sîa kpɔ́ a ŋánaa.

⁴³Kɛ́lɛ, vé pâi kɛ̂i tí kásama. Kɛ́lɛ, à kɛ̀ núu da à ŋ̀wɛli é kɛ́ a núui gɛ́tɛi kásama, fɛ̂ɛ m̀aa nuui a gbîŋ kɛ̀ a kálɔmu-nuu,

⁴⁴ǹyaŋ à kɛ̀ núu da à ŋ̀wɛli é kɛ́ a núu-tuɛ-nuu kásama, fɛ̂ɛ é kɛ́ a luɛ kákelee káyêei,

⁴⁵kpɛ́ni fêi, núu-kpune Ǹóŋ máŋ fé pá ní a gɛ́ɛ núu é tíi kɛ́ mì. Kɛ́lɛ e pà a gɛ́ɛ é tíi kɛ́ nûa dîɛ, é ŋɔfúlu-laai tɛ́ɛ a maa tee sɛŋ núu támaa mɛni ma.”

⁴⁶Dí sèri Zɛleko. Zîsɛ, ŋɔpôlu-ƃelai da kpɔŋ kɛ́tɛ dí kɛ́ kulâi Zɛlekoi, ŋɛi-pu-naloŋ tɔnɔ è kɛ̀ seêni berei kɔlɛ. Ǹáa ƃé kɛ̀ a Batimiɔ, Timîa ǹóŋ.

⁴⁷Gɛ́ɛ a m̀ɛni a gɛ́ɛ è kɛ̀ a Nâzarɛ Zisɛi, è pɛ̀lɛ láɣiɛɛ ma, ǹyɛɛi, “Deeƃé Ǹóŋ Zîsɛ, ḿalôŋ káa!”

⁴⁸Núu támaa dí gbèra dí m̀o ma a gɛ́ɛ é m̀ɛni sáa, kɛ́lɛ, è làɣi kpɔ́ a zu kɛ́tɛ, ǹyɛɛi, “Deeƃé Ǹóŋ, ḿalôŋ káa!”

⁴⁹Nya ƃe Zîsɛ e tɔ̀ɔ e m̀o dîa, “Ka dóli.” Dí ŋɛi-pu-nuui tòli, dí m̀o ma, “Ílii kpéle í ímu siɣe. A ítolîi.”

⁵⁰Batimiɔ è ŋɔpili-kpãai pìli é píli ɣelêi é pá Zîsɛ pɔ́.

⁵¹Zîsɛ è m̀arê kɛ̀, “Lé ƃé yâ ŋ̀wɛ̂lii ŋá gɛ́ yɛ̂i?” Batimiɔ ǹyɛɛ m̀ai, “Kaamɔ̂ɔ, gɛ́ ŋá kwaa káa.”

⁵²Zîsɛ è m̀o ma, “Ye lí nâa yɛ̂, ílaa-lai a íƃalo.” È m̀o tí, ǹalôŋ é kwaa káa, é pîlaŋ bôlu berei ma.