Read Kpelle Mâki 9 Bible Online

Mâki 9 - Kpelle bible

Mâki 9

¹Nya ƃe è m̀o dîa, ǹyɛɛi, “Tɔ̃yâ ma, ŋá m̀ó kâa, núu da-ni díkaa tɔɔ ní ƃɛ́, dífe pâi saâi dí lɛ́ɛ la zu dí Ɣâla ŋɔkâloŋ-laai káa é pá, wála-wala-laa kɛ́ ƃò bôlu.”

²Ɣele kûu lɔ́ɔlu mɛi da tɛ̂ɛi pôlu ma, Zîsɛ è lì a Pitɛ, Zĩi, da Zɔ̂ŋ yée tɔ́ɔ tɔnɔ ma dítɔnɔ kwaa ma. Nya ƃe m̀aa è fàleŋ díŋɛi.

³Ŋɔseɣei è kɛ̀ fólôi kpɔ́ yɛ̂ɛ vóloi núu da fa pɔ̂ri kɛ̀ m̀aa kpɛɛ̂i.

⁴Nya ƃe bôlu-ƃela saaƃai ŋí Zîsɛ kàa gɛ́ lòno Ilaza da Mose pɔ́.

⁵Pitɛ è m̀o Zîsɛ ma, “Kaamɔ̂ɔ, ǹɛ́lɛɛ̂i a gɛ́ɛ kúkaa ƃɛ́. Kwaa ƃûu saaƃa tɔɔ, dɔnɔ kɛ́ ƃò ímɛni ma, dɔnɔ Mose mɛni ma, dɔnɔ Ilaza mɛni ma.”

⁶Pitɛ da m̀arâai dí kɛ̀ yaôi díkɛ kpɛ̃liŋ. Pitɛ fé kɛ́ ní a mɛni kɔ́lɔŋɔɔ a pɔ̂ri kɛ̀ m̀ôi.

⁷Nya ƃe ɣele-kɔlɔŋ kole è dímɛi pɛ̂lɛ. Wóo da è kula ŋ̀ele-kɔlɔŋ kolei su ǹyɛɛi, “Ŋáwɛli kɛ́-maa Loŋ ká ŋí, ka ŋ̀óo mɛ́ni.”

⁸Dítinaŋɔɔi, dífe Mose da Ilaza núu káa a ní, fɛ̂ɛ nɔ́ kɛ̀ Zîsɛ tɔnɔ.

⁹Díkɛɛ ǹyéei yenîi, è dília-woo ƃò a gɛ́ɛ mɛnii dí gàai dífe m̀o núu da ma, é lɛ́ɛ la zu núu-kpune Ǹóŋ é m̀u síɣe saa yêei.

¹⁰Dí m̀ɛnii ŋí lâai kɛ̀ díkili ŋá, kɛ́lɛ dí kɛ̀ díkili ŋá siâi, “M̀u siɣɛɛ saa yêei su-kulâi ƃa lé?”

¹¹Dí Zîsɛ marê kɛ̀, dîyɛɛ m̀ai, “Lé mɛni ƃé Dɔ̂ŋ lɛ́-ƃelai da mò la dîyɛɛ, ‘Fɛ̂ɛ Ilaza a pa fúlɔi?’ ”

¹²È díwoo su tòo ǹyɛɛ dîai, “Ilaza a pâi kpɔ́ fúlɔi a gɛ́ɛ é m̀ɛnii kélee su sã́a. Kɛrɛ̂e, bɔ̃yɛɛ̂i Ŋ̀âla-kɔlɔi su a gɛ́ɛ fɛ̂ɛ núu-kpune Ǹóŋ é mɔ̃lɛ mɛni támaa su, dí tûa la yɛ̂ɛ luɛ?

¹³Kɛ́lɛ, ŋá m̀ó kâa, Ilaza a gbâa pá. Dí tùa la yɛ̂ɛ berei dí ŋ̀wɛli la, yɛ̂ɛ berei bɔ̃yɛɛ̂i la Ŋ̀âla-kɔlɔi sui é pîlaŋ mài.”

¹⁴Dí seriɛɛ bôlu-ƃelai gbeli-ŋai dîai, dí kpɔŋ kɛ́tɛ kàa dínaŋɔɔ dîa. Dɔ̂ŋ lɛ́-ƃelai da bôlu-ƃelai díkɛ sîa toôi.

¹⁵Gbɔŋ su-ƃelai kɛ́ɛ da Zîsɛ káai, dípɛlɛ è pù a gɛ́tɛ. Díkelee dí kîrɛ sìɣe dí lí bɔ́ dí dílaa tí ma.

¹⁶Zîsɛ è ŋɔpôlu-ƃelai marê kɛ̀, ǹyɛɛ dîai, “Lé ƃé ka dîa-ní ka m̀aa sîa toôi?.”

¹⁷Gbɔŋ su-nuui dɔnɔ e zu tòo, ǹyɛɛ m̀ai, “Kaamɔ̂ɔ, ŋá pà a ńoŋ ípɔ. Nyînaŋ nyɔ́mɔɔ káa bôlu.

¹⁸Ƃɛ́i kélee à zòŋ naai, a tòo, ǹá-ya file-file kɛ́ tɔ̀ɔ ǹá, gɛ́ ǹyíŋ ŋá mii, gɛ́ kɛ̀ kàŋ-kàraŋ. Ŋá mò ípôlu-ƃelai dîa a gɛ́ɛ dí gbɛ́ bôlu, kɛ́lɛ, dífe pɔ̂ri ní.”

¹⁹Zîsɛ è m̀o dîa, “Óo, ŋ̀éniɛi ŋí su-ƃelai, laa-la fé káyêei, ɣele ɣɛɛlu ƃé fɛ̂ɛ ŋá kɛ́ la kákɔlɛi? Ɣele ɣɛɛlu ƃé fɛ̂ɛ ŋá ńii kpéle la káyêei? Ka pá la ḿbɔ.”

²⁰Dí pà a zurɔ̂ŋ-looi bɔ́. Nyînaŋ nyɔ́mɔɔi kɛ́ɛ a Zîsɛ káai, è zurɔ̂ŋ-looi tùmo-tumo, é doo ǹɔii ma, gɛ kiliŋ, ǹá-ya file-file kɛ́ tɔ̀ɔ ǹá.

²¹Zîsɛ e zurɔ̂ŋ ǹâŋ marê kɛ̀, ǹyɛɛi, “Nyînaŋ nyɔ́mɔɔi ŋí a kɛ́ bôlu a ɣele ɣɛɛlu?” È mò ma, “É síɣe ńoloŋ tãi ma.

²²Tãi támaa a bìli ŋɔŋ su da ǹyái a gɛ́ɛ é bàa. À kɛ̀ yà pɔ̂ri mɛni da kɛ̂i, kúmalôŋ káa í kpɔ́ŋ kûa!”

²³Zîsɛ è m̀o ma, “À kɛ̀ yá kpîŋ yâ pɔ̂ri! Mɛni kélee ŋ̀aa-see a kɛ̀ laa-la nuu yêei a ǹɛ́lɛɛ.”

²⁴Ǹaa ŋáa ma, ǹôloŋ ǹâŋ è làɣi a wɔ́lɔ, ǹyɛɛ m̀ai, “Ŋa láa la, kpɔŋ mâ, berei máŋ ŋálaa-lai láa fé fɛ́ɛ ní lai!”

²⁵Zîsɛ kɛ́ɛ a gàa a gɛ́ɛ gbɔŋ su a kɛ́ kɛ̂tɛi díkɔlɛi, è lòno nyînaŋ nyɔ́mɔɔi ma, ǹyɛɛi, “Yá nyînaŋ nyɔ́mɔɔ, ŋa m̀ó yâ, ye kúla ǹoloŋ ŋí pôlu, ífe wɔ́lɔ ŋɔ́nɔ lɛ̀ɣɛ la.”

²⁶Nyînaŋ nyɔ́mɔɔi è làɣi, é dumo-tumo a ŋ̀ánaa, é kúla bôlu. Zurɔ̂ŋ-looi è kɛ̀ yɛ̂ɛ a saa, ǹúui da-ŋa dí m̀ó dîyɛɛi, “Aâ saa.”

²⁷Kɛ́lɛ, Zîsɛ è zòŋ a ǹyée é m̀u síɣe é tɔ́ɔ.

²⁸Zîsɛ liɛ́ɛ bɔ́ naai, ŋɔpôlu-ƃelai dí m̀arê kɛ̀ dítɔnɔ kwaa ma dîyɛɛ m̀ai, “Lé mɛni ƃé kúfe pɔ̂ri ní kɛ̀ ǹyînaŋ nyɔ́mɔɔi kpɛ̂i la zurɔ̂ŋ-looi tí pôlui?”

²⁹È díwoo su-tòo ǹyɛɛ dîai, “Ɣâla fɛliɛɛ kpanaŋ (da suŋ kpanaŋ siɣeɛɛ) nɔ́ ƃa gɛ̀ núu é ǹyînaŋ nyɔ́mɔɔ sii ŋí kpɛ́ núu da pôlu.”

³⁰Dí kùla naa dí tɛ́ɛ Galalii. Zîsɛ fé kɛ́ ní ŋ̀wɛ̂lii núu da é gɔ́lɔŋ ƃɛ́i è kɛ̀ naai,

³¹kpɛ́ni fêi, è kɛ̀ mɛni lɛ̂i ŋɔpôlu-ƃelai dîa, ǹyɛɛi, “Da pâi núu-kpune Ǹóŋ tɛɛ̂i nûa pɔ́ a gɛ́ɛ dí bàa. Dà bàa, ɣele kûu saaƃa a tɛ̀ɛ, a pâi m̀u siɣêi ŋɔ́nɔ.”

³²Kɛ́lɛ, dífe táre ní ŋɔsɛŋ lɛ́ɛi ŋí su, dí kɛ̀ yao a gɛ́ɛ dí m̀arê kɛ́ m̀ɛni ma.

³³Nya ƃe dí lì dí sèri Kapɔ̂nia. Dí lɔ́ɔ kɛ̀ bɛ́rɛi mui, Zîsɛ è ŋɔpôlu-ƃelai marê kɛ̀, ǹyɛɛ dîai, “Lé ƃé ká kɛ̀ m̀aa sîa toôi berei sui?”

³⁴Kɛ́lɛ, dífe pɔri ní kɛ̀ ŋ̀óo su toôi, kpɛ́ni fêi, m̀ɛnii dí kɛ̀ zîa toôi díkîe-ní loai ƃé kɛ̀ a gbɛ̂ɛ ƃa ǹúui gɛ́tɛ ɣelei dísamai.

³⁵Nya ƃe Zîsɛ è sèe é ŋɔpôlu-ƃelai tóli, ǹyɛɛ dîai, “À kɛ̀ núu da à ŋ̀wɛli é kɛ́ a núu-tuɛ-nuu, fɛ̂ɛ m̀aa nuui é kɛ́ a ǹúui kélee gbɛɛ ŋái, gɛ́ ƃò a ǹúui kélee dílɔmu-nuu.”

³⁶Nya ƃe è pà a lôloŋ tɔnɔ é dɔ́ɔ dísama, é zee ǹyée tɔ̃ɔi, è m̀o dîa ǹyɛɛi,

³⁷“Ǹúui a ǹyée sèe lôloŋ kɛ́ɛ ŋí mu ńaai sui, m̀aa nuui a ǹyée sée ḿû. Ǹúui ŋɔ́nɔ a ǹyée sèe ḿûi, m̀aa nuui fa ǹyée sèe nɔ́ ḿû, kɛ́lɛ, m̀aa nuui a ǹyée sée nuui mu ńdɛ̀ɛi.”

³⁸Zɔ̂ŋ è m̀o ma, ǹyɛɛi, “Kaamɔ̂ɔ, kú núu da kàa gɛ́ nyînaŋ nyɔ́mɔɔ kpɛ̀ ílaâi su. Kɛ́lɛ kú gbèra, kpɛ́ni fêi, vé a kúta.”

³⁹Kɛ́lɛ, Zîsɛ è m̀o dîa ǹyɛɛi, “Káfe gbèra, kpɛ́ni fêi, núu à mɛni kpaya-kpaya kɛ̀ ńaai sui, va pɔ̂ri mɛni nyɔ́mɔɔ ƃôi é pîlaŋ ḿâ a maa félaa.

⁴⁰Ǹúui vé tɔɔ ní kûai, gáa a kútà.

⁴¹Tɔ̃yâ ma, ŋá m̀ó kâa, ǹúui a ya kɔ̂ɛɛ tɛɛ kápɔ, kpɛ́ni fêi, Kôrai láai káa kâai, m̀aa nuui fé pâi wɔ́lɔ ŋɔfela-fei lánîi.

⁴²“Núu da à gɛ ǹîa-pɛlɛɛi ŋí dɔnɔ, nyii a lâa a ńyãai, é sɔnyɔ̂ŋ kɛ́, m̀aa nɛ̃ɛ̂i dí kɔni kɛ́tɛ ɣiri m̀aa ǹúui kpîŋ kɔŋ ma dí bili yúo su.

⁴³À kɛ̀ íyee à gɛ̀ í sɔnyɔ̂ŋ kɛ́, dée yâ. Ímaa nɛ̃ɛ̂i íkɛ ƃò a ífulu, íyee tɔnɔ kpéŋ kɛ́ɛ yâ, é tɛ́ɛ la íyee feerɛ kɛ́ɛ yâ í lí Dɛ̂ƃele-taa ma, ŋ̀wɔ́lɔ-wɔlɔ ŋɔŋ su, [

⁴⁴nyii va wɔ́lɔ liiŋ, gbeli-ŋai pâi dímiî dífa saa.]

⁴⁵À kɛ̀ íkɔɔ à gɛ̀ í sɔnyɔ̂ŋ kɛ́, dée yâ. Ímaa nɛ̃ɛ̂i íkɛ ƃò a ífulu, íkɔɔ tɔnɔ kpéŋ kɛ́ɛ yâ, é tɛ́ɛ la íkɔɔ feerɛ kɛ́ɛ yâ í lí Dɛ̂ƃele-taa ma, ŋ̀wɔ́lɔ-wɔlɔ ŋɔŋ su, [

⁴⁶nyii va wɔ́lɔ liiŋ, gbeli-ŋai pâi dímiî dífa saa.]

⁴⁷À kɛ̀ íŋɛi à gɛ̀ í sɔnyɔ̂ŋ kɛ́, gula yâ. M̀aa nɛ̃ɛ̂i í lí Ɣâla ŋɔkâloŋ-laai su a íŋɛi-gao tɔnɔ kpéŋ é tɛ́ɛ la íŋɛi-gao veerɛ kɛ́ɛ yâ í lí dɛ̂ƃele-taa, ŋ̀wɔ́lɔ-wɔlɔ ŋɔŋ su,

⁴⁸nyii va wɔ́lɔ liiŋ, gbeli-ŋai pâi dímiî dífa saa.

⁴⁹Da pâi núu kélee liƃi waâi dîa a ŋɔŋ nɔ́ yɛ̂ɛ berei da sâla sãa liƃi wàa dîa a kpolo-liyeŋ

⁵⁰Kpolo-lîyeŋ lɛ̂lɛɛi. Kɛ́lɛ, à kɛ̀ gboloi à ǹíyeŋ làŋ, a pɔ̂ri gɛ̂i léŋ é líyeŋ ŋɔ́nɔ? Tɔɔ kpolo-liyeŋ é kɛ́ kâa kákɛ-ɣeniɛi su, a gɛ́ɛ ka káƃarâai ká kɛ́ ƃò kwaa tɔnɔ ma lii-sêe su.”