Read Kpelle Mâki 8 Bible Online

Mâki 8 - Kpelle bible

Mâki 8

¹Ɣele tɔnɔ da kpɔŋ kɛ́tɛ e ŋɔ́nɔ ŋ̀á tɛ̀ ma Zîsɛ kɔlɛ. Dí lɛ̀ɛ naa díkɔnɔ̃ŋ é kpɛ́ɛ. Sɛŋ da fé kɛ́ ní díyêei a gɛ́ɛ dí m̀ii. Nya ƃe è ŋɔpôlu-ƃelai tòli é m̀o dîa, ǹyɛɛi,

²“Gbɔŋ malôŋ káa ŋ́gɛ̂i, kpɛ́ni fêi, da gɛ́ ḿbôlu a ɣele kûu saaƃa, mii-sɛŋ fé naa a gɛ́ɛ dí m̀ii.

³À kɛ̀ ŋà burii lɛ̀ɛ dîa ŋá dítɛɛ dípɔ naa, da pâi foâi berei ma, kpɛ́ni fêi, díta-ní dí síɣe kwaa kôya ma.”

⁴Ŋɔpôlu-ƃelai dí m̀arê kɛ̀, dîyɛɛi, “Núu a pɔ̂ri mii-sɛŋ sɔlɔ ƃôi ǹûai ŋí mɛni ma vɛ̃ɛ-kpâlaŋ ŋí su?”

⁵È dímarê kɛ̀, ǹyɛɛ dîai, “Kpólo-kpala ɣɛɛlu ƃé káyêei?” Dí mò ma, “Lɔ́ɔlu mɛi feerɛ.”

⁶Nya ƃe è gbɔŋ kɛ̀ dí see ǹɔii ma é gbólo-kpala lɔ́ɔlu mɛi feerɛi síɣe, é sɛɣɛ-fei tɛɛ Ɣâla pɔ́, é díɣale-ɣale é dɛɛ ŋɔpôlu-ƃelai pɔ́ a gɛ́ɛ dí dɛɛ ǹûai pɔ́ dí m̀ii. Nya ƃe dí dɛ̀ɛ ǹûai pɔ́.

⁷Nyɛ̃ɛ loŋ-kuro è kɛ̀ díyêei máŋ. Zîsɛ è zòŋ díyêei é lûwa láa dîa, é m̀ó ŋɔpôlu-ƃelai dîa a gɛ́ɛ dí dítɛɛ ǹûai pɔ́.

⁸Ǹûai dí m̀ii dí pela, bɛnɛi nyíi e kùla bôlui, dí ŋ̀á tɛ̀ ma. E kɛ̀ a kpɔ̂lɔ lɔ́ɔlu mɛi feerɛ láa fɛ́ɛ.

⁹Mii-ƃela dí kɛ̀ a núu wála náaŋ.

¹⁰Nya ƃe è dílɛ̀ɛ naa dí lí, é píli géleŋ su da ŋɔpôlu-ƃelai a maa félaa, dí lí Daamanuta kpiniŋ su.

¹¹Faresii-ŋai dí pà dí pɛ́lɛ sia toôi Zîsɛ lá. Dí kɛ̀ Ɣâla-taa ŋɛi-kɛ-maa kɔ́rîi Zîsɛ yêei a gɛ́ɛ dí zu-kɔɔ̂ŋ.

¹²Nya ƃe è Ǹɛ̃wo tòo a zu kôya, é dímarê kɛ́, ǹyɛɛ dîai, “Lé mɛni ƃé ŋ̀éniɛi ŋí su-ƃelai da ŋɛi-kɛ-maa kɔ́rîi laai? Tɔ̃yâ ma, ŋá m̀ó kâa, fé pâi wɔ́lɔ ŋɛi-kɛ-maa da kélee tɛɛ̂i ŋ̀éniɛi ŋí su-ƃelai pɔ́.”

¹³Zîsɛ è kùla ŋɔ́nɔ díkɔlɛ, é píli géleŋ su é lí ǹyái pôlu.

¹⁴Bôlu-ƃelai dí nìa a gɛ́ɛ dí lí a mii-sãa támaa. Kpólo-kpala tɔnɔ nɔ́ ƃé kɛ̀ díyêei géleŋ su.

¹⁵È dília-woo ƃò, ǹyɛɛi, “Ka m̀ɛni. Ka kámɛi káa a Faresii-ŋai da Ɛɛlɔ ní díkpolo tɛ́-sɛŋ.”

¹⁶Dí lòno é pîlaŋ ma díkîe-ní loai, dîyɛɛi, “A m̀ôi tí, kpɛ́ni fêi, kpólo-kpala fé kúyêei.”

¹⁷Zîsɛ è m̀ɛnii kɔ̂lɔŋ dí kɛ̀ m̀ôi. È dímarê kɛ̀, ǹyɛɛ dîai, “Lé mɛni ƃé mɛni ƃé ka m̀ôi é pîlaŋ kpólo-kpala fé káyêei mɛni mai? M̀ɛnii ŋá m̀oi káfe nîi ŋ̀á káa ní ma kpaa máŋ ka táre zu? Kákili ŋá tɛɣiɛ̂i?

¹⁸Káŋɛi káa kâa káfa kwaa kâa? Wóli káa kâa káfa mɛni mɛ̂ni? Mɛni fa máŋ lɛ̀ɛ kákili ŋá?

¹⁹Gbólo-kpala lɔ́ɔlui su-ɣále-ɣaleɛɛ ḿî ǹúu wála lɔ́ɔlui mɛni mai, bɛnɛi lɛ̀ɛi è kɛ̀ a kpɔ̂lɔ láa fɛ́ɛ ɣɛɛlu?” Dîyɛɛ ma, “Puu kao feerɛ.”

²⁰È ŋɔ́nɔ dímarê kɛ̀ ǹyɛɛ dîai, “Gbólo-kpala lɔ́ɔlu mɛi feerɛi ŋá dɛ̀ɛ núu wála náaŋ (4,000) pɔ́i, bɛnɛi lɛ̀ɛi è kɛ̀ a kpɔ̂lɔ láa fɛ̂ɛ ɣɛɛlu?” Dí ŋ̀óo su tòo dîyɛɛ mai, “Lɔ́ɔlu mɛi feerɛ.”

²¹Ǹyɛɛ dîai, “Káfe nîi táre ní m̀ɛnii ŋí su?”

²²Nya ƃe dí sèri Bɛsaida. Núu da-ni dí pà bɔ́ a ŋɛi-pu naloŋ tɔnɔ, dí Zîsɛ kpera fé a gɛ́ɛ e ǹyée pɛ́lɛ mà.

²³Zîsɛ è ŋɛi-pu naloŋ sòŋ a ǹyée, é kúla la daai su. È ǹá-ya pù naloŋ ŋ̀ɛ́i, é ǹyée pɛ́lɛ ma, é m̀arê kɛ́ ǹyɛɛ ma, “Ya sɛŋ da kâai?”

²⁴Ǹalôŋ è ŋ̀ɛi mu sìɣe é zu too, ǹyɛɛ mai, “Ŋa nûa kâai, kɛ́lɛ, díkaa nɔ yɛ̂ɛ wúru-ŋa ƃé siâi.”

²⁵Zîsɛ è ŋɔ́nɔ ǹyée pɛ̀lɛ ǹalôŋ ŋɛ́i ma, ǹalôŋ e kwaa káa a ǹɛ́lɛɛ, gɛ́ sãa kàa dímaa ponoɔɔ.

²⁶Nya ƃe è dɛ̀ɛ bɔ́-taâi, ǹyɛɛ mai, “Ífe lì pôlu máŋ daai tí su.”

²⁷Zîsɛ da ŋɔpôlu-ƃelai dí lì ŋɔ́nɔ Sɛsɛria Felepâ taa-ŋai su. È dímarê kɛ̀ berei su, ǹyɛɛ dîai, “Ǹûai dîyɛɛ ŋ́gaa a gbɛ̂ɛ?”

²⁸Dí mò m̀a dîyɛɛi, “Nûa da m̀o a gɛ́ɛ íkaa a Batâi-kɛ-nuui Zɔ̂ŋ. Kɛ́lɛ, da-ni da mò, Ilaza. Gbéli-ŋai da mò a gɛ́ɛ íkaa a Ɣâla ŋɔlóno-kɛ-nuui dɔnɔ.”

²⁹È dímarê kɛ̀ ŋɔ́nɔ, ǹyɛɛi, “Káaŋ kâa ŋ́gaa a gbɛ̂ɛ?” Pitɛ e zu tòo, ǹyɛɛ mai, “M̀asâya ƃa yá.”

³⁰Zîsɛ è dília-woo ƃò ǹyɛɛ dîai, “Káfe m̀o núu da ma.”

³¹Nya ƃe Zîsɛ è pɛ̀lɛ ǹɛ̂i ŋɔpôlu-ƃelai dîa a gɛ́ɛ fɛ̂ɛ nɔ́ Núu-kpune Ǹóŋ é mɔ̃lɛ mɛni támaa su, fɛ̂ɛ nɔ́ ǹúu-pɔlɔ-ŋai da zâla láa soŋ-ƃela kpaya-kpayai da Dɔ̂ŋ lɛ́-ƃelai dí dípôlu tɔɔ ma. Gbɛɛ ŋái da pâi baâi, ɣele kûu saaƃa pôlu ma é m̀u siɣe saa yêei.

³²È nyíŋí ƃò dîa a zu ponoɔɔ. Nya ƃe Pitɛ é lì la, é pɛ́lɛ lônoi ma.

³³Kɛ́lɛ, Zîsɛ è tìnaŋ è ŋɔpôlu-ƃelai káa, ǹyɛɛ Pitɛ ma, “Sêtɔŋ, siɣe ŋ́gɔlɛ, kpɛ́ni fêi, Ɣâla ŋɔmɛni fé íkili ŋá, fɛ̂ɛ núu-kpune ŋɔmɛni.”

³⁴È gbɔŋ tòli da ŋɔpôlu-ƃelai, é m̀o dîa ǹyɛɛi, “À kɛ̀ núu da a ŋ̀wɛ̂lii é pîlaŋ ḿbôlu, tɔɔ maa nuui é gíli kúla gbîŋ kponôi, é ŋɔsaa-wurii síɣe é pîlaŋ ḿbôlu.

³⁵Ǹúui a ŋ̀wɛ̂lii é ŋɔfúlu-laai lâai kɛ̂i, a pâi ǹánîi, kɛ́lɛ ǹúui a ŋɔfúlu-laai làŋ ḿaa mɛni ma da Duŋ Lɛ́lɛɛi, a pâi zɔlɔ ƃôi.

³⁶Lé ƃé núu a pɔ̂ri gulâi ŋɔfúlu-laai láŋɔɔ su a gɛ́ɛ é ŋ̀éniɛi kélee kɛ́ a bɔ́ɔi?

³⁷Lé ƃé núu a pɔ̂ri dɛɛ̂i a gɛ́ɛ é ŋɔfúlu-laai sɔlɔ ƃó pôlu?

³⁸À kɛ̀ núu da à ŋùmɛ é pîlaŋ ḿâ da ŋáwooi, ŋ̀ulu-wulu kɛ́ɛi da zɔnyɔ̂ŋ ɣéniɛi ŋí su, gɛ̀ ní, ŋ̀elei núu-kpune Ǹóŋ à pà lai, da Ŋ̀âla-taa-kela maa waa-ŋai, Ǹâŋ ŋɔfólo-laai kɛ́ ƃò bôlui, a pâi ŋumɛ̂i é pîlaŋ ǹúui tí ma.”