Read Kpelle Lûu 19 Bible Online

Lûu 19 - Kpelle bible

Lûu 19

¹Nya ƃe Zîsɛ e tɛ̀ Zɛleko, gɛ naa su ƃɔ.

²Nalôŋ tɔnɔ e kɛ̀ naa, ǹáa kɛ́ ƃo a Zakîɛ; e kɛ̀ a ŋuŋ-fela-fei kula-nuu kɛ́tɛ, gɛ ƃo a tɔɔ-nuu.

³E kɔ̀ a gɛɛ e Zîsɛ kaa, kɛ́lɛ, ve pɔ̂ri ni gbɔŋ mɛni ma. Kpɛ́ni fêi, e kɛ̀ a núu kpua.

⁴Nya ƃe e kirɛ sìɣe tuɛ-pere, e tɛ sakimo-wurii su a gɛɛ e gáa. Kpɛ́ni fêi, Zîsɛ e kɛ̀ pâi tɛɛ̂i a naa-pere.

⁵Tãi Zîsɛ e pà la naai, e ŋ̀ɛi tɛ̀ ɣelêi, e m̀ó ma, ǹyɛɛi, “Zakîɛ, pîlaŋ a maa felaa; kpɛ́ni fêi, fɛ̂ɛ ŋa sâa tua ípɛrɛi lá.”

⁶Nya ƃe e pîlaŋ a maa felaa, e ǹyée sée mù a lii-nɛ̃ɛ.

⁷Díkɛɛ da gáai, díkelee dí díŋuŋ su sàa, dîyɛɛi, “A lí a gɛɛ é kɛ́ a sɔnyɔ̂ŋ-nuu ŋɔŋɔ̃ya.”

⁸Nya ƃe Zakîɛ e mu siɣe e m̀ó Kúnuu-namui ma, ǹyɛɛi, “Gáa, Kúnuu-namui, ŋa pâi ŋ́gɔ̃liŋ gbûra tɛɛ̂i gôlo-ƃelai pɔ; à kɛ̀ ŋà sɛŋ da kula núu ma a wôya-pere, ŋa pâi bɔɔ-too tɛɛ̂i pôlu náaŋ.”

⁹Zîsɛ e mò ma, ǹyɛɛi, “Ƃálo-laa a sâa pá bɛ́rɛi ŋi lá. Kpɛ́ni fêi, gáa máŋ a Eberaɣɛ̃ɛ ǹóŋ da.

¹⁰Kpɛ́ni fêi, núu-kpune Ǹóŋ e pà a gɛɛ e díkɔ̂ri, e díƃalo, diai kɛ̀ a dílaŋɔɔ̂i.”

¹¹Díkɛɛ díwoli tɔɔ̂i mɛni-ŋai ŋí mai, Zîsɛ è pɛ̀lɛ sã́ŋ sɔ̂ɔ ma dîa, kpɛ́ni fêi, è kɛ̀ a ǹɛɣɛɛ nâa Zerusâlɛŋ, è kɛ̀ ŋɔ́nɔ díkili ŋá a gɛɛ Ɣâla ŋɔkâloŋ-laai è kɛ̀ pâi lɛ̂i a maa félaa.

¹²Maa-mɛni ƃe e mò la, ǹyɛɛi, “Laa-maa-nuu tɔnɔ ƃe lì lɔii kôya su a gɛɛ dí gɛ a kâloŋ kɛ́tɛ e pa ŋɔ́nɔ pôlu.

¹³E ǹyee-mu-ƃelai buu tôli, e pãi puu tɛ̀ɛ dípɔ, ǹyɛɛ dîa, ‘Ka káyee pene zu e lɛɛ zu ŋa pa pôlu.’

¹⁴Kɛ́lɛ, ŋɔlɔii-su-ƃelai dí gbɔ̀ara, dí kela-ŋa tɛ̀ɛ dí pìlaŋ bôlu a gɛɛ dí m̀ó, dîyɛɛ, ‘Kúfe ŋ̀wɛ̂lii nalôŋ ŋi é kɛ́ a kâloŋ kúmɛi.’

¹⁵“Nya ƃe e kɛ̀ ti, tãi e pà la pôlu, gɛɛ a kâloŋ, e ǹyée-mu-ƃelai tôli nyii-ŋai e zɛŋ-kaoi tɛ́ɛ dípɔi a gɛɛ e gáa berei da díyee pene la zui.

¹⁶Ǹúui duɛ-tuɛi e pà bɔ e m̀o, ǹyɛɛi, ‘Ńâmu, ípãu a pãi puu kɛ́.’

¹⁷Nya ƃe e mò ma, ǹyɛɛi, ‘Ya gɛ́ a ǹɛ́lɛɛ, yée-mu-nuu lɛ́lɛɛ! Kpɛ́ni fêi, ya tenîŋ-mo kɛ́ mɛni-loŋ su, wala-wala-laa a pâi kɛ̂i íyeêi taa puu mɛi.’

¹⁸Ǹúui veerɛi e pà, ǹyɛɛi, ‘Ńâmu, ípãu a pãi lɔ́ɔlu kɛ́.’

¹⁹Nya ƃe e mò ma, ǹyɛɛi, ‘Ya pâi kɛ̂i taa lɔ́ɔlu mɛi.’

²⁰E kɛ̀ ti gbeli e pà, ǹyɛɛi, ‘Ńâmu, ípãu ká nyii ŋá màa gbìniŋ a seɣe, ŋá ǹáâi kɛ̂i.

²¹Kpɛ́ni fêi, ŋa kɛ̀ yáôi yâ berei íkaa la a ǹúui ŋɔmɛni kpanaŋɔɔ̂i; ya zɛŋ sîɣe naa nyii ífe ǹáa ni naai, íkɛ zí-sɛŋ ƃá kula ŋá nyii ífe zí ni.’

²²È mò mà, ǹyɛɛi, ‘Íkpɔɔi lá-wooi ƃe ŋa pâi ímɛnii ŋá têei la, wúlu-yee-mu-nuu! Íkɛ a gɔ́lɔŋɔɔ a gɛɛ ŋ́gaa a ǹúui ŋɔmɛni kpanaŋɔɔ̂i, ŋ́gɛ zɛŋ sîɣe naa nyii ḿve ǹáa ní naai, ŋ́gɛ zí-sɛŋ ƃá kula ŋá nyii ḿve zí níi.

²³Le ƃe kɛ̀ ífe ŋásɛŋ-kaoi pu ní zɛŋ-kao-laai kɛ́ pɛrɛi kú a gɛɛ tãi ŋà pà la pôlu, ŋá zɔlɔ ƃó bɛlɛɛ geni ma ŋɔ́nɔ?’

²⁴Nya ƃe e mò diai kɛ̀ tɔɔ ni nâa kɔlɛ mai, ǹyɛɛi, ‘Ka ŋɔpãŋ kúla ǹyêei. Ka dɛɛ nalôŋ pɔ nyii pãi puui káa ǹyêei.’

²⁵Nya ƃe dí mò ma, dîyɛɛi, ‘Ńâmu, pãi puu káa ǹyêei!’

²⁶È mò dîa nyɛɛ, ‘Ŋá m̀ó kâa, ǹúui sɛŋ da káa ǹyêei, nya ƃe da a pâi tɛɛ̂i bɔ. Kɛ́lɛ, ǹúui sɛŋ da fe ǹyêei, ǹyaa ƃe ŋɔi ǹyée ŋái da pâi gulâi ǹyêei.

²⁷Kɛ́lɛ, diai a ŋ́gbɔara-ƃelai dífe kɛ́ ni ŋ̀wɛ̂lii a gɛɛ ŋa kɛ́ dímɛi, ka pá a dîa, ka dípaa ŋ́ɛi.’ ”

²⁸Gɛɛ a nyíŋi ƃói, e lì dítuɛ Zerusâlɛŋ.

²⁹Nya ƃe e kɛ̀ ti, tãi nâa e sèri la Bɛfazi da Bɛtɛni ǹyéei kɔlɛ da dòli a Ŋulɔ-wuru-yeei, e ŋɔpôlu-ƃelai veerɛ tɛ̀ɛ, ǹyɛɛi,

³⁰“Ka lí gbanâŋ lá kátuɛ-pere. Kà sèri naa, ka pâi wɛlɛ-sôo-loŋ kâai gbulɔ̂ŋɔɔ naa nyii núu da fé niî wɔ́lɔ see ni bôlui; ka vúloŋ, ká pá la ƃɛ.

³¹À kɛ̀ núu da à kámarê kɛ̀, ǹyɛɛi, ‘Le ƃe kɛ̀ ka vúlonîi?’ Ka pâi nyíŋi ƃôi kâai, ‘Kúnuu-namui a ŋ̀wɛ́li kɛ̂i.’ ”

³²Nya ƃe, diai e dítɛ̀ɛi, dí lì, dí gáa kpɔ́ nɔ yɛ̂ɛ berei e mò la diai.

³³Díkɛɛ kɛ̀ ŋwɛlɛ-sôo-loŋ fúlonîi, namela dí mò dîa, dîyɛɛi, “Le ƃe kɛ̀ ka ŋwɛlɛ-sôo-loŋ fúlonîi?”

³⁴Nya ƃe dí mò, dîyɛɛi, “Kúnuu-namui a ŋ̀wɛ́li kɛ̂i.”

³⁵Dí pà la Zîsɛ pɔ. Dí díseɣe-ŋai pu ŋwɛlɛ-sôo-loŋ pôlu, dí Zîsɛ see mɛi.

³⁶Gɛɛ liî, dí díseɣe-ŋai pɛ̂lɛ berei ma.

³⁷Nya ƃe gɛɛ a lɛɣɛ, gɛ Ŋulɔ-wuru-yeei yeŋ, ŋɔpôlu-ƃela kpɔŋ kélee dí pɛ̀lɛ lii-nɛ̃ɛ kúlaa ma, díkɛ Ɣâla láa maa tɛ a láɣi-woo, berei dí ŋwála-wala-tii kpaya-kpaya-ŋai kélee kàa lai.

³⁸Díyɛɛi, “Lûwa káa gâloŋ ma nyii pà Kúnuu-namui láai sui! Lii-see é kɛ́ Ɣâla-taa, laa-maa-tɛ é kɛ́ ɣelei-pere póŋ-póŋ!”

³⁹Nya ƃe Faresii-ŋai dí kɛ̀ gbɔŋ sui, da-ni dí mò ma, dîyɛɛi, “Kaamɔ̂ɔ, m̀ó ípôlu-ƃelai dîa dí kpera.”

⁴⁰E zu tòo, ǹyɛɛi, “Ŋá m̀ó kâa, à kɛ̀ nyii-ŋai ŋi da kɛ̀ a dímɛi saa, gɔni-ŋai kpîŋ da pâi lâɣii.”

⁴¹Gɛɛ a lɛɣɛ, gɛ daai kaai, e wɔ̀lɔ a gbanaŋɔɔ daai mɛi,

⁴²ǹyɛɛi, “Eêi kɛ̀ kpîŋ îi gɔlɔŋ íɣelêi ŋi su le-mɛni-ŋa ƃa lii-sêe kɛ̀! Kɛ́lɛ, loníi ma ǹoɔɔ̂i íŋɛi.

⁴³Kpɛ́ni fêi, ɣele-ŋa da pâi pâi yâ tãi íkpɔara-ƃela da pâi gala tɔɔ̂i la dí dínâŋ yâ, dí ímaa tinaŋ dí bîlaŋ gîei, dí íkɛ naa ífa pɔ̂ri kulâi,

⁴⁴dí ítoo ǹɔii ma da ínîa-pɛlɛɛi ígarai su, dífe pâi ísu kɔni tɔnɔ kpîŋ lɛɛ̂i laa ni gîe mɛi. Kpɛ́ni fêi, ífe niî ínaa-kaa-tãi kɔlɔŋ ni.”

⁴⁵Nya ƃe è lɔ̀ Ŋ̀âla-pɛrɛ Kɛ́tɛi mu, é pɛ́lɛ ǹûai kpɛ́ɛ ma kɛ̀ pɔni tɔɔ̂i naai,

⁴⁶ǹyɛɛ dîa, “Bɔ̃yɛɛ̂i, ‘Da pâi ŋápɛrɛi kɛ̂i a Ɣâla-fɛli-pɛrɛ’; kɛ́lɛ, ka gɛ́ a ŋuma-ƃela-kɛi.”

⁴⁷Nya ƃe e kɛ̀ Ɣâla-woo lɛ̂i Ŋ̀âla-pɛrɛ Kɛ́tɛi mu a ɣele kélee. Zâla láa soŋ-ƃela kpaya-kpayai da gɔlɔ-pɔ̃yɛ-ƃelai, bɛlɛɛ ǹɔii-namelai dîa, dí kɛ̀ bàa-pere kɔ́rîi;

⁴⁸kɛ́lɛ, dífe pere kélee da kaa ni dí gɛ la, kpɛ́ni fêi, ǹûai kélee dí kɛ̀ ŋ̀óo pôlu.