Read Kpelle Lûu 5 Bible Online

Lûu 5 - Kpelle bible

Lûu 5

¹Nya ƃe e kɛ̀ ti, tãi gbɔŋ e kɛ̀ a dínaŋɔɔ mà a gɛɛ dí Ɣâla ŋɔwóoi mɛnii, e kɛ̀ tɔɔ ni Gɛnɛ̂sarɛ-poa kɛ́tɛi kɔlɛ.

²E yá ŋá-keleŋ feerɛ kâa see ni boai ŋá zîŋ ma, kɛ́lɛ, nyɛ̃ɛ-kpɛ́-ƃelai da kula dísu, díkɛ dídeɣaŋ-ŋai waa.

³Nya ƃe e pìli yá ŋá-keleŋ dɔnɔ su, nyii kɛ̀ a Samaŋ ŋɔi, e gbera fé a gɛɛ e zu kula zîŋ ma a guro. Nya ƃe e sèe géleŋ su, e Ɣâla-woo lɛ ǹûai dîa.

⁴Gɛɛ nâa a kpɛɛ lonoɔ mai, e mò Samaŋ ma, ǹyɛɛi, “Íkeleŋ tuâŋ ƃɛi mai ǹyái siŋɔɔ̂i naai, í ídeɣâŋ lɔ naa a gɛɛ í nyɛ̃ɛ-kpulu soŋ.”

⁵Samaŋ e zu tòo, ǹyɛɛi, “Kaamɔ̂ɔ, kwâa tíi kɛ́ sâa a gbanaŋɔɔ gbínii yée mu, kúfe sɛŋ da soŋ ni! Kɛ́lɛ, berei ya m̀ó lai, ŋa pâi deɣaŋ-ŋai toôi.”

⁶Díkɛɛ da gɛ́ ti, dí nyɛ̃ɛ-kpulu kɛ́tɛ sòŋ, dídeɣaŋ-ɣɛli kɛ́ pɛlɛ téɛɛ ma.

⁷Nya ƃe dí díƃarâa tòli a díyee, diai kɛ̀ ǹyá ŋá-keleŋ nyíti sui, a gɛɛ dí pa kpɔŋ dîa. Nya ƃe dí pà dí kéleŋ feerɛ lá fɛɛ kpɔ́, díkɛ pɛlɛ lɔ́ɔ ma ǹyái mu.

⁸Samaŋ Pitɛ kɛ́ɛ a gáai, e pɛ̀lɛ Zîsɛ kɔ́ɔ mu, ǹyɛɛ mai, “Ye ísu kula mâ, Kúnuu-namui, kpɛ́ni fêi, ŋ́gaa a sɔnyɔ̂ŋ-nuu.”

⁹Kpɛ́ni fêi, da m̀arâai kélee dípɛlɛ è pù é pîlaŋ nyɛ̃ɛ-kpului ma dí zòŋ,

¹⁰bere nɔ ƃe e kɛ̀ la a Zĩi da Zɔ̂ŋ, Zɛƃɛdi ǹônii, nyii kɛ̀ a Samaŋ m̀arâai. Kɛ́lɛ, Zîsɛ e mò Samaŋ ma, ǹyɛɛi, “Ífe yào, é kúla tãi ŋi ma, ya pâi kɛ̂i núu sonîi.”

¹¹Díkɛɛ da pá a díkeleŋ-ŋai zîŋ mai, dí tèe dísãâi kélee dîa dí pîlaŋ bôlu.

¹²Nya ƃe e kɛ̀ ti, tãi e kɛ̀ la taa tɔnɔ su, nalôŋ tɔnɔ e pà bɔ, gbôdo-kɔlɔ-fela e kɛ̀ ma gwaa kélee. Gɛɛ a Zîsɛ káai, e tòo gɔ́ɔ mu, e gbera fe, ǹyɛɛ mai, “Kúnuu-namui, à kɛ̀ yà ŋ̀wɛli, ya pɔ̂ri ḿalôŋ.”

¹³Nya ƃe Zîsɛ è ǹyée sãa é bɛlɛ mà, ǹyɛɛi, “Ŋa ŋ̀wɛ̂lii, ƃalo.” A naa maa felaa gbôdo-kɔlɔ-felai e kpɛ̀ɛ ma.

¹⁴Gɛɛ ti, e nia-woo ƃò a gɛɛ ve mo núu da ma, kɛ́lɛ, ǹyɛɛ ma, “Lí í íkpîŋ lɛ́ zâla láa soŋ-nuui ma í sâla kula íƃalo-mɛni ma yɛ̂ɛ berei Mose e mò lai, e kɛ̀ a sêre ǹûai díɛ.”

¹⁵Kɛ́lɛ, m̀aa-tuŋ e taa kpɔ́ a zu kɛ́tɛ gwaai kélee ma. Nya ƃe kpɔŋ kɛ́tɛ e pà gîe-ma a gɛɛ dí ŋ̀óo mɛni, e díƃalo díkɔlɔ-fela-ŋai su.

¹⁶Nya ƃe è kùla naa é lí vɛ̃ɛ-kpalaŋ su a gɛɛ é Ɣâla fɛli.

¹⁷Nya ƃe e kɛ̀ ti, ŋele-ŋai ti dɔnɔ e kɛ̀ Ɣâla-woo lɛ̂i la, Faresii-ŋai da dɔ̂ŋ-lɛ-ƃelai dí kɛ̀ see ni gɔlɛ, nyii-ŋai kùla daa-ŋai kélee su Galalii-lɔii ma, bɛlɛɛ Zuda-lɔii ma, da Zerusâlɛŋ; Kúnuu-namui ŋɔwala-walai e kɛ̀ m̀ɛi a gɛɛ e díƃalo.

¹⁸Ka gáa, sinaa da-ni-ŋa dí pà a mɛ̃lɛ-mɛ̃lɛŋ-nuu tɔnɔ nyii kɛ̀ laa ni gara ŋái. Nya ƃe dí kɛ̀ kɔ̂i a gɛɛ dí pa la dí lɔ la dí ǹáa Zîsɛ ŋɛi tuɛ,

¹⁹kɛ́lɛ, dífe pere kaa ni a gɛɛ dí lɔ la gbɔŋ-too-pere ma. Dí tɛ̀ bɛ́rɛi kɔŋ ma dí bâne-kalaŋ da kula naa dí yeŋ a ŋɔgarai gbɔŋ sama Zîsɛ ŋɛi tuɛ.

²⁰Gɛɛ a dílaa-lai kaai, e mò, ǹyɛɛi, “Nalôŋ, ísɔnyɔ̂ŋ su-mɛni a lɛɛ.”

²¹Gɛɛ ti, gɔlɔ-pɔ̃yɛ-ƃelai da Faresii-ŋai dí kɛ̀ díkili ŋá siâi, dîyɛɛi, “Gbɛ̂ɛ ƃe ŋi a tɛ-ŋɛi-woo lônoi? Gbɛ̂ɛ ƃa pɔ̂ri sɔnyɔ̂ŋ su-mɛni lɛɛ̂i fɛ̂ɛ Ɣâla ǹyaa tɔnɔ?”

²²Kɛ́lɛ, Zîsɛ kɛ́ɛ a díkili-ŋa-siai kɔlɔŋ, e díwoo su tòo, ǹyɛɛi, “Le ƃe ka kákili ŋá siâi la kálii sui?

²³Nênɛ ƃe naa fii-kpɛɛi a gɛɛ núu e mò, ‘Ísɔnyɔ̂ŋ su-mɛni a lɛɛ,’ kpaa núu e m̀o, ‘Ímu siɣe, í tɔɔ í sia’?

²⁴Kɛ́lɛ, a gɛɛ ka gɔlɔŋ wala-wala-laa káa núu-kpune Ǹóŋ yêei ŋ̀éniɛi su e sɔnyɔ̂ŋ su-mɛni lɛɛ.” È mò mɛ̃lɛ-mɛ̃lɛŋ-nuui ma, ǹyɛɛi, “Ŋá m̀ó yâ, ímu siɣe í ígarai siɣe í li ípɛrɛi lá.”

²⁵A naa maa felaa e m̀u sìɣe ǹûai ŋɛi, e zɛŋ siɣe e kɛ̀ laa ni mai, e li ŋɔpɛ́rɛi lá, gɛ Ɣâla láa maa tɛ.

²⁶Nya ƃe díkelee dípɛlɛ e pù, dí Ɣâla ŋɔfólo-laai maa tɛ, dílaa é fɛ́ɛ a yao, dîyɛɛi, “Kwaa mɛni maa pɔlɔ-pɔlɔ-ŋai káa sâa.”

²⁷Nyiŋi nàa pôlu ma e kùla naa, e ŋuŋ-fela-fei kula-naloŋ tɔnɔ kàa, ǹáa ƃe kɛ̀ a Liva, gɛ ƃo see ni ŋuŋ-fela-fei kula-pɛrɛi lá. Nya ƃe e mò ma, ǹyɛɛi, “Pîlaŋ ḿbôlu.”

²⁸Nya ƃe e m̀u sìɣe, e tee sɛŋ kélee ma, e pîlaŋ bôlu.

²⁹Nya ƃe Liva e kúu kɛ́tɛ kɛ̀ mì ŋɔpɛ́rɛi mu, ŋuŋ-fela-fei kula-kpɔŋ bɛlɛɛ ǹûa kpeli-ŋai dîa da dîa-ni dí kɛ̀ see ni teƃele ma.

³⁰Gɛɛ ti, Faresii-ŋai da díkɔlɔ-pɔ̃yɛ-ƃelai dí kɛ̀ mɛni saâi e pîlaŋ ŋɔpôlu-ƃelai dîa, dîyɛɛi, “Le ƃe kɛ̀ ka kálaa miî, kakɛ kákpele gîe-ma ka ŋuŋ-fela-fei kula-ƃelai da zɔnyɔ̂ŋ-ƃelai?”

³¹Nya ƃe Zîsɛ e díwoo su tòo, ǹyɛɛi, “Diai díkɔlɔ̂i ponoɔ̂i dífa sále-kɛ-nuu wɛ́li kɛ̀, fɛ̂ɛ diai díkaa kɔ́lɛ̂i.

³²Fe pa ni a gɛɛ ŋa tɔ̃yâ-ƃela toli, fɛ̂ɛ sɔnyɔ̂ŋ-ƃela lii-pene mɛni ma.”

³³Nya ƃe dí mò ma, dîyɛɛi, “Zɔ̂ŋ ŋɔpôlu-ƃelai da pîli suŋ su, díkɛ Ɣâla fɛli fie-fie. Bere nɔ ƃe Faresii-ŋai díwɔ̂-polu-ƃelai da gɛ̀ la. Kɛ́lɛ, íwɔ̂-ŋai da dílaa mii, díkɛ díkpele.”

³⁴Zîsɛ e mò dîa, ǹyɛɛi, “Ka pɔ̂ri nɛnî-kula-kuui su-ƃelai kɛ̂i dí píli suŋ su tãi nɛnî-kula-surɔŋ káa la díkɔlɛi?

³⁵Ŋele-kuu-ŋai da pâi pâi, tãi da pâi nɛnî-kula-surɔŋ kulâi la díyêei. Maa-tãi ti su da pâi pílii suŋ su.”

³⁶È sáŋ sɔ̀ɔ máŋ dîɛ, ǹyɛɛi, “Núu da fa seɣe nina kpua fala ma, é seɣe pɔlɔ pɛ́ŋ pɛlɛ la. À gɛ̀ tí, a pâi ninai fálâi, gɛ̀ ní, gbuâi kùla ninai mai da bɔlɔi, dífe pâi díkîe ŋɛi sonii.

³⁷Núu da fa ŋwã̂ai nina pù sua-kɔlɔ-gonoŋ pɔlɔ-ŋa su. À gɛ̀ tí, ŋwã̂ai ninai a pâi zua-kɔlɔ-gonoŋ pɔlɔ-ŋai ƃɔ́i, é pú, gɛ̀ ní zua-kɔlɔ-gonoŋ-ŋai da pâi karâi.

³⁸Kɛ́lɛ, fɛ̂ɛ dí ŋwã̂ai nina pú sua-kɔlɔ-gonoŋ nina-ŋa su.

³⁹Núu da fa pɔ̂ri kpɛɛ̂i ŋwã̂ai pɔlɔ kpeleɛ ma, gɛ ŋɔnɔ ŋwã̂ai nina wɛ́li kɛ̀, kpɛ́ni fêi, a mò, ‘Ŋwãai pɔlɔi lɛ́lɛɛ̂i.’ ”