Read Kpelle Lûu 23 Bible Online

Lûu 23 - Kpelle bible

Lûu 23

¹Gɛɛ tí, gbɔŋ kélee dí dímu sìɣe dí pa la Pâle pɔ naa.

²Nya ƃe dí pɛ̀lɛ mɛni lɛɛ̂i ma, dîyɛɛi, “Ku nalôŋ ŋi kàa gɛ kúsîi-ŋai kɛ̀ a gɛɛ dí tɔɔ gɔmɛnɛi ma. Gɛ mò dîa a gɛɛ dífe ŋuŋ-fela-fei tɛɛ Gâloŋ Siizɛ pɔ, gɛ mo, ǹyɛɛ a gɛɛ ǹyaa kpîŋ ƃa Kôrai nyii gáa a kâloŋ.”

³Nya ƃe Pâle e m̀arê kɛ̀, ǹyɛɛi, “Yá ƃa Zûu-ŋai Díkâloŋ?” E ŋ̀óo su tòo, ǹyɛɛi, “Yâa m̀ó.”

⁴Pâle e mò zâla láa soŋ-ƃela kpaya-kpayai da ǹûai dîa, ǹyɛɛi, “Fe mɛni nyɔ́mɔɔ da káa ni nalôŋ ŋi kponôi.”

⁵Kɛ́lɛ, dí mò a zu kɛtɛ-pere, dîyɛɛi, “Gáa ǹûai kɛ̂i wúlee a ŋɔsɛŋ-lɛɛi Zuda-lɔii kélee su, e gɔ́ɔ pîlaŋ Galalii, e seri máŋ la ƃɛ.”

⁶Tãi Pâle e mɛ̀ni lai, è mare-kɛ̂ɛ kɛ̀ à kɛ̀ nalôŋ è kɛ̀ a Galalii-nuu.

⁷Gɛɛ a gɔ́lɔŋ a gɛɛ e kɛ̀ a Ɛɛlɔ ŋɔlɔii-ma-nuu dai, e dɛ̀ɛ Ɛɛlɔ pɔ naa nyii kɛ̀ Zerusâlɛŋ a maa-tãi ti.

⁸Tãi Ɛɛlɔ e Zîsɛ kàa lai, ǹíi e kɛ̀ a nɛ̃ɛ a dámaa. Kpɛ́ni fêi, e kɛ̀ ŋ̀wɛ̂lii e gáa a tãi su kôya, berei e mɛni támaa mɛni la e pîlaŋ mai. Gíli e kɛ̀ ma a gɛɛ a pâi ŋɔmɛni-kpaya-kpaya kɛ́ɛ kâai.

⁹Gɛɛ ti, e mare-kɛɛ támaa pu ma; kɛ́lɛ, ve zu too ni.

¹⁰Nya ƃe zâla láa soŋ-ƃela kpaya-kpayai da gɔlɔ-pɔ̃yɛ-ƃelai dí tɔɔ gɔlɛ, díkɛ mɛni lɛɛ ma a gbanaŋɔɔ.

¹¹Nya ƃe Ɛɛlɔ da ŋɔǹɔii maa kpɛ́-ƃelai dí kɛ̀ tuâi la a ƃaa-kula-maa-pere, díkɛ ɣɛlɛ-maa kula zu. Dí yokpo lɛ́lɛɛ ŋánaa tòo gɔŋ ma, dí dɛɛ pôlu Pâle pɔ naa.

¹²Maa-ɣelei ti Ɛɛlɔ da Pâle dí nɛ̀ɛ a díkîe. Kpɛ́ni fêi, nyiŋi e lɛɛ pâi kɛ̂i dí kɛ̀ a díkîe-ni kpɔaraa.

¹³Pâle è zâla láa soŋ-ƃela kpaya-kpayai da gɔmɛnɛ-ƃelai tôli díkîe ma da ǹûai.

¹⁴È mò dîa, ǹyɛɛi, “Ká pà a nalôŋ ŋi ḿbɔ, káa a ǹûai kɛ̂i díkɛ tɔɔ gɔmɛnɛi ma; kɛ́lɛ, ka gáa, ŋaâ zu kɔɔŋ káŋɛi tuɛ, fé mɛni nyɔ́mɔɔ kaa ni nalôŋ ŋi kponôi e pîlaŋ la mɛnii kélee ma ka nɛ ḿâi;

¹⁵Ɛɛlɔ fulɔi máŋ fé gáa ni, kpɛ́ni fêi, e dɛ̀ɛ pôlu kúpɔ. Ka gáa, ve mɛni nyɔ́mɔɔ da kɛ́ ni a gɛɛ e zu-saa kɛ́;

¹⁶maa-mɛni ma, ŋa pâi ǹókwâi ŋa tee ma.” [

¹⁷Nya ƃe e nâa kɛ̀ ti, fɛ̂ɛ e tee pelesinɛ tɔnɔ ma, e dɛɛ dípɔ a gúui ŋele.]

¹⁸Kɛ́lɛ, díkelee dí làɣi a gîe, dîyɛɛi, “Ka lí a nalôŋ ŋí, í tee Barâƃa ma í dɛɛ kúpɔ!”

¹⁹Dí Barâƃa ŋí pìli kpini-pɛ̂rɛ mu kpɛ́ni fêi è kɔ̀ gɔmɛnɛi pɔ́ daa-leei su da núu paa-mɛ̂ni.

²⁰Pâle e lòno dípɔ ŋɔ́nɔ, gɛ ŋ̀wɛli a gɛɛ e tee Zîsɛ ma;

²¹kɛ́lɛ, dí kɛ̀ nɔ lâɣii ma, dîyɛɛi, “Gba-mo saa-wuru ma, gbamo saa-wuru ma!”

²²Zaaƃa-tãi e mò dîa, ǹyɛɛi, “Le-mɛni ma? Le-mɛni nyɔ́mɔɔ ƃe e gɛ̀? Fe niî mɛni nyɔ́mɔɔ kélee da kaa ni gbonôi nyii fɛ̂ɛ e saa zu; maa-mɛni ma, ŋa pâi ǹókwâi ŋa tee ma.”

²³Kɛ́lɛ, dí kɛ̀ kpɔ nɔ bôlu a gbanaŋɔɔ a laɣi-woo a gɛɛ e gbamo saa-wuru ma. Díwoo-ŋai e ŋ̀ɔi mɛi ɣâle.

²⁴Gɛɛ tí, Pâle è m̀ɛnii têe a gɛɛ m̀ɛnii dí kɛ̀ ŋ̀wɛ̂lii é kɛ́i, é kɛ́.

²⁵È tèe ǹalôŋ ma dí marê kɛ̀ m̀ɛni ma, nyii dí bìli kpini-pɛrɛ mu, gɛɛ kɔ̂i gɔmɛnɛi pɔ da ǹúu-paa-mɛni mai; kɛ́lɛ, è Zîsɛ tɛ̀ɛ dípɔ a gɛɛ dí dínîa-mɛni kɛ́ la.

²⁶Nya ƃe díkɛɛ liî a Zisɛi, dí Sailini naloŋ Samaŋ soŋ, nyii kɛ̀ kulâi gbâlaŋ ŋái, dí zaa-wurii láa gâraŋ ŋá a gɛɛ e pîlaŋ la Zîsɛ pôlu.

²⁷Nya ƃe kpɔŋ kɛ́tɛ e pîlaŋ bôlu, da nɛyaa nyii-ŋai kɛ̀ díkeŋei tuâi, díkɛ gbeɣêi too m̀ɛni mai.

²⁸Kɛ́lɛ, Zîsɛ e tìnaŋ dípɔ e m̀o dîa, ǹyɛɛi, “Zerusâlɛŋ-loŋ-nɛni-ŋa, káfe wɔlɔ ḿɛni ma. Kɛ́lɛ, ka wɔlɔ kákpîŋ kámɛni ma da kánîa-pɛlɛɛi.

²⁹Kpɛ́ni fêi, ka gáa, ŋele-ŋai káa pâi tãi da pâi m̀ôi, dîyɛɛi, ‘Lûwa káa gboma-ƃelai dîa da gôo-ƃɔlɔŋ-ŋai dífe niî loŋ sɔlɔ ƃo níi, da ŋini-ŋai lóŋ fe niî gbele níi.’

³⁰Maa-tãi ti da pâi pɛlɛɛ̂i m̀óɔ ma ǹyée kpaya-kpayai dîa, dîyɛɛi, ‘Ka too kûa’; da ǹyée pɛlɛɛ-ŋai dîa, dîyɛɛi, ‘Ka kúmɛi pɛ́lɛ.’

³¹Kpɛ́ni fêi, à kɛ̀ dí nyiŋi kɛ̀ a ŋ̀úru ŋunii, le ƃe pâi kɛ̂i a ŋ̀úru kpalai?”

³²Dí lì a tɔ̂ŋ-kara-ƃela feerɛ máŋ a gɛɛ da dîa-ni dí dípaa.

³³Tãi dí sèri la gwaai ma da kɛ̂ ma Ŋuŋ-konoŋ-kwaai mai, dí gbamo naa zaa-wurii ma, bɛlɛɛ dɔ̂ŋ-kara ƃelai dia máŋ, dɔnɔ kɛ́ ƃo ǹáa-mii-yee mɛi-pere, gbeli e ƃo gɔɔ-yee mɛi-pere.

³⁴Nya ƃe Zîsɛ e mò, ǹyɛɛi, “Ńâŋ, dísu-mɛni lɛɛ; kpɛ́ni fêi, dífe mɛnii kɔ́lɔŋ da gɛ̂i.” Dí ŋɔseɣei ŋá kɔ̀lɛ kpɛɛŋ su.

³⁵Nya ƃe ǹûai dí kɛ̀ tɔɔ ni gɔlɛ, díkɛ naa kaa. Gɔmɛnɛ-ƃelai máŋ dí kɛ̀ ɣɛ́lɛ-maa kulâi zu, dîyɛɛi, “E núu da kpɛni-ŋa ƃàlo; à kɛ̀ gáa a Kôrai nyii kulâi Ɣâla yêei, Ŋɔsu-ɣɛɛ-nuui, ǹɛɛ naa é gbîŋ ƃálo!”

³⁶Gɔkuluƃa-ŋai máŋ dí kɛ̀ ɣɛ́lɛ-maa kulâi zu, dí pa a lɔɔ-kpona a gɛɛ dí dɛɛ bɔ.

³⁷Díyɛɛi, “À kɛ̀ íkaa a Zûu-ŋai Díkâloŋ, íkpîŋ ƃalo!”

³⁸Kɔlɔ-pɔ̃yɛɛ e kɛ̀ ŋuŋ mɛi-pere, ǹyɛɛ, “Zûu-ŋai Díkâloŋ ká ŋi.”

³⁹Dɔ̂ŋ-kara-nuui dɔnɔ nyii kɛ̀ sɛ́lɛnîi naai, e laa-kara-woo ƃo mà, ǹyɛɛi, “Kɛrɛ̂e, yá ƃa Kôrai? Íkpîŋ ƃálo bɛlɛɛ kûa!”

⁴⁰Kɛ́lɛ, ǹúui gbeli e ǹia-woo ƃò, ǹyɛɛi, “Ífe máŋ yáôi Ɣâla ma, íkɛ gáa a gɛɛ íkaa mɛni-lɛɛ maa-laa tɔnɔi ti su?

⁴¹Zã́âi kúmɛni ma; kpɛ́ni fêi, kúkaa kúsɔŋ ŋɔfela-fei sɔlɔ ƃôi; kɛ́lɛ, nalôŋ ŋi fé mɛni nyɔ́mɔɔ da kɛ́ ni.”

⁴²Nya ƃe e mò ma, ǹyɛɛi, “Zîsɛ, ḿaa-mɛni é lɛ́ɛ íkili ŋá tãi yà pà la íkâloŋ-laai sui.”

⁴³E mò ma, ǹyɛɛi, “Tɔ̃yâ ma, ŋá m̀ó yâ, sâa kwa ya kwa pâi kɛ̂i Paredai.”

⁴⁴È kɛ̀ nâa a aƃai ǹɔ́ɔlu mɛi dai. Nya ƃe kpíni è pɛ̀lɛ ǹɔii gwaa kélee ma é lɛ́ɛ la zu aƃai ǹɔ́ɔlu mɛi náaŋ é seri,

⁴⁵vóloi ŋɔkwaa-ponoɔi é fɛ̀ɣɛ. Ŋ̀âla-pɛrɛ Kɛ́tɛi mu-seɣei e nâa ƃela zamai.

⁴⁶Nàa kɛ́ɛ ti, Zîsɛ e làɣi a ŋ̀óo kɛ́tɛ, ǹyɛɛi, “Ńâŋ, ŋa ŋámɔ̂leŋ tɛ́ɛ ípɔ!” Gɛɛ a nyiŋi ƃói, e nɛ̃wo gbɛɛ ŋái too.

⁴⁷Tãi gɔkuluƃa-ŋai mɛi nuui e mɛnii ŋi kàa la é kɛ́i, e laa-maa-tɛ tɛɛ Ɣâla pɔ, ǹyɛɛi, “Tɔ̃yâ ma, nalôŋ ŋi e kɛ̀ a tɔ̃yâ-nuu!”

⁴⁸Gbɔŋ kélee kɛ́ɛ a pá gîe-ma a gɛɛ dí naa kaai, dí kɛ̀ liî a díkeŋe lá tua tãi dí mɛnii ŋi kàa la é kɛ́i.

⁴⁹Kɛ́lɛ, ǹúui kélee kɛ̀ a gɔlɔŋɔɔi, bɛlɛɛ nɛyâai dîa nyii-ŋai kûla Galalii-lɔii sui, dí pìlaŋ bôlui, dí tɔ̀ɔ kwaa kôya ma, díkɛ mɛnii ŋi kaa.

⁵⁰Nalôŋ tɔnɔ e kɛ̀ naa, ǹáa ƃe kɛ̀ a Zosɛ, nyii kûla Zûu-ŋai dítaai su da kɛ̂ ma Alimatîai. E kɛ̀ a goyâŋ su-nuu da. E kɛ̀ a nuu lɛ́lɛɛ, gɛ ƃo a tɔ̃yâ-nuu.

⁵¹Ve faa ni díŋuŋ pìlaŋ su-wooi ma da mɛnii dí gɛ́i. E kɛ̀ Ɣâla ŋɔkâloŋ-laai kɔ́rîi.

⁵²Nalôŋ ŋi e lì Pâle pɔ, e m̀arê kɛ́ Zîsɛ pomai mɛni ma.

⁵³Nya ƃe e gula, e m̀aa kpiniŋ a seɣe kole, e ǹáa ƃolôŋ su nyii dí dèe kɔni kɛ́tɛ su ƃɛi poma da fé niî wɔ́lɔ laa ni naai.

⁵⁴E kɛ̀ a Zãâ kpɛtɛ-ɣelei, nya ƃe Vii-tɔɔ-ɣelei gɔ́ɔ e kɛ̀ pîlanii.

⁵⁵Nɛyâai da dîa-ni dí kûla kɛ̀ Galalii-lɔii su dí lɛɛ bôlui, dí molôŋ kàa da berei bomai e kɛ̀ laa ni lai;

⁵⁶gɛɛ ti, dí lì pôlu, dí wée-fũa-ŋa da wuru-ya kúŋ nɛ̃ɛ-ŋa kpɛtɛ. Dí dífii tɔ̀ɔ a Vii-tɔɔ-ɣelei yɛ̂ɛ berei dɔ̂ŋ e mò lai.