Read Kpelle Lûu 18 Bible Online

Lûu 18 - Kpelle bible

Lûu 18

¹Nya ƃe e sáŋ sɔ̀ɔ dîa, e ǹɛ dîa a gɛɛ fɛ̂ɛ nûa dí kɛ̀ Ɣâla fɛlîi a tãi kélee, dífii fé kpɛɛ.

²Nyɛɛi, “Mɛni-ŋa-tee-nuu tɔnɔ ƃe kɛ̀ naa taa tɔnɔ su, nyii ve kɛ́ ni yáôi Ɣâla ma, va fulɔi máŋ núu da ƃâa siɣei;

³nya ƃe pɔɔ-nɛni tɔnɔ-e kɛ̀ daai ti su nyii káa pà bɔ, gɛ mo ma, ǹyɛɛi, ‘Ŋ́gula mî ŋ́gbɔara-ƃelai yêei.’

⁴Nàa kuro kɛ́ɛ ti, ve faa ni; kɛ́lɛ, nàa pôlu ma e mò gbìŋ ma, ǹyɛɛi, ‘Berei máŋ ḿva yao la Ɣâla ma, ḿva máŋ núu da ƃâa siɣei,

⁵kɛ́lɛ, bɔɔ-nɛnii ŋi a fũa-fũa tɔɔ mâ, ŋa pâi ńyee kulâi mù, ŋa dɛɛ, à wàla kɛ́ ti, a pâi ḿvii kpɛɛ̂i a gɛɛ pâi ƃɛ a tãi kélee.’ ”

⁶Nya ƃe Kúnuu-namui e mò, ǹyɛɛi, “Ka zɔŋ-nyɔŋ mɛni-ŋa-tee-nuui wóo mɛni.

⁷Ɣâla fé pâi ŋɔsu-ɣɛɛ-ƃelai kulâi mɛni su diai da wɔ̂lɔ ma ɣele-ƃɔ́ɔ da kpini yée mui? A pâi díkɛ̂i dí maa kpɛŋ a zu kôya?

⁸Ŋá m̀ó kâa, a pâi díkulâi mɛnii a maa felaa. É máŋ kɛ́ ti, tãi núu-kpune Ǹóŋ pà lai, a pâi laa-la kâai ŋ̀éniɛi su?”

⁹E máŋ záŋ ŋi sɔ̀ɔ dîɛ diai díkili e kɛ̀ díkpîŋ dîa a gɛɛ dí kɛ̀ a dísɔŋ lɛ́lɛɛ, kɛ́lɛ, dí díƃarâai kélee kpɔarai, ǹyɛɛi,

¹⁰“Sinâa feerɛ dí lì Ŋ̀âla-pɛrɛ Kɛ́tɛi mu Ɣâla fɛlîi. Dɔnɔ e kɛ̀ a Faresii-nuu, m̀arâŋ-nuui kɛ́ ƃo a ŋuŋ-fela-fei kula-nuu.

¹¹Faresii-nuui e tɔ̀ɔ e Ɣâla fɛli nɔ ŋi ǹyaa tɔnɔ, ‘Ɣâla, ŋa ísɛɣɛ̂i fé a gɛɛ fé yɛ̂ɛ ḿarâai kélee nyii-ŋai díkaa a gɔ̃liŋ-tɔɔ-ƃelai, ŋôya-ƃelai, wulu-wulu-kɛ-ƃelai, fulɔi máŋ yɛ̂ɛ ŋuŋ-fela-féi kula-nuui ŋi.

¹²Ŋa pîli suŋ su a ɣele feerɛ lɔku kélee yée mu. Sɛŋ kélee ŋa zɔlɔ ƃôi, ŋa Ɣâla ŋɔi tɛ́ɛ bɔ.’

¹³Kɛ́lɛ, ŋuŋ-fela-fei kula-nuui e kɛ̀ tɔɔ ni a zu-kúlaa ma, ve ŋɛi tɛ ni ŋelei su. Kɛ́lɛ, gɛ geŋe-la tua, ǹyɛɛ, ‘Ɣâla, zɔnyɔ̂ŋ-nuui ŋi a ńyãai, ḿalôŋ káa!’

¹⁴Ŋá m̀ó kâa, nalôŋ ŋi e lì bɔ naa a zɔŋ kpɛɛ ma, kɛ́lɛ, m̀arâŋ-nuui fei; kpɛ́ni fêi, ǹúui kélee a gbîŋ kɛ̀tɛi, m̀aa a pâi yenîi. Kɛ́lɛ, ǹúui a gbîŋ maa yêŋ, a pâi kɛ̂i a gɛ́tɛ.”

¹⁵Dí kɛ̀ nâa pâi máŋ a kɔatara-ŋa bɔ a gɛɛ e ǹyée pɛlɛ dîa; ŋɔpôlu-ƃelai kɛ́ɛ da gáai, dí díkpera.

¹⁶Kɛ́lɛ, Zîsɛ e dítòli dí pa bɔ, ǹyɛɛi, “Ka ǹîa-pɛlɛɛi lɛɛ naa dí pa ḿbɔ, káfe díkpera; kpɛ́ni fêi, ǹúu kɛɛ-ŋai ŋi ƃe Ɣâla ŋɔkâloŋ-laai káa dímɛni ma.

¹⁷Tɔ̃yâ ma, ŋá m̀ó kâa, ǹúui va ǹyée sèe Ɣâla ŋɔkâloŋ laai mu yɛ̂ɛ lóloŋ, va li naa.”

¹⁸Kâloŋ tɔnɔ e m̀arê kɛ̀, ǹyɛɛi, “Kaamɔ̂ɔ lɛ́lɛɛ, le ƃe ŋa pɔ̂ri gɛ̂i a gɛɛ ŋa wɔlɔ-wɔlɔ fulu-laai sɔlɔ ƃo?”

¹⁹Zîsɛ e zu tòo, ǹyɛɛi, “Le ƃe ya kɛ̂i la mâ núu lɛ́lɛɛi? Núu da fé naa ǹɛ́lɛɛ̂i fɛ̂ɛ Ɣâla tɔnɔ.

²⁰Í dɔ̂ŋ-ŋai kɔ́lɔŋ: Ífe wulu-wulu kɛ̀. Ífe núu paa. Ífe ŋuma kɛ̀. Ífe wôya-sere-faa kɛ̀ Ƃâa kɛ́ ínâŋ ma da ílee.”

²¹È mò, ǹyɛɛi, “Ŋa nyii-ŋai ŋi kélee lâai kɛ́ é síɣe ŋásurɔ̂ŋ-loo tãi ma.”

²²Ǹyaŋ, tãi Zîsɛ e mɛ̀ni lai, è mò ma, ǹyɛɛi, “Mɛni tɔnɔ ƃe a lɛ̂ɛ. Íyee-ŋa-sãai kélee kɔ́lɛ, í zɛŋ-kaoi tɛɛ gôlo-ƃelai pɔ, gɛ̀ ní, laai-kɛ-sɛŋ a pâi kɛ̂i íyeêi Ɣâla-taa; í pá, í pîlaŋ ḿbôlu.”

²³Kɛ́lɛ, gɛɛ a nyiŋi mɛ́nii, ǹíi e sòli. Kpɛ́ni fêi, e kɛ̀ a dɔɔ kpɔ́ a dámaa.

²⁴Zîsɛ kɛ́ɛ a gáai e mò, ǹyɛɛi, “Gbanaŋɔɔ̂i kpɔ́ a gɛɛ diai tɔɔ-sɛŋ a díyêei dí li Ɣâla ŋɔkâloŋ-laai su!

²⁵Kpɛ́ni fêi, nàa fii-kpɛɛi a gɛɛ soo-fáleŋ e lɔ saɣílaŋ wôloi é tɛ́ɛ tɔɔ-nuu liɛɛ Ɣâla ŋɔkâloŋ-laai su ma.”

²⁶Diai mɛnii dí mò, dîyɛɛi, “Gɛ̀ ní, gbɛ̂ɛ ƃa pɔ̂ri ƃálôi?”

²⁷Kɛ́lɛ, e mò, ǹyɛɛi, “Mɛnii núu fa wɔ́lɔ pɔ̂ri gɛ̂i, Ɣâla a pɔ̂ri gɛ̂i.”

²⁸Nya ƃe Pitɛ e mò, ǹyɛɛi, “Gáa, kwa kúpɔ naa lɛ́ɛ, kwa pîlaŋ ípôlu.”

²⁹Nya ƃe e mò dîa, ǹyɛɛi, “Tɔ̃yâ ma, ŋá m̀ó kâa, núu da fé niî ŋɔpɛ́rɛ lɛɛ ni, kpaa ŋɔnɛnî, kpaa ŋɔlee-kaa-sinaâi, kpaa ǹâŋ da ǹee, kpaa máŋ ŋɔnîa-pɛlɛɛi, Ɣâla ŋɔkâloŋ-laai mɛni ma,

³⁰nyii ve pâi dámaa-ɣele sɔlɔ ƃôi tãi ŋi su, da wɔlɔ-wɔlɔ fulu-laai tuɛ-pere-ɣeniɛi sui.”

³¹Nya ƃe e bôlu-ƃela puu kao feerɛi síɣe kwaa tɔnɔ ma, ǹyɛɛ dîa, “Ka gáa, kwa kɛ́ tɛ̂i Zerusâlɛŋ. Mɛnii kélee Ɣâla ŋɔlóno-kɛ-ƃelai dí bɔ̃̀yɛ e pîlaŋ núu-kpune Ǹóŋ mai ŋa-see a pâi kɛ̂i.

³²Kpɛ́ni fêi, da pâi dɛɛ̂i Zɛ̃tai-ŋai pɔ, dí ɣɛ́lɛ-maa kula zu, dí tua la a nyɔ́mɔɔ, dí díla-ya pu ma;

³³da pâi ǹókwâi, dí bàa, kɛ́lɛ, ŋele-kuui zaaƃa-ɣelei a pâi m̀u siɣêi.”

³⁴Kɛ́lɛ, dífe táre ni mɛnii ŋi da su; ŋ̀óoi ŋi e kɛ̀ a noɔɔ dîa, dífe mɛnii mɛni ni e mòi.

³⁵Nya ƃe è kɛ̀ tí, gɛɛ a lɛɣɛ Zɛleko mai, ŋɛi-pû naloŋ tɔnɔ è kɛ̀ sêe-ni berei kɔlɛ, gɛ́ fɛli kɛ.

³⁶Nya ƃe tãi è gbɔŋ tíŋ mɛ̀ni la tɛɛ̂i m̀ai, è mare-kɛ̂ɛ kɛ̀ nyíŋi su-kulâi ƃa lé.

³⁷Dí mò ma, “Zîsɛ nyii kùla Nâzarɛi, ǹyaa ká tɛɛ̂i ti.”

³⁸Nya ƃe e wɔ̀lɔ, ǹyɛɛi, “Deeƃé Ǹóŋ Zîsɛ, ḿaloŋ káa!”

³⁹Diai kɛ̀ liî tuɛ-perei dí mò mà a gɛɛ é mɛi sáa; kɛ́lɛ, e làɣi a zu kɛ́tɛ, ǹyɛɛi, “Deeƃé Ǹóŋ, ḿalôŋ káa!”

⁴⁰Nya ƃe Zîsɛ e kpèra, e m̀ó dîa a gɛɛ dí pa là bɔ. Tãi e lɛ̀ɣɛ lai, e m̀arê kɛ̀,

⁴¹ǹyɛɛi, “Le ƃe ya ŋ̀wɛ̂lii ŋa gɛ yɛ̂?” Nalôŋ e mò, ǹyɛɛi, “Kúnuu-namui, gɛ ŋa kwaa kaa.”

⁴²Nya ƃe Zîsɛ e mò ma, ǹyɛɛi, “Ye kwaa káa; ílaa-lai a íƃalo.”

⁴³Nya ƃe e kwaa kâa a maa felaa, e pîlaŋ bôlu, gɛ Ɣâla láa maa tɛ̂; ǹûai kélee kɛ́ɛ da gáai, dí laa-maa-tɛ tɛ̀ɛ Ɣâla pɔ.