Read Kpelle Lûu 10 Bible Online

Lûu 10 - Kpelle bible

Lûu 10

¹Nyiŋi naa pôlu ma, Kúnuu-namui e núu buu lɔ́ɔlu mɛi feerɛ sèe. Nya ƃe e dítɛ̀ɛ ŋ̀ɛi tuɛ feerɛ-feerɛ. Dí lì daa-ŋai kélee su da gwaa-ŋai kélee ma ƃɛi e kɛ̀ pâi liî naai.

²Nya ƃe e mò dîa, ǹyɛɛi, “Mɔlɔŋ mɔ̃ɔ̂i a gɛ́tɛ, kɛ́lɛ, dee-ƃela dífe támaa ni; ka Mɔlɔŋ-nuu-namu fɛli a gɛɛ e dee-ƃela támaa tɛɛ ŋɔmɔlɔŋ-kpalaŋ-ŋai ŋá.

³Ka lí a kásiai; ka gáa, ŋa kátɛɛ̂i yɛ̂ɛ ƃála-lonii ƃe liî kɔ́li-saŋ su.

⁴Káfe li a bɛ̂bɛ, da kolâ, bɛlɛɛ kpaŋ-kpali ma; káfe kála ti núu da ma berei su.

⁵Tãi kà lɔ̀ pɛ́rɛ da mu, ka m̀ó a maa-ŋuŋ kaai, ‘Lii-see é kɛ́ bɛ́rɛi ŋi ma!’

⁶À kɛ̀ lii-sêe wɛli-nuu da káa naa, kálii-sêei a pâi kɛ̂i ma; à wàla kɛ́ ti, a pâi pâi pôlu kápɔ.

⁷Ka lɛɛ bɛ́rɛi ti mu, ka kálaa míi, ka kákpele a sɛŋ nyii nɔ da dɛ̀ɛ kápɔ, kpɛ́ni fêi, fɛ̂ɛ díi-kɛ-nuui e ŋɔfela-fei kaa; káfe li pɛ́rɛ lá, ka kula naa ka li da la.

⁸Taai nyii nɔ kà lì zu dí díyee see kamui, ka mii-sɛŋ kélee mii da zèe káŋɛi.

⁹Ka ǹûai ƃálo naa díkaa kɔ́lɛ̂i, ka mó dîa kâa, ‘Ɣâla ŋɔkâloŋ-laai a lɛɣɛ a káa.’

¹⁰Kɛ́lɛ, taai nyii nɔ kà lì zu, dífe díyee see ni kamui, ka lí ka pîlaŋ daai su bere-lee-ŋai ma, ká m̀ó kâa,

¹¹‘Kápɔ-taai-muluŋ kpîŋ máŋ nyii lɛ̀ɛ kúkɔɔ ŋái, kwa gbɛ́mɛnîi a sêre kámɛni ma. Kɛ́lɛ, ka nyiŋi kɔlɔŋ a gɛɛ Ɣâla ŋɔkâloŋ-laai a lɛɣɛ.’

¹²Ŋá m̀ó kâa, a pâi kɛ̂i a nàa fii-kpɛɛ a ŋelei ti Sodɔŋ mɛni ma e tɛɛ daai ti ma.

¹³“Kpalo ƃêlai yâ, Koraziŋ! Kpalo ƃêlai yâ Bɛsaida! Kpɛ́ni fêi, à kɛ̀ ŋ̀wála-wâla-tii kpaya-kpayai kɛ̂ kásui, dîi kɛ̀ tí Taya da Sidɔŋ, gɛ̀ ní, da wɔ́lɔ dílii pene, díkɛ maloŋ tôo-maa sêɣe tòo díkɔŋ ma, díkɛ see luu su.

¹⁴Kɛ́lɛ, a pâi kɛ̂i a nàa fii-kpɛɛ Taya da Sidɔŋ dímɛni ma mɛni-ŋa-tee-ɣelei ma e tɛɛ la kâa.

¹⁵À kɛ̀ ti yáŋ, Kapɔ̂nia, da pâi ímaa tɛ̂i í seri Ɣâla-taa? Da pâi ípilîi Dɛ̂ƃele-taa.

¹⁶“Ǹúui a káwoo mɛ̀nii, a ŋ́oo mɛ̀ni. Kɛ́lɛ, ǹúui a ǹyée kùla kamui, a ǹyée kùla mû. À kɛ̀ ti, ǹúui a ǹyée kùla ḿûi, a ǹyée kùla ǹúui mu ńdɛ̀ɛi.”

¹⁷Nya ƃe ǹúu buu lɔ́ɔlu mɛi feerɛi dí pà pôlu a lii-nɛ̃ɛ, dîyɛɛi, “Kúnuu-namui, nyînaŋ nyɔ́mɔɔ-ŋai kpîŋ máŋ dí kúwoo sìɣe ílaâi su!”

¹⁸Nya ƃe e mò dîa, ǹyɛɛi, “Ŋá Sêtɔŋ kâa, é kúla Ɣâla-taa, e too yɛ̂ɛ ŋele-gbana-ŋɔŋ.

¹⁹Ka gáa, ŋa wala-wala-laa tɛɛ kápɔ a gɛɛ ka sia kali mɛi da zɛŋkpɛ̂-ŋa, bɛlɛɛ kákpɔara-nuu ŋɔwala-walai ma; ǹyaŋ sɛŋ da fe pâi káŋwanâi.

²⁰Kɛ́lɛ, káfe lii-nɛ̃ɛ kɛ̀ nyiŋi su a gɛɛ nyînaŋ nyɔ́mɔɔ-ŋai da káwoo siɣe; kɛ́lɛ, kálii e nɛ̃ɛ a gɛɛ kálaa pɔ̃yɛɛ̂i Ɣâla-taa.”

²¹Maa aƃai tí su Zîsɛ líi è nɛ̀ɛ M̀ɔlêŋ Maa Waai sârai, ǹyɛɛi, “Ŋa ísɛɣɛ̂i fêi, Ńâŋ, Ɣâla-taa da ŋ̀éniɛi Su-nuu-namui, a gɛɛ ya mɛnii ŋi lóo dáre-ƃelai dîa da mɛni maa-kɔri-ƃelai, ya ǹɛ́ nîa-pɛlɛɛi dîa; é máŋ kɛ́ ti, Ńâŋ, nyíti máŋ e kɛ̀ a ínîa-mɛni lɛ́lɛɛ.

²²Ńâŋ a sɛŋ kélee tɛ́ɛ ḿbɔ; núu da fé Nòŋ-nuui kɔlɔŋ fɛ̂ɛ Nàŋ-nuui, kpaa núu da fé Nâŋ-nuui kɔlɔŋ fɛ̂ɛ Nòŋ-nuui, bɛlɛɛ la ǹúui ma nyii Nòŋ-nuui a ziɣe a gɛɛ e ǹɛ mai.”

²³Nya ƃe e tìnaŋ ŋɔpôlu-ƃelai pɔ, e lono dípɔ dítee-tee kwaa ma, ǹyɛɛ, “Lûwa káa ŋɛi ma nyii a sɛŋ káa káŋɛi a gáâi!

²⁴Kpɛ́ni fêi, ŋá m̀ó kâa, Ɣâla ŋɔlóno-kɛ-ƃela da kâloŋ-ŋa támaa da ŋ̀wɛ̂lii dí zɛŋ káa káŋɛi a gáai, kɛ́lɛ, dífe niî gáa ní, a gɛɛ dí m̀ɛnii mɛ́ni nyii ká m̀ɛnii, kɛ́lɛ, dífe niî mɛni ní.”

²⁵Ǹyaŋ ka gáa, tɔ̂ŋ-lɛ-nuu tɔnɔ e sìɣe e tɔɔ a gɛɛ e zu kɔɔŋ, ǹyɛɛ ma, “Kaamɔ̂ɔ, le ƃe ŋa pɔ̂ri gɛ̂i a gɛɛ ŋa wɔlɔ-wɔlɔ fulu-laa sɔlɔ ƃo?”

²⁶Nya ƃe e mò ma, ǹyɛɛi, “Le ƃe bɔ̃yɛɛ̂i dɔ̂ŋ-kɔlɔi sui? Ya ǹono leŋ?”

²⁷Nya ƃe e zu tòo, ǹyɛɛi, “Fɛ̂ɛ í Ínuu-namu-Ɣala wɛ́li a ílii kélee, ímɔ̂leŋ kélee, íwala-wala-laai kélee, íkili kélee, í íkɔlɛ-ma-nuui wɛ́li yɛ̂ɛ íkpîŋ.”

²⁸E mò ma, ǹyɛɛi, “Yâa zu too a zã́a; nyiŋi kɛ́, gɛ̀ ní, ya pâi fulu-laa kâai.”

²⁹Kɛ́lɛ, e kɛ̀ ŋ̀wɛ̂lii e gbîŋ kɛ́ a núu sã́a. Nya ƃe e mò Zîsɛ ma, ǹyɛɛi, “Gbɛ̂ɛ ƃa ŋ́gɔlɛ-ma-nuui?”

³⁰Zîsɛ e zu tòo, ǹyɛɛi, “Nalôŋ tɔnɔ ƃe kɛ̀ kulâi Zerusâlɛŋ a gɛɛ e yeŋ Zɛleko. Kɛ́lɛ, e tòo ŋuma-ƃela yée ŋá. Dí ŋɔseɣei wêyeŋ ma, dí ǹókwa dí ǹɛɛ naa dí li, e lɛɛ a guro gɛ pa saâi.

³¹Nàa kɛ́ɛ ti, sâla láa soŋ-nuu tɔnɔ e kɛ̀ tɛɛ̂i nàa-pere. Tãi e gàa lai, e m̀aa lâa, e tɛɛ bere-ƃelai nyíti mɛi-pere.

³²Bere tɔnɔi ti nɔ ƃe Liivai-nuui e gɛ̀ la. Gɛɛ a pá a kula mai, e m̀aa lâa, é tɛ́ɛ ma bere-ƃelai nyíti mɛi-pere.

³³Kɛ́lɛ, Sameria-nuu tɔnɔ e kɛ̀ tɛɛ̂i berei ti su, e pà kulâi ma. Tãi e gàa lai, m̀alôŋ e zòŋ.

³⁴Nya ƃe e lì bɔ, e wulɔ da ŋwã̂ai pu ŋɔpalai ŋá e ŋá ɣiri; e m̀u sìɣe e zee gbɔɔ̂i-wɛlɛ-sôoi mɛi e li la ŋɔ̃yâ-laa-pɛrɛi mu e m̀ɛi kaa.

³⁵Ŋelei ti pôlu ma, e sêleŋ feerɛ tɛ̀ɛ ŋɔ̃yâ-pɛrɛ mɛi-kaa-nuui pɔ, ǹyɛɛi, ‘Ye nalôŋ mɛi káa; sɛŋ kélee ya gɔ̀lɛ m̀ɛni mai, ŋà pà pôlu, ŋa pâi gélee pɔɔ-tee fêi.’

³⁶Núu saaƃai ŋi gáa íkili ŋá nênɛ ƃa nalôŋ ŋí tòo ŋúma-ƃelai yée ŋái gɔlɛ-ma-nuu?”

³⁷E mò ma, ǹyɛɛi, “Nalôŋ malôŋ kàai, ńyãa ƃe.” Nya ƃe Zîsɛ e mò ma, ǹyɛɛi, “Lí, í gɛ́ nɔ a bere tɔnɔi ti.”

³⁸Nya ƃe e kɛ̀ ti, díkɛɛ nâa liî díperei sui, e lì kpa-nâŋ da lá; nɛnî tɔnɔ ǹáa ƃe kɛ̀ a Maatɛ, e ǹyée sèe mù ŋɔpɛ́rɛi lá.

³⁹Ǹêɣe-nɛnii e kɛ̀ naa, ǹáa ƃe kɛ̀ a Mere, nyii sèe Kúnuu-namui kɔ́ɔ mu, gɛ ŋ̀óli tɔɔ ŋ̀óo mai.

⁴⁰Kɛ́lɛ, Maatɛ e kɛ̀ a gbaaŋɔɔ mii-sɛŋ kpɛtɛ mɛni ma; e lì bɔ, ǹyɛɛ, “Kúnuu-namui, ífe kpaaŋ ni berei ńêɣe-nɛnii e ńɛ̀ɛ la ŋ́gɛ mii-sɛŋ kpɛtɛ ńyãa tɔnɔi? Mó ma e pa e kpɔŋ mâ.”

⁴¹Kɛ́lɛ, Kúnuu-namui e ŋ̀óo su tòo, ǹyɛɛi, “Maatɛ, Maatɛ, íkpaaŋɔɔ̂i, ílii kɛ́ kɔ mɛni támaa mɛni ma;

⁴²mɛni tɔnɔ ƃe gbanaŋɔɔ̂i. Mere a ǹɛ́lɛɛ síɣe zu nyii dífe pâi gulâi ǹyêei.”