Read Kpelle Mâki 5 Bible Online

Mâki 5 - Kpelle bible

Mâki 5

¹Nya ƃe Zîsɛ da ŋɔpôlu-ƃelai dí sèri Galalii Poai pôlu, Gɛnɛ̂sara lɔii kpiniŋ su.

²È kùla kpɔ́ nɔ́ ǹyá ŋá-keleŋ su, da nalôŋ tɔnɔ da dí kòyaŋ a kùla ƃo m̀olôŋ sãŋ su pere. Nyînaŋ nyɔ́mɔɔ è kɛ̀ ǹalôŋ ŋí pôlu.

³Ǹalôŋ ŋí è kâa ǹyiî m̀olôŋ sãŋ su. Núu da fa kâa pɔ̂ri ǹalôŋ ŋí ɣirîi kpaa máŋ é doo yɔlɔ ŋá.

⁴Dí dòo kpɔnɔ da yɔlɔ ŋá a ɣele támaa, kɛ́lɛ, va kâa lɛ̀ɛ naa. È kɛ̀ kpɔ́ a gbonôi kpanaŋɔɔ núu da kélee yée fa pɔ̂ri kɛ̀ ma a gɛ́ɛ é ŋ̀á yéŋ.

⁵A kâa siâi m̀olôŋ sãŋ su da ǹyéei su a Ɣele ƃɔ́ɔ da kpíni kélee, gɛ́ làɣi, gɛ́ gbîŋ tee-tee a kɔni ƃela-ŋa.

⁶Ɣele tɔnɔ da è kɛ̀ kwaa kôya ma é Zîsɛ káa. È kîrɛ sìɣe é lí bɔ́ naa é tóo gɔ́ɔ mu

⁷é láɣi ǹyɛɛ mai, “Zîsɛ, Ŋ̀âlai Gɛ́tɛi Ǹóŋ, lé ƃé yâ ŋ̀wɛ̂lii í gɛ́ a ńyãai? Ɣâla láai su ŋa íkpera fêi, ífe ŋ́ɛi maa nɔ̃ɔ!”

⁸È nyíŋí ƃò, kpɛ́ni fêi, è m̀ɛni Zîsɛ lá ǹyɛɛi, “Yá nyînaŋ nyɔ́mɔɔ, sìɣe ǹalôŋ ŋí pôlu!”

⁹Zîsɛ è m̀arê kɛ̀, ǹyɛɛ mai, “Ílaa ƃa gbɛ̂ɛ?” Ǹyɛɛ mai, “Ńaa ƃa kpɔŋ. Kútamaâi.”

¹⁰È Zîsɛ kpera fè kpɔ́ a ŋ̀ánaa a gɛ́ɛ vé díkpɛ ǹɔii tí ma.

¹¹Kwíi-ƃoi kpɔŋ kɛ́tɛ díkɛ̀ naa díkɛ dílaa mii ǹyéei pɛ̂rɛ ma.

¹²Ǹyînaŋ nyɔ́mɔɔ-ŋai dí Zîsɛ kpera fèi, dîyɛɛ mai, “Kútɛɛ m̀oi-ŋai pɔ́ naa pere a gɛ́ɛ kúlɔ díkponôi kú ƃo naa.”

¹³Nya ƃe Zîsɛ è fàa ma. È ǹyînaŋ nyɔ́mɔɔ-ŋai kùla ǹalôŋ kponôi é dípili m̀oi-ŋai kponôi. M̀oi-ŋai dí kɛ̀ a wála feerɛ. Dí gbotoloi yèŋ a kîrɛ dí lí ǹyuo-loŋ su dí lɛ̀ɛ zu.

¹⁴Ǹya ƃé m̀oi mɛi káa-ƃelai dí pù a kîrɛ dí li dí m̀o daai su ǹûai da gbâlaŋ-ŋai lá-ƃelai. Ǹûai ŋí dí pà dí m̀ɛnii káa kɛ̀i.

¹⁵Nya ƃe dí pà Zîsɛ pɔ́, dí ǹalôŋ káa ǹyînaŋ nyɔ́mɔɔi è kɛ̀ bôlui. È kɛ̀ seêni, m̀aa ɣiriɛ, gíli ŋá ponoɔɔ. Dí yào kpɔ́ a ŋ̀ánaa.

¹⁶Diai m̀ɛnii ŋí naa kàai, dí mò daai su-ƃelai dîa berei m̀ɛnii è kɛ̀ la a ǹalôŋ ǹyînaŋ nyɔ́mɔɔi è kɛ̀ bôlui da m̀ɛnii kɛ̀ a m̀oi-ŋai.

¹⁷Nya ƃe dí Zîsɛ marê kɛ̀ a gɛ́ɛ é kúla díkpinîŋ su.

¹⁸Zîsɛ kɛ́ɛ pilîi ǹya ŋá-keleŋ sui, ǹalôŋ nyînaŋ nyɔ́mɔɔi è kɛ̀ bôlui, è gbera fè a gɛ́ɛ da ǹyaa dí li.

¹⁹Kɛ́lɛ, Zîsɛ fé fáa ní. È mò ǹalôŋ ma ǹyɛɛi, “Ye lí pôlu ípɔ naa m̀ɛni kɛ́tɛi Ínuu-namui ímalôŋ káa a gɛ́ yɛ̂i, í m̀ó ínûai dîa.”

²⁰Nya ƃe ǹalôŋ è lì m̀ɛnii kélee Zîsɛ è gɛ̀ m̀ii gɛ́ m̀ó Daa-puu-lɔii-kpiniŋ su-ƃelai dîa da m̀ɛni kɛ́tɛ lɛ́lɛɛi è gɛ̀ mìi. Ǹûai kélee pɛ́lɛ è pù m̀ɛnii ŋí mɛniɛɛ dîɛi.

²¹Zîsɛ è lì ŋɔ́nɔ ǹyái pôlu ǹya ŋá-keleŋ su. Kpɔŋ kɛ́tɛ è ŋ̀á tɛ̀ ma gɔlɛ ǹyuo-loŋ kɔlɛ.

²²Ŋ̀âla fɛli-kerei mɛi-nuui dɔnɔ, ǹáa ƃé kɛ̀ a Zailɔ. È pà é gáa, é tòo gɔ́ɔ mu,

²³é vɛli, ǹyɛɛ mai, “Ńoŋ-nɛnîi a kɛ́ saâi. Pá í íyee pɛ́lɛ ma, a gɛ́ɛ vé saa, kɛ́lɛ, é ƃálo.”

²⁴Nya ƃe da ǹyaa dí lì. Kpɔŋ kɛ́tɛ è pìlaŋ bôlu dítinaŋɔɔ ma.

²⁵Nɛnî tɔnɔ è kɛ̀ gwaai ŋí ma kɔlɛ ma. Ŋãa kɔlɔ-fela è kɛ̀ ma kóraŋ puu kao feerɛ yée mu.

²⁶È lì zóo támaa pɔ́ naa a gɛ́ɛ dí zále. È ǹyée ŋá pù a dámaa sále-ŋa mɛni ma. Kɛ́lɛ, vé ƃálo ní. Ŋɔpalai su è kɛ̀ nɔ́ kɛ̂tɛi.

²⁷È Zîsɛ tuŋ mɛ̀ni é pá bɔ́ naa gbɔŋ su bôlu-pere é ŋɔyokpoi soŋ.

²⁸È mò ǹíi su pere ǹyɛɛi, “À kɛ̀ nɔ́ ŋà ŋɔyokpoi tí sòŋ, ŋa pâi ƃálôi.”

²⁹È lɛ̀ɣɛ kpɔ́ nɔ́ Zîsɛ ŋɔyokpoi wóŋ ma, ŋ̀ãai é kpèra pûi é gɔ́lɔŋ gbîŋ kponôi pere a gɛ́ɛ a ƃálo ŋɔmɛni kpɔ̂lui yêei.

³⁰Zîsɛ ǹyaa máŋ è gɔ̀lɔŋ gbîŋ kponôi a gɛ́ɛ ŋɔwála-wala-laai da é lì. È tìnaŋ a maa félaa gbɔŋ su é dímarê kɛ́, ǹyɛɛ dîai, “Gbɛ̂ɛ ƃé lɛ̀ɣɛ ŋáyokpoi mai?”

³¹Ŋɔpôlu-ƃelai dí mò ma, “Íkaa gbɔŋ sãŋ ŋí kâai íkɔlɛ ma, díkɛ sɔ̀ɔ yâ, íkɛ kúmarê kɛ́, ‘Gbɛ̂ɛ ƃé lɛ̀ɣɛ ŋáyokpoi mâi?’ ”

³²È gɔlɛ kàa a gɛ́ɛ é ǹúui káa m̀ɛnii ŋí kɛ̀i.

³³Kɛ́lɛ, ǹɛnîi è kɛ̀ yaôi m̀aa kɛ́ kpɛ̃liŋ, é tóo Zîsɛ kɔ́ɔ mu é dɔ̃yâi kélee ƃó ma.

³⁴Zîsɛ è m̀o nɛnî-looi ma ǹyɛɛi, “Ńoŋ-nɛnîi, ílaa-lai a íƃalo, lí lii-sêe su, ŋa íkɔlɔ-felai ƃálo.”

³⁵Zîsɛ kɛ́ɛ kɛ̀ lônoi, kéla-ŋa dí kùla Ŋ̀âla fɛli-kerei mɛi-nuui ŋɔpɛ́rɛi lá, dí m̀o Zailɔ ma dîɛi, “Íloŋ-nɛnîi aâ saa. Lé ƃé íkaa fũa-fũa tɔɔ̂i la Kaamɔ̂ɔ ma ŋɔ́nɔi?”

³⁶Zîsɛ kɛ́ɛ a díwoo mɛ̀nii, vé ŋ̀oli tɔ̀ɔ ní mà. Kɛ́lɛ, è mò ǹalôŋ ma ǹyɛɛi, “Ífe yào. Láa nɔ́ a Ɣâla.”

³⁷Vé kɛ̀ fáa ní a gɛ́ɛ núu da é pîlaŋ bôlu, fɛ̂ɛ nɔ́ Pitɛ, Zĩi da ǹêɣe Zɔ̂ŋ.

³⁸Dí páa Zailɔ ŋɔpɛ́rɛi lái, è kpɔŋ kàa díkɛ ƃò wúlee, díkɛ wɔ̀lɔ.

³⁹Zîsɛ è lɔ̀ bɛ́rɛi mu ǹyɛɛ dîai, “Kákaa wúlee, kákɛ wɔ̀lɔ lé mɛni ma? Ǹólôŋ ŋí fé saa ní. Gáa nyiî.”

⁴⁰Dí ɣɛ́lɛ-maa kùla Zîsɛ kponôi. Kɛ́lɛ, è díkelee kpɛ̀ dí kúla ŋ̀énei ŋá. Ǹyaa, ǹôloŋ ǹâŋ, ǹôloŋ ǹee da diai kɛ̀ gɔlɛi mai nɔ́ ƃé lì ƃɛ́i ǹôloŋ è kɛ̀ laai ni naai.

⁴¹È ǹôloŋ yée sòŋ ǹyɛɛ mai, “Talida, kumi.” Zu-kulâi ƃa, “Nɛnî-loŋ, ŋa mò yâ, ímu siɣe.”

⁴²È mò kpɔ́ nɔ́ ti, nɛnî-looi é m̀u sìɣe gɛ́ sìa. Ǹɛnî-looi ŋí è kɛ̀ a kóraŋ puu kao feerɛ-loŋ. M̀ɛnii ŋí è ǹûai kélee pɛ́lɛ pù a zu gɛ́tɛ.

⁴³Kɛ́lɛ, Zîsɛ è dília-woo ƃò a gbanaŋɔɔ a gɛ́ɛ dífe m̀ɛnii ŋí ƃo núu da kélee ma, ǹyɛɛ diai, “Ka mii-sɛŋ tɛɛ bɔ́ é m̀ii.”