Read Kpelle Lûu 15 Bible Online

Lûu 15 - Kpelle bible

Lûu 15

¹Nya ƃe e kɛ̀ ti, ŋuŋ-fela-fei kula-ƃelai da zɔnyɔ̂ŋ-ƃelai kélee dí kɛ̀ lɛɣɛ̂i la a gɛɛ dí díwoli tɔɔ ŋ̀óo ma.

²Nya ƃe Faresii-ŋai da gɔlɔ-pɔ̃yɛ-ƃelai dí kɛ̀ díŋuŋ su-woo saâi, dîyɛɛi, “Ǹalôŋ a ǹyée sèe sɔnyɔ̂ŋ-ƃela mu, da dîa-ni díkɛ dílaa mìi.”

³Nya ƃe e záŋ ŋi sɔ̀ɔ dîɛ,

⁴ǹyɛɛi, “Gbɛ̂ɛ ƃe kásama nyii ƃála ŋuŋ tɔnɔ à kɛ̀ ǹyêei, dɔnɔ é láŋ zu, va buu lɔ́ɔlu mɛi náaŋ kao lɔ́ɔlu mɛi náaŋ (99) ŋi lɛ̀ɛ kwaa ta ma, e li ǹáŋɔɔ̂i kɔ́rîi e lɛɛ zu e gaai?

⁵À kpɛ̀ɛ a gáa, a bu gâraŋ ŋá, gɛ̀ níi-nɛ̃ɛ kula.

⁶Tãi à pà la bɔ naai, a m̀arâai da gɔlɛ-ma-ƃelai tôli gîe ma, ǹyɛɛ dîa, ‘Kwaa lii-nɛ̃ɛ kula mî. Kpɛ́ni fêi, ŋà Ŋáƃala káa nyii kɛ̀ a ǹáŋɔɔ̂i.’

⁷É máŋ kɛ́ ti, ŋá m̀ó kâa, lii-nɛ̃ɛ támaa a pâi kɛ̂i Ɣâla-taa sɔnyɔ̂ŋ-nuu tɔnɔ mɛni ma nyii a ǹíi pènei, é tɛ́ɛ zɔŋ-lɛlɛɛ-ƃela buu lɔ́ɔlu mɛi náaŋ kao lɔ́ɔlu mɛi náaŋ ma diai dífe lii-pene wɛ̂lii.

⁸“Kpaa, à kɛ̀ sɛŋ-kao kole kpua puu káa nɛnî yêei, dɔnɔ à làŋ zu, le-nɛni ƃe ti va pɔ̂ri laŋpo tɔɔ̂i, e bɛ́rɛi mu kɔɔ e nàa kɔri e lɛɛ zu e gaai?

⁹Tãi à gàa lai, a m̀arâai da gɔlɛ-maa-ƃelai tôli gîe ma, ǹyɛɛi, ‘Kwaa lii-nɛ̃ɛ kula mî. Kpɛ́ni fêi, ŋaâ zɛŋ-kaoi káa nyii ŋa ǹáŋ.’

¹⁰É máŋ kɛ́ ti, ŋá m̀ó kâa, lii-nɛ̃ɛ káa Ɣâla ŋɔkéla-ŋai ŋɛi sɔnyɔ̂ŋ-nuu tɔnɔ mɛni ma nyii a ǹíi pènei.”

¹¹Nya ƃe e mò, ǹyɛɛi, “Nalôŋ tɔnɔ ƃe kɛ̀ naa ǹóŋ-surɔŋ kɛ́ ƃo feerɛ.

¹²Ǹeɣe-nuui e mò ǹâŋ ma, ǹyɛɛi, ‘Ńâŋ, íkɔ̃liŋ-ŋai nyii pâi kɛ̂i a ŋ́ɔ̂i dɛɛ ḿbɔ.’ Nya ƃe e gɔ̃liŋ ŋá kɔ̀lɛ da ǹîa díloai.

¹³Ɣele-kuu támaa fé tɛɛ ni, ǹeɣe-nuui e ŋɔsãâi kélee ŋá tɛ́ gîe ma, e sia kôya siɣe, e li kpɔ́ lɔii da kpɛni su. Nàa ƃe e ŋɔsɛŋ-kaoi kélee su kàra naa a ƃoo-pere.

¹⁴Gɛɛ a kpɛɛ a gélee kɔlɛɛ̂i, puru kɛ́tɛ e tòo kɛ̀ ǹɔii ti su, puru kɛ́ pɛlɛ bàa ma.

¹⁵Nya ƃe e lì a gɛɛ e tíi kɛ́ ǹɔii ti su núu tɔnɔ mì nyii dɛ̀ɛ ŋɔkpâlaŋ ŋá a gɛɛ e ƃoi-ŋa ŋá kɔŋ.

¹⁶Ǹíi eêi pɔ̂ri kɛ̂i a nɛ̃ɛ, à kɛ̀ eêi moi-ŋai kɔnɔŋ da mii. Núu da fé sɛŋ da tɛ̀ɛ ní bɔ.

¹⁷Kɛ́lɛ, gíli ŋá kɛ́ɛ a ponoi, e mò ǹyɛɛ, ‘Ńâŋ yée-mu-ƃelai kpólo támaa káa díyêei é tɛ́ɛ nyii ma da ŋ̀wɛ́li kɛ̂i. Ńyaŋ ŋ́gaa ƃɛ, puru kɛ́ ḿbaa!

¹⁸Ŋa pâi mu siɣêi ŋa li ńâŋ pɔ. Ŋa pâi m̀ôi ma, “Ńâŋ, ŋa sɔnyɔ̂ŋ kɛ́ a Ɣâla-taa da íŋɛi;

¹⁹ḿaa fé ŋɔ́nɔ nɛ̃ɛ ni a gɛɛ dí ńdoli a íloŋ. Ŋ́gɛ nɔ a íyee-mu-ƃelai dɔnɔ.” ’

²⁰Nya ƃe e m̀u sìɣe e li ǹâŋ pɔ. “Kɛ́lɛ, gɛɛ kɛ̀ kwaa kôya mai, ǹâŋ e gàa, m̀alôŋ e zoŋ, e kîrɛ sìɣe e li e kpulɔ̂ŋ ma, e ǹá-gbɔ see ma.

²¹Nya ƃe ǹóŋ e mò ma, ǹyɛɛi, ‘Ńâŋ, ŋa sɔnyɔ̂ŋ kɛ́ a Ɣâla-taa da íŋɛi; ḿaa fé ŋɔ́nɔ nɛ̃ɛ ni a gɛɛ dí ńdoli a íloŋ.’

²²Kɛ́lɛ, ǹâŋ e mò ǹyée-mu-ƃelai dîa, ǹyɛɛi, ‘Ka pá a ǹyokpoi ǹɛ́lɛɛi a maa felaa, ka doo gɔŋ ma; ka gbono too ǹyée ma, ka kɔlɔ lɔ gɔ́ɔ ŋá;

²³ka pá a niŋa-naɣa kɛ̂tɛi, ka bàa a gɛɛ ku mii, ku lii-nɛ̃ɛ kula;

²⁴kpɛ́ni fêi, ńoŋ ŋi e kɛ̀ a zaa, a ŋɔ́nɔ kɛ́ a vulu; e kɛ̀ a ǹáŋɔɔ, nya ƃe a káa.’ Nya ƃe dí pɛ̀lɛ lii-nɛ̃ɛ kɛ́ɛ ma.

²⁵“Nya ƃe e kɛ̀ ti, ŋɔlóŋ duɛ-tuɛi e kɛ̀ gbâlaŋ ŋá; gɛɛ kɛ̀ lɛɣɛ̂i bɛ́rɛi kɔlɛi, e ɣale-sɛŋ da mãla-kɛ-tiŋ mɛni.

²⁶Nya ƃe e ǹâŋ yée-mu-nuu tɔnɔ tòli, e m̀arê kɛ́ a gɛɛ e nyiŋi su-kulai lɛ́ ma.

²⁷E mò ma, ǹyɛɛi, ‘Ílêɣe a pá. Nya ƃe ínâŋ a niŋa-naɣa kɛ́tɛi paa. Kpɛ́ni fêi, a zɔlɔ ƃó ŋɔ́nɔ a vulu, gɔlɔ̂i ponoɔ.’

²⁸Kɛ́lɛ, ǹíi e ŋwàna, ve faa ŋ́i a gɛɛ e lɔ. È kɛ̀ nɔ́ tí ǹâŋ é kúla ŋínii ŋá, é gberâi fé.

²⁹Kɛ́lɛ, è ǹâŋ wóo su tòo, ǹyɛɛi, ‘Bɛ káa, góraŋ-ŋai ŋi kélee ŋá kɛ̀ tíi kɛ̂i yɛ̂ yɛ̂ɛ luɛ; fé tá íwoo pili ni; kɛ́lɛ, ífe tá ƃoli-naɣa tɛɛ ni ḿbɔ a gɛɛ ŋa kúu kɛ́ la marâai dîa.

³⁰Kɛ́lɛ, tãi nɔ íloŋ ŋi e pà la, a kúla íkɔ̃liŋ-ŋai miî wulu-wulu-nɛyaa pôlui, ya niŋa-naɣa kɛ́tɛ̂i páa ma!’

³¹Nya ƃe e mò ma, ǹyɛɛi, ‘Ńoŋ, íkaa wɔ́lɔ ŋ́gɔlɛ. Zãâi kélee gáa ńyêei, gáa a ípɔɔ.

³²Maa nɛɛ̂i kɛ̀ ku lii-nɛ̃ɛ kula, kúlii é láa. Kpɛ́ni fêi, ílêɣei ŋi kɛ̀ a zaai, a kɛ́ ŋɔnɔ a vulu; e kɛ̀ a ǹáŋɔɔ, nya ƃe a káa.’ ”