Read Kpelle Lûu 2 Bible Online

Lûu 2 - Kpelle bible

Lûu 2

¹Nya ƃe e kɛ̀ ti, ŋele-ŋai ti su Gâloŋ Siizɛ Agɔtɔɔ e tɔ̂ŋ tɛɛ a gɛɛ dí ǹûai láa siɣe ǹɔii gwaa kélee ma.

²Ǹûai láa siɣɛɛ duɛ-tuɛi ká kɛ̀ ŋi tãi Kɔrinia e kɛ̀ la a gɔmɛnɛ-nuui Siria-lɔii sui.

³Nya ƃe, ǹûai kélee dí lì díkpɔɔ̂i taa-ŋai su tɛi-tɛi a gɛɛ dí dílaa siɣe.

⁴Zosɛ máŋ e kùla Nâzarɛ Galalii-lɔii su, e li Deeƃé ŋɔtaai su da dòli a Bɛpeleɣɛ̃ɛ, Zuda-lɔii sui, kpɛ́ni fêi, è kɛ̀ a Deeƃé ŋɔpɛ́rɛi-mu-nuu da, gɛ ƃo ŋɔnɔ a ŋɔkaayɔ da,

⁵a gɛɛ dí dílaa siɣe da Mere nyii dí ǹáa sèe kɛ̀ mà a gɛɛ e kɛ́ a ŋɔnɛnîi, nyii gôo e kɛ̀ mai.

⁶Nya ƃe è kɛ̀ tí, díkɛɛ kɛ̀ naai, tãi è sèri a gɛɛ maa é fúloŋ.

⁷Nya ƃe m̀aa è fùloŋ a ŋɔlóŋ-surɔŋ vulɔ-fúlɔi. È seɣe-wã̂aŋ kpìniŋ la, é ǹáa kala kpâla ŋá niŋa laa-mii-gãla su. Kpɛ́ni fêi, dílaâi fé kɛ́ ni naa ŋɔ̃yâ-laa-pɛrɛi mu.

⁸Ǹɔii ti su ƃála mɛi-kaa-ƃela dí kɛ̀ naa, díkɛ díƃala-ŋai mɛi kaa vieŋ ŋá a kpini.

⁹Nya ƃe Kúnuu-namui ŋɔkéla e kùla díkɔlɛ, Kúnuu-namui ŋɔfólo-laai e díkɔlɛ ma pòno. Dí yào kpɔ a dámaa.

¹⁰Nya ƃe Ŋ̀âla-taa-kelai e mò dîa, ǹyɛɛi, “Káfe yào, kpɛ́ni fêi, ka gáa, ŋa pá kápɔ a tuŋ lɛ́lɛɛ e pîlaŋ lii-nɛ̃ɛ kɛ́tɛ ma nyii pâi kɛ̂i ǹûai kélee mɛni mai,

¹¹kpɛ́ni fêi, sâa da Káƃalo-nuui maa sɔlɔ ƃó Deeƃé ŋɔtaai su, nyii gáa a Kôrai, Kúnuu-namui.

¹²Nyíŋi káa a ŋɛi-kɛ́-maa káyêei: ka pâi ǹôloŋ kâai seɣe-wã̂aŋ kpíniŋɔɔ la, gɛ́ ƃò laa-ni kala kpâla ŋá niŋa láa-mii-gãlai su.”

¹³A ǹaa maa félaa kpɔ́ Ɣâla-taa-kela kpɔŋ kɛ́tɛ e pà Ŋ̀âla-taa-kelai pɔ, díkɛ Ɣâla láa maa tɛ, dîyɛɛi,

¹⁴“Laa-maa-tɛ é tɛ́ Ɣâla pɔ ɣelêi-pere póŋ-póŋ. Lii-see é kɛ́ ǹûai sama ǹɔii ma diai ǹíi lâai dímɛni mai!”

¹⁵Nya ƃe e kɛ̀ ti, Ŋ̀âla-taa-kela-ŋai kɛ́ɛ da dílɛɛ naa da lí Ɣâla-taai, m̀ála mɛi-kaa-ƃelai dí mò díkîe-ni dîa, dîyɛɛi, “Ka pá kwaa li Bɛpeleɣɛ̃ɛ a gɛɛ ku mɛnii ŋi káa a kɛ̂i nyii Kúnuu-namui a ǹɛ́ kûai.”

¹⁶Nya ƃe dí lì a maa felaa, dí Mere da Zosɛ kaa, bɛlɛɛ gwâtarai ma gɛ ƃo laa ni kala kpala ŋá niŋa laa-mii-gãla su.

¹⁷Díkɛɛ da gáai, dí mɛnii ƃò nyii ƃò dîa e pîlaŋ ǹôloŋ mai.

¹⁸Ǹûai kélee mɛnii dípɛlɛ e pù e pîlaŋ mɛnii ma m̀ála mɛi-kaa-ƃelai dí mò diai.

¹⁹Kɛ́lɛ, Mere e ŋ̀óo-ŋai ŋi kélee lâai kɛ̀, gɛ gíli ŋá sia ǹíi su e pîlaŋ dîa.

²⁰Nya ƃe m̀ála mɛi-kaa-ƃelai dí pène pôlu. Dí kɛ̀ Ɣâla ŋɔfólo-laai maa tɛ̂i, díkɛ ǹáa maa tɛ mɛni-ŋai kélee mɛni ma dí mɛ̀ni, dí gáa, yɛ̂ɛ berei e ƃò la diai.

²¹Ǹyaŋ, tãi ɣele-kuu lɔ́ɔlu mɛi saaƃa e tɛ̀ɛ, díkɛɛ da kpɛɛ a gbɛ̀tɛɛ̂i, dí ǹáa sèe a Zîsɛ, ǹáai Ŋ̀âla-taa-kelai e zèe ma maa-koo e lɛɛ pâi kɛ̂i ǹee mai.

²²Tãi kɛ́ɛ a séri dímɛni ma a gɛɛ dí dímaa waa yɛ̂ɛ berei Mose ŋɔtɔ̂ŋ è mò lai, dí pà la Zerusâlɛŋ a gɛɛ dí dɛɛ Kúnuu-namui pɔ́,

²³(yɛ̂ɛ berei bɔ̃yɛɛ̂i la Kúnuu-namui ŋɔtɔ̂ŋ sui, ǹyɛɛi, “Lóŋ-surɔŋ vulɔ-fulɔi kélee a koo-ƃɔlɔŋ lá ƃôi da pâi dólîi a maa waa Kúnuu-namui mi”)

²⁴a gɛɛ dí sâla kula yɛ̂ɛ berei e ƃò la Kúnuu-namui ŋɔtɔ̂ŋ sui, ǹyɛɛi, “Tòloŋ-sirɛ pɛlɛɛ zaa ma à wàla kɛ́ ti, popo-lonii feerɛ.”

²⁵Nalôŋ tɔnɔ ƃe kɛ̀ naa Zerusâlɛŋ, ǹáa ƃe kɛ̀ a Simiɔŋ, nyii kɛ̀ a sɔŋ-lɛlɛ-nuu, gɛ ƃo a Ɣâla mɛni wɛliɛ, nyii kɛ̀ Eezuɛ ŋá-nɛnɛ-ɣele maa kpɛ̂nii. M̀ɔlêŋ Maa Waai e kɛ̀ mɛ̀i.

²⁶Nya ƃe M̀ɔlêŋ Maa Waai e nɛ̀ ma a gɛɛ ve pâi saâi e lɛɛ zu e Kúnuu-namui Ŋɔkôrai kaa.

²⁷Ǹyaŋ M̀ɔlêŋ Maa Waai e lì la Ŋ̀âla-pɛrɛ Kɛ́tɛi mu. Tãi ǹee da ǹâŋ dí pa kɛ̀ a ǹôloŋ Zîsɛ a gɛɛ dí mɛnii kɛ́ mì yɛ̂ɛ berei dɔ̂ŋ-kɔlɔi è mò lai,

²⁸è ǹôloŋ lâa ǹyée-tɔ̃ɔi, é lûwa tôo Ɣâla ma, ǹyɛɛi,

²⁹“Kúnuu-namui, ya nâa ǹɛɛ̂i naa íyee-mu-nuui é lí lii-sêe su yɛ̂ɛ berei íwoôi káa lai,

³⁰kpɛ́ni fêi, ŋ́ɛi a íƃalo-laai káa,

³¹nyii ya gbɛtɛ ǹûai kélee ŋɛi.

³²Gáa a kwaa-ponoɔ a gɛɛ e Zɛ̃tai-ŋai ŋɛi lá ƃó. Gáa a folo-laa ínûai Eezuɛ-ŋai mɛni ma.”

³³Nya ƃe ǹâŋ da ǹee dípɛlɛ e pù a mɛni-ŋai ƃò e pîlaŋ mai;

³⁴Simiɔŋ e lûwa tòo dîa, ǹyɛɛ ǹee Mere ma, “Gáa, ǹôloŋ ŋi seɛɛ̂i Eezuɛ-ŋai dámaa-ɣele too-mɛni da dímu siɣe-mɛni ma, gɛ ƃo ŋɔnɔ a ŋɛi-kɛ-maa nyii da pâi wóo nyɔ́mɔɔ ƃôi e pîlaŋ mai

³⁵(ƃóa-sɔkpɔ a pâi ƃɔ́i ímɔ̂leŋ su máŋ) a gɛɛ gili-ŋa-sia-ŋai gáa líi támaa sui é lɛ́.”

³⁶Ɣâla ŋɔlóno-kɛ-nɛni tɔnɔ ƃé kɛ̀ naa, ǹáa kɛ́ ƃò a Ana, nyii kɛ̀ a Fɛ̂nuɛ ŋɔlóŋ-nɛni, gɛ ƃo a Asɛ-sii-nuui da. E kɛ̀ nâa a bɔlɔɔ a dámaa. Da ŋɔsurɔ̂ŋ dí kɛ̀ díkîe ma a kóraŋ lɔ́ɔlu mɛi feerɛ é kúla gbela tãi ma.

³⁷E kɛ̀ nâa a pɔɔ-nɛni a kóraŋ buu lɔ́ɔlu mɛi saaƃa kao náaŋ, nyii kɛ̀ Ŋ̀âla-pɛrɛ Kɛ́tɛi mu a tãi kélee, gɛ pɛlɛ Ɣâla kɔ́ɔ mu a biliɛ suŋ su da Ɣâla-fɛliɛ kpini da foloi.

³⁸Gɛɛ pâi aƃai tí sui, è sɛɣɛi-fêi tɛ̀ɛ Ɣâla pɔ́, gɛ́ maa-mɛni ƃò dîa diai kélee kɛ̀ maa-têe-laai kɔ́rîi Zerusâlɛŋ mɛni mai.

³⁹Díkɛɛ da kpɛɛ a mɛnii kélee kɛ́ yɛ̂ɛ berei Kúnuu-namui ŋɔtɔ̂ŋ e mò lai, dí lì pôlu Galalii-lɔii su díkpɔɔ̂i-taai su Nâzarɛ.

⁴⁰Nya ƃe ǹôloŋ è ƃɔ̀lɔ, kponôi e kpanaŋ, ǹáa é fɛ́ɛ a táre; Ɣâla ŋɔƃɛlɛ-sêei é kɛ́ ma.

⁴¹Kóraŋ kélee ǹâŋ da ǹee da káa lì Zerusâlɛŋ Dɛɛ-mɛi Kûui mɛni ma.

⁴²Tãi e kɛ̀ la a kóraŋ puu kao feerɛi, dí lì gúui su yɛ̂ɛ berei da wɔlɔ gɛ̀ lai.

⁴³Gúu-ɣele-ŋai kɛ́ɛ da kpɛ̀ɛi, dí kɛ̀ liî pôlui, zurɔ̂ŋ-loi Zîsɛ e lɛ̀ɛ pôlu Zerusâlɛŋ. Ǹâŋ da ǹee dífe kɛ́ ni a gɔ́lɔŋɔɔ.

⁴⁴E kɛ̀ díkili ŋá a gɛɛ e kɛ̀ zia-ƃelai sama. Nya ƃe dí lì a ɣele tɔnɔ-sia, díkɛ gɔ̀ri ma díkaayɔ-ŋai da díƃarâa sama.

⁴⁵Kɛ́lɛ, díkɛɛ dífe gáa níi, dí pène pôlu Zerusâlɛŋ, díkɛ gɔ̀ri.

⁴⁶Nya ƃe e kɛ̀ ti, ɣele-kuu saaƃa e tɛ̀ɛ, dí gáa Ŋ̀âla-pɛrɛ Kɛ́tɛi mu, gɛ ƃo see ni dɔ̂ŋ-lɛ-ƃelai sama, gɛ ŋ̀óli tɔɔ dîa, gɛ mare-kɛɛ-ŋa kɛ̀ dîa.

⁴⁷Ǹúui kélee ŋ̀óo mɛnii, dípɛlɛ è pù é pîlaŋ ŋɔtárei ma da ŋɔmɛni su-too wóo-ŋai ma.

⁴⁸Díkɛɛ da gáai, dípɛlɛ è pù. Ǹee ǹyɛɛ mai, “Ǹóŋ, le ƃe kɛ̀ ya tûa a kûa a gɛɛ ŋi? Gáa, kwa ínâŋ ku kɛ̀ íkɔrîi a lii-sɛlɛŋ.”

⁴⁹Kɛ́lɛ, è mò dîa, ǹyɛɛi, “Le ƃe kɛ̀ ka ŋ́gɔrîi? Káfe gɔlɔŋ fɛ̂ɛ ŋa kɛ́ Ńâŋ ŋɔpɛ́rɛi mu?”

⁵⁰Nya ƃe dífe táre ni ŋ̀óoi su e mò diai.

⁵¹Gɛɛ ti, da dîa-ni dí lì, dí pa Nâzarɛ, gɛ díwoo siɣe. Kɛ́lɛ, ǹee e ŋ̀óo-ŋai ŋi kélee lâai kɛ̀ ǹíi su.

⁵²Nya ƃe Zîsɛ ŋɔtárei su è kɛ̀tɛ da ŋɔkóraŋ, da ŋɔƃɛlɛ-sêei Ɣâla da ǹûai ŋ́ɛi-tuɛ.