Read Kpelle Lûu 16 Bible Online

Lûu 16 - Kpelle bible

Lûu 16

¹É máŋ mò ŋɔpôlu-ƃelai dîa, ǹyɛɛi, “Tɔɔ-nuu tɔnɔ ƃe kɛ̀ naa ǹyée-mu-nuu kɛ́tɛ kɛ́ ƃo ma. Nya ƃe dí pà dí ǹyée-mu-nuu kɛ́tɛi sɔŋ su kula ma a gɛɛ e kɛ́ gɔ̃liŋ-ŋai su karâi.

²Nya ƃe e dòli e mò ma, ǹyɛɛi, ‘Le-mɛni ƃe ŋi ŋá mɛ̀ni e pîlaŋ yâi? Pá a zãâ láa-siɣe-kɔlɔi. Kpɛ́ni fêi, ífe pâi kɛ̂i ŋɔ́nɔ a ńyee-mu-nuu kɛ́tɛ.’

³Nya ƃe ǹyée-mu-nuu kɛ́tɛi e mò gbîŋ ma, ǹyɛɛi, ‘Le ƃe ŋa pɔ̂ri gɛ̂i berei ńâmu a ǹúu-kɛtɛ-laai kúla la ńyêei? Pɔri fé mî a gɛɛ ŋa lɔii siŋ, ǹyaŋ ŋ́gɛ ŋumɛ fɛli kɛ̂i.

⁴Ŋa mɛnii kɔlɔŋ ŋa pâi gɛ̂i a gɛɛ tãi da ŋ́gula la ǹúu-kɛtɛ-laai sui ǹûai dí díyee see ḿu dípɛrɛ-ŋai mu.’

⁵Nya ƃe e ǹâmu ŋɔkpa-soŋ-ƃelai tôli tɛi-tɛi. E mò duɛ-tuɛi ma, ǹyɛɛi, ‘Ɣɛɛlu ƃe í zoŋ ńâmu yêei?’

⁶È mò ma, ǹyɛɛi, ‘Wúlɔ tîŋ ŋuŋ tɔnɔ pôlu buu lɔ́ɔlu mɛi da.’ Nya ƃe e mò ma, ǹyɛɛi, ‘Íkpa-soŋ-kɔlɔi síɣe, í see a maa félaa, í dîŋ buu lɔ́ɔlu mɛi saaƃa pɔ̃yɛ.’

⁷È kɛ̀ tí, è mò gbeli ma, ǹyɛɛi, ‘Ɣɛɛlu ƃe í zoŋ ńâmu yêei?’ È mò ǹyɛɛi, ‘Mɔlɔŋ ƃɔrɔ ŋuŋ lɔ́ɔlu mɛi da.’ E mò ma, ǹyɛɛi, ‘Íkpa-soŋ-kɔlɔi síɣe, íƃɔrɔ ŋuŋ náaŋ pôlu buu lɔ́ɔlu mɛi saaƃa (480) pɔ̃yɛ.’

⁸Nya ƃe ǹâmui e ǹyée-mu-nuu sɔŋ nyɔ́mɔɔi láa maa tɛ̂ berei a táre kɛ́ lai; kpɛ́ni fêi, ŋ̀éniɛi ŋi su-lonii-ŋai táreɛ̂i e pîlaŋ díkaa-ƃelai dîa é tɛ́ɛ víyeŋ ǹônii-ŋai dîa.

⁹Ŋá m̀ó kâa, ka káwɛli-ƃela kɔri káa kpîŋ mɛni ma a berei ka kawoya-sɛŋ-kaoi kɔlɛ lai. À kɛ̀ ti, tãi à kpɛ̀ɛ lai, da pâi díyee seêi kámu wɔlɔ-wɔlɔ kwaa-ŋai ma.

¹⁰“Ǹúui zã́âi mɛni-loŋ sui, zã́âi máŋ gɛ́tɛ su; ǹúui ŋ̀óyâi mɛni-loŋ sui, ŋ̀óyâi máŋ gɛ́tɛ su.

¹¹À kɛ̀ káfe kɛ́ ni a núu sã́a-ŋa ŋôya-sɛŋ-kao sɔlɔ-ƃoɔi su, gbɛ̂ɛ ƃe pâi tɔ̃yâ-tɔɔ-laa tɛɛ̂i kápɔ e gíli kɛ́ kâa?

¹²À kɛ̀ káfe kɛ́ ni a núu sã́a-ŋa núu da kpɛni yée-ŋa-sɛŋ mɛi, gbɛ̂ɛ ƃe pâi kákpɔɔi-sɛŋ tɛɛ̂i kápɔ?

¹³Yée-mu-nuu tɔnɔ fa pɔ̂ri tíi kɛ̂i namu feerɛ mi; kpɛ́ni fêi, a pâi dɔnɔ kpɔarâi, e m̀arâŋ wɛli, à wàla kɛ́ ti, a pâi tɔɔ̂i dɔnɔ pôlu, e m̀arâŋ-nuui kpɔara. Ífa pɔ̂ri tíi kɛ̂i Ɣâla mi da sɛŋ-kao.”

¹⁴Faresii-ŋai nyii-ŋai kɛ̀ a sɛŋ-kao wɛliɛi, dí mɛnii ŋi kélee mɛ̀ni, dí ɣɛlɛ-maa kúla zu.

¹⁵Kɛ́lɛ, e mò dîa, ǹyɛɛi, “Káa ƃa ǹûai ka kákpîŋ sãa núu ŋɛi, kɛ́lɛ, Ɣâla e kálii su kɔlɔŋ; kpɛ́ni fêi, sɛŋ nyii a ǹûai ŋɛi soŋ, mɛlɛ kpɛɛ̂i Ɣâla koi.

¹⁶“Dɔ̂ŋ-kɔlɔi da Ɣâla ŋɔlóno-kɛ-ƃelai ƃe ŋwála-wala-laai e kɛ̀ díyêei e lɛɛ zu Zɔ̂ŋ e pa; é kúla tãi ti ma, Duŋ Lɛ́lɛɛi, nyii bîlaŋɔɔi Ɣâla ŋɔkâloŋ-laai mai, a ƃó, ǹyaŋ ǹûai kélee da díkpîŋ pûi zu a wala-wala-laa.

¹⁷Kɛ́lɛ, nàa fii kpɛɛ̂i a gɛɛ ŋelei da ǹɔii dí kpɛɛ é tɛ́ɛ la dɔ̂ŋ-kɔlɔi ŋɔwóoi gbua tɔnɔ kpîŋ toɔɔ pôlu ma.

¹⁸“Surɔ̂ŋ kélee à ŋɔnɛnîi lɛ̀ɛ, é da kpɛ́ni kúlai, a wulu-wulu kɛ́. Zurɔ̂ŋ máŋ à nɛnîi kùla bɔ̂ŋ à ǹɛɛ̂i, a wulu-wulu kɛ́.

¹⁹“Nya ƃe è kɛ̀ tí, tɔɔ-nalôŋ tɔnɔ è kɛ̀ naa nyii seɣe kpɔ̂lu-mu-tɛɣiɛ da seɣe kole kpanaŋɔɔ lɛ́lɛɛ e kɛ̀ ma, gɛ kúu kɛ́tɛ kɛ́ a ɣele kéleei.

²⁰Nya ƃe kôlo-nuu tɔnɔ, ǹáa ƃe kɛ̀ a Lâzara, e kɛ̀ laa ni ŋɔgalai laƃelei. Pala kɛ́ gbono ma gwaa kélee,

²¹nyii kɛ̀ ŋ̀wɛ̂lii e mii-sɛŋ pɛnɛ-pɛlɛɛi mii kɛ̀ kulâi dɔɔ-nuui ŋɔteƃelei mai. Ŋ̀îla-ŋai kpîŋ dí pà díkɛ ŋɔpalai ŋá kɔmɔ.

²²Nya ƃe gôlo-nuui ŋi e saa. Ŋ̀âla-taa-kela-ŋai dí ziɣe, dí li la Eberaɣɛ̃ɛ kɔ̃ɔŋ su. Dɔɔ-nuui e sàa máŋ, dí ǹoo;

²³gɛɛ Dɛ̂ƃele-taai gɛ ƃo mɛni-kpɔ̂lu sui, e ŋɛi tɛ̀ ɣelei e Eberaɣɛ̃ɛ káa kwaa kôya ma, Lâzara kɛ́ ƃo gɔ̃ɔŋ su.

²⁴Nya ƃe e làɣi a ɣelêi-pere, ǹyɛɛi, ‘Ńâŋ Eberaɣɛ̃ɛ, ḿalôŋ káa. Lâzara tɛɛ e ǹyée kpua lɔ yâi, e ńɛŋ laɣi. Kpɛ́ni fêi, ŋ́gaa mɛni-kpɔ̂lu kâai ŋɔŋ-leŋ ŋi su.’

²⁵Kɛ́lɛ, Eberaɣɛ̃ɛ e mò ma, ǹyɛɛi, ‘Ńôŋ, nàa é lɛ́ɛ íkili ŋá tãi í kɛ̀ la a ífului, íkɛ ísɛŋ lɛ́lɛɛ sɔlɔ ƃôi, bere tɔnɔi tíi nɔ́ ƃe Lâzara è kɛ̀ sɛŋ nyɔ́mɔɔ sɔlɔ ƃôi la. Kɛ́lɛ, loníi ma gáa ŋá-nɛnɛ sɔlɔ ƃôi ƃɛ, yáŋ íkaa mɛni-kpɔ̂lu su.

²⁶Nyiŋi kélee pôlu ma, poto kɛ́tɛ kpɛtɛɛ̂i kwa káa-ni kúloai a gɛɛ diai ŋ̀wɛ̂lii dí siɣe ƃɛ dí li kápɔ naai, pɔ̂ri fé kɛ́ dîɛ, kpaa máŋ, núu da fa pɔ̂ri kulâi naa e pa kúpɔ.’

²⁷Nya ƃe e mò, ǹyɛɛi, ‘Gɛ̀ ní, ŋa íkpera fei, ńâŋ, a gɛɛ í dɛɛ ńâŋ ŋɔpɛ́rɛi lá.

²⁸Kpɛ́ni fêi, lee-kaa-sinaa lɔ́ɔlu káa ńyêei. Ǹɛɛ naa é dília-woo ƃó a gɛɛ dífe lâa pá la mɛni-kpɔ̂lu-kwaai ŋi ma.’

²⁹Kɛ́lɛ, Eberaɣɛ̃ɛ e mò ma, ǹyɛɛi, ‘Mose káa díyêei da Ɣâla ŋɔlóno-kɛ-ƃelai; ǹɛɛ naa dí díwoo mɛni.’

³⁰Nya ƃe e mò, ǹyɛɛi, ‘Kpaa, ńâŋ Eberaɣɛ̃ɛ; kɛ́lɛ, à kɛ̀ núu da à kùla saa yêei e li dípɔ, da pâi dílii penêi.’

³¹E mò ma, ǹyɛɛi, ‘À kɛ̀ dífa Mose da Ɣâla ŋɔlóno-kɛ-ƃelai wóo siɣe, dífe pâi máŋ mɛni siɣêi a tɔ̃yâ à kɛ̀ núu da à m̀u sìɣe saa yêei.’ ”