Read Kpelle Lûu 4 Bible Online

Lûu 4 - Kpelle bible

Lûu 4

¹Zîsɛ e kùla Zɔdiŋ Ya-Leei ma e pene pôlu, ǹáa fɛ̂ɛ a M̀ɔlêŋ Maa Waai. Nya ƃe M̀ɔlêŋ e lì la vɛ̃ɛ-kpâlaŋ su.

²E gɛ̀ naa a ɣele-kuu buu náaŋ, Dɛ̂ƃele kɛ́ zu kɔɔŋ. Maa-ɣele-ŋai ti su Zîsɛ fé sɛŋ da mii ni. Díkɛɛ da kpɛɛi, puru e gɛ̀.

³Nya ƃe Dɛ̂ƃele e mò ma, ǹyɛɛi, “À kɛ̀ íkaa a Ɣâla Ǹóŋ, gɔnii ŋi kɛ́ e pene a kpólo.”

⁴Zîsɛ e ŋ̀óo su tòo, ǹyɛɛi, “Bɔ̃yɛɛ̂i, ‘Núu fa ŋɔfúlu-laai kɛ̀ nɔ kpólo mii-mɛni ma.’ ”

⁵Gɛɛ ti, dɛ̂ƃele è zìɣe e tɛ la ɣelêi, e ŋ̀éniɛi su-kaloŋ-laai kélee lɛ ma a naa maa felaa a tãi tɔnɔ,

⁶nya ƃe Dɛ̂ƃele e mò ma, ǹyɛɛi, “Ŋa pâi ŋwála-wala-laai ŋi kélee tɛɛ̂i ípɔ bɛlɛɛ dífolo-laai ma, kpɛ́ni fêi, dɛɛ̂i ḿbɔ, ǹyaŋ, ǹúui kélee ŋa ŋ̀wɛli ŋa dɛɛ bɔi, ŋa dɛ̀ɛ bɔ.

⁷À kɛ̀ yà pɛ̀lɛ ŋ́gɔɔ mu, gélee a pâi kɛ̂i a ípɔɔ.”

⁸Zîsɛ e ŋ̀óo su tòo, ǹyɛɛi, “Bɔ̃yɛɛ̂i, ‘Ínuu-namui Ɣâla fɛli í tíi kɛ́ nɔ mì ǹyaa tɔnɔ.’ ”

⁹Gɛɛ ti, e lì la Zerusâlɛŋ, é zee kpɔ́ Ŋ̀âla-pɛrɛ Kɛ́tɛi tôŋ su póŋ-póŋ, ǹyɛɛ mai, “À kɛ̀ íkaa a Ɣâla Ǹóŋ, kula í too,

¹⁰kpɛ́ni fêi, bɔ̃yɛɛ̂i, ‘A pâi ŋɔkéla-ŋai tɛɛ̂i ípɔ a gɛɛ dí ímɛi kaa.’

¹¹Bɔ̃yɛɛ̂i ŋɔ́nɔ, ‘Da pâi díyee seêi ímu dí li a yá a gɛɛ ífa lâa íkɔɔ tua la kɔni ma.’ ”

¹²Zîsɛ e ŋ̀óo su tòo, ǹyɛɛi, “M̀ôɔi, ‘Ífe Ínuu-namu Ɣâla su kɔ̀ɔŋ.’ ”

¹³Nya ƃe, Dɛ̂ƃele kɛ́ɛ a kpɛɛ ŋɔsu-kɔɔŋ-sii kélee mai, e siɣe gɔ̀lɛ e li e lɛɛ zu e tãi lɛ́lɛɛ kaa.

¹⁴Nya ƃe Zîsɛ e pène pôlu M̀ɔlêŋ ŋɔwala-walai su, e li Galalii-lɔii su. Nya ƃe maa-tuŋ e tàa ǹɔii kɔlɛ ma gwaa kélee.

¹⁵E Ɣâla-woo lɛ̀ Díɣâla-fɛli-kêre-ŋai mu, díkelee dí ǹáa maa tɛ.

¹⁶Nya ƃe e pà Nâzarɛ ƃɛi dí wɔ́lɔ ŋ̀á kɔ̀ŋ naai. Yɛ̂ɛ berei e kâa gɛ̀ lai, e lì Ŋ̀âla-fɛli-kerei mu a Vii-tɔɔ-ɣelei. E m̀u sìɣe e tɔɔ a gɛɛ e kɔlɔ lono.

¹⁷Nya ƃe, dí Ɣâla ŋɔlóno-kɛ-nuui Azaya ŋɔkɔlɔi tɛɛ bɔ. E gɔlɔi lá ƃò, e ƃɛi kaa dí bɔ̃̀yɛ naa, dîyɛɛi,

¹⁸“Kúnuu-namui Ŋɔmɔ̂leŋ Maa Waai kaa ḿɛi, kpɛ́ni fêi, a wulɔ pu ŋ́ûa a gɛɛ ŋa tuŋ lɛ́lɛɛ ƃo gôlo-ƃelai dîa. A ńdɛɛ a gɛɛ ŋa ŋuŋ-maa ƃo-mɛni ƃo gɔ-soŋ-ŋai dîa, ŋa ŋɛi-pu-ƃelai díkwaa-kaai mɛni ƃo, a gɛɛ ŋa ǹûai ŋuŋ ma ƃó diai díkaa mɛni kpɔ̂lu sui,

¹⁹a gɛɛ ŋá Kúnuu-namui ŋɔyee-see mu-koraŋ maa-mɛ̂ni ƃó.”

²⁰Nya ƃe è gɔlɔi kpîniŋ é dɛɛ gɔlɔ mɛi-kaa-nuui pɔ́ pôlu, é sée. Ǹûai kélee kɛ̀ Ŋ̀âla-fɛli-kêrei mui, dí díŋɛi pìlaŋ mà.

²¹E pɛ̀lɛ lonoɔ ma dípɔ, ǹyɛɛi, “Sâai ŋi ƃe Ŋ̀âla-wooi ŋi ŋa-see a nâa kɛ́ la káwôlii.”

²²Díkelee dí ǹáa maa tɛ̂. Dípɛlɛ e pù e pìlaŋ mɛlɛ-see woo-ŋai dîa kùla ǹái. Nya ƃe dí mò, dîyɛɛi, “Zosɛ ǹóŋ fei ŋi?”

²³Gɛɛ ti e mò, ǹyɛɛi, “Tɔ̃yâ ma, ka pâi zaŋ ŋi sɔɔ̂i mî, ‘Sále-kɛ-nuu, ye íkpîŋ ƃálo. M̀ɛni-ŋai kélee kwa mɛni a gɛɛ í gɛ̀ Kapɔ̂niai ye gɛ́ ƃɛ íkpɔɔi-lɔii su.’ ”

²⁴Kɛ́lɛ, e mò, ǹyɛɛi, “Tɔ̃yâ ma, ŋá m̀ó kâa, Ɣâla ŋɔlóno-kɛ-nuu da kélee fé naa ƃâa e kɛ́ mà gbɔɔ̂i-lɔii su.

²⁵Ŋá m̀ó kâa a tɔ̃yâ, pɔɔ-nɛni támaa dí kɛ̀ Eezuɛ-lɔii su Ilaza ŋɔtãi su, tãi ŋele-kɔlɔŋ lá e tɛ̀ la a kóraŋ saaƃa ɣáloŋ lɔ́ɔlu mɛi dai, puru kɛ́tɛ e pà ǹɔii gwaa kélee,

²⁶kɛ́lɛ, dífe Ilaza tɛɛ ni díta tɔnɔ pɔ naa, fɛ̂ɛ pɔɔ-nɛni tɔnɔ nyii kɛ̀ Zɛlefa Sidɔŋ-lɔii sui.

²⁷Gbôdo-ƃela támaa dí kɛ̀ Eezuɛ-lɔii su Ɣâla ŋɔlóno-kɛ-nuui Ilasa ŋɔtãi ma. Kɛ́lɛ, díta tɔnɔ fé ƃalo ni fɛ̂ɛ Siria-naloŋ Neemaŋ.”

²⁸Tãi dí m̀ɛnii ŋi mɛ̀ni lai, diai kɛ̀ Ŋ̀âla-fɛli-kerei mui dílaa e fɛ̀ɛ a lii-ŋwana.

²⁹Dí dímu sìɣe dí gbɛ daai su, dí li la ǹyéei tôŋ su botoi mɛi, ƃɛi dítaai e kɛ̀ a dɔɔ naai, a gɛɛ dí bili e pîlaŋ a dôŋ.

³⁰Kɛ́lɛ, e tɛ̀ɛ dísama e li.

³¹Gɛɛ ti, e lì Kapɔ̂nia Galalii-lɔii su, e Ɣâla-woo lɛ dîa Vii-tɔɔ-ɣelei ma.

³²Nya ƃe dípɛlɛ e pù a ŋɔsɛŋ-lɛɛi, kpɛ́ni fêi, ŋ̀óoi e kɛ̀ a wala-wala-laa.

³³Nalôŋ tɔnɔ ƃe kɛ̀ Ŋ̀âla-fɛli-kerei mu, nyînaŋ nyɔ́mɔɔ kɛ́ ƃo bôlu. È làɣi a ŋ̀óo su kɛ́tɛ,

³⁴ǹyɛɛi, “Aá, Nâzarɛ Zisɛi, le-mɛni ƃe íyeêi í gɛ a kûa? Ya pá a gɛɛ í kúsu kara? Ŋa íkɔlɔŋ. Yá ƃa Ɣâla Ŋɔnúu maa waai.”

³⁵Kɛ́lɛ, Zîsɛ e gbèra, ǹyɛɛi, “Ímɛi sáa, í siɣe bôlu!” Nya ƃe, nyînaŋ nyɔ́mɔɔi e nalôŋ tôo ǹɔii ma ǹûai sama, e siɣe bôlu, ve ŋ̀wana ni.

³⁶Nya ƃe díkelee dípɛlɛ e pù, díkɛ lono díkîe-ni pɔ, dîyɛɛi, “Lé wôo ƃe ŋi? Kpɛ́ni fêi, a lôno nyînaŋ nyɔ́mɔɔ-ŋai pɔ a wóo kpanaŋ da wala-wala-laa, dí kula ǹûai pôlu.”

³⁷Nya ƃe maa-tuŋ e tàa ǹɔii gwaa kélee ma naa kɔlɛ ma.

³⁸Nya ƃe e mu sìɣe e kula Ŋ̀âla-fɛli-kerei mu, e lɔ Samaŋ ŋɔpɛ́rɛi mu. Samaŋ ǹyuâra kɔlɔ e kɛ̀ a vãa ma a ŋánaa. Nya ƃe dí m̀arê kɛ̀ a gɛɛ é kpɔŋ ma.

³⁹Nya ƃe e tɔ̀ɔ m̀ɛi e lono gɔlɔ-fãa-maai ma a gbanaŋɔɔ. Gɔlɔ-fãa-maai ǹyaŋ e tee ma. A naa maa felaa e mu sìɣe, e dímii-sɛŋ kpɛtɛ.

⁴⁰Volo-kaoi kɛ́ɛ toôi, ǹúui kélee kɔlɔ-fela-nuu e kɛ̀ ǹyêei, dí pà a dia bɔ. Nya ƃe e ǹyée pɛlɛ díkelee dîa tɛi-tɛi e díƃalo.

⁴¹Ǹyînaŋ nyɔ́mɔɔ-ŋai máŋ dí kùla dámaa-ɣele pôlu. Dí kɛ̀ wɔ́lɔ̂i, dîyɛɛi, “Yá ƃa Ɣâla Ǹóŋ!” Kɛ́lɛ, e díkpèra, ve faa ni a gɛɛ dí lono. Kpɛ́ni fêi, dí gɔlɔŋ a gɛɛ ǹyaa ƃe kɛ̀ a Kôrai.

⁴²Ɣele kɛ́ɛ a ƃɔ́i e kùla naa e li dɔnɔ kwaa ma. Nya ƃe gbɔŋ-su-ƃelai dí kɛ̀ gɔ́rii, dí pa bɔ, díkɛ kɔ a gɛɛ dí gbera va lâa dílɛɛ la naa, e li.

⁴³Nya ƃe e mò dîa, ǹyɛɛi, “Fɛ̂ɛ ŋa Ɣâla ŋɔkâloŋ-laai maa-tuŋ lɛ́lɛɛi ƃo daai gbeli-ŋai su máŋ, kpɛ́ni fêi, maa mɛni ƃe dí ńdɛ̀ɛ la.”

⁴⁴Nya ƃe e kɛ̀ Ɣâla-woo ƃôi Ŋ̀âla-fɛli-kêre-ŋai mu Zuda-lɔii su.